بیز قارانلیق قوتولاردا بؤیوموش
سویون کؤلگه سینده
بیر مئشه‌لیک قادینلاریق!
بیز باغیرتیلاریمیزی سوسوب
یاغیشین دامجیلارینا قاتاراق
یئللرین قوجاغینا آتان
قادینلاریق.
بیز گؤزوموزون ایشیغی‌ایله
اوره‌ییمیزده سئوگییه یووا قوران
قادینلاریق.
بیز مؤجوزه‌لر دیاری‌نین قارانلیغیندا
سئوگینی سو ایله تورپاق آراسیندا یارادان
قادینلاریق.
بیز یارادیلیشین ایلک توخومون بئجه‌رن
یئره اؤزونه حیات وئرن
قادینلاریق.
بیز بیر مئشه‌لیک وارلیق،
بیز فیرتینالار قوشو.
بیز سئوگی ایله واریق،
بیز حیاتین یارانیشی.
بیز قادینلاریق!
بیز واریق!
اسفند ۱۴۰۳
