داغ سالامات قال!
مسعود آذر
گونش تزه – تزه ذیروه‌لری قیزاردیردی کی جانی ننه قویونلاری ساغیب، سوت بایداسینی آلاچیقین قاباغیندا یئره قویوب، ایچری گیردی. اللریندن قوپان تزه سوت قوخوسو آلاچیقی بورودو. یاواشجا نوه‌سی اصلانین باشی اوسته گئچیب، سسله‌دی:
– اصلان، اصلان، دور بالام دور، دی دور بالامسان، گون اورتا اولدو.
اصلان جاواب وئرمه‌ییب اهمالجادان بؤیرو اوسته فیرلانیب، یورغانی باشینا چکدی.
جانی ننه بیرده سسله‌دی:
– اصلان، دور بالامسان دور، قویونلاریمیز آجیندان قیریلدیلار ها!
اصلان دوداغی آلتدا میزیلدادی:
– من گئد‌نمه‌رم، ایمران گئتسین، دونن‌ده من گئتمیشدیم.
– آخی قارداشین کئفسیزدیر، گئدنمز، دور بوگون‌ده سن گئت، صاباح‌دا اونو گؤندرریک.
اصلان دئیینه – دئیینه یورغانی قیراغا آتیب، آلاچیقدان چؤله چیخدی. دان یئری آغارارکن شئیورین هوندور قایالاری گؤز قارشیسیندا صف چکیب، اوبانی دؤوره‌له‌میشدی. یاخیندان، اوزاقدان قارالان قایالار، گونش چیرتدایاندا باشدان قیزاریردیلار. اوبادا قویون – قوزو مله‌شیردی؛ کئچی‌لر داریخیب چپردن ائشیگه آتیلماق ایسته‌ییردیلر؛ ایت‌لرده هره‌سی بیر داش دیبینه سیخیلیب، باش قویوب قوللاری اوسته گؤز آلتیندان هنده‌وری ایزله‌ییردیلر.
اصلان ال – اوزونه سو ووروب، آلاچیقا قاییتدی. پالتارلارین گئییب، منده‌سینی چینینه سالیب، ال آغاجینی گؤتوروب، ائشیگه چیخیب، چپرین قاپیسین آچدی. کئچی‌لر دارتینیب اؤنجه باییرا چیخدیلار، اونلارین آردینجا قویونلار. اصلان سورونو اوزو آشاغا قاطارا دوزوب، ائل چیمنیندن کئچیریب، ماهی گؤلونده سوواریب، سونرا دره‌دن آتلادیب، قره‌داش گونئیینه ساری آپاردی.
گون اورتایا قالمیش یئنه‌ده سورونو ماهی گؤلونده بره‌یه قایتاردی. سورو ماهی گؤلونه چاتاندا، آناسی گول‌صنم ایله باجیسی قرنفیل، الده بایدا – دولچا، قویونلاری ساغماغا گلیردیلر.
اصلان اونلاردا اولان اضطرابی گؤروب، اوره‌یی چیرپیندی؛
– آنا نییه نیگرانسیز؟
– بالا ایمرانین حالی یاماندیر، اود ایچینده یانیر، بدنی آلوو تپیر.
– آپارین شه‌هره دا.
– عمین گئدیب کنده ماشین دالینجا.
اصلان بیر – بیر قویونلارین باشین توتوب ساخلاییردی و آناسی ایله باجیسی‌دا ساغیردیلار. آمما نئجه ساغدیقلارینی هئچ اؤزلری‌ده بیلمه‌دی‌لر. تئزجه بله- بؤیورد ائدیب، اوبایا ساری قاییتدیلار. اصلان‌دا بیر کاسا سوت ساغیب، ال چؤره‌ییندن دوغراییب یئدی. سونرا دوروب قویونلاری ترپه‌دیب، شئیورین یاشیل چیمنلی، سال‌داشلی دؤشلرینه یایدی. گون اورتا چاغی یئنه‌ده سورونو ماهی گؤلونه قایتاریب، سوواریب سونرا بوراخدی داشلارین کؤلگه‌سینده یاتیشسین‌لار. یاخین فاصله‌دن گلن ساز سسی و نئچه آدامین های – کویو، اصلانی بولاق باشینا ساری چکدی. نئچه نفر داغچی بولاق باشیندا اوتوراق ائتمیشدیلر. بیر گنج اوغلان سازی باسیب سینه‌سینه، یانیق کرمی چالیردی. اصلان ایره‌لی گئدیب، سالام وئریب، بولاق باشیندا اوتوروب، ال اوزونه سو ووروب، بیر اووج‌دا سو ایچدی، سونرا بیر داش اوسته چیخیب اوره‌ک تئللرین اوخشایان سازین سسینه دالدی.
