او گونلرکی اوفق‌دن،
گونش باشین اییردی،
قارانلیق چؤکه- چؤکده
آنام ناغیل دئییردی.

چوخ منزیللر آتدادیم
کئچدیم اوزون یوللاری،
هله‌ده یولداشیم‌دی
آنامین ناغیللاری.

دئییر:
بیر قیز واریمیش
گؤزللرین گؤزلی،
بو دونیانین بزه‌یی
یارانیشین اؤزَلی.

عاغیلدان سرمایالی
ادب، ارکاندان درین،
آبری، حیا سؤزونده
باشی‌ایدی گؤزللرین.

چوخ سایلی ائلچی‌لردن
سئودی لاپ یوخسولونو،
وارلی‌لاری بوراخدی
توتدو یوخسول الینی.

گون گلدی توی توتولدو
تزه بَی‌له گلینه،
عادتجه خینا یاغدی
آیاغینا، الینه.

خبری ائشیتجه‌یین
خایین وارلی ائولادی،
باشیندا قوچولارلا
گلینی اوغورلادی.

گلین چوخ تلاش ائتدی
آغلاییب یاش اله‌دی،
یالواریب آندا وئردی
منی بوراخین دئدی.

گؤردو اورکلری داش
قولاقلاری ساغیردی،
اوز چئویریب گؤیلره
یارادانی چاغیردی:

«تانری منی قوش ائله
قانادی گوموش ائله
ائلده روسوای ائله‌مه
داغدا گونوم خوش ائله
داشلارا یولداش ائله»

اوجا تانری ائشیتدی
گلینین فریادینی-
اونو قوشا چئویریب
کهلیک قویدو آدینی.

گلینلیک بزکلری
اونلا ابدی قالدی،
آدی ائلده، اوبادا
خینالی کهلیک اولدو.