گؤز
حسین آرزو
نازنین بیر نازلی گؤز جئیرانی گؤزلر گؤزلریم
بیر شیرین دیل، لبلری خندانی گؤزلر گؤزلریم
بیر ده‌لی لئیلاسیزام داغلار دا داغلار سینه‌می
دیل یاراسی باشدا، شیرین جانی گؤزلر گؤزلریم
بی‌وفالیق مرزینی پوزدی دئییر گئت گؤزله‌مه
ایختیاریم یوخ گؤزون قوربانی گؤزلر گؤزلریم
معتصم غربتدی، افشین روزگار غم، ستم
بابکی، ستارخانی، پسیانی گؤزلر گؤزلریم
خسته جان، غربت چتین، یاتسام یوخومدا جان آنام
آی وطن! آیدین گلن دؤورانی گؤزلر گؤزلریم
خاطرات شهرینده پاییز “آرزو” بیداد ائدیر
یئل وورور دوستلوق ایتیر، جانانی گؤزلر گؤزلریم
پاییز – ۱۳۶۶- نهر عنبر
یک پاسخ
سلام
ساغ اولون و سلامت یاشایین عزیز دوستلار
۶- جولای – ۲۰۱۵ – ایووا – امریکا –