هاوانی لکه‌لندیرن بو جنون
نه سنینچین قولتوغوندا کیتابی
قورتولاسان بلکه،
نه منیمچین موشتولوغو وار
تورپاغین گونه‌باخانلی بلکه‌سیندن.
پنجره‌لر بیر- بیر
گئیینیر ساری یارپاغا،
شوبهه‌نین دوماندا بوغدوغو
اوشاق گولوشونه.
قوشون- قوشون قورشون
هر گون بیرآز
حیاتی رؤونقدن سالیر.
سن اینانیرسان بعضا
الیفباسی جین شیاطین دیلینه اویغون
یالانا،
تانری کؤینه‌یینده
وطن آل وئرینه باخان
وطنسیزلییه.
ایندی «پهپاد» قانادیندا پایلاشیرلار
آزادلیغی، آجلیغی،
هامینین اوره‌یی یانیر سنه
مزار اوستونده قرآن اوخویاندان
اورتا شرقین لوطوسوناجان.
گؤی اوزونه بئل باغلاما
دان یئری قیزاران دئییل
گوجونه سیغین
حیاتین هئیوالی نارلی بوداغینا.
۱۴۰۴/۰۳/۳۱
