سئرچه‌لر
آفاق مسعود- کؤچورن: فریدون محمدی (آرچان)
الی اسدی، یا فیکری داغـیلدی، نه اولدوسا، یئنه چایلا دولو فینجان آپاردیغـی یئرده آغزی اوسته دؤشه‌مه‌یه دوشوب، سیندی. فینجانلا بیر اوره‌یی دؤشه‌مه‌نین ایشیلتـی‌لی، برک اوزونه دییب چیلیک- چیلیک اولدو. داغـیلان یئنه شیرین‌چای ایدی…
…دهلیزده آناسی‌نـین عصبی‌لیکدن اییلن اوزو گؤروندو. آناسی‌نـین اوزو عصبی‌لشنده ائله واهیمه‌لی اولوردو، آدامین آز قالیردی باغری یاریلا.
آناسی بو واهیمه‌لی اوزویله گون‌آشیری یوخوسونا دا گیریردی. همین بو عجاییب اوزویله گؤزونو آغاردا- آغاردا دمیر آددیم‌لارلا توفان کیمی اوستونه یئریییردی… اوندا آناسی‌نـین نهنگ کؤلگه‌سیندن ائله بیل گئجه دوشوردو، هر یانا قاتـی ظولمت چؤکوردو. آناسی‌نـین بو واهیمه‌لی کؤلگه‌سی آلتـیندا، ظولمت قارانلیغـین ایچینده تم‌تک قالیردی، دهشت‌دن، قورخودان باغری یاریلا- یاریلا یـیغـیلیب- یـیغـیلیب بالاجا سو داملاسینا دؤنوردو… اوندا آناسی یئکه، آغـیر آیاق‌لارییلا اونون اوستوندن کئچیب گئدیردی. اونو تاپدایـیب، ازیب دؤشه‌مه‌یه یایـیب گئدیردی. او دا دؤشه‌مه‌یه یایـیلان مینلرله سولو نؤقطه‌سیندن هئیسیز سسییله کیمیسه کؤمه‌یه چاغـیریردی…
… بدنی اورپه‌نه- اورپه‌نه اییلیب فینجانـین قیریق‌لارینـی یـیغدیقجا فیکیرلشدی کی، اوندا، یوخودا کیمی چاغـیریردی کؤمه‌یه؟!.. یادینا دوشدو کیمی، ننه‌سینی… هه، اؤزودو کی، وار. آناسی‌نـین آناسینـی. ننه‌سی کؤک بدنینی قاباغا وئریب، اونو آناسی‌نـین عصبی‌لیکدن تاریما چکیلن سوموکلو ال‌لریندن آلاردی. آلیب قارنـینا چیخاردی. او دا اوزو ننه‌سی‌نین یومشاق ایستی قارنـیندا نفسینی ساخلایا- ساخلایا آغلایاردی…
… بیردن ننه‌سی اوچون اوره‌یی گیزیلده‌دی، باشینـی، بوتون بدنینی اوووج کیمی یـیغـیب اونون قارنـینا گیریب گیزلنمک ایسته‌دی. فیکیرلشدی کی، اورا گیره بیلسه‌یدی، داها چیخمازدی. ائله اوراداجا اوتوروب قالاردی، اوردا درسینی اوخویاردی، یازاردی، یاتـیب- دوراردی…
ننه‌سی‌نین قارنـی اوکئآن کیمی نهنگ و درین ایدی. اوردا ایسته‌سه‌یدی لاپ بئلوسیپئد ده سور‌ردی…
… آناسی هله ده دهلیزین او باشیندان باخیردی. باخدیقجا دئیهسن دیش‌لری بیر- بیرینه سیخیلیردی، یومروق‌لاری دویونله‌نیردی، باشی‌نـین توکو بیر بارماق قالخیردی…
دئیهسن یئنه اونو دؤیمه‌یی گلیردی. ساچیندان توتوب جیریق- جیریق ائله‌مه‌یی، چیمدیکله‌ییب سوموک‌لرینی ازمه‌یی گلیردی.
فیکیرلشدی کی، گؤره‌ن آناسی اونو دؤیمکدن یورولموردو؟!.. عکسینه دؤیدوکجه بیر آز دا ائله بیل گوج‌لنیردی، رنگی- روحو آچیلیردی؟!.. آناسی ائله بیل کیمینسه حئیفینی اوندان، اونون بالاجا آریق بدنیندن آلیردی. آناسی گؤره‌ن کیمین حئیفینی آلیردی اوندان؟!..
«هه، فینجانـین قیریق‌لارینی یـیغدیقجا فیکیرلشدی- آناسی اونون بدنیندن حئییف آلیردی. نه‌یه حئییف‌سیله‌نیردی گؤره‌ن؟!..
