من چؤره‌یین آچیق یولونو
دیلی پلتک‌لرین آیدین خطابه‌لرینی دوشونورم
نامحرمه یول وئرمه‌ین چیلغین آرزولاری
وطن یئکه‌لیکده دونیانی دوشونورم
بس من وارام.
چیچک‌لرین شهید ماهنیسی
گؤیلرین اوجقار یئرینده چراغ اولور
تاخیلیر قارانلیغین گؤزونه
شعریمه دئمیشم
شهید ماهنی‌لار دفتریمی ترک ائله‌سه‌لر
اؤلسون
بس من وارام.
یوخ دئمک آزادلیق دئمکدیر
دیلیمین یوخ دئین یئرین کسیرلر
مفتیل‌لر دؤزه بیلمیر
اؤلومه خور باخان دویغولاریما
بو چتین بایرامی
چالیشیرام باجارام
بس من وارام.
اونون کؤینه‌یینده قیزیل اولدوز یانیر
گون باتیر گؤزونده
ماوی‌لیک دؤزولمز اولوب
سو سوسمالی
انقلاب کیمی‌دیر وطن
دوغور دا، بوغور دا
من بونا دؤزه بیلمیرم
بس من وارام.
