آخ !
بیر ده باغیرسام
یالنیز بیر ده باغیرسام
زَهَر قاتاجاغام جسدیمه
قارغالار دولانماسین باشیمین اوستده
بیر ده باغیرسام
«یاغ اولمارام باشقاسی‌نین چیراغینا»
ایچیمین قیغیلجیمی
یاناجاقدیر زومرود قوشو تک
و کولوم
دیرچلده‌جک سون دؤیوشومو
آخ بیلیرم
بویلو بیر قادین‌دیر باغیرتین سنین
زامانین سامانلی خارمان دوغوملوسو
اوزون یولدور باخیشی‌نین کوچه‌لری
گونش باتار کؤلگه‌سینده اونون.
بنؤوشه اولارسان
باشینی کوسدوره‌رسن آزادلیغین قوینونا
و دینله‌یرسن شلاله‌لر زومزومه‌سینی.
قیزیل گول اَکرسن
تورپاغی‌نین کؤپورموش قارنیندا.
آخ !
بیر ده باغیرسام
باهارلا دولاجاغام
بیر ده باغیرسام
آذرده اییرمی‌بیر اولاجاغام.
تبریز – ۱۳۷۵/۹/۲۱
