منی سؤیدوکجه سئوینیرم
لاله‌لیکده طغیان ائدن
قابان خاصیتی
چوخدانکی بیر ایشدیر
ائله کابوس بونا دئیرلر.
یوخونا قورخولو بیر آدام گیریر
باشلاییر شیشمه‌یه
یئکه‌لیر اژدها کیمی
دئو کیمی
قویمور یاتاسان
نیسان یاغیشی
جانینا دوشن آتشی
آتشه توتسا دا.
آدامین اوره‌یی یانیر «مک کارتی»یه
«ماریا سالازار»ا.
تورپاغین یادداشیندان سیلینمییه‌جک
بوغدا تارلاسین
حرام ال‌لرین قوراقلیغیندان
عنوانسیز اوشاق‌لارین
گولوشونه داشییان‌لار.
یالان دانیشیرسان
یوخسا نه لازیم
تاریخه قوشولموش منی
بونجا سؤیمک
بونجا پیسله‌مک؟
بو کابوسدان آیریلان ایکی یولون
بیری جنون‌دور
بیری ده جنون.
۱۴۰۳/۱۰/۲۹
