قيش بایاتی‌لاری
حمید آرش آزاد
شهريميزه قيش گلدي
قار گلدي- ياغيش گلدي
خياواني سئل توتدو
آياغا قاليش گلدي!
***
قيش گليبدير تبريزه
قار چاتير ايندي ديزه
مسؤول‌لار آيين- شايين
چون‌كي قار ياغماز ميزه!
***
قارغا دئيير: «قار- قار
ديزدن اوسته قالخيب قار
هم تاكسي دربستي توت
هم‌ده شوْفئره يالوار»!
***
سوْيوق‌دان توتولور ديل
اوشاق‌لار قالميش سفيل
ساعت اوْن‌دا دئييرلر:
«مدرسه اوْلسون تعطيل»!
***
دؤرد ساعت‌دير ياغير قار
آغاريبدير دام- ديوار
هواشناسي دئيير:
گؤي‌ده آزجا بولوت وار»!
***
قار توتوبدور هر ياني
باغلاييب اوْتوباني
يوْل مدير كلّي دئيير:
«بس بو ميكروفون هاني؟!»
***
ماشين قاليرسا قاردا
دئمه: «مسؤول‌لار هاردا؟»
عزيز قارداش! آزجا دؤز
يوْل آچيلار باهاردا!