۱٫ گؤزلرین
گؤزلرینین چتینلییینه باخما
یورغون گونش
یولون سالیب اوردان
ایلک انسانین قویدوغو قانون
آنلاشیلماز اولوب.
گؤزلرین دونیا بویدا بیر ائو
قوناق دوشه بیلر هامی.
سن شرابی شعره قاتان بیر قادین
سنی هر دیلده باشا دوشمک اولار.
۲٫ یانیلیرسان
یاغیشلی کیشی
سببینی سورمادان
مرمینی قوجاقلاییب
چوخ دا گئجیکدیرمه‌دی عزراییلی.
محاربه‌دن گلنلره بنزه‌ییردین
سؤزونون مرمی دادی
اؤزوندن اول ایچری گیرمیشدی.
او گوندن چوخ ایللر کئچیر
او گون هرگون تزه‌لنمکده.
سن منیم یئمک یئمه‌ییمی گؤرور
کیتاب اوخوماغیمی گؤرور
یانیلیرسان.
۳٫ شاعر کیمی
اوتورموشوق ماسانین باشیندا
بیر شئی آلیب وئرمه‌دن
چای ایچیریک.
سؤزلریمیز یوز ایل بیر ـ بیریندن اوزاق
لهجه‌لریمیز فرقلی.
سن ائوین او تایلیسی
من بو تایلیسی
سون گؤروشوموز یادیمیزدا دئییل.
سنی شاعر کیمی سئومه‌یه
شاعر کیمی یانیلمیشام
سن گلن گوندن مسافرمیش‌سن.