– چوبان کیشی نئجه سن؟
بو بیر اورتا یاشلی داغچی‌نین سسی‌ایدی کی الین قویموشدو اصلانین چینینه. اصلان اؤزون ییغیشدیریب اوتانا–اوتانا جاواب وئریر:
– ساغ اول یاخشییام.
– چوبان کیشی آدین نه دیر؟
– اصلان.
– دوغرودان‌دا ائله قوچ اصلان‌سان.
– اصلان بیزه بیر آغیز اوخویا بیلرسن؟
– یوخ، من نه اوخویاجاغام؟
– نه اوخویاجاقسان؟ آ کیشی بیر عاشیق ماهنیسی اوخو.
اصلان اوتانا اوتانا دئدی:
– هه، نه دئییرم، اوخویوم دا.
اصلان گلیب ساز چالانین یانیندا اوتوروب، کؤکسونو تمیزله‌ییر، سسینی صافالدیر.
– اصلان بی هانسی هاوانی چالیم؟
– هاوانین آدین بیلمیرم، آمما سوزلری “سالامات قال”دی.
– دیلینده بیر هاوانی گل.
اصلان دیلی ایله هاوانی چالیر.
– لای لای لایلای لالای، لایلای لالای لای …
– هه گؤیجه گولودور، نه گوزه‌ل. اوخو اؤلمییه‌سن سنی آکیشی!
اصلان اوخویور:
بلکه بو یئرلره بیرده گلمه‌دیم،
دومان سالامات قال، داغ سالامات قال
….
– ساغ اول!!!
– ساغ اول!!!
هامی داغچی‌لار ساغ اول دئییب، اصلانی ناهارا قوناق ائدیرلر. اصلان‌دا بیر بؤیوک کاسا سوت ساغیب، اونلارا وئریر. دسترخان آچیلیر، یئمک گلیر، یئییب – ایچیب، یئنه ده ساز چالینیر، اصلان‌دا اوخویور.
بیر آز زامان کئچمه‌میشدی کی اصلانین داییسی قوتاز و عمیسی اوغلو صابر، اوبادان قویون ایچینه گلدیلر. هر ایکیسی‌نین گؤزلری قیزارمیش، احوالاتی پریشان‌ایدی. صابر اصلانی گؤرجک، هؤنکوروب های – های آغلاییر. اصلانین سسی بوغازیندا قورویور. ساز چالان بو احوالاتی گؤرجک اللری آغیرلاییب، دایانیر. سازین سیملری سیزلاییب، سوسور. اصلان موضونون نه اولدوغونو دوشونوب، اللرین اوزونه قویوب، زولوم – زولوم آغلاییر.
قوتاز ایکی ارکک سورودن آییریب، قاتیب قاباغینا، اوزو یوخاری اوبایا ساری یولا دوشور. صابرده آغیر – آغیر قوتازین آردینجا.
داغچی‌لارین گؤزلری دولوب، اوره‌کلری سیخیلیر، هره‌سی بیر طرفده الی قوینوندا اوتوروبلار. بو آندا ساز چالان داغچی یئریندن قالخیب، سازی سینه‌سینه باسیب، یئنه گؤیچه گولو هاواسیندا بئله اوخویور:
سیلینمز اوره‌کدن قارداش حسرتی،
یاسلی چوبان قارداش، باشین سالامات.
سال داشلی داغ گره‌ک، دؤزه بو غمه،
داغسان اصلان کیشی، داشین سالامات.
