چئویرن: شهرام گلکار
ترجمه: شهرام گلکار
شهرام گلکار

علمی نادیر سوروجولردن ایدی کی، بو واختاجان دوراقدا قالیردی. بو یئکه‌لییه شهرین شهر ایچی وار-یوخ ایکی‌جه خسته‌خاناسیندان ان اؤنملیسی‌نین عاجیلیندن، اؤزو ده گئجه واختی ۳ ساعاتدان آرتیق کیمسه‌نین تاکسی ایسته‌مه‌مه‌سی اؤزونلویونده هله-هله راسلامادیغیمیز آلیشیلمادیق بیر اولای ا‌یدی. علمی‌نین آغزیندا اؤنجه‌دن گونلرله حاضیرلیق یاپیلمیش دؤولت سوییه‌سینده قورولموش سیمفونییا دوندوروجو آغیر آیازین اؤلومجول هنیرتیسینی اوخویوردو. دوراغین شیشه‌سی کسیجی سویوقدان ات توک‌ائدن بیتکی‌لر تک آدامی سوموروردو. دیشاری‌داکی سیگارین چکمه لذّتینی ده سوموروب ایچرله‌میشدی آیاز.
گئنل‌ده ائو-ائشیکلرینه گئتمک اوچون دوراغیمیزا گلن یولچولارین یولونو دؤرت گؤزله بکله‌دیییمیز یولون هئپ نیشان آلدیغیمیز اوز‌به‌اوز او الیندن سئوینج موشتولو قارالتی گؤروندو. گئجه‌ یاری‌سینی گئری‌ده قویوب ساعات بیرده هله شام یئمه‌ین علمی سئوینجدن دیشاری آتیلدی. ‘ماشین’ دئیه یولچو پئشینده اولدوغونو آناتماق اوچون یاریم-یامالاق جانسیز باغیرتیسی گؤزلری‌نین گؤردویو سارسیدیجی گؤرونتونو سیندیره‌مه‌ییب آغزیندا قالدی. گنج قادین اورتاسیندا آهیل خانیم سول اوجوندا جاوان ائرکک اولان گرگین اوچ نفرلیک سیرانین دیگر اوجوندا اؤز-اؤزونه سؤیله‌نیردی. جانی‌نین یانغیسیندان ایلیشکیلندیره‌مه‌دییی سؤزلری یانداشلارینی باخیشلاری‌نین عکسینه اولاراق قولاقلاری‌نین داری سیزماماسینا زورلاییب، یومشاق گؤرسنمه‌یه چالیشان توتوملارینی سرتلشمکدن یانا قوللانماغا ایته‌له‌ییردی. عصبدن جومله‌لری سونا وارمیردی. آغیزیندان ال‌قومباراسینی خیاوانا، قالدیریما توللاییردی.
دوردوغوموز دوراقدان قیزین گلین، ائرکه‌یین ار، او بیر قادینین دا بالدیز اولدوغو سئزیلیردی.
اورتا یاشلی خانیم گنج قادینین سؤزلریندن – سن دویمادین یا اوراسینی اؤتوردون، وئر بو جیندانین آغزی‌نین پایینی – بیر گؤز قیرپیمیندا اوغلانا اؤتوروب، بیر گؤز قیرپیمیندا دا باخیشینی اوغورلادی.
اوچونون ده اللری جیبینده ا‌یدی. اوست‌-باشلاریندان آلکول ایی گله‌نه اوخشامیردی. قاپی‌دان‌می قاییتمیشدیلار!
اوغلان یولون اوبیر الینده ماشینلار گلن یولو گوده – گوده گؤزله گؤرونمه‌ین بیر بیز اوستونده آیاغینی تئز-تئز دَییشدیریردی.
اورتام بیر جیریققانین یانیب سؤندویو زامان دیلیمی ایچینده گرگینلشدی. قیزین گؤزونون باغلی، آغیزینین‌سا آچیق آنلاری‌نین بیرینده، اوغلان قورشون هیزی‌ ایله بیزدن قورتولوب، کئچدی قیزین اؤنونه، چیمیر آلان سئرچه‌لری ایینه یارپاقلی شام آغاجی داللاریندان اوچدوراجاق سسی ایله قیزین سویوقدان قان آلمیش اوزونه شیلله‌نی مؤحکم یامادی.
اوْرتاداکی خانیمین اوره‌یی دیندی. باشدا قاچیرتدیغیمیز اؤنجه‌دن تلئفونلا ایسته‌دیکلری تاکسی گلدی.
هاوادا بوز باغلایان آغلایان قیزین علاج‌سیز گؤوده‌سی ماشینا میندی.
علمی هر آنلامدا بیره‌بیر بنزرلییی ایله چارلی‌چاپلی‌نین حوزونلو شاشقینلیغی ا‌یله گئده بیلمک اوچون ماشینی آلیشدیردی؛ اگزوزدان چیخان قاتی دوماندا هامیمیز ایتدیک.
آرامیزدا دیوار قورولدو. دوراغی باغلادیم گئدک؛ آمما ها گئتدیک‌سه، اوزاقلاشماغی باشارا بیلمه‌دیک.

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

تاکسی دوراغیندا

شهرام گلکار
www.ishiq.net

آذربایجان ادبیات و اینجه‌صنعت سایتی

تاکسی دوراغیندا

شهرام گلکار
www.ishiq.net

آذربایجان ادبیات و اینجه‌صنعت سایتی

تاکسی دوراغیندا

شهرام گلکار
www.ishiq.net

آذربایجان ادبیات و اینجه‌صنعت سایتی