یوز ایلین اوستونده سینیرلری پوزان کوتو دوشونجه ایله قویولموش سینیر، ایندی چؤکوشو ایله اؤزلملرین کورا دؤنوشموش ایللرینی آلاجانلاشدیرماغا چالیشیردی؛ دمیر دیرکلی مفتیل‌لر آیاقلار آلتیندا، او اوز- بو اوز حسرتلی اینسانلار چوخدان دیله‌نه‌جک گؤروشو اؤزومسه‌میشدیلر آرتیق. اورتا ایکی اوخولونا گئدن چاغلاریم ایدی. بیر تومن‌سیز چاغلاریم… دؤرت‌یولون بؤیور سوست خیابانی گلن‌لرین گیرلی آل-وئرلرینین شوتونا «شوروی بازاری» آدلاندیریلدی. گونلوک بئش تومن اوخول خرجلیییمله من ده آل-وئردن حاققیما دوشه‌نی اؤلومونه آلماق ایسته‌ییردیم. گلن‌لرین هانسی‌نین قولو، هانسی‌نین ساچی، هانسی‌نین دا نه‌بیلیم گوجونون، دیلینین روسا چالدیغینی گؤروردوم. او تایا گئده بیلمه‌ین بدنیمه چیلدیراسی‌یا بو گل-گئت اولاییندان پای ایسته‌ییردیم. اوخولون بوفه‌سیندن کنار پولومون نئجه گوجسوز اولدوغونو ایلیگیمه قدر یاشادیم او گون. الی آزاجیق آغزینا چاتان اؤزو او تایدا قوناق ایدی، منیم‌ گؤزومسه آجیقلی-آجیقلی گلن‌ قوناقلارین آلیش-وئریشینین نه کیمی یوروشونه دیکیلمیشدی چؤزگه‌سیز؛ نه گلن‌لرین «آل»یندا، نه ده قارشیلایانلارین «وئر»ینده ایدیم من. آجیغا گلنلردن بیر کیچیک سیگارئت پاکئتی آلیب، قوشدوم باغچامیزین انجیر آغاجینین دیبینده گیزلتدیم. زامان زامان چاره‌سیزلیییم یادیما دوشدوکجه اورایا گئدیب کوره‌ییمی چئوریلمیش کوهنه داشقایا دایاییب ایکی اوچ گیله‌سینی اؤسکوره- اؤسکوره زورلا چکیردیم. «ز»یلان باشلانان ایندی آنیمسامادیغیم او سیگارئتین آدی چوخ سونرالار بوش واختیمین وئریسینده یاپدیغیم کیتاب یازیشلاریندا کؤچوروش‌لرینده چئویریش‌لرینده اوخول اوزه‌ریندن قورولا بیله‌جک بوتون آنی‌لاریمی، یازغیمی عؤمورلوک توستویه وئردی.