یامان اؤتدو ایللریمین قیر آتی،
خاطیره‌لر توزا باتدی داریخدیم.
بیر آنا وار او توز- دومان ایچینده
ایللر اونو هئی آغلاتدی داریخدیم.
دوشنی یوخ یورد- یوواسی بوش قالیب،
گؤز یاشیندان قایاسیندا یاش قالیب،
اوجاغیندان بیر جوت سؤنوک داش قالیب،
داش‌لار منده اوجاق چاتدی داریخدیم.
آدامسیزدی بو اوتاق‌لار، او دام‌لار،
کؤکدن دوشوب او باغچا‌لار، بادام‌لار،
گؤزه ده‌یمیر من گؤردویوم آدام‌لار،
دومان اولدو گؤزدن ایتدی داریخدیم.
یاد صحرادا بیر پیادا غریبم،
کیم تاپیلار چاتسین دادا، غریبم؛
تکلنمیشم بو دونیادا، غریبم؛
بو دا بئله بیر حیاتدی، داریخدیم.
چئینه‌ییرم اؤتن‌لرین دادینی،
گئیینیرم ایستیسینی، اودونو،
تامسینیرام قایماغینی، سودونو،
بیر ناغیلدی، احوالات‌دی، داریخدیم.