آناسی هردن‌بیر اونو دؤیمه‌یه گوجو چاتمایاندا ائوین ایچینده او یان- بو یانا یئریییب کیمه‌سه قارغـیش ائله‌ییردی، کیمیسه سؤیوردو.
فیکیرلشدی کی، عمومیتله آناسی ائله بیل نه ایسه ایسته‌ییردی، آمما ایسته‌دییینی ائله‌یه بیلمه‌ییردی.
نه ایسته‌ییردی گؤره‌ن آناسی؟!..
فینجانـین قیریق‌لارینـی تلم- تله‌سیک یـیغدیقجا ایتی شوشه‌لر اتینه کئچیب ال‌لرینی قانادیردی.
آناسی بیر مدت آغـیر- آغـیر نفس آلا- آلا اوزاقدان اونا باخدی. دئیهسن اونو دؤیمک هوسی یوخ ایدی. یا یورولموشدو، یا دا بلکه الی‌نین قانـی هیرسینی سویوتموشدو…
– الین بیشیب؟..
آناسی‌نـین سسی همیشه‌کی کیمی قورو و کوبود ایدی.
… تیتره‌ییب آیاغا قالخدی، قیریق‌لار اته‌یینده مطبخه گئتدی، یئریدیکجه آرخادان آناسی‌نـین نیفرت دولو گؤزلریندن بدنینه بیر خئیلی زهرلی اوخ‌لار سانجیلدی.
آناسی بو اوخ‌لاردان اونا او بیری اوتاقدا اولاندا دا آتـیردی. قارا یازی ماشینـینـی ایکی‌اللی عصبی- عصبی دؤیه- دؤیه دیوارین او اوزوندن ائله بیل گوللـه‌له‌ییردی اونو.
آناسی بیر ده یوخودا گوللـه‌له‌ییردی اونو. همین او قارا یازی ماشینـینا مینیب تانک کیمی گورولدایا- گورولدایا اوستونه یئریییردی. سونرا ماشینـی‌نـین دیل‌لرینی باسیب اونون بدنینی گوللـه‌یه دولدوروردو، آش‌سوزن کیمی دئشیب تؤکوردو. او دا یارالی بدنینه باخیب گؤروردو کی، اتینه دولان سن دئمه گوللـه دئییلمیش یازی ماشینـی‌نـین اؤزو کیمی قاپ- قارا حرف‌لری ایمیش. بدنی، ال- آیاغـی باشدان- باشا قارا حرف ایچینده قاچیب هارداسا اوره‌یی اسه- اسه آناسی‌نـین الیندن گیزلنیردی. سونرا بیر ده باخیب گؤروردو بایاقدان بری ایچینه گیریب گیزلندییی ایری بیر «و» حرفی‌دی…
… اته‌یی شوشه قیریغـییلا دولو قالخیب قالخیب دیزلرینی بیر- بیرینه سورته- سورته مطبخه کئچدی، اوردا زیبیل‌قابی‌نـین دیلینی باسیب فینجانـین قیریق‌لارینـی اورا بوشالتدی، قولاغـی دهلیزده اته‌یینی دؤنه- دؤنه چیرپدی، تمیزله‌دی، شوشه‌نین نؤقطه بویدا قیریق‌لارینـی بیر- بیر حؤوصله ایله اته‌ییندن اووجونا یـیغدی.
… آناسی هله ده دهلیزده‌یدی، عصبی‌لیکدن قیوریلان نفسی دهلیزه دولوب آغـیر دالغا کیمی مطبخه آخیردی، اونو دؤوره‌یه آلیردی…
… آناسینـی بیر دفه لاپ دهشتلی گؤرموشدو یوخودا. یوخو اوندان باشلایـیردی کی، آناسی اوزو پنجره‌یه آرخاسی اونا اوتورموشدو، او دا بارماق‌لاری‌نـین اوجوندا آرخادان یاخین‌لاشیردی، آناسینـی چاغـیریردی، او، های وئرمیردی، ال‌لری دیزی اوسته، گؤزونو قیرپمادان پنجره‌دن هاراسا اوزاق‌لارا باخیردی… اوندا او، آناسی‌نـین چیینینه توخونوردو… آناسی ایچی بوش موقوّا کیمی لاخلایـیر، بؤیور اوسته دؤشه‌مه‌یه دوشوردو، اونون باش‌سیز قولچاغـی کیمی اوزون- اوزادی مله‌ییردی… قورخو ایچینده آغلایا- آغلایا آناسی‌نـین قالدیرماق ایسته‌ینده آناسی‌نـین قولو چیخیردی، باشی دوشوردو. بوتون بدنی اسه- اسه آناسی‌نـین قول- قیچینـی قوجاغـینا یـیغـیب اؤز اوتاغـینا آپاریردی، اوردا ال- آیاغـی کئیییه- کئیییه، تلم- تله‌سیک قول- قیچی یئره سریب تزه‌دن یـیغـیردی، آناسینـی تعمیر ائله‌ییردی و هئچ نه آلینمیردی…
… آناسی‌نـین اوتاغـی‌نـین قاپیسی چیرپیلدی و چوخ کئچمه‌دی کی، یازی ماشینـی‌نـین عصبی جیققیلتـی‌سی ائشیدیلدی.
