گون باتیر، مور داغلار قان بویاقلانیر. اولدوزلار گلینجه ایچیمده بیر اوشوتمه وار؛ سانکی بیر قارالتی منی ایزلمک ده دالدالاناجاق.
یئر دولانیر. گؤزلریم سورونور. دیزلریم قورخودان اسرکن یام- یاشیل یارپاقلار یئله نمنه تاپشیرماقدا. قولاغیم جومور چینارلارین قولاج بوداغلارینا. إهئی منه ده دانیشین آی یاشیل یارپاقلار! دیزلریم گلمیر. هه، یارپاق یوخ یئل‌له دانیشمالییام.
منی لاغا قویوب گاه ساغدان اسیر، گاه سولدان. اوره‌ییم سیزیلداییر. قانادین قوربانی، آچما یایلیغی! کسیلمیش ساچلاریمی نه داراماغا هوسیم وار، نه هؤرمگه. چووووووووخ چووووووووخ اوزاقدا قالیب قولاج هؤروک‌لر.
اینیلتی سسی گلیر. بیر چیل قارانقوش ندنسه بو گئجه یولداشیمدیر؛ او دا ائوسیز، او دا یوواسیز!
نه بیلیم، بلکی ده قوولموش بیری تام منیم کیمی؟! باشی قوینوندا ترس قاتلانیر ایپک له‌لک‌لر.
نه مهریبان دیزیم وار! جانیم چوخ آغیر، داشییا بیلمیر؛ لاکین باشیمی اوستونه آلیر.
قانادین قوربانی آی یئل‌لر! قوخومو داشیما بیلمسین بیری ائلدن قاچمیشام.
منه سئویرم دئین سئوگی دن قان قوسموشام.