تاق، تاق، تاق…
– کیمدیر؟
تاق، تاق، تاق…
– آیدین، بالا گؤر کیمدیر؟ – آنا اوتاقدان چاغیردی.
آیدین ائیواندا، تزه‌جه قاییردیغی اوچورتماسینا, قویروق دوٍزلدیردی. شیریق- شیریق کسدییی کاغیذلاری حالقالایارکن زینجیر حالقالاری کیمی بیر- بیرینه کئچیردی. آیدین اوچورتماسی‌‌نین قویروغونو زینجیر‌لتمک ایسته‌ییردی. آیدین آناسی‌نین سسینی ائشیدرکن گئدیب قاپینی آچدی، هئچ کیمی گؤرمه‌دی. تزه‌دن ائیوانا قاییتدی. اوتوروب- اوتورمامیش تزه‌دن قاپینی دؤیدوٍلر: تاق, تاق, تاق…
عصبی‌لیکله یئنه ده قاپی‌یا ساری گئتدی. بو دونه ده کیمسه‌نی گؤرمه‌دی. اؤز- اؤزوٍنه بئله دوٍشوٍندوٍ کی، بلکه بیر دجل اوشاق اونو ساریییب اینجیتمک ایسته‌ییر. قاپینی آچیق قویدو، ایر اورا یاخینلاشان اولسا اونو گؤره بیلسین.
تاق- تاق- تاق…
بو دؤنه قاپیدان چوخ اوزاقلاشمامیشدی و بیردهکی قاپئ آچیق‌ایدی، آنجاق یئنه کیمسه گؤروٍنمه‌دی.
حئیرته دالاراق تعجّوٍبلوٍ- تعجّوٍبلوٍ حیطین اورتاسیندا دایانمیشدی.
آناسی اوتاقدان چاغیردی:
– قاپی دؤین کیمدیر؟
آیدین باشینی قالدیردی, آناسینا جاواب وئرسین کی، بیردن گؤزلری حیطین قیراغینداکی یاشلی بؤیوٍک آغاجا دوٍشدوٍ. آغاجین گؤوده‌سینده اوتورموشدو و اوتوردوغو گؤودهیی سوٍرعتله دیمدیک‌له‌ییردی. تاق- تاق سسی چیخاریردی. آیدین ائهمالجا قوشو آناسینا گؤستره‌رک دئدی:
– قاپینی دؤین باخ بو قوشدور.
آنا پنجره‌دن ائشییه باخاراق گوٍله- گوٍله دئدی:
– بو قوشون آدی آغاج دلن‌دیر، دوٍزدوٍر بو تاپدالایان آغاج دلینمیش.
– آناجان نه اوٍچوٍن بو آغاج‌دلن بئله بیزیم آغاجیمیزی یارالاییر- دئیه آیدین آناسیندان سوروشدو؟ من ایندیجه گئدیب اونو داشلا وورارام بلکه، بیزیم آغاجیمیزی یارالاماسین.
– یوخ آیدین جان، بو ایشی گؤرمه, آغاج‌دلن‌لر هئچ واخت آغاج‌لارا زییان یئتیرمیرلر، بلکه اونلارین بو ایشی آغاج‌لار اوٍچوٍن چوخ دا فایداسی واردیر. آغاج‌دلن‌لر برک و اوزون دیمدیکلریایله آغاج‌لارین قابیق‌لارینی دئشیب اونلارین آلتیندا گیزله‌نن زییانکار قورد- قوش‌لاری اوجوب یئیرلر. بئلهلیکله اونلار آغاجلاری زییانکار قورد- قوشلارین زییانیندان قورتارارلار. من ایسه چوخ سئوینیرم کی، بو آغاج‌دلن بیزیم ائوده‌کی آغاجی تاپیب و اونون ساغلاملیغینا یاردیم ائله‌ییر.
آیدین دئدی: ایندی آنلادیم نه اوٍچوٍن آغاج‌دلن‌لر آغاجلاری تاق- تاق تاققیلدادیرلار.
– قریبه گوزه‌ل لطیفه‌دیر- آنا دئدی: دئیه بیلیرسن آغاج‌دلن‌لر نه اوٍچوٍن آغاجلاری دؤیوٍرلر.
– آغاج‌دلن‌لر قاپینی دؤیوٍرلر کی، قورد- قوش‌لار ائشییه چیخان کیمی اونلاری دوشوٍروٍب یئییرلر.
