آی یار! محبّتین منه وار مختصر، یا یوخ؟
هردن بو عاشقه ائده‌جک‌سن نظر، یا یوخ؟
اوّل گلنده، بیر ایل «آقا» سؤیله‌دین منه
سونرا، اوتوز اوچ ایل ائله‌ییبسن «نؤکر»، یا یوخ؟
یوخ اؤلکه‌ده هنرلی‌لره اعتبار وئره‌ن
رخصت وئریرسن ائوده اولوم مُعتبر، یا یوخ؟
پول یوخ، مقام‌دا یوخ، بیزه وار تکجه «افتخار»!
من‌‌ده اولوم بو باشچی‌لارا «موفته خر» یا یوخ؟
دؤنسه الیمده‌کی قلمین جؤوهری یاغا
دستمال اولا کاغیذ، اولارام بخته‌ور، یا یوخ؟
یالتاقلیق ائله‌یم، چالیشیب، مدح‌لر یازام
اوندا، مقاماتین خوشو مندن گلر، یا یوخ؟
یوز اللی دفعه بیر پروژه افتتاح اولا
«تبریز» آبادلانیب، اولاجاق بیر شه‌هر، یا یوخ؟
محکم یاپیشسا صندلی‌یه «شهر شوراسی»
دیبده بو شهر پاریسه یوزمین ده‌یر، یا یوخ؟
یوز ایل آچاق آغیز دوعایا، گؤز تیکک یولا
«مئترو»-یلا دیبده ائیله‌یه‌ریک بیر سفر، یا یوخ؟
باخ، «اورمیه گؤلو» قورویور، سون نفسده‌دیر
مسؤول‌لارا چاتیب گؤره‌سن بیر خبر، یا یوخ؟
بوش سؤزلری بوراخ- بالا!- گل، ازدواج ائده‌ک
دؤلت، بیزه گؤر اوندا کلان وام وئر‌ر، یا یوخ؟
کؤکدن سوادسیز اولسادا بَی، هم گلین خانیم
دانیشگاها، گؤر ازدواج‌ایله گیر‌ر، یا یوخ؟
بیر ائوله‌نن کیشی، گئنه‌ده ائولنه‌ بیلر
خوشبخت اولار بو قانون ایلن هر بشر، یا یوخ؟
مستأجر، هم‌ده ایشسیزیک، آنجاق گل ائوله‌نک
قانون بیلرکی، وار بئله ایشده ضرر، یا یوخ؟
تنقیدله طنز یازدین- آی «آرش»- عؤمور بویو
دوز سؤیله- قارداش!- عؤمرون اولوبدور هَدَر، یا یوخ؟