آی، سودان فایدالانیر
گؤزه‌للییین ایسه
کوچه‌لرده اؤزون ایتیرن
گنج یاشلی داورانیشدان؛
اولدوزون ممه‌سیندن سود امیر
سنده رؤونق یارادان
سئحیرلی نئجه‌لیک‌لر.
هئچ بیلیرسن کی
تانرییا وئریلن سئوگی سورغوسو
هله آکادمییالاردا
الدن اله دولانیر؟
ساده‌جه گؤزو‌موز دانیشیر اوره‌ییمیزی
بیر استکان چای
ال بویدا چؤره‌ک
عالمه سیغمایان آلما خاصیتی.
پنجره‌نین بیر گؤزونده
حیات دوام ائدیر
طبیعتدن الهام آلاراق،
بیر گؤزونده
مارت آیی
صاباحین خریطه‌سی تزه‌له‌نیر.
باغلاسان پنجره‌نی
چای‌لارین سویو قورویار
گؤى قورشاغی ترک ائده‌ر
یاغیشلی گونلریمیزی؛
کایناتین نظامینا توخونما.
۱۴۰۴/۰۱/۰۶