ایچینی چکیب راحات نفس آلدی.
فیکیرلشدی کی، آناسی بو قده‌ر نه یازیر گؤره‌ن؟!..
بیر دفه اوغورلانـیب آناسی‌نـین اوتاغـینا گیرمیشدی، یازیب اوست- اوسته یـیغدیغـی یازی‌لارینـی اوخوموشدو و قطعیین هئچ نه باشا دوشمه‌میشدی. آناسی نه‌سه سئرچه‌لردن یازیردی…
فیکیرلشدی کی، بلکه آناسی سئرچه‌لری سئویر؟!.. یا بلکه آناسی دا سئرچه‌دی، اونا گؤره اونو سئومیر؟!.. یا بلکه عکسینه، او، سئرچه اولمادیغـینا گؤره اونو سئومیر؟!..
یا بلکه آناسی اونو سئویردی؟!. بو اساسن او خسته‌له‌ننده اولوردو. علی‌الخوصوص قیزدیرماسی یوکسک اولاندا… اوندا آناسی داها یازی ماشینـینـی چاققیلداتمیردی، دئیینمیردی، اوزون- اوزادی فیکیرلی گؤزلرینی بیر نؤقطه‌یه زیلله‌ییب قالیردی، یورغون اوزویله چارپایـیسی‌نـین یانـیندا اوتوروب مهربان گؤزلرله اونا باخیردی، آرادا بیر سویوق دوداق‌لارینـی اونون آلنـینا توخوندوروب ایستی‌لییی‌نی یوخلایـیردی… و اوندا آناسی‌نـین دوداق‌لاریندان هئچ نه گلمیردی. آناسی همین بو سویوق دوداق‌لاری ایله عئینییله بئله‌جه دمیر اوتونون قیزماغـینـی یوخلایـیردی، زیوه‌دن یـیغدیغـی تمیز پال- پالتارین نملییینی یوخلایـیردی.
فیکیرلشدی کی، یقین اؤلسه آناسی داها چوخ سئوه‌ر اونو… سونرا گؤزونون قاباغـینا گتیردی نئجه اؤلور، نئجه اونو تابوتا قویورلار، نئجه آناسی تابوتون اوستونه یـیخیلیب هؤنکور- هؤنکور آغلایـیر…
آناسی بوتون بدنییله اونون اوستونه یـیخیلیردی. اوندا آناسی‌نـین بدنی‌نین چکی‌سینی، ایستی‌لییی‌نی، اییی‌نی حیس ائله‌ییردی و یوخوسو گلیردی…
بونو سون واخت‌لار تئز- تئز گؤزونون قاباغـینا گتیریردی. یاخشی ایدی…
اؤلومدن قورخماسایدی، بیر ده بیلسه‌یدی کی، دیریله‌جک، اؤلردی… هه، یقین کی، اؤلردی…
بونو فیکیرلشیب ایچینی چکدی، بالاجا ال‌لرینی قولتوغونا سوخوب اوتوردو و اوزون مدت اؤلومون نه اولدوغو باره‌ده فیکیرلشدی. اؤلوم، چوخ قریبه‌دی کی، قارانلیق دئییلدی… دومانلی یاز سحری کیمی آغ- آپپاق و سویوق ایدی. اوردا- او قاتـی دومانـین ایچینده بو بالاجا جانـی‌یلا نئیله‌جکدی؟!.. اوتوراجاقدی، اوزاناجاقدی، یا قاناد آچیب سئرچه کیمی اوچاجاقدی؟؛.. بونو بیلمیردی. بیر ده بو آیدین اوتاقدان اورا – او دومانلی یئره‌جن نئجه گئده‌جکدی؟!.. هاراسی‌سا آغرییاجاقدی، یا نفسی دارالاجاقدی و یا ال- آیاغـی قاریشیق ات ماشینـی‌نـین ایچییله چکیله- چکییله قییمایا دؤنوب گئده‌جکدی؟!.. بوراسی قورخولو ایدی…
… بئله فیکیرلشدیکجه ائله بیل آخشام دوشوردو، اوتاغـین ایشیغـی آزالیردی.
… بارماق‌لاری‌نـین اوجوندا قالخیب ایشیغـی یاندیردی.
آناسی اونون اوچون آغلایاجاقدی، هؤنکوروب لاپ دلی کیمی اولایاجاقدی.
