یاواش- یاواش
تورک اوغلو
عاشيغام اؤلدورمه انصافين اولسون
آلساندا جانيمي آل ياواش- ياواش
گل اوتور يانيمدا يانير اوره‌ييم
قولونو بوينوما سال ياواش- ياواش
گل چيخاق چمني سئير ائد‌ک قوشا
اغيارين اوره‌يي چيرپيلسين داشا
من سرو قدينه ائديم تاماشا
سنده اؤز سازيني چال ياواش- ياواش
سئوميشم گلنده سني، بولاقدان
عطريني آلارام گؤرسم اوزاقدان
گل باسيم باغريما اؤپوم ياناقدان
سوروشسون باشيندان شال ياواش- ياواش
«تورک اوغلو» سئويله‌يير دوشدوم ديللره
مني مجنون ائديب سالدين چؤل‌لره
سئوگيليم قولاق آس بونيسگيل‌لره
دوشدو اوره‌ييمه خال ياواش- ياواش
4 پاسخ
Yotube
کانال شاعر تورک اوغلو خاطیره سی
سلاملار حسن آقا ایلدیریمه
اؤتن اون ایل لیکلرده،اؤز اینکیاشفینی یالنیز گوزگو گؤسترمز یئرلرده داوام ائتدیره بیلن چاغداش آذربایجان شعری نین آجی طالعی نین بیری ده اونون لازمی قدر تحلیل اولونماماسی دیر. .تورک اوغلونون بو قوشماسی رحمتلیک ذلیم خان یعقوبون آل یاواش یئری قوشماسینا بیر جاواب اولاراق یازیلمیشدیر تورک اوغلو نون بو شعری نین اهمییتی اوندا دیر کی بو تایدا بیر نسلین آرزی و آماللارینی اؤزونده انعکاس ائتدیرن بو شعر او ایللرده بیزیم غربت و سئوگی شعریمیز کیمی ده دیرلنیردی. بو شعر اوریینده آذربایجان جوشقوسو دائم ولکانلانان بیر شاعیرین اوتا یاشلاریندا یازدیغی بیر ائل ادبیاتی نمونه سی دیر.اونون بوکیمی قوشمالاری بیزی همیشه کؤورلدیردی گنجلیک ایللرینده شعیر اوجاقلاریمیزا قوللوق ائدن تورک اوغلو البت ده همیشه اورگیمیزده دیر .اونا جان ساغلیغی آرزی ائدیرم .ساغ اولون کی سایت نیزدا اونا دا یئر وئرمیسینیز / تهران ائل اوغلو
سلاملار ایله سایقیلار
چوخ صمیمی و گؤزل…
بیرینجی بیت باشلانیش اولاراق اورکلری یاخان قدر دویغوسال و تام عاشیقلار سئون بیر سؤز.
“عاشیغام اؤلدورمه انصافین اولسون
آلساندا جانیمی آل یاواش- یاواش”
… سئوگیلیم قولاق آس بو نیسگیل‌لره …
یاشایاسینیز کی بویوک شاعیرلریمیزین آدینی دیری ساخلاماقدا چالیشیرسینیز. تورک اوغلو شعر آدی ایله تانینان ائل شاعیری برحعلی قریشی بیزیم ائلیمیزین افتخاری دیر. منیم بو شاعیر و اونون عمیسی اوغلو بویوک شاعیریمیز مرادعلی قریشی(قافلانتی) دان اونوذولماز خاطیره لریم وار. من آذربایحان شعرینین ایلک نمونه لرینی چوخ جاوان ایکن اونلارین دوداقلاریندان ائشیتدیم. قافلانتی نین روحو شاد اولسون و تورک اوغلونون عومرو اولدوزلارین سایی جان.