خسرو باقرپور
سئو!
سئوگییه دول!
بو دونیا
ایلک آددیمی آتماقدان قورخان
یالقیز اینسانلاردان دولودور!
چکینیرلر ایلک سؤزدن:
«سنی سئویرم!» سؤزوندن!
یاشاماق ایسته‌ییرسن‌سه
باجاردیغین قده‌ر
هئچ واخت اسیرگمه
«سنی سئویرم!» سؤزونو
اونا لاییقلی کیمسه‌دن!
«سنی سئویرم!»
-بو سئحیرلی صمیمی جومله –
سئوینج فواره‌سی‌دیر
آزادلیق شیفره‌سی‌دیر
آبادلیغا دوغرو
یولچولوق باشلانغیجی‌دیر.
«سنی سئویرم!»
ایپک قوردونون
داریسقال قوزاسیندان
کپه‌نک سماسینا
یوکسه‌لیش معجزه‌سی‌دیر.
«سنی سئویرم!»
سینمامیش ایکی پیمانه‌نین
جینگیلتی سسی‌دیر.
«سنی سئویرم!»
ایکی باده‌نین دوداقلاریندان
سئوینج ایچمکدیر،
سئویلن بیر یولدا
ایلک آددیم دئمکدیر!
۱۷ اسفند ۱۴۰۱
