آذر ائولادی
سلیمان ثالت
دیلی حق نیدالی، باشی بلالی
جومرد ایگیدلرین آتاسی‌یام من
د‌ده قورقود کیمی ائللر عاشیغی
بوتون شنلیک‌لرین صفاسی‌یام من
دیلی باغلی، سازی سینمیش اوزانام
خالقا بوی بویلایـیب، داستان یازانام
اوبا- اوبا، اویماق- اویماق گزه‌نم
دوشونن باشلارین سئوداسی‌‌یام من
گؤزومده قالسادا آرزو مورادیم
ظالیم‌لر اؤنونده مظلوم اولمادیم
باشدان باشا حماسه‌دیر حیاتـیم
حاققین عدالتـین فداسی‌یام من
آذر ائولادی‌یام شرفلی، شانلی
شاهلارین ظولموندن گؤز یاشی قانلی
مؤحکم ایراده‌لی، تمیز ووجدانلی
اودلار دیاری‌‌نین بالاسی‌یام من
سازیم اوخشایاندا یانیق کرمی
ناله‌سی یاندیریر، یاخیر عالمی
الیمده‌دیر علعسگرین قلمی
محروم کوتله‌لرین صداسی‌یام من
یک پاسخ
yashasin suleyman salis haminizin elleriniz agrimasin