قوی بو خاطیره‌مین دنیز قوش‌لاری
سئیر ائتسین سئومه‌لی ساحیل‌لرینی؛
هله بیلمه‌سینلر شوملاییب گؤیون،
ویداعلاشماسینلار دوز أل‌لرینی.
هله آلبومومون شکیل‌لرینده
بیر دالغا اؤزونو ساحیله چالیر.
هاوادا یئل‌له‌نن ساری یایلیغیم
میندیییم قاییق‌دا قویلانیب قالیر.
کیم سیندیره بیلر بو ساری دردی!
اورمو چؤره‌ییمین ایتن دوزودو.
اورمودور سپیلن یارالاریما،
یارامین مرهمی وطن دوزودو.
ائشیدین دونیانین محکمه‌لری
گوناهسیز بو محکوم دارا یاراشمیر.
دالغاسیز دنیزین باغلی‌دیر دیلی،
بو دلی جئیرانا یارا یاراشمیر.
سوسوز آرتیمیانین شیرین قاداسی
ده‌یسین ظالیم‌لارین شور باخیشینا .
یئنه قاییق‌لارین لؤبر سالاجاق
ساحیلده گؤزله‌ین یار باخیشینا.
کربلا چؤلونده سویون قارشیسین
اوتانماز اوتانماز کسدی شومورلر.
ایندی بیر دنیزی سوسوز ساخلاییر
بویالی شومورلر، یاسدی شومورلر.
