بو یئرده بنی آدم . . . / حبیب فرشباف
سسلندیرن: کبری میرحسینی
بير خلوت كوچه‌نين اورتاسيله، آريق اوجابويلو بير كيشي عصاسيني گؤيده فيرلادا- فيرلادا گلير. اونون عصاسي‌لا بيرليكده، گولداني بؤركونون قيرميزي قوتازي و ييرتيق- ياماقلي اوزون آرخاليغي‌نين اتك‌لري ده توولانير.
او ياخينلاشديقجا يوغون سسي آيدين قولاغا چاتير:
– منم بهلول-ي داننده، منم بهلول-ي ديوانه، منم…
يولدان اؤتن پييادالارين كيميسي دايانيب، حئيرت ايچينده اونا تاماشا ائدير؛ كيميسي ده اونون عئيبه‌جر گؤركميندن قورخا- قورخا دووار ديبينه سوزولوب، گؤزون اوندان گؤتورمه‌دن، سورعت‌لي آدديملارلا اوندان اوزاق‌لاشير.
بهلول هئچ بير كسه توّجؤه ائتمه‌دن يولونا داوام ائدير. بو آن چليگيني يئره دؤيه- دؤيه اونا ياخينلاشان بير قوجا کور كيشي، بيردن بهلولون گؤزونه ساتاشير.
بهلول سورعت‌له دووار ديبينه چكيليب، قوجانين يولونون اوستونده دايانير. كور اونا ياخينلاشاركن، بهلول تئز جيبيندن بير قيزيل سيكّه چيخاريب اوجادان سسله‌نير:
– آي گؤزلو قارداش! آللاه سنه كؤمك ائله‌سين، آل بو سيكّه‌ني بير باخ گؤر دوغرودان دا سيكّه‌دير، يا يوخ؟
قوجا بو سؤزلري ائشيدركن، تئز چليگيني قولتوغونا ووروب، ديك يئرينده دايانيب ساغ قولاغيني سس گلن طرفه چئويرير. بهلول بو عملي قوجادان گؤرن كيمي يئنه سؤزلريني تكرارلايير:
– آي گؤزلو قارداش! آللاه سني گون ايشيغينا حسرت قويماسين، آل منيم بو سيكّه‌مي بير يوخلا؛ قوي لاپ آرخايين اولوم.
كور، هر ايكي اليني قاباغا طرف اوزالديب، سسه طرف ياخينلاشاندا، بهلول فؤورن اليني اوزالديب، اونون اليني توتوب، سيكّه‌ني اونون اووجونا قويوب، دايانير. قوجا سيكّه‌ني ايكي بارماغي‌نين آراسيندا سورتوب يوخلاديقدا، اوره‌يي گوپ- گوپ دؤيونمه‌يه باشلايير. آخي او سيكّه تانيماقدا هئچ زامان يانيلماميشدير.
قوجا فورصتي فووتا وئرمك ايستمه‌دن، تئز ايكي آدديم دالي چكيليب، سس‌سيز دووار ديبينه ياخينلاشماق ايسته‌يير.
بونو گؤرن بهلول اونو سسله‌يير:
– آي گؤزلو قارداش! منيم سيكّه‌م نئجه سيكّه‌دير؟ بس ندن دانيشميرسان؟
كور قوجا بير نئچه آدديم دا سس‌سيز آرخايا چكيليب، دووار ديبينه قيسيلير. يئنه بهلول:
– آي گؤزلو قارداش! بس ندن جاواب وئرمه‌ييرسن؟ بير ديء گؤروم سيكّه‌م نئجه سيكّه‌دير آخي؟!
كور جينقيريني چيخارتمادان، نفسيني اوغورلاييئب دايانير.
بهلول:
– آي گؤزلو قارداش! بس سن هارا گئتدين؟ منه بير جاواب وئر گؤروم!- دئسه ده، يئنه قوجا كور ساكيت- ساكيت دايانير. بو دؤنه بهلول اونو هده‌له‌ييب:
– آي گؤزلو قارداش! منيم سيكّه‌مي وئرمه‌سن، باخ داش آتاجاغام ها! دئيه- دئيه، بيردن يئردن بير داش گؤتوروب، قوجايا ياخينلاشيب، داشي اونون بؤيروندن ووروب دايانير.
كور، داشين ضربه‌سيندن نيققيلداسا دا، داشين اونا توخوندوغونو تصادوفي ظنّ ائديب، موطلق سسيني چيخارماق ايسته‌مير.
بهلول بو احوالاتي سئير ائده‌رك، سس‌سيز- سس‌سيز گولومسه‌ييب يئنه سؤزه باشلايير:
– آي گؤزلو قارداش! منيم سيكّه‌مي وئرمه‌سن باخ يئنه ده داش آتاجاغام ها!- دئييب، يئنه اييليب يئردن بير داش گؤتوروب، نه گوجو وار قوجانين قابيرغاسيبنا گوبسه‌يير.
كور داشين ضربه‌سيندن ائي واي دئييب، تئز سسيني كسيرسه ده آنجاق بو دؤنه داشين اونا توخوندوغوندان حئيرت‌لنيب بيرآز فيكره گئدير…
بهلول ايچين- ايچين گولسه ده، يئنه توختاقليلق‌لا سؤزه باشلايير:
– آي گؤزلو.ٍقارداش! ايكي‌جه داش آتميشام بيلميرم سنه دييب، يوخسا يوخ؟ بونو بيلميرم، آنجاق سنه دئييرم منيم سيكّه‌مي وئرمه‌سن، يئنه داش آتاجاغام ها!- دئييب، يئنه يئردن بير داش گؤتورور…
اوچونجو داش كورون قابيرغاسينا ديديكده، او داها دؤزنمه‌ييب:
– ائي واي ننه، ائي واي! – دئيه- دئيه ديلي آچيلير:
– گل آي قارداش! گل- گل اؤلدوم! گل آل سيكّه‌ني! واللاه سنين آتيشين كور آتيشينا بنزه‌مير! آي قارداش گل آل سيكّه‌ني، مني نييه اؤلدوروسن؟- دئييب، سيكّه‌ني بهلولا اوزادير.
بهلول سيكّه‌ني آليب، گوله –گوله يولونا داوام ائدير:
– منم بهلول-ي داننده، منم بهلول-ي ديوانه. منم..