۱- اومید
اومیدلر
بیر- بیرینه باغلانیر؛
اوره‌کده‌کی سؤزلر
شهرلره یاییلیر،
قاپی – قاپی چاغلانیر.
بؤیوک، کیچیک
کئچمیش کؤهنه یارالاری اونوتمادان
آغریلارینی خیاوانلاردا پایلاشیرلار
و چکدیکلرینی، گؤردوکلرینی
یادداشتلاریندا ساخلاییرلار؛
بئله‌لیکله
نه اونودورلار،
نه‌ده باغیشلاییرلار.
۲- بولودلار
زامان- زامان
گؤی اوزونده بولودلارا گؤز قویورام:
بیرگون قاچیر
بیرگون دورور
بیرگون یاغیر
بیر گون آچیر؛
سانکی منیم طالعیمی
بیرم- بیرم گؤیده یازیر!،
قاچیرام دا
دورورام دا
گؤزلریمدن یاغیرام دا
اوره‌ییمی آچیرام دا.
سن یادیما دوشن گونلر
بولودلارین ان گؤزه‌لین
ساچلارینا اوخشادیرام،
خاطیریمده یاشادیرام.
