اوچ قارداش داغی
افراسیاب نوراللهی

بو بیر داغ!
بو بیر داغ،
آذربایجانین خودافرینینده،
دونیایین آذربایجانیندا،
و کائناتین یئرآدلی کوره سینده.
نه او قدر بؤیوک کی؛
“اورست”، “ساوالان” داغلارینا تای
نه او قدر کیچیک کی؛
باخیب،
باشینی بولارکن گولومسه‌یرک، دئیه‌سن؛
داغا باخ داغا، آی های!
و ده میفیک!
نه اؤیله میفیک کی؛ قاف، فیلان
نه ده اؤیله کی؛ یالاندان یالان
اؤیله میفیک کی؛ گئرچه یین اؤزو!
حله حله باش وئرمه‌ین،
و باش وئرینجه ده،
بیر میف قدر اولاناقسیز،
آمادا اولاسی بیر گئرچه‌یین!
یانی تورکلویوموزون میفی.
یانی تورکلویوموزون بابک‌لییی،
نسیمی‌لییی.
و ائله جه ده،
تورکلویوموزون اوچلویو!
او ارنلریمیزین دئدییی،
او تورکییه میزین”نازلی جان، بدیرحان ومن”-ی،
و قریبچی‌لری،
و …
و هامی دونیایادا تانیش،
یانی بیر دونیا قدرده گئنیش،
او هامی دئوریملر آناسی،
دئوریملر بئشییی اوچلویون!
او بیرلییمیزین رمزی،
مارشی،
او وطنیمیزین کئشییی اوچلویون!
یانی اوچ قارداشین میفی!
او بیر اولونجا،
دوشمانی یئنن،
و دوشمانی یئنینجه ده،
تانریلاردان داغا، داشا دؤندویونو دیله‌ین اوچ قارداشین!
عجبا،
بو نه تورلو بیر دیلک!
بیر گون،
بو بیرلیک‌لرینین پوزولماق قورخوسوندانمی گلیردی بو؟!

یوخسا بو بیر گئرچک ائله!
یانی،
دوشمانی یئندیکدن سونرا،
اوزون سوره یئنیلمز، جسور واوچ قالا بیلدییندن؛
یانی،
بیر بیرلیک تیمثالی اولا بیلدییندن،
خالق،
بو داغا باخیب،
اونلارا دئییل،
اونلارا باخیب،
بو داغا اوچ قارداش دئییر.
هر حالدا بیریسینی ده دئمک اولور بو قونودا،
اؤزوده بو گونوموزه اویغون،
بو بیرلییمیزین،
هر واخت دان، هامیدان داحا گرکدییی بو گونوموزه.
کی بیزلراوچ اولمایی باجارینجا،
گوج اولوروز.
وگوج اولونجادا،
اؤیله ایشلر یاپیریز،
اؤیله اولوروزکی؛
نه کی دوشمان،
هئچ تانریدا تاب گتیره میر بیزی!
هئچ تانریدا گؤتوره میر بیزی!..
وبؤیله جه داغا داشا دؤنده ریلیریک!!.
یاز ۱۳۸۹