فرقانه مهدییئوایا
خسرو باریشان

من هر گئجه
شعرین شوْرونو چیخاردیب
سوُیونو سوزورم ایزلریمه.
گؤزلرینیز آیدینلانیر.
و سوْیورام اورهییمی
آدم جنّتدن قوْوولور؛
گؤزلرینیز یاشلانیر.
منی بئله غریب حاللار تاپار فرقانه،
بئله عجب حاللار…
منی سؤزجوکلر مئیمون ائیله‌میش فرقانه!
۲۴ساعات دوُرمادان
باشیمین اَتینی یئییرلر!
هانسی سؤزجوکدن هانسی سؤزجویه آتیلیم؟
هانسی گؤزلری دَریم،
شعریم دوْغسون منیم؟
یامان قوْرخورام فرقانه،
شعریم همیشه اوُشاق قالیر!
نئجه انسان تکاموله چاتسین کی؟
تانرییا چاتماق اوچون
هانسی نردوُوانی هانسی گؤیه دایامالییام؟!!
اوُشاقایدیم
آناما اوُلدوز دَرمک ایستردیم…
بؤیودوم
هئچ قیز اوُلدوز سئومه‌ییر کی..!
دئییر: – من اؤزوم بیر اوُلدوزام آی اوْغلان.
گئچیر آیلار…
آیدان، اوُجادان
سنه باخیرام،
اؤزومه باخیرام.
توتسونون یوُخارییا قالخدیغیندانمی
هر اورکده یانغین وارسا
توتسوسو منیم گؤزومه گئدیر؟
داریخمالار یاغیشلاری
ائله باشلاییرلار کی
بوتون یاغیشلار داریخیر!
بیلیرم دوُز یئییب دوُزقابینی سیندیریرلار!
بیزلرسه
یارامیزدان دوُز سپیریک!
اَلیمیزین دوُزو اولماسا دا
نفسیمیزین دوُزو بوْل اوْلاجاق!
اَاَ…ح، دوُزون نه یئری وار بوُ شعرده فرقانه؟!!
دؤکتورلر یئمکده بئله
یاساق ائتمیشلر.
دوُزون اورَهیه ضرری واردیر آخی.
حال‌بوُکی من
دوُزلو بیر قیز دوْغاجاقدیم؛
آدینیایسه «تورکآی» قوْیاجاقدیم.
اورَک ایشچیسی اوْلان آتاسینا اؤیونسون.
باخ
هر ایشیق هایخیران یاخیلیب
سوْنرا دا بیر اوُلدوز اوْلوب.
سن دئمه اَصیل شاعیر
«اوُرمو گؤلو»دور.
«باکی-تبریز» اوُتوبوسلاری
«آذربایجان» بوْیدا یالقیزلیغیمدان گئچمه‌ییرلر هئچ.
دالغالار…
دالغالار…
دنیزده جان وئریب
ایچیمده جانلانیرلار.
سن آغلاییرسان…
من تیترهییرم…
یوْلوموز عئینی؛
توُوالئتدهکی کپهنه‌یین اؤیکوسودور آلینیازیمیز!
آشکار دا اوْلسان
گیزلهنه‌جکسن.
گیزلی ده اوْلسام،
آشکارلاناجاغام.

آه من بیر دوشونجه هئیکلییم
گؤزیاشلاریمدان یوْنولورام فرقانه.
من جنّتی یانماقدا گؤردوم؛
بوُ سببدن شاعیریک فرقانه.
پس یاشاسین توْپراغیمیز.

۱۳۹۴/۹/۱۷