(۱)
قیزینین چانتاسی آباژورون یاشیل ایشیغی آلتیندا گؤزونه چارپدی. اوخول أشیالارینی سلیقه ایله ییغیب، سالونون بیر کونجونه قویموشدو. چانتانی آچیب، أشیالاری بیر ده گؤزدن کئچیرمه قرارینا گلدی، هر شئیین حاضیر اولماسیندان أمین اولماق ایسته‌ییردی. تَپ-تَزه دفتر‌لر، رنگ‌به‌رنگ قلم‌لر، سو قوم‌قوماسی، یئمک قابی، هر شئی حاضیر ایدی. ألینی دوم-دوز اوتولنمیش، قیرمیزی اوخول فورماسینا چکدی. بارماق‌لاری، قیزینین گؤوده‌سی ایچینده وارمیش کیمی، محبت‌له فورمانین اوستونده سوزولدو. مطبخه ساری گئتدی.
چایداندا قالان چایی ایستکانا سوزدو. ایچدیگی چای‌لارین نئچه-جی اولدوغونو بئله هئچ بیلمیردی، هرحالدا بیر چایدان چایی قورتارمیشدی. لوش ایشیقلی مطبخده، ماسانین دالیندا اوتوروب، سویودوجو موتورونون ضعیف ویزیلتیسینا قولاق آسیردی، ائوین سس‌سیزلیگینده سس‌لر داها آیدین ائشیدیلیردی. گؤزو ماسانین اوستونه سریلمیش سوفرانین گول‌لرینده گزینیردی. ساری، نارینجی یئمک لکه‌لرینی گؤروب، «صاباح سوفرانی یومالی‌یام» دوشونوردو. قندی ألینه گؤتوروب چایا باتیراندا، قند بارماق‌لاری‌نین آراسیندان بوراخیلیب چایا جومدو، قندین چایدا أریییب یوخ اولماسینا باخیب، دوداق آلتی «سئوینه‌جه‌یم» دئدی. چایی ایچیب، ایشیق‌لاری سؤندوروب، یاتماق قرارینا گلدی.
حیات یولداشی چوخدان یاتمیشدی، یاواشجا یاتاغین قیراغیندا اوتوروب، موبایلی‌نین ساعاتینی آلتی یاریما قوردو، یاتاغا اوزاندی، یئنیدن موبایلی گؤتوروب، ساعاتی ۶:۱۵ دقیقه‌یه چکدی. راحات بیر مؤوقع سئچیب، یاتماغا چالیشدی، ألینی یاسدیغین آلتینا قویدو، اوزو اوسته اوزانیب، گؤزلرینی یومدو. اؤزونو یاتماغا زورلادی، صاباح، قیزی اوخولا باشلایاجاقدی. دئمک اولار، او قیزیندان چوخ هیجانلی‌ایدی، اما بو هیجانی یاتیشدیریب، یاتمالی ایدی. ساغ طرفه، حیات یولداشینا ساری دؤنور، همیشه‌لیک عادتی اوزَری، نفسینی اونون نفسی‌ایله اویغولاشدیریب، یاتماغا چالیشیر. اما اولمور، ایچینده‌کی جوشقو اونون راحات و دوزنلی نفس آلماغینا مانع اولور. اوقدر چایی ایچدیگی اوچون اؤزونو قینیییر. گؤزلرینی تاوانا زیلله‌ییب ذهنینده بیر حئکایه باشلادیب، اونو ذهنینده جانلاندیراراق یوخویا دالماغا چالیشیر، اما بو گئجه ذهنینده‌کی قوش بیر بوداقدا اوتورماق بیلمیر. واز کئچیب، گؤزلرینی یومور. شیدیرغی یاغیش اوتاغین پجره‌سینی دویجله‌ییر. یورغانی باشینا چکیر. یاشیل بیر کیتاب حیطتین اورتاسینداکی حوووضا تولازلانیر. حووضون یاغیش‌دان دالغالنمیش سویو داها دا دالغالانیر، کیتابین یاپراق‌لاری ایسلانیب، یاواش-یاواش سویا جومور. یاشیل کیتاب حووضون ماویلیگین‌ده بوغولور. بیر کیتاب داها حیط‌ده اوچوشور و بیری داها. یاشلی گؤزلرینی، یوموق گؤز قاپاق‌لاریینین دالیندا گیزله‌دیب، داملا‌لارین یاناق‌لارینا آخماماسینا چالیشیردی. آجی بوتون قلبینی جایناغینا آلیب، قلبی سیخسنتی‌دان پارتلاییردی. چکدیگی آجی زهر کیمی قانینا آخیب، بوتون اورقان‌لاریندا دولانیردی. قیچ‌لارینی قارنینا ییغیب، ألی ایله یورغانی قارمالاییردی. گؤزلرینی آچیب دیوارا ساری دوندو. قارانلیق گؤزلرینی هجوما آلدی.
