چیلله گئجه‌‌سینه سئوگی شعری
سحر خیاوی
یئنه ده چیلله‌دیر، قارلی-قیروولو
اوتانجاق آی باخیر پنجره‌میزدن.
بیر اوووج دَن سپیم صاباح سئرچه‌لر
دویونجا یئسینلر داش هئره‌میزدن.
دئییرلر اوزوندور چیلله سئوگیلیم
آمما کی سئویشسک صوبحه‌دک نه وار؟
قور وئریر آلمالیق یاناقلاریمدا
سینه‌مده نار باغی، لَبده گیلانار.
دوداغین خیاوین اوزوملوکلری
سوسوزام مین گیله لَبیندن یئتر.
ائله کئفلی‌یم کی بیر تارلا شعیر
بو آخشام بوغدالیق الیمدن بیتَر.
آل منی قوینونا، یوخسا دَلی‌یم
اَلَگیم اَله‌نَر، غربیلیم چؤنَر.
ائله باخ «سحرین» قاچاق یئلی‌یَم
احوالیم بیر آن دا بو حالدان دؤنَر.
آل منی قوینونا پیچیلداگینان
یئنه قولاغیما سئوگی ناغیلی.
بیر ده قوی دیریلسین خانیم قاینانام
باشیمدان اَلَه‌سین گلین نوغولو.
نه اولار پاییزدیر بیرآز احوالیم
نه اولار یارپاغیم سارالیب بیرآز.
باشیمدا هله ده گلین‌لیک هاوام
اوره‌کده سئوگی وار، گولوشومده ناز.
بو آخشام غریب بیر حالدایام یئنه
پرده‌نی چک‌گینن آی دا باخماسین.
چیلپاقجا، دَلیجه سونولدوم سنه
دئه دان سؤکولمه‌سین، گونَش چیخماسین.