آناسی‌نـین بئله هؤنکورتو ایله آغلاماسینـی ننه‌سی اؤلنده گؤرموشدو. آناسی ال‌لرینی تابوتا سارییـیب باتمیش سسییله «آنا… آ!»- دئییب قیشقیریردی.
… سونرا آناسی‌نـین اؤلمه‌یینی گتیردی گؤزونون قاباغـینا. آناسی سولغون بنیزییله، سورمه‌لی گؤزلرییله، اوزونده‌کی همین او حؤوصله‌سیز ایفاده‌یله تابوتدا اوزاناجاقدی. اوندا او… تابوتون لاپ یانـیندا اوتوروب آناسی‌نـین سولغون یاناغـینـی ایسته‌دییی قده‌ر سیغال‌لایاجاقدی.
… بورا چاتاندا اؤزویله باجارمیردی، گؤزلری دولوب- بوشالیردی…
… آناسی سس‌سیز آددیم‌لارلا دهلیزدن کئچیب مطبخه گیردی. اوردا دئیهسن اؤزونه قهوه بیشیردی. سونرا الینده فینجان اوتاغا قایـیتدی و داها یازی ماشینـینـی سسی ائشیدیلمه‌دی.
فیکیرلشدی کی، قریبه‌دی، آناسی ائله بیل تک دئییلدی. اوتاغـیندا ساعات‌لارلا اوتوراندا دا فیکیرلی- فیکیرلی دهلیزدن کئچنده ده، اونونلا اوزبه‌اوز دوراندا دا همیشه آناسی‌نـین بئینی ائله بیل کیمینله‌سه، نه ایله‌سه مشقول ایدی. ائله ایدی کی، نه اوزون- اوزادی اوزانان ساعات‌لاری، نه ائوین آدام‌اؤلدورن ساکیت‌لییی‌نی حیس ائله‌میردی.
… دیوانین کونجونه قیسیلیب فیکیرلشدی کی، آناسی‌نـین بئینی نه ایله مشقول اولا بیلردی؟!.. او بیری اوتاق ساکیت ایدی. فیکیرلشدی کی، گؤره‌ن ایندی آناسی اورادا نئیله‌ییر؟..
فیکیرلشدی کی، بلکه ده آناسی بئله‌جه ساعات‌لارلا اوردا – او قاپیسی باغلی اوتاقدا تک اوتورا- اوتورا هئچ نه ائله‌میر، اوتوروب ائله بئله دیوارا باخیر؟!
آناسی اوتاغـینا گیریب اوردا ائله بیل کیمنن‌سه گیزلنیردی. اوندان گیزلنیردی، یا آتاسیندان، بوراسی دقیق دئییلدی. آمما بیر دفه آتاسییلا نه حاقداسا موباحیثه ائله‌ینده آناسی گؤزلری ایریله- ایریله وحشی بیر سسله:
– ال چک یاخامدان! ایجازه وئر اؤلک!.. – دئمیشدی. اوندا او، اوزونو بالیشا سوخوب آغلامیشدی.
فیکیرلشدی کی، آناسی بلکه ائله دوز دئییردی، او اوتاغا اؤلمک اوچون گیریردی و بلکه ائله اوردا اؤلوردو؟!..
آمما آناسی اؤلمک ایسته‌ییردی. بوراسی یوز فاییز دقیق ایدی.
سونرا دا فیکیرلشدی کی، آخی آناسی نییه اؤلمک ایسته‌ییردی؟!..
بلکه آناسینـی اؤلدورن، گون- گوندن سارالدان، اونلارا آجیقلا باخدیران گئجه- گوندوز دلی کیمی یازدیغـی او یازی‌لارییدی؟!..
آتاسی دا نیفرت ائله‌ییردی همین او منفور یازی‌لارا، بونو دا دقیق بیلیردی. چونکی آتاسی بیر دفه ائله بئله ده دئمیشدی. گئجه‌دن خئیلی کئچمیش یاتاغـیندان قالخیب آناسی‌نـین اوتاغـی‌نـین قاپی‌سینـی آچمیشدی، «نیفرت ائله‌ییرم- دئمیشدی- سنین بو یازی‌لارینا».
فیکیرلشدی کی، قریبه‌دی آناسی! هئچ نه ائله‌مه‌یه- ائله‌مه‌یه، هم ده ائله بیل نه ایسه ائله‌ییردی آتاسینا. هه، قریبه‌دی…
سونرا فیکیرلشدی کی، یقین آناسی آتاسینـی دا ائله اؤز اوتاغـیندان، دیوارین او اوزوندن یازی ماشینـییلا گوللـه‌له‌ییر.