– آه آتا، کئشکی سنده ده بیر شمس کرامتی اولاردی، او کیتاب‌لار او حوووض‌دان، او یاغیش‌دان قورخو چیخاردیلار، من ده مولانا کی «قیل و قال» دان چیخیب، «وصف و حال» گیرردیم. اؤز-اؤزونه دئدی.
یاغیشلی بیر پاییز آخشامی ایدی، اؤفکه‌لی گؤیون قاباران پارلاق دامارلاری هاوادا چیرپینیردی.
– هله اوقدر بئ‌‌غیرت اولمامیشام، قیزیم شعر درنک‌لرینده اؤزگه اوغلانا عشق شعرلری اوخویا. دده‌م گورو بیر داها دا ائشیدم، بیلم او قورومساق‌خانا درنَگه آیاغین قویوبسان، آیاغین سیندیرارام. بو گوندن ده درس، کنکور کیتابیندان باشقا بیر کیتاب بو ائوه گیرمه‌یه‌جم. باشین سال آشاغییا، درسینی اوخو. ائله ایش گؤرمه قویماییم بو درسی ده اوخویاسان.
کیتاب‌لار اوتاغین کیتابلیغین‌دان بیر-بیر حیطه تولازلانیردی، بیر نئچه‌سی حوووضا دوشوب، قالانی دا یاغیشین آلتیندا ایسلانیب، أزیلن صفحه‌لری یئره یاپیشیب، یاسلی‌لار کیمی پالچیغا بورونوردو. اوتاغیندا بوزوشوب اوتورموشدو، آتاسینن قورخونج، قارانلیق بیر قویو کیمی آچیلان گؤزلرینین گیله‌لری اونو دهشتلی بیر بوشلوغا سوروکلویوردو. او آن‌لار‌دا بیر دوز خط گؤزونون اؤنونده اوزانیب گئدیردی. سی‌سی‌یو اوتاق‌لارینین مانیتوروندا، قلبین دوردوغونو خبر وئرن او اوفوقی خط. اونون قلبیین‌ده‌کی حیس‌لین اؤلوم خطی. او گون اوره‌گینده ایکی سئوگینی اؤلدوردو، بیری یازیچی اولماق سئوگی‌سی، بیری ده وولکان پوسکورن باخیش‌لارییلا قلبینه اود سالان او شاعیر اوغلانین سئوگی‌سی. او گوندن ایستک و آرزولارینی اوز یالقیزلغیندا، دومانلی باخیش‌لارینین اوجقاریندا گیزلتدی، حسرتی، حسرت اوستونه قویوب، بیریکدیردی.
یورغانی اوستوندن آتیر، دیرناق‌لاری یورغانا ایلیشیر، بیری‌نین قیراغی سینیر. سینان دیرناق تؤرپو کیمی روحونا، فیکرینه چکیلیب، دؤزونولمز بیر عذابا چئوریلیر. قارانلیقدا یانینداکی چکمجه‌نی قاریشدیراراق دیرناق قایچی‌سینی تاپیر. دورور، توالته گئدیب، دیرناق‌لارینی توتماغا باشلاییر. گؤزو آیناداکی قادینا ساتاشیر، آلنین‌داکی نازیک جیزگی‌لره، قومرال ساچ‌لاری‌نین آراسینداکی آغ تئل‌لره، گؤزلرینین آلتین‌داکی گؤیومتول حالقالارا. آلا گؤزلری بیر آز سولوب دورغون بیر گوُلو یانسیتسا‌دا، اوزو اولغون بیر قادین اوزو اولسا دا، باخیش‌لارینین درینلیگینده هله ده او اون‌سککیز یاشلی قیزین آرزولاری یاشاییردی…
(۲)
یازی‌لارلا دولو، چیرکدن آغ رنگی سارییا دؤنموش تؤکوک دیوارلی صینیفدا، قارا مغنعه‌لی قیزلار، پاسلانمیش، اوست‌لری یادیگارلیق قازینتی‌لارلا دولو نیمکت‌لر دالیندا سیخیشیب اوتورموشدولار. مبادا معلم تخته قاباغینا چاغیرا دئیه، هره‌سی گؤزلرینی بیر طرفه تیکیب، معلم‌له گؤز-گؤزه گلمک‌دن چکینیرلر. بیر تک اونون دالغالی، جوشغون گؤزلرندن سئوای. خانم قراجه‌داغی قارا پارلاق ساچ‌لارینی مغنعه‌نین آلتینا تیخیشدیریب، باخیشینی گؤزلوگونون اوستوندن صینیفدا گزیندیریر. او گؤزلرینی معلمین اوزونه زیلله‌ییب، صبیرسیزجه خانم قراچه‌داغی‌نین ایری گیله‌لی قارا اوزوم کیمی أتلی، پارلاق دوداق‌لاری‌نین آراسیندان آدی‌نین چیخماسینی گودور. سوبانین ایستی‌سی ایله قیزلارین نفسی بیرلَشیب، بورکولو صینیفا مورگولنمه هاواسی چؤکموشدو.
– پاشایی، دور پنجره‌لردن بیرینی آچ. معلم دئدی.
قیزلازین بیری صینیفین او تاییندان: «خانیییم، سن الله قوی صبا گلیب اینشاسین اوخوسون. هامی‌نین یوخوسو قاچار، بیز ده پنجره قاباغیندا سویوقدان دونماریق.» گولوشمه سسی گؤیه قالخدی. دوغرودان دا، او یازی‌لارینی اوخویاندا سانکی اطرافینداکی هاوا دالغالانیب، یوخو بورکوسو صینیف‌دان داغیلاردی. صینیف جانلانیب، چیرک باسمیش دیوارلار بئله ایشیلداییردی. گؤزلریندن داها دنیز یازی‌لاری، اوزمک هوسی وئریردی اینسانا، خیال دالغالارینا توتوشدوروب آپاریردی اینسانی.
خانم قراچه‌داغی گولومسه‌نه‌رک: «اینشا اوخوماقدان قاچماغا یاخشی بهانه تاپیبسیز» دئدی، سونرا «صبا اینشاسین اوخوماقدان قاباق اونا و سیزلره بیر یاخشی خبریم وار، صبانین اوخول‌لار آراسی حئکایه یاریشماسینا گؤندردیگی حئکایه، بیرینجی مقامی قازانیب. بو گون وزارتخانادان بیر مکتوب گلیب، صبانی تهرانا، اؤدول تؤره‌نینه دعوت ائدیبلر. صبا، سنی اورک‌دن تبریک ائدیرم.»
کیلاسی آلقیش سس‌لری بورودو. صبا سئوینج‌دن قیشقیریب، معلمین قوجاغینا آتلادی. اؤزونه حاکیم اولا بیلمه‌ییب معلمین اوزونه اوپوش‌لر یاغدیردی. خانم قراچه‌داغی دوروخاراق، صبانی اؤزودن آییریب، «یاخشی‌دا اؤزوندن چیخما، ایندی اینشانی اوخو گؤرک بوگون بیزه نه یازیبسان»
(۳)
او گون‌لری خاطیرلایاراق گؤزلرینین دنیزیندن، دوداق‌لارینا گولوش‌لر آخیر. سویو آچیب اوزونه بیر آووج سو سپیر، ائشیگه چیخیب سالونون کونجونده‌کی کیتابلیغین أن اوست قاتیندان رنگی سولموش أسکی بیر دفتر چیخاردیر. آتاسینین بو دفتردن خبری یوخویدو، یوخسا بو دفتر ده او کیتاب‌لار کیمی یاغیش آلتیندا داغیلیب یوخ اولاجاقدی. او پاییز آخشامیندان بیر بو دفتر قالدی بیله‌سینه، بیر ده اوره‌گینه دامغالانمیش کدر داغی. بوتون شعرلری، حئکایه‌لری، یازی‌لاری بو دفترده یازیلمیشیدی. یازیچی اولماق هوسی بو دفتری یازا-یازا اوره‌گینده کؤک سالمیشدی. اما نه یازیق‌کی قوجامان بارلی بیر آغاج اولمادان، کؤورک بیر فیدان اولاراق کسیلیب، قورودولدو.
دفتری تومارلاییب، بیراز ورقله‌یندن سونرا، بوکوب یئرینه قویور. ساعاتا باخیر، بیری اون بئش دقیقه کئچیر. کئچیب سالونون بوجاغینداکی موبلون اوستونده اوتورور. یانینداکی آباژورون ایشیغینی یاندیریر، یاشیل ایشیق آباژورون اطرافیندان ساللانان کریستال‌لاردا مین پارچایا بؤلونور. موبایلینی ألینه آلیب، تئلئگرامینی آچیر. بیر حئکایه کانالیندان، حئکایه اوخوماغا قرار وئریر. بلکه یوخو گؤزلرینه دولا. ایلگی‌سینی چکن بیر حئکایه تاپماق اوچون کانالی آلت-اوست ائدیر، بارماغی ایله اسکرینی اوسته چکیر، یازی‌لار سرعتله گؤزونون قاباغیندان کئچیر، بیردن بیر یازی گؤزونه ساتاشیر، «قیسا حئکایه یاریشماسی». بیر ادبی درنک طرفیندن بیر اعلان وئریلیب، مهر آیی‌نین سونونا قدر زمانی وار، سئچیلمیش اثرلر بیر کیتابدا یاییملاناجاقدی. بو یاریشما اون‌بئش ایل بوندان قاباق اولسایدی، هئچ تردید ائتمه‌دن اونا قاتیلاردی، اما ایندی نئجه؟ کؤکسونو اؤتورور. أل‌لرینی گؤزلرینین قاباغینا توتور. گونده‌لیک ائو ایش‌لریندن ظرافتینی ایتیرن بو بارماق‌لار بیر داها قلم توتا بیلرمی؟ بئینی نئجه؟ او یارادیجیلیق هله ده او بئیینده دیری‌دیرمی؟ قلبینده‌کی حیس‌لر هله ده اوقدر دورو و ایشیق‌دیرمی؟
بالکونون قاپی‌سینی آچیر، ملایم بیر أسینتی، آی ایشیغی گؤزلرینده رقص ائدن تور پرده‌نی اوخشاییر. پاییزین سرین هاواسی اوزونه جالانیر. قونشو ائولرین پنجره‌لری یوخودادیر، بیر تک اونون یاشیل ایشیغی اونونلا یانیر. مطبخه گئدیب سماوری یاندیریر، بیر چای دمله‌ییب، ایستکانا سوزور. بیر دفتر و قلم گؤتوروب بالکونا چیخیر. سایریشان اولدوزلارین آلتیندا، آغ ماسانین دالیندا اوتورور. یئل بالکونون مَهَججرینه دولاشان تیترک، احتراصلی سارماشیقا ساریلیب قولاغین‌دا محبت ماهنی‌لاری پیچیلداییردی. درین بیر کؤکس آلیب، دیبچکده‌کی شمعدانی‌لرین قوخوسونو ایچینه چکیر. او یوخوسوز گئجه‌لرین حئکایه‌لرینی کاغاذا آخیتماق وقتی گلمیشدیر. قلم أل‌لرینده تیتره‌ییر، دامارلانمیش أل‌لریندن، سؤزجوک‌لر یاواش-یاواش آخیب آغ کاغاذی جانلاندیریر. اون‌بئش ایللیک حسرتین باشی آچیلیر، دورمادان یازیر. او حسرت دامغاسیندان یازیر، بو گونه‌دک قلبی‌نین گیزلی صاندیقدا ساخلانان آرزولاریندان یازیر.
سوپورگه‌چی‌نین خزل‌لری سوپورمک سسی‌ایله اؤزونه گلیر، گونشین قیزیل ایشیغی گؤزلرینین ماوی دنیزینده چاخناشیر. سون کلمه‌لری یازیر، حئکایه‌سی‌نی بیتیریب، قلمی یئره قویور. دوداغیندا بیر گولوش، قیزینی اویاندیرماغا گئدیر.
سون
۷/۴/۱۴۰۰
یک پاسخ
چوخ گوزل،لای بالای خاطره ، همده سونی اومید وئریجی بیر حکایه اوخودوم . خصوصاً گونشین دوغماسی ایله ، ینی دن یازیچی اولماق باجاریغی گوزل شکیلده بیر بیرین تاماملاییر . حییفلر کی اوخوماغینا بیر ایل یوبانمیشام . آلقیشلار