ماشینین سیقنالی‌یلا یوخودان آییلمیش کیمی، باخیشلاری قهقهه ایله اوزاقلاشان ماشینداکی گنج‌لرین آرخاسیندان آسیلی قالدی. تک‌یونلو خیاوانی آدلاییب، چوخدا بؤیوک اولمایان و دؤرد باش عائله‌نین چؤره‌ک داغارجیغی حسابلانان اوفیس‌ین آستاناسیندا دوردو. بیرنئچه کره کلیدی فیرلادی. قاپینی آچیب ایچری گیردی. همیشه «احتیاط ایگیدین یاراشیغی‌دیر» سؤزونه عمل ائده‌ر، احتیاطی الدن وئرمزدی. وعده‌یه یاریم ساعات قالیردی هله. آنجاق او همیشه‌کی کیمی تئز گلمیشدی. تر-تمیز و سلیقه‌ایله اوتولنمیش کوتونو آسقی‌دان آسدی. اوستولونو سهمانلادی. حقوق کیتابلارینی یئر به یئر ائله‌دی. اونون حقوق اوزره تحصیلاتی اولماسادا، عالی تحصیللی‌لر دارا دوشنده یانینا گلیب، مصلحت آلاردیلار.
ساعات بئش راده‌لری ایدی قاپی آچیلدی. ایچری گیرن – «سالام! یوبانمادیم کی؟» دئدی. «ایلیاس» -«یوخ! واختیندا گلیبسن. بویور ایلش!» جواب وئردی.
خوش- بئش‌دن سونرا «وقار» ماسانین سولونداکی اوستولدا یئرلشدی. اؤزونو راحات گؤسترمه‌یه چالیشسا دا اوز- گؤزوندن یورغونلوق و نیگارانلیق یاغیردی. یایین قورا پیشیرن ایستیسینه باخمایاراق ایچینی شپه وورموش – قیروو باغلامیش کیمی حس ائدیردی. یوماق کیمی قیوریلیب اوستولون تکینده بوزوشدو.
ایلیاس قوولوقداکی کاغاذلاری بیر- بیر واراقلاییب نظردن کئچیریردی. هردن چاتما قاشلاری بوزوشوب، سوموک دولو سیسقا صیفتینده او قدر ده ایری اولمایان گؤزلری کیچیلیردی. آرا سیرا باشینی دا بولاییب خیسین- خیسین آجی گولوش ده قونوردو اوزونه.
گؤزلویونو اینجه بورنونون زیروه‌سینه دایادی.گؤزلویون اوستوندن زهیملی- زهیملی باخاراق، قوولوقدان بیرکاغاذ گوستریب: – «نه‌دن … آخی نه‌دن؟!» سوروشدو. سانکی بیرقورشون ثقلتی، سیندان جینگیلتیسی وار ایدی بو «نه‌دن؟!» سورغوسوندا. وقارین روحونو ازیب، جمده‌یینه ائنیردی بو آغیرلیق، بو جینگیلتی. او، ایلیاس‌ین ایتی و اوزوجو باخیشلاریندان ساوونماق اوچون باشینی آشاغی تیکمیشدی، آمما یئنه ده او نئشتر باخیشی، اؤز اوزه‌رینده حس ائدیردی. اوندان قاچا بیلمیردی. – «بو دوسیانین هانسی وریندن توتورامسا بالیق کیمی الیمدن زویوشور دوشور.» دئدی ایلیاس. وقار اؤزونو مودافیعه ده ائده بیلمیردی؛ کؤکسونده بیر آغیرلیق حس ائدیردی.
بیر مشتری‌نین ایچری گیرمه‌سی دوروما بیرآز یوموشاقلیق گتیردی. مشتری دردینی قورالاییب، شیکاتینی سؤیله‌دی. مشتری‌نین گلمه‌سی ایله بیر آز اؤزونو اله آلدی وقار. یازی اثناسیندا تزه گلن آدام دوداق آلتی میزیلدانا – میزیلدانا: – «الله بو دونیادا آدامی نه ساوادسیز نه ده آدامسیز ائله‌مه‌سین» دئدی. ایلیاس گولومسه‌ییب، زارافات‌لا سوروشدو:
– نه‌دن عمی‌جان؟
مشتری، دریندن بیر آه چکیب فیسیلدایارکن، -«ساوادسیزین باشی بؤرکسیز قالیر قادان آلیم، آدامسیزین دا ایشی.» دئدی. ایلیاس -«ائله‌دی عمی‌جان، ائله‌دی» دئیه‌رک، «عریضه‌نی یازارام، انشالله صاباح گل آپار!» دئییب، مشترینی یولا سالدی.