آتاسی سون واخت‌لار آناسینا کده‌رلی گؤزلرله ائله باخیردی، ائله بیل دیشی آغرییـیردی. سونرا آتاسی دا، علاجی کسیلیب قیزدیریردی، یورغان- دؤشه‌یه دوشوب زارییا- زارییا آناسی‌نـین اوزونه باخیردی، «منه یازیغـین گلیر»؟ – دئییردی.
آناسی‌نـین‌سا اونا دا یازیغـی گلمیردی. خسته‌له‌ننده ده گلمیردی. و حتتا…
بورا گلیب چاتاندا اتی اورپشدی.
و حتتا آتاسی اؤلسه‌یدی بئله، آناسی‌نـین اونا یازیغـی گلمزدی. بیر دفه آتاسی عصب‌لشیب «اؤلسه‌یدیم، جانـیم قورتاراردی!..» – دئیه‌نده، آناسی همیشه‌کی لاقئید اوزویله، سسینی قالدیرمادان «اؤلمورسن آخی؟!..» – دئمیشدی و اوندا آناسی‌نـین اوزوندن دقیق گؤرموشدو، آناسی نه ایسته‌ییر.
… بئله فیکیرلشدیکجه دامارلاریندان سویوق گیزیلتی کئچدی.
ساکیت‌لیکدن آز قالا قولاق‌لاری باتدی.
بیر دفه آناسی‌نـین اوتاغـینا بئله‌جه ساکیت‌لیک دوشنده، بارماق‌لاری‌نـین اوجوندا گلیب قاپینـی آزجا آرالامیشدی، گؤردویونه خئیلی تعجّوب‌لنمیشدی.
آناسی اوستول‌اوستو گوزگونون قاباغـیندا اوتوروب دینمز- سؤیله‌مز اؤزونه باخیردی. آناسی اوزون مدت بئله‌جه اؤزونه باخدی، سونرا باشینـی قولونا قویوب ساکیتجه آغلادی.
او گوندن بری ها فیکیرلشیردیسه ده، باشا دوشه بیلمیردی کی، آناسی اوندا نییه ائله آغلایـیردی؟!..
فیکیرلشدی کی، بلکه آناسی ایندی یئنه آغلایـیر؟!.. سونرا ائله بیل قولاغـینا او بیری اوتاقدان هیچقیرتـی سس‌لری گلدی. اوره‌یی دؤیوندو…
قالخیب بارماق‌لاری‌نـین اوجوندا آستا- آستا دهلیزه چیخدی، گلیب آناسی‌نـین اوتاغـی‌نـین قاپی‌سینـی آزجا آرالادی.
… آناسی پنجره‌نین قاباغـیندا الی قولتوغوندا دایانـیب نه‌یه‌سه باخیردی. اونون گلدییینی حیس ائله‌ییب چؤندو:
– نه‌دی؟..
– هئچ… ائله بیلدیم آغلایـیرسان.
– آغلامیرام، – آناسی ساکیت و سرت سسییله دئدی. – اؤزو ده بسدی گوددون منی.
آناسی‌نـین بایاقدان بری قاباغـیندا دوردوغو پنجره‌نین آغزی سئرچه‌یله دولویدو آناسی دئمک بایاقدان سئرچه‌لره باخیردی…
دهلیزه چیخیب قاپینـی اؤرتدو، اوزبه‌اوزده‌کی گوزگونون قاباغـیندا دایانـیب اوزون مدت دیققتله اوزونه، گؤزلرینه، آغزینا باخدی.
قطعیین سئرچه‌یه اوخشامیردی.
فیکیرلشدی کی، اصلینه قالسا، آناسی اونو، هئچ اولماسا گونده بیر دفه اؤپمه‌لی‌دی. یا دا هئچ اولماسا گون‌آشیری اؤپمه‌لی‌دی. نئجه کؤرپه‌لیکده اؤپوردو… یقین بئزیب اونو اؤپمکدن.
یاخشی، اؤپمکدن بئزیب اوندا هئچ اولماسا اوزبه‌اوز اوتوروب دانـیشسین و صؤحبت‌لری تخمینن بئله اولوردو:
– اوزون یئنه قاشیغا دؤنوب… – بونو آناسی دئییردی. او گولومسه‌ییب چییین‌لرینی چکیردی.
– نییه امل‌لی یئمیرسن؟!..
– ایشتاهیم یوخدو.
– دونن قییمت آلمامیسان؟.
– ادبییاتدان «بئش» آلمیشام.
آناسی‌نـین اوزونون ایفاده‌سی بو جاوابدان قطعیین دییشمیردی:
– آفرین.
سونرا آناسی همین او ایفاده‌سیز اوزویله، فیکری یئنه او سئرچه‌لرین یانـیندا ایشه گئدیردی. یا بلکه سئرچه‌لرین یانـینا گئدیردی؟!..
