اللی یاشیما آز قالیردیم کی، آنلادیم من دانیشان‌دا دینله‌ین دوستلاریم سئزدیرمه‌دن آزجیق گؤزلرینی قیییرلار؛ گؤزلرینین ببه‌ینده اؤتورو چاتیشمازلیغیندان دوغان اینامسیزلیق ایشاریر، قییی‌سینداسا دالغالار قیریشیر؛ اللری آیاقلاری قورویوب، دوشونجه‌لری نئجه‌لیک نیته‌لیک دویغوسال یانیمی بیراخیب دیرک چاتدیراجاقلاریما کیلیدله‌نیر. بو، یابانچیلارلا قارشیلاشاندا ساده‌جه مات مات دوروخمالارا دؤنوشوردو. من اؤزومو تا موبیل چیخینجایا قدر تام دویما‌ییب سسیمی دینله‌یه بیلمه‌دیک اوچون اونلاری دا آنلایا بیلمک دوشونجه‌سی‌نین گرکلییینه بئله وارا بیلمه‌میشدیم. ایلک کره سسیمی ‘ائشیتمک’ ایسته‌دیم یازام آمما بو ائشیتمک دئییل کی، بؤیله اولسایدی دوستلاریم یا دا یابانچیلار اؤیله‌ گؤدنجه قارشیلیق وئرمزدیلر؛ ایلک کره سسیمی ‘دویدوغومدا’ باشقاسی دانیشیر کیمی حیسّ ائتدیم اؤزومو. سس یاشام قوخویوردو، اؤلودن جان چیخار کیمی بیغلی بیغلی ایدی. اولاغان اوستو بیر شئی دئییلدی، اولاغان ایچی گؤزللیک ایدی. اولاغانین اوستونده نه اولا بیلیر کی!؟ اولسا نه اولاجاق آخی، بیزی مارقلاندیرماز کی گؤره بیلمه‌ییب دویمایاجاغیمیز نسنه!
سسیمده من می یوخ ایدیم منده می سس بللی دئییلدی. ایسته‌مه‌دن اوزوم یادیما دوشدو؛ دئدیم بو سس یعنی بو اوزوندو! اولاماز! سسیمی اؤز بدنیمله ده اؤرتوشدوره بیلمه‌دیم؛ اوست-اوسته دوشمه‌دیلر. بیر ده نئچه واخت‌دا بئناوا جاماعاتلا بو سسی نئجه قارشیلاشدیرمیشام، اونو دوشوندوم دوردوم! بو، منیم هئچ یانیما اوخشامیردی. یاواش یاواش آنلاییردیم سسیمله نه چکدیردیییمه. بوندان سونرا بس! نه ائده‌جکدیم!؟ سسیمله اؤزوم آراسیندا سؤزلشمه یاپمالی‌یدیم یا دا کئچمیش دوزه‌نی پوزماییب داوام ائله‌سه‌یدیم، بیلمیردیم کی!
هم بو یابانچی سس چوخ اؤنجه روس یازارلاری حاقدا اوخودوغوم ک‌گ‌ب’نین اونلارا یاپدیغی تورلو تورلو آژان نؤمره‌لرینی آنیمسادیردی. دینله‌نیر کیمی اولموشدوم. گیزلیجه دینله‌ییجی جیهازی قوراشدیریب ایچیمه ائریشیب سسینی آلا بیلیردیم. سسیم چوخ گنج ایدی گؤوده‌مدن. گؤوده‌مه یئمیردی دوروشوغو هاواسی. سؤزونو چاتدیرماغا ائورن بیته‌جک‌جه‌سینه تله‌سیردی. بیر ده هئچ جیددی‌یه قوللانیلمامیشدی. هم اونون اوره‌یینی کیمسه بیلمیردی؛ ایچیندن کئچه‌نی ده اؤیله. سسیمی هم سئودیم هم ده یازیغیم گلدی.