داها گوندوزله گئجه‌نین دوداق -دوداغا گلن واختی ایدی. گونش یئنی بیر سحری باشلاماغا دینجلمک اوچون یوخویا گئدیردی. ایلیاس اوزونو وقارا توتوب دئدی:
– قوولوقداکی‌لاری بیر ده دریندن باخمالی‌یام، آمما دوزگون قرار اوچون حادثه‌نی بوتون دئتاللاریلا، هئچ نه‌یی اونوتمادان بیرداهادا دئمه‌لی‌سن.
ایلیاس، سسینی دیشلری آراسیندا سیخاراق – «بوتون دئتاللاریلا» سؤزونو داهادا وورغولادی.
قاش قارالمیش، وعده اؤتموشدو. ایلیاس وقارلا ساغوللاشیب، اونونلا اوفیس‌ین ائشییینه قده‌ر آیاقلاشدی، سونرا یئنی‌دن وعده‌لشیب آیریلدی‌لار.
ایلیاس واختین کئچمه‌یینه باخمایاراق هله ده اوفیسی او باش بو باش آددیملاییردی. دوستونون نئجه ده دلی‌سوو، ایستی قانلی و چیلغینلیغینی یاخشی بیلیردی. حاقسیزلیغا دا نئجه امانسیز و عنادکار اولدوغونو دا اونوتمامیشدی….:
{ابتدایی صینیفی بیرکیلاسدا اوخویوردولار. شیدیرغی یاغیش یاغیردی. یوخاری صینیف اوشاقلاریندان بیری صینیف یولداشینی ایته‌له‌ییب پالچیغا بولاشدیرمیشدی. وقار دا دؤزمه‌ییب آغیز- بورنونو ازیشدیرمیشدی. آناسینی مدرسه‌یه چاغیریب، اونا اوشاغی‌نین تربیه‌سیز اولدوغونو دا سؤیله‌ینده، او یئنه ده گناهسیزجاسینا زوراکیلیغا معروض قالدیغینی سؤیله‌ییب و اؤزونون حاقلی اولدوغونو دئمیشدی مدیره.}
ایلیاس بونلاری خاطیرلایارکن وقارین بئله بیر دولاشیق دورومدان نئجه قورتاراجاغینا یول آختاریردی. بیر آز دا اونونلا انصافسیزجاسینا داورانماسیندان پئشمانچیلیق حسی کئچیریردی؛ آنجاق دوستونون دا بوز کیمی ارییب یوخ اولماسینا دؤزه بیلمیردی.
***
گئجه یارینی اؤتموش، دان یئری یاواش –یاواش آغارماقدا ایدی؛ وقارین یوخوسو سانکی عرشه چکیلمیشدی. فیکیر خیال آردی آردینا بوتون وارلیغینی چولقامیشدی. گؤزلری اؤنونده گول یارپاغی کیمی سولان «آی‌نور»ونو، جانیندان آرتیق سئودییی «نازلی»سینی و داها عادت ائتدییی «نورگول» ننه‌نین آغری سیزیلتی‌لارینی دوشونرکن، اؤزونو درین بیر قارانلیق قویویا دوشموش کیمی حس ائدیردی. دوستاق اولما احتیمالینا دا دوشوندوکده، بو قویو داهادا درینلشیر، داهادا قارانلیقلاشیر ظن ائدیردی. باشی آغیرلاشیب، گؤزلری سانجیر، کؤکسو سیخیلیر و سونو گؤرونمه‌ین اضطراب اونو اؤز جایناغیندا سیخیب، سیخیب سیخیشدیریردی. بیردن اوره‌یینه اوشوتمه دوشدو؛ جانی قیزیشدی. اؤز- اؤزونه – «ایلاهی، اولمایا نورگولوم ده منیم کیمی آتاسیز بؤیویه، نازلیم آنام کیمی قاپی‌لار دوشگونو اولا؟!» سیزیلدادی. قه‌هر بوغازیندا دویونلندی؛ نفه‌سی آغیرلاشدی؛ سیر-صیفتیندن قان قاچدی.
یان اوتاقدان آناسی نورگول‌ون سیزیلتی‌لاری وقاری اؤزونه قایتاردی:
– نه اولوب آی ننه!؟
– آیاقلاریم زوق-زوق زوققولداییر بالا! سومویوم سانجیر؛ آز قالیر جانیم چیخسین. بیر یوللوق اؤلوب قوتارسئیدیم سیزده راحات اولاردیز، من ده»
– آی ننه سن آللاه ائله دئمه! آخی نه اولوب کی؟ صاباح درمانلاریوی آلارام توختارسان.
وقار آناسینا توختاقلیق وئریردیسه، آنجاق سحر آچیلاجاغیندا هانکی دویونلری‌نین آچیلماسینا هئچ اینانمیردی. گؤزلری اوتاغین تاوانینا تیکیلی قالمیشدی. نورگول ننه‌نین سیزیلتی‌لاری دا ائله آتاسیندان میراث قالمیش بو نملی، گون دوشمز بیر اوتاق بیر دهلیزلی ائوین تؤحفه‌سی ایدی. نورگول ننه گوزللییینی، جاوانلیغینی قورتوم –قورتوم اودوب، گاه وارلی‌لارین ائو- ائشیکلرینی تمیزله‌مک‌له، گاه دا تارلالاردا تیرشته ووروب، پامبیق ییغماق‌لا چالیشمیشدی کی وقارا یئتیم‌لییین نه اولدوغونو دادیزدیرماسین. اونو ائنلی کورک، دولو گؤده‌لی، ایری گؤزلو بیر اوغلان بسله‌میشدی. آنجاق اورتا مکتبدن آرتیق اوخودا بیلمه‌میشدی. اوندان سونراسی دا جانینداکی سیزیلتی‌لارلا، قیچینداکی زوققولتولارلا ال به یاخا اولموشدو.
وقار تحصیلینی بوراخیب، عائله‌نی دولاندیرماق اوچون ایشلمه‌لی ایدی. بیر نئچه آی دؤیمه‌میش قاپی قالمامیشدی. آنجاق ایش تاپا بیلمه‌میشدی کی بیلمه‌میشدی. آرا بیر تورپاق صاحیبلرینه سوچو گئدیر، اونلارین تارلا ایشلرینی گؤرور، محصوللارینی داشیما ایشلریله مشغول اولوردو. آنجاق دولانیشیغی یاخشی دولانمیر، نورگول ننه‌نین درمانلارینی دا یئرلی یئرینده آلماغا امکان تاپمیردی.
گونلر بیر- بیرینی قووها قوودا ایدی. آی‌لارین، ایللرین نئجه اؤتدویونو بئله دویموردو. تاپیلان هر بیر ال ایشینه و فعله‌لییه یوخ دئمیر، یالنیز عائله‌سی‌نین معاشینی تامین ائتمه‌یه فیکیرلشیردی. گاه ایش اولور، گاه دا بئکار قالیردی، آنجاق بیر تهر کئچینیردی. بیرده گؤزونو آچیب گؤردوکی یاتاغیندا «نازلی»سی، قوجاغیندا ایسه «آی‌نور»و دا وار هله. حال بوکی عائله بودجه‌سینده اوچونجویه یئر یوخ ایدی. اؤتن هر دقیقه ساحیله چیرپینان دالغا کیمی شاپالاق اولوب، اوزونه چیرپیلیردی. حیات داهادا آغیرلاشیر، اؤده‌نیش‌لر گلیری اوسته‌له‌ییردی. نورگول ننه‌نین ده دورومو گونو-گوندن آغیرلاشیردی.