آخشام‌لار آناسی لاپ عصبی اولوردو. اوّل سویونوب بیر مدت یاتاق اوتاغـیندا گؤزو یومولو اوزانـیردی، سونرا آیاق‌اوستو نه ایسه یئییب تزه‌دن اوتاغـینا گیریردی و یئنه یقین سئرچه‌لردن یازیردی.
فیکیرلشدی کی، ائله بیل اوزون مدتدن بری‌دی، آناسی نه ایسه ائله‌مک ایسته‌ییر. گؤره‌ن آناسی نه ائله‌مک ایسته‌ییر؟.. بلکه سئرچه‌لری چوخالتماق ایسته‌ییر؟!..
سونرا فیکیرلشدی کی، بونون خئیری نه اولا بیلر گؤره‌ن؟..
بالاجا اوره‌ییندن نه‌سه خوشاگلمز ایلیق سو کئچیب گئتدی. اوره‌یی سیخیلدی.
… باشینـی تاختـی‌نـین سؤیکنه‌جه‌یینه سؤیکه‌ییب سس‌سیز- سس‌سیز آغلادی…
چوخ کئچمه‌دی کی، یازی ماشینـی ایشه دوشدو. آناسی ایندی کیمیسه، آیری آدامی گوللـه‌له‌ییردی.
آناسی یازی ماشینـیندا یازاندا ائله بیل بوتون دونیانـی اونودوردو. اوزو دییشیردی، ساچی پیرپیزلاشیردی، بارماق‌لاری اوجو ایتی قلمه دؤنوردو، اؤزو ده هانسی‌سا وحشی حئیوانا اوخشایـیردی…
هه، تاپدی. شیره… آناسی یازاندا شیره اوخشایـیردی.
… قالخیب پنجره‌یه یاخینلاشدی. آخشام دوشوردو. بیر آزدان آناسی قورو سسیله – «یاتماق واختـی‌دی»- دئیه‌جکدی و او بو هئیوره تاختدا، بو اوزون‌سوو اوتاقدا، قارانلیقدا اوزانـیب تاوانا باخا- باخا اوزون مدت یوخوسونون گلمه‌یینی گؤزله‌یه‌جکدی.
یوخوسو دا آناسییلا گله‌جکدی…
آناسی هردن مهربان اولوردو یوخودا. یازی ماشینـی‌نـین عوضینه پالتار تیکن ماشینـی چاققیلدادیب اونا بیر اوجدان چهرایی، نارینجی پالتارلار تیکیردی. سونرا بو پالتارلاری اونا گئییندیریب قوجاغـیندا اوتوردوردو، ساچینـی تومارلایـیردی… و تومارلادیقجا ساچی تؤکولوردو. ساچی دیزلرینه، دؤشه‌مه‌یه تؤکولوردو، آناسی‌نـین ال‌لرینده قالیردی… قریبه‌یدی کی، ساچی تؤکولدوکجه هئچ بیر آغری حیس ائله‌میردی، عکسینه، یوخوسو گلیردی…
… قاپی جیریلتـی‌یلا آچیلدی. دهلیزین ایشیغـیندان بیر پارچا ایچری دوشدو.
گلن آناسییدی. اوّل باشینـی، سونرا بدنینی ایچری سالیب بارماق‌لاری‌نـین اوجوندا اوتاق‌بویو یئریدی. گلیب باشی‌نـین اوستونده دوردو. بیر مدت بئله‌جه دینمز- سؤیله‌مز دایانـیب دوردو. ائله بیل اونون یاتـیب- یاتمادیغـینـی بیلمک ایسته‌ییردی.
… ایچی قورخو ایچینده چیرپیلدیسا دا گؤزونو آچماغا اوره‌ک ائله‌مه‌دی، آناسی بیر مدت بئله دوراندان سونرا اییلیب قولاغـینا پیچیلتـی‌یلا:
– یئنه گودورسن منی؟… – دئدی.
… قورخودان گؤزویومولو باشینـی ترپه‌دیب «یوخ» دئدی. اوندا آناسی‌نـین الی آغـیز- بورنونو ائله قاپادی کی، بوغولوب دیک آتـیلدی…
کیتاب دیز‌ی‌نین اوستوندن سوروشوب دؤشه‌مه‌یه دوشدو.
یوخویا گئتمیشدی نه‌دی؟!..
… اوشویوب ال‌لرینی قولتوغونا سوخدو. سونرا بیردن آغلینا گلن فیکیردن ایچی آتـیلدی. تاختـیندان سیچرایـیب او بیری اوتاغا قاچدی. قاپینـی آرالایـیب باشینـی ایچری سالدی.
… آناسی یئنه سئوگی دولو گؤزلریله نه‌سه یازیردی دئیه اونون گلدییینی ائشیتمه‌دی.
… اوره‌ک‌لنیب ایچری گیردی، گلیب آناسی ایله اوزبه‌اوز دوردو. آناسی اونو گؤره‌ن کیمی گؤزونون سئوگیسی قاچدی.
– نه‌دی؟..- دئییب عئینه‌یینی ساچینا کئچیردی، عصبی اوزله اونا باخدی.
– خسته‌لنمیشم…
آناسی کؤکس اؤتوروب سویوق الینی اونون آلنـینا قویدو.
– قیزدیرمان یوخدو… – دئییب یئنه بایاقکی ایفاده‌یله اوزونه باخدی.
– بلکه اؤلچوم؟..
– لازیم دئییل.
اوندا دئمک قالخاجاق… – دئییب آناسی‌نـین گؤزونون ایچینه باخدی.
آناسی‌نـین اوزو دییشمه‌دیسه ده، رنگی توتولدو ائله بیل:
– قالخار، باخاریق…
… باشینـی آشاغـی سالیب چیخماق ایسته‌دی، سونرا نه فیکیرلشدیسه گئری چؤندو:
– اؤزومو پیس حیس ائله‌ییرم… اوره‌ییم بولانـیر، اوشویورم- دئدی.
– لیمون ییء، ایستی گئیین.
آناسی آخیرینجی سؤزلری روبوت کیمی دئدی.
… اوتاقدان چیخیب قاپینـی اؤرتدو. بالاجا یومروق‌لاری دویون‌لنیب سیخیلدی. اوتاغـینا قایـیدیب پنجره‌نین لایلارینـی آچدی. پنجره‌نین قاباغـی سئرچه ایله دولویدو دئیه «پیرر» ائله‌ییب هاوایا قالخدیلار. یاز گلسه ده هاوادا قیشین سویوقلوغو هله حیس اولونوردو.
… بیر مدت بئله‌جه، اینینده‌کی نازیک پالتاردا، سویوقدان تیتره‌یه- تیتره‌یه، کولک ساچ‌لارینـی قاریشدیرا- قاریشدیرا دایانـیب فیکیرلشدی کی، قوی ائله خسته‌لنسین کی، قیزدیرما اؤلچه‌نین جیوه‌سینی شوشه‌سینی دئشیب چؤله چیخسین. یا دا بلکه اؤزونو آشاغـی آتسین؟!.. اوندا آناسی اونون یانـینا پیلله‌کنلری قیشقیریب آغلایا- آغلایا، آیاق‌لاری بیر- بیرینه دولاشا- دولاشا دوشه‌جکدی. یا دا بلکه هئچ دوشمه‌یه‌جکدی؟!.. آشاغـیداکی سس- کویه قالخیب پنجره‌دن باخاجاقدی، سونرا دونیادان بئزمیش اوزویله کؤکس اؤتوروب عئینه‌یینی گؤزونه کئچیره‌جکدی، اوتوروب یئنه دلی کیمی یازاجاقدی.
… بارماق‌لاری‌نـین اوجونا قالخیب آشاغـی بویلاندی. باشی ائله هرلندی، آیاغـی بودره‌دی، آز قالدی دؤشه‌مه‌دن قیریلیب اونو باشی اوسته نیزه کیمی آشاغـی آتـیب یئره سانجا. محجّردن توتوب اؤزونو زورلا ساخلادی، پنجره‌نی اؤرتوب اوره‌یی یئریندن قوپا- قوپا یئنه تاختـیندا بوزوشدو.
… پنجره‌نین قاباغـی یئنه سئرچه‌یله دولدو، آناسی‌نـین هر سحر محجّره تؤکدویو قورو چؤره‌یی دنله‌ییب باش‌لارینـی تئز- تئز اویان- بویانا بورا- بورا، بیر- بیری‌نین اوستوندن آتـیلا- آتـیلا ائله بیل انزلی اوینایـیردیلار، هردن بیر ده شوشه‌نین او اوزوندن دینمز- سؤیله‌مز، بالاجا اوزلرییله اونا باخیردیلار و ائله بیل گولومسه‌ییردیلر.
… هر سحر آناسی یئریندن قالخیب یوخولو، کال اوزویله بیرباش مطبخه گئدیردی، اوردان چؤره‌ک قیریغـی گؤتوروب بیر- بیر اوتاق‌لاری گزیردی، پنجره‌لری آچیب چؤره‌یی اوووردو، سونرا باشینـی پنجره‌نین شوشه‌سینه سؤیکه‌ییب همین او یوخولو اوزویله سئرچه‌لرین یئمه‌یینه باخیردی…
… سئرچه‌لرین سسی او بیری اوتاقدان گلن یازی ماشینـی‌نـین چاققیلتـی‌سینا قاریشیب عئیبه‌جر بیر موسیقی‌یه چئوریلیردی.
