بوگون چهارشنبه 1 اردیبهشت 1400 ساعات 18:41
ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری

arashگئنه بايرام گليب، گئتدي!
حمید آرش آزاد

(1)
«الا، يا ايها‌الساقي، ادر كأسا و نا وِل‌»‌لر!
گئنه بايرام گليب، گئتدي، اوره‌كده قالدي نيسگيل‌لر
هجوم ائتدي ائوه هر دؤرد طرفدن لشكرِ اعدا
تهاجم‌دن‌ ده چوخ ووردو خسارت بو تناول‌لر
سوكولدو آلمانين بؤيرو، دليندي پورتاغال باغري
كسيلدي آرمودون نسلي، جهاندان كؤچدو آجيل‌لر
تالاندي خوانِ يغما تك ميز اوسته مئيوه- شيريني
صليبي‌لر كيمي بسكي ائديب حمله بو فاميل‌لر
گؤرنده آجيلي، رحم ائتمير اصلا بو قوهوم- قارداش
خداوندا! بو «هابيل»‌لر، نه‌دن اولموشدو «قابيل»‌لر؟!
بير آي بايرامه قالميش، بسكي عرشه قالخدي قيمت‌لر
بازاردان بوش قاييتدي سر به سربيچاره زنبيل‌لر
نئجه جمعيتي ائتسين بو حالدا كنترل انسان؟
مخارجلر! بئله گئتسه، اينان، جوت- جوت دوغار فيل‌لر
مخارج‌ آتلي، آيليق‌لار پياده، يول يوخوش، ياران
بو اوضاعين بيانيندا قاليب عاجز بوتون ديل‌لر
بو خرجين عُهده‌سيندن هئچ گَلَنمز يوخسول- آيليقچي
مگر ديمديكلريندن ياغديرا مينليك، ابابيل‌لر
تعجب ائتمه گر من سالميرام سس، ائتميرم ناله
منيم بختيم ائله ياتميش، اويالدانماز صرافيل‌لر
(2)
گئنه بايرام، ائديب اون‌بئش‌گون اقامت، گئتدي
نئچه وقت بيزلر ايله ائتدي ظرافت، گئتدي
چونكي ايش- گوج يوخ‌ايدي، هئي ياتيب، هئي مورگوله‌ديك
بيزي تنبل‌ليگه بايرام وئريب عادت،‌ گئتدي
سو دان- اود دان چوخ آتيلديق، آچالار بختيميزي
باهاليق آچدي ولي هر زادي راحت، گئتدي
مئيوه مئيدان‌لاريني گزدي بيرآز نوروز عمي
گؤردو هر يان‌دا يازيلميش باها قيمت، گئتدي
گؤردوكي، تكجه بادمجان اونا قسمت اولاجاق
گؤزو ضرب‌دن بؤيويوب، ائيله‌دي وحشت، گئتدي
راديونو دينله‌دي، تيلويزيونادا ائتدي نظر
گؤردو شادليق يئرينه وار قورو صحبت، گئتدي
ملّي بايرام ساييليرميش بيزه بو نوروز اگر
هر وطنداش نييه سالجاق اله فرصت، گئتدي؟
پوللو چون ايسته‌دي لاپ ملّي توتا بايراميني
اودور «آنتاليا»، «دوبئي» ائيله‌دي نيّت، گئتدي!
يوخسولون‌دا قاپيسي باغلي قاليب اون‌بئش گون
اؤزو قالدي، ولي بختي ايله سعادت، گئتدي
گؤي- گؤيرتي تاپيب، هر قيزكي دوگون سالدي بو ايل
هم قويون، هم كئچي ائتدي اونا لعنت، گئتدي
بير زرنگي وار ايدي، يونجالارا سالدي دوگون
ياخشي‌ يار، بختي اونا ائيله‌دي قسمت، گئتدي
ايكي يوز اللي‌مين اولموشدو بو ايل بايرامليق
ائتدي بئش يوز نفر آنجاق بيزي غارت، گئتدي
مئيوه- شيرني وار ايكن، ائل بيزه لاپ عاشق ايدي
چون‌كي بوشقاب‌لاري بوش گؤردو، جماعت گئتدي
موكئت اوستون بزه‌دي پوسته- توخوم قار- قابيغي
او زمان ائتدي قوناق‌لار ائوي خلوت، گئتدي
بو يازيق بايراما- «آرش»!- اوره‌گيم چوخ ياندي
بيزيم احوالي گؤروب، چكدي خجالت، گئتدي

یک پاسخ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *