ekiz tayi

“اَکیز تایی”نین تورشمزه‌لری – 11/ اوروپا اتحادیه‌سی و قیزارمیش باغیرساق

کوکورچ آدینی ائشیدندن بری هم عاغلیما ایلیشیب، هم ده گؤیلومه. بیر هفته‌دن آرتیقدی هر گون اؤزومه دئییرم بوش وئر، دئیرلر بس یازماغا سوژه تاپا بیلمه‌یبیسن. منه گؤره بیزیم اؤلکه‌ده یازماغا بولان- سولان سوژه وار، یئتر کی بیر ساعات خیابانلاردا آددیملاییب، چئوره‌یه گؤز گزدیره‌سن؛ کپی رایت‌سیز، تای‌سیز سوژه‌لری گؤروب، گؤتوره بیلرسن. اوسته‌لیک آددیملاماغا گؤیلسوز اولسان بئله، تاکسی‌ده اَیلشدیغینده بیر شار بوراخیب، قولاقلاریوی شوشله‌ییب، هر آغیزدان بیر سؤز ائشیده بیلرسن، دی گل یازانینا مینت!!!

کوکورچ آدینی ائشیتدیغیمده اؤز- اؤزومه دئدیم:« دونیانین آغا بی‌لری گؤر ایشی هارا یئتیریبلر! میلتین نه یئییب، یئمیه‌جاغینا بئله قرار وئریرلر» سونرا دوشوندوم، نه یاخجی هله بیز اوروپا اتحادیه‌سینه قاتیلماغا نه گؤیلوموز وار نه ده جغرافیامیزین بیر نئچه فاییزی اوروپا جغرافیاسیندا یئرله‌شیب. یوخسا جیز- ویز سهل‌دی، کله- پاچا، مال زینگی یئمه‌ییمیزه بئله مانع اولاردیلار. هله ساری کؤکلو قویون بئینیندن، مال دیلینین کناریندا مارال باخیشلی قویون گؤزوندن دئمیرم…

اؤز الیمده دئییل، کوکورچ‌له جیز- ویز، هر ایکیسی ده بیر آنلاما گلسه‌ده، منه ائله گلیر کی کوکورچ، تبریز جیز- ویزچیلاری پیشیرن باغیرساقلارین خارجی واریانتی‌دی. اوسته‌لیک کوکورچ سؤزو دیلیمده دولاناندا آغزیم، ذهنیم یاراتدیغی تصویره سولانیر. آجی چایین قیراغیندا اوتورموش، ماشینین سی دی سینده سسله‌نن « آمان اووچو…» ماهنیسی، سؤیوددوکدن اَسن اَسیم، مانقال ایچینده قورلانمیش کؤمور، بیرمیس تاوا دولوسو سوغان داغ‌لا باغیرساق قاریشیمی، اوسته‌لیک ایچینه دوغرانمیش آجی بیبرله بامادور و…

ائشیتدیغیم گوندن ایکی هفته سوووشوب. هله ده عاغلیما سیغا بیلمیرم کوکورچ، تورکیه اؤلکه‌سینین اوروپا اتحادیه‌سینه قاتیلماق اوچون مانع‌لریندن بیری ساییلیر. بلکه تورک میلتی، کوکورچ، دئییل، قیزارمیش چکیرتگه‌ایله سوسَری یئیین میلت‌لردن ساییلاردی؟!

92.6.30

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ایشیق درگیسی، سایی 1
ایشیق درگیسی، سایی 2
ایشیق درگیسی، سایی 3
ایشیق درگیسی، سایی 4