(۱) بولاغ
گوزلرینین درینلیینده
بیر بولاغ وار
آشیب داشاندا
حسرت یارالارینی یویوب آپاریر
و دوغرو بیر زامان
یئرینی آلیر؛
زامانین کئچیدینده
آرزولار بارلانیر،
سانکی
آیاقلاری یئردن اوزوب
پاییز یاپراغی کیمی
هاوادا اوچوردور.
.
(۲) قارانلیغین سونو
یوللار اوزوموزه باغلانسادا؛
قارانلیق جانیمیزا چؤکوب
روحوموزو چالسادا؛
تولکولر چاکا‌ل‌لارین آرخاسیندا
قویروقلارینی اوینادسالاردا؛
یئنه‌ده
داغین دالیندان گونش چیخاجاق،
قارانلیغی اؤز حرارتی‌له یاخاجاق
و چکیرگه‌لر
یووالاریندان چیخیب،
سازلار‌ین چالاجاق.
