قاچیر. من ده دالیسیجا. باشینین دالین‌دا سیخی‌جا باغلانمیش اوزون آت قویروغو، سارقاچ کیمی، بیر ساغا- بیر سولا بئلین‌ده اویناییب، منی هیپنوز ائدیر. گؤزلدیر، قومرال، آرادا بیر ساری ساچ‌لاری، گونش ووران شلاله کیمی، بئلین‌ده پاریلداییردی. گؤرسن قارا ماسکا دالین دا گیزلنن اوزو، گونش گؤزلوگو دالین‌دا گیزلنن گؤزلری ده گؤزلدیرمی؟ نئچه‌نجی گئجه‌ایدی اونو بوردا قالابالیغین ایچین‌ده گؤروردوم. او قالابالیق دا، آل آلوولارین، توستونون آراسین‌دا، ائفیرلی ، اوچوجو بیر وارلیق کیمی‌یدی. ألیمی آتیب توتماق ایستسم، گؤی‌‌لره اوچاجاق سانکی. اونو گؤرنده ایستمزدن، ألیم‌ده‌کی سیلاحی برکدن سیخیردیم. اونون گؤزل ساندیغیم اوزونه نفرت ائدیردیم. منی سحرلدیگینی حس ائدیردیم. قریبه، ضدیتلی دویغولاری روحوم‌دا اویاندیریردی. اونا بسلدیگیم دویغولاری ایچیم‌ده بوغوماغا چالیشیردیم. دویغولاریما گؤره اؤزوم‌دن اوتانیردیم، آخی او منیم دوشمانیم ساییلیردی. من اونو سئومه‌ملیدیم.
اونون‌دا مندن نفرت ائتدگینی بیلیردیم. امما سونرا دوشوندوم او مندن نفرت بئله ائتمیر، اونون گؤزون‌ده، منله، یانیم‌دا دایانان یولداش‌لاریمین آراسین‌دا هئچ بیر فرق یوخویدو. بیز هامیمیز اونا دوشمانیدیق. او قوخونج کاسکا‌لار، ائیبجر قارا گئیم‌لر، من‌لیگیمیزی ألیمیزدن آلمیشدی. هئیکل کیمی، خیابان‌دا دوروب، کوماندیرین أمرینی گؤزلین عسگرلریدیک. وور دئسه ووروردوق، اؤلدور دئسه اؤلدوروکوک. ایشیمیزین نه‌دنینی بیلمدن، ووروب، اؤلدوردوگوموز انسانی تانیمادان. یالنیز بیر روبات کیمی، أمرلره اطاعت ائدیرئیک.
نه‌دنینی بیلمدیگیم بیر قورخو ایچیمه دولموشدو. گؤزومو سارقاچ ساچ‌لارین‌دان آلا بیلمه‌دن قاچیرام. اطرافیم‌داکی هر شئی یوخ اولموش بیر من وارام، بیر ده او ائفیرلی وارلیق. داها نه أل‌لری یومروