خلقتین ایلکینه دوغموش ایکی جان
بیری دوغرو بیرین آدلاندی یالان
بزهمیش هر یئری خلّاقین الی
بو زامان سئیر گلستان ائدهلی
دوغرونو گؤردو یالان قالدیریب ال،
سئیر ائدک نازلی باهاری دئدی گل!
یئرده قالمیر داها چیرکینلیک ایزی،
گؤیو بوغموش نه گؤزل نور دنیزی.
دوغرودا هر طرفه سالدی نظر،
گؤردو گوللر آچیلیبدیر تزه- تَر.
یالانین نطقینا آلداندی یازیق،
اؤز اینامیندا اونو ساندی یازیق.
ال وئریب بیر- بیرینه دوست دئدیلر،
دوستلوغو جاندان عزیز سؤیلهدیلر.
وئردیلر ال- اله سئیران ائدرک
دئدیلر بیز بئله دونیانی گزک،
یئنی دوستلار یعنی دوغریلا یالان
دونیانین سئیرینه چیخدیقلاری آن
یوللاری دوشدو دورو بیر قویویا
ایکی یولداش سویونوب گیردی سویا
یالان آز سونرا اکیلدی قویودان
دوغرونون پالتارینی چالدی سودان
نه گوجو واردی توپوردو دابانا
دوغورو آردینجا حزین باخدی اونا
آرادان چیخدی دابان قیرما یالان
دوغرودا قالدی قویوینان، سویونان.
چالدیغی پالتاری گئیدی بویونا
دونیا آلداندی بو ماهر اویونا
دوغرو چیلپاق بدنی چیخدی چؤله
تاکی اؤز پالتارینی سالسین اله
دونیا گؤرجک اونا آد قویدو دلی
بلی پیسلر هامی چیلپاق گؤزلی
لوت گؤروب دوغرونو قورخدو یئر اوزو
اوتانان دوغرودا گیزلندی اؤزو
لوت گؤروب دوغرونو دونیا چکینیب
دوغرو گئییمینده یالان شاهه مینیب.
گیزلهدیبدیر او گئیمله ذاتینی
هلهده چاپمادا دؤرد نال آتینی
دوغرو اولسان قویودا قالمالیسان
دوغرو گئیمینده یالان اولمالیسان
سخاوت عزتی (عندلیب)
چئویرن: سخاوت عزتی (عندلیب)
ترجمه: سخاوت عزتی (عندلیب)
سسلندیرن: سخاوت عزتی (عندلیب)
- شعر
- اوخوماق زامانی: < 1 دقیقه
- https://ishiq.net/?p=36381
چاپ