نهایت، ابتدایی صینیفده بیرگه اوخودوقلاری بیر دوستون آتاسی‌نین سیفاریشی ایله اؤزل شیرکتلرین بیرینده مشغول اولماق اوچون همن شیرکته یوللاندی. شیرکتین حیطینه گیردی. ایشچی‌لردن رئیسین اوتاغینی سوروشدو. آز قالا اوره‌یی آغزیندان چیخاجاقدی. بوتون وجودونو هیجان و اضطراب بوروموشدو. قاپینی دؤیوب ایچری گیردی. سالام وئریب، دیک دایاندی. اوستول ایچینده هلله‌نن اورتا یاشلی، بوغو بورما، قیرمیزی یاناقلی و داز بیر کیشی قاشینی دویونله‌ییب -«نه ایشین وار؟» دئدی. وقار تانیشی‌نین سیفاریشینی، ائله‌جه‌ده گلیشی‌نین سببینی آنلاتدی؛ دورومونو ایضاح ائدیب، اونون یانیندان الی بوش قاییتماماسینی خواهش ائتدی. رئیس، وقاری باشدان آیاغا سوزوب، دوداقلارینی بوزوب، قاشلارینی دویونله‌دی. ماسایا دیرسکله‌نیب: -«والله ایش مسئله‌سی بیر آز موشگولدو.» دئدی. یئنی‌دن اوستولا دایانیب، بارماقلارینی باماقلارینا ایچ ائله‌دیکده: -«البتده حاج‌آغا سیفاریش ائله‌ییبسه …» دوداغینی بوزوب، قاشینی دویونله‌ییب، -«داها نئیله‌مک اولار؟!» دئدی.
سون کلمه‌نی دئیینجک وقار آزی اون دفعه اؤلوب دیریلدی. روحو بدنیندن چیخدی. آنجاق سونوجدا -«داها نئیله‌مک اولار؟!» سؤزو اونو گؤیلره قانادلاندیردی. بونا باخمایاراق اؤزونو آغیر و تمکینلی آپارماغا دا چالیشیردی. سونرا رئیس وئره‌جه‌یی معاشی و وقارین گؤره‌جه‌یی ایش حاقیندا دانیشدی. آنجاق بونلار وقار اوچون هئچ بیر اؤنم داشیمیردی. -«اؤزون بیلرسن رئییس. نئجه مصلحتدیر ائله ده اولسون.»، دئییب، راضیلیغینی بیلدیردی. اصلینده باشقا یولو دا یوخ ایدی .ایشه باشلاماق ایچون بیرسیرا کاغاذی هئچ اوخومادان، و بیر آغ ورقه‌یه هئچ -«بو کی آغ کاغیذدیر؟» دئمه‌دن، قول چکدی. اؤز- اؤزونه -«تکی، ایش اولسون. بونلار اؤنملی دئییل. رئییسه ده کی تاپشیریبلار…»، میزیلدادی.
***
وقار قاباقجادان پیلانلاشدیغی کیمی ایلیاسلا بیرلیکده نظمییه مامورلارینین عدلیه طرفیندن گتیردییی چاغیریش ورقه‌سی‌له برابر محکمه‌یه گئتدی. حاکیم ورقه‌یه و قوولوقداکیلارا نظر سالیب، وقاردان حادیثه‌نی اولدوغو کیمی دانیشماغینی ایسته‌دی. وقار اوستولدا بیر آز اؤزونو دبردیب، سانکی هوجوما کئچه‌جک کیمی یئرینی برکیتدی…
{….. قیشین اوغلان چاغی ایدی. گون ایشیلداسا دا سازاغ کسیب تؤکوردو آدامی. شیرکتین خیدمتچیسی «مشه ‌شوکور» تئلفونا چاغیردی. دسته‌یین او طرفیندن نازلی‌نین آغلار سسینی دویدوم. درحال ائوه گئتدیم. آنامی هوشدان گئتمیش کیمی گؤردوم. جانینداکی آغری‌لار – سیزیلتی‌لار آیاقدان سالمیشدی آروادی. بیر نئچه آی دا داوا- درمان یئمیردی. دوغروسو پولومون اولمادیغیندان داوا- درمانینی آلا بیلمیردیم. بیر نئچه آی ایدی کی رئییس معاشلاریمیزی وئرمیردی….}
ووقار هر بیر کلمه نی دئدیکده سسینده خیریلتی، گؤزونده یاش حالقالانیردی. اودقونوب کؤکس اؤتوروردو.
{…. جئبیم بوش ایدی. داوا- درمان ائله بیل بیر ایت اولوب بئینیمده مدام هوروردو. داها دؤزوموم قوتارمیشدی. حیاتدان دویموشدوم. درحال شیرکته قاییتدیم. رئییسین اوتاغینا گئتدیم و معاشیمین هئچ اولماسا بیر قیسمینی وئرمه‌یی اوندان خواهیش ائتدیم. رئیس بورما بوغلارینی ائشه‌له‌ییب دیک گؤزومه زیللندی. -«اوغول، بیلیرسن کی دولت بیزه پول وئرسه، بیز ده ….»، سؤزونو تماملاماغا قویمادیم. یالوارماغا یاخارماغا باشلادیم. التماس ائله‌دیم….}
بونلاری دئدیکجه وقارین هیجانی قالخیر، دیل- دوداغی داهادا اسمه‌جه‌یه دوشوردو. قه‌هر بوغازیندا دویونلنمیشدی.
{… نه قده‌ر یالواردیم یاخاردیم قولاق آسمادی. اؤزومدن چیخمیشدیم. بئینیم ایشدن دوشموشدو. قیشغیردیم: «بیلیرسن آنام اؤلور ااای، اؤلور. اونو حکیمه آپارمالی‌یام.» بیردن رئییسین اوزو دؤندو. ائله بیل قیرمیزی یاناقلارینا قان سیچرادی. او دا چیغیردی: «نئینیم اؤلور. جره اؤلسون جهننمه اؤلسون…..» داها گؤزومو قان توتموشدو. یاخاسیندان یاپیشدیم. نه ائده‌جه‌ییمی بیلمیردیم. یئره سریلدییینی گؤردوم، بیرده باشی‌نین دالیندان قان آخماسینی. در حال، اوست- باشیمی توپارلاییب اوتاغی ترک ائتدیم. آستانادا مشه شوکورو گؤردوم. بیرگؤزوم دالدا بیر گؤزوم قاباقدا دارکوچه‌لردن ائوه گلدیم….}
حاکیم الی‌له دایان! اشاره‌سی وئردی؛ سونرا قوولوقدان بیر ورقه چیخاریب، وقارا گؤستردی. -«سن کی بوتون حوقوقلارینی آرتیقلاماسی‌لا آلمیسان! قول دا چکمیسن»، دئدی. وقارین باشینا سانکی قاینار سو تؤکولدو. دیلی توتولدو. -«یانی نمنه؟!» دئمه‌یه بئله، امکان تاپمادی. او آغ ورقه‌نین امضالادیغی گون یادینا دوشدو. باشینا نه اویون گلدییینی باشا دوشوردو. یولداشی ایلیاسین اوزونه باخا بیلمیردی. اونون دا بوتون جهدلرینی پوچا چیخارمیشدی. داها ایش ایشدن کئچمیشدی. مونصیف‌لر هیئتی قرار اوچون مشورت اوتاغینا کئچمیشدیلر ….
***
نازلی، وقارین هؤنکورتویله یوخ! …یوخ! من آلمامیشام…! من آلمامیشام…! چیغیرتیسینا یوخودان آییلدی. وقاری تؤشویه –تؤشویه قان- تر ایچینده گؤردو. وقار اللری ساچلاریندا دریندن کؤکس اؤتوردو. نازلی‌نین قورخولو معصوم باخیشلارینی سئزدی. اللرینی اوزونه سورتدو. سونرا اللرینی گؤیه آچیب، -«خودایا مین شوکور!» دئدی. بیر داها ایلیاس‌لا صاباحکی وعده‌سینه فیکیرلشدی. او صاباح ایلیاسا مسئله‌نین نه اولدوغونو بوتون دئتاللاری ایله آنلاتمالی ایدی…
سون
خرداد ۱۴۰۰