غزل / سحر خیاوی
(اوتای-بوتای آذربایجان شهید آنالارینا سونولور)
قیشدا گلدین وطنه،جیسمیده قانچیل گیلانار
گلمه‌ییب‌دیر آنان اؤلسون هله بو یوردا باهار
نوقطا-نوقطا بدنیندن تیلیت آل قان سوزولور
ننه قوربان بیر بدنده بو قَدَر اولدوز اولار؟
یایلیغیملا یارانی باغلاییم هؤولار ببه‌ییم
الیمی چتر ائله‌ییم بلکه سنه دوشمه‌دی قار
چیخاریم گول آیاغیندان بو آغیر چکمه‌لری
گؤزلریمدن ایراق اولدو، آیاغین چالدی قابار
اینانانمیردیم اوغول، او دئییلن شوم خبری
اؤلومون اخبارینی تر-تلسیک گَتدی چاپار
یاندی مین آرزی-دیلک آخ… تویونو توتمامیشام
چاخناشار ایچده اوره‌ک،فیرتینالار منده قوپار
زخمه وور کؤکسومه مین دفتر آغیت ناله ائدیم
ائتدی واختسیز اؤلومون قلبیمی چون سینه‌ی تار
قارقالار گؤزلرینه اوخ کیمی باتدین مله‌ییم
خول-بوداقسیز سنه،قوی آغلاییم آی تازه چینار
آنا قوربان بیلیرم ایندیجه یول یورغونوسان
قوی اؤپوم گؤزلرینی،اوچسون عذارینده غوبار
بیلیسن آیریلیقا یوخدو دؤزوم دای آنادا
کسیلن قوللارینی بیر کره ده بوینوما سار
گئجه‌لرده یول آزیب بلکه گؤزومدن کئچه‌سن
قویموشام کیپریگیمین هر تئلینه بیرجه فَنار
نئینک،اولسون وطنه من سنی قوربان وئردیم
سن گونشلیکده سنی کیم دانا،آللاهی دانار
مین باهار گلسه ده اوغلوم،پاییزام من سنسیز
توت الیمدن منی ده، سنسیز اولان مندن آپار
یک پاسخ
چوخ گوزل تصویرلردن دولو!