اؤز خوشونا دئییل
یوسف جوادی
خزان باغچامیزین یانیندان کئچیر،
لاله دؤزنمه‌ییر قانیندان کئچیر،
هر گوله بیر تیکان جانیندان کئچیر،
مئشه‌لر یام- یاشیل یاشیللاشیرلار.
اؤز خوشونا دئییل جان گؤبیینده،
قرنفیل دوغولور قان گؤبیینده،
گؤر نئجه گئجه‌نین دان گؤبیینده
اولدوزلار اسنه‌ییب ایشیلداشیرلار.
گؤزه‌لر داغلارین دئشیلمیش دردی،
قوشولدو چایلارا اوره‌یین وئردی
داش-قوملو یوللاردان گؤردوگون گؤردو
دالغالار ساحیلده میشیلداشیرلار.