… توکو اورپندی، آیاغا قالخیب اووا چیخان پیشیک کیمی آستا- آستا پنجره‌یه یاخینلاشدی، سویون آلتـینداکی کیمی سس‌سیز حرکتله چفته‌نی بوروب پنجره‌نین لایـینـی آچدی. سئرچه‌لر لاپ یاخیندایدی. اونا محل قویمادان جوککولده‌یه- جوککولده‌یه آتـیلیب دوشوردولر.
… الینی گؤز قیرپیمیندا محجّره آتدی.
… سئرچه‌لر فوّاره ووروب هاوایا قالخدی.
… اووجو بوش دئییلدی. سئرچه‌لردن بیری آخیر کی، کئچمیشدی الینه. سئرچه‌نین ایستی، یومشاق بدنی اووجوندا یوخاریدایدی، بالاجا، قارا گؤزلرینی اونون اوزونه زیلله‌ییب دینمز- سؤیله‌مز باخیردی و یئنه ائله بیل گولومسه‌ییردی.
… بدنیندن قاپ- قارا، آجیقلی بیر زهر دولاشیب سئرچه‌نین توتان اووجونا یـیغـیلدی. اووجو نئجه سیخیلدیسا، سئرچه‌نین بالاجا باشی جان‌سیز حرکتله گئری قاتلاندی.
اؤلو سئرچه‌نی الی‌نین ایچینده او اوز – بو اوزه چئویریب باخدی. سئرچه‌نین بایاقکی تبسّومو هله ده اوزونده‌یدی… اودو کی، ایکی بارماغـییلا قوشون باشینـی آچاری بوران کیمی بوروب کؤکوندن قوپارتدی. آپاریب مطبخه زیبیل وئدره‌سینه آتدی. اوتاغـینا قایـیداندا حیس ائله‌دی کی، دیزلری اسیر. تاختـیندا اوتوروب ال‌لرینه باخدی. ال‌لری ده اسیردی.
… چوخ کئچمه‌دی کی، آتاسی گلدی. آتاسی‌نـین قانـی یئنه قارا ایدی. اؤزو ده دئیهسن ایچمیشدی. توکلو اوزویله اونو اؤپوب آزجا لنگر ووردو، سونرا کئچیب همیشه‌کی کیمی تئلئویزورلا اوزبه‌اوز اوتوردو.
… گلیب آتاسی‌نـین بؤیرونده اوتوردو، باشینـی اونون سینه‌سینه قویدو. آتاسی‌نـین کؤینه‌یی ائله بیل نم ایدی.
– ائو یامان سویوقدو… – آتاسی دئدی، سونرا اونون باشیندان اؤپدو. آتاسیندان تر اییی گلیردی…
٭٭٭
… سحر یازی ماشینـی‌نـین چیققیلتـی‌سی کسمیشدی. تئلئویزورون دا سسی گلمیردی. ائله بیل ائوده هئچ کیم یوخ ایدی.
… یئریندن قالخیب باشماق‌لارینـی گئیدی، گرنشه- گرنشه دهلیزه چیخدی.
… آناسی‌نـین اوتاغـی‌نـین قاپیسی آچیق ایدی. گلیب ایچری بویلاندی.
… اوتاق ائله بیل دییشمیشدی. یازی ماشینـی یوخا چیخمیشدی، یازی ماشینـی‌نـین میزی یئرینی دییشیب لازیم‌سیز اشیا کیمی کونجه دیرنمیشدی. آناسی‌نـین ساعات‌لارلا اؤزونه باخدیغـی گوزگوسو ده یوخ ایدی. و عومومییتله اوتاقدا آناسینا عایید ائله بیل هئچ نه یوخ ایدی. آناسی‌نـین کرئسلوسو اوتاغـین اورتاسیندایدی و اوردا ایندی آتاسی اوتورموشدو. توکلو اوزونو الی‌یله گیزله‌دیب سیغار چکیردی، اونون گلیشینی حیس ائله‌ییب دیکه‌لدی. اوندا گؤردو کی، آتاسی‌نـین گؤزلری قیپ-قیرمیزیدی.
– … او هارا گئتدی؟..
آتاسی چییین‌لرینی چکیب اوزونده‌کی بدبخت ایفاده‌یله اونا باخدی.
– بیلمیرم…- دئدی، سونرا آتا- بالا قوجاقلاشیب دینمز- سؤیله‌مز یئلله‌نه—یئلله‌نه اوتوردولار.
… پنجره‌نین قاباغـی ساکیت ایدی، سئرچه‌لرین سسی گلمیردی.
باشا دوشدو آناسی اونلاری آتـیب هارا گئتمیشدی. گؤزلری دولدو.
… آناسی سئرچه‌لرله گئتمیشدی…
