یاتیب ایچیمده بیری، لاپ خوماره بنزَری وار،
مئیی یاریم قوتاران، مئیگساره بنزَری وار.
یامانجا چؤزلَمیشم فیکریمین یوماقچاسینی!
دوروم دا دور- دولاشیق روزگاره بنزَری وار.
یاشام تیکینتیسینه باخ کی، طاق با طاق سؤکولور!
یاشام کی، صاحیبی یوخ بیر دیاره بنزَری وار.
باخاندا آغلاییرام گنج‌لیک شکیل‌لریمه
سویوقدا شاختایا دوشموش بهاره بنزری وار!
جاوانلیق ائیله سووشدو گؤرنمه‌دیم دانیشاق،
وفاسی، عشقی یالانچیق نیگاره بنزَری وار.
منیم کیمی دادان اولماز زمانه‌نین زَهَرین،
زمانه سؤیله‌مه کی، شاهماره بنزَری وار.
بو شهر گلدی گؤرن هانسی گؤیچه‌یین گؤزونه؟
نجور دئییم کی، بونون شهر یاره بنزَری وار؟
چوخ عشق‌لر بوغولوب بوردا سئوگی‌لر کسیلیب،
اودور کی، هر قاپی‌نین بیر مزاره بنزَری وار!
چتین گؤره بو شهر عدل ایله، «سخاوت» اوزون؟
بو یئرده هر قلمین بیر میشاره بنزَری وار!