قاراداغ
احد فرهمندی(اویاق)
عایله‌سینی قاراداغ زلزله‌سینده ایتیرمیش بیر كیچیك قیزین دیلیندن
بیر آندا بوتون دونیا ایچیمه شوملادی
هر نه‌ییم قورخولو قارانلیقلار ایچینده ایتدی
ساریلماز، ساغالماز، درین یارالار وورولدو اوره‌ییمه
شن دونیام، آشیلماز داغلارین آلتیندا قالدی
دالیندان قیریلمیش بیر یاپراق كیمی
قاسیرقالار دوستاغی اولدوم.
قانی دورماز یارام هر آن سیزلاییر.
دمپرم اوغورلایان، آنام واركن؛
اوره‌یینین سسینی هر آن دینلردیم
آغلاسایدی گولمزدیم
گولسَیدی آغلامازدیم
اوره‌ییمده بیله دمپرم اولسایدی
او یانیمدا كن قورخمازدیم
آنجاق ایندی؛
كندیمیزده سحر اولمور آرتیق
تیر- تیر تیتره‌ییب
قاچیرام كور قارانلیغا
قورخولاریم اویانیر آمانسیز
هیچقیراقلاریم دویونله‌نیر بوغازیمدا
یاریق- یاریق یاریلیرام
داغیلمیش یورد- یوواما باخدیقجا
اوره‌ییم بؤلونور
نیكبت باسمیش تورپاغیمدا
سویو قوروموش ایرماق كیمییم
بو فلاكت اومودلاریمی گمیریب
آجی امزدیریر منه
قانیما دولان دمپرم
هر ثانیه دامار- دامار ییخیر منی
اؤلومو اؤلدورسه‌ده قالان جانیم
گؤزلریمه اومود ایشیغی دولمور آرتیق
كیملر آچا بیلمیر بو كور یوماغی
یاشایان اؤلولر كیمییم.
…….
اوووی!!! عؤمور بویو یاسلانان یوردوم!
سنده اؤپوله‌سی اللر ایتیردیم؛
اوتانجیدان یاناغیندا آلما بیتن آداخلی قیزلار
كؤكسونده بیر خالقین نیسگیلین داشییان آهیلار
آنا قوینوندا سود امر كؤرپه‌لر
نه‌لر و نه‌لر….
آلاز- آلاز یانان گؤزلریمده
سونسوز آرزیلاریم قالدی
قاریش- قاریش سئودییم تورپاغیمدا
قارا داغیمین قوینوندا
قارا گونلرده‌یم…!!!