بیر عائله‌نین ائولادیییک
یارادان مرهمه؛
دوغما بیر شعرین دال‌لاری.
«لیلی» ده مجنوندور
«لیلی»نین «مجنون»و دا.
یاغیش‌سیز بولودون کور اوجاغیندان
نه باشقالیق دوغولار
نه اولدوز.
ایسته‌سن الفبانی
سؤزجوک‌لرین یونولموش کاراکتریندن
یؤنلده‌سن سئوگی لیریکاسینا
«ناظم»ین قارونلوغوندان
«نرودا»نین کپنک‌لیییندن
دانیش جهانا.
کیم دئییر انقلاب
یالنیز پولاد لوله‌دن دوغولاجاق؟
بیرجه فرصت گره‌ک
فضولی‌نین یاساق دوامینا:
چاغداش آلترناتیولرین
یئنی‌لیک سیلاحینا.
دونیانین ان بؤیوک گناهی
شعیرسیزلییی
گونشین ایستی قوجاغیندا
اوشویوب آلیزلاماسی‌دیر.
گؤیرچینی کندیر دیلی‌له دانیشدیرماق
دفتریمین سول جیبیندن
اونیوئرسیته خاطیره‌لرین اوغورلاماق
بویلو گونلریمیزی
نادان الی‌له کور ائله‌مک
هارا یئتیرر بیزی؟
۱۴۰۳/۱۲/۲۰
