(۱) یالان
فرق ائله‌میر سن گئدیرسن
یوخسا یوللار
اؤنملی سنین اوزاقلاشماغیندیر.
سنی سئویرم دئدییین یالاندان
سویون ساده باخیشی دیکسیندی
تلفن تئللری یوکون آغیرلیغین
یانیب توستولندی.
قوراما بولود فتح ائدیب گؤیلری
بوشونا گؤز تیکمیشم یوللارا
بو یاز یاز اولمایاجاق.
نه قدر سسله‌ییرم
سسیم سنه چاتمیر
فاصله‌لرین دیکتاتورلوغوندان.
اوزاقلاشدیقجا
سئوگی چوخ یالان دانیشیر.
(۲) سوچوم یوخ
سن یئکه‌‌لیکده یالنیزلیغی
هارا یئرلشدیریم؟
افلاطون اگر منی سئومیر
سئومه‌‌سین
سنی هر کیم گؤرسه شاعر اولار.
بیر آز واخت آییر، چیخ بازارا
قوی اوزرلیک ساتان‌‌لار بایرام ائله‌‌سین.
