اورتاق بیر علاقه یعنی یوخ ایمیش؟!
لال اولور کلمه‌لر ایکیمیز آرا.
گیله‌مده یاشلانیر گیلئیلی سؤزلر،
دیلیمه گلدیک‌ده قالیر آوارا.
بئینیمده قایناشیر دوشونجه‌لریم،
قلمه، کیتابا پناهلانیرام.
ائوینه قایغیسیز، اَره قایغیسیز
بو آغیر سوچلارا گوناهلانیرام.
گؤتوروب قلمی قارا گؤیومه
بیر قوجاق یاغیشلی بولود چکیرم.
یئنه ده قلبیمین شورانلیغینی
دیرناقلا شوملاییب اومود اَکیرم.
نه تئز سونا چاتدی سئوگی سؤزلری،
نه تئز آلچاقلاشدی آرزو گؤیوموز؟!
سؤز وئردیک سونادک آیریلماریق بیز
آخمادی بیر آرخا سانکی سویوموز!
ازلدن سهویمیش قدملریمیز،
بو یوک سون منزله چاتمایاجاقمیش.
اوچوب اودامیزدان سعادت قوشو،
چیینیمیزده میشیل یاتمایاجاقمیش!
آمما کی بو تیترک یووانین ایچره
پناهسیز، گوناهسیز سئرچه‌لر یاتیب.
اونلار نئیله‌سینلر یانلیش سئچمیشیک؟!
اونلار نئیله‌سینلر گَمی‌میز باتیب؟!
حوّا گوناهی تک بو آغیر یوکو
اؤلوم چاغینادک دولاندیراجام.
یاشام آجیغینا، فلک رغمینه
دئیه‌جم: «خوشبختم!»، ایناندیراجام
ائله یالان دئیه‌جم اؤزوم اینانام،
چئوره‌دن آلقیشلار سئلله‌نه بیزه.
ائله یالان دئیه‌جم آجی تیکانلیق
اوتانجدان قیزاریب گول‌لَنه بیزه!
اوزاق صاباحلاردا گُور تورپاغیمدا
شورانلیق قلبیمدن تیکان بیته‌جک.
نه یاخشی، سئوگیسیز، اینامسیز آدیم
قالین تیکانلیقدا گؤزدن ایته‌جک!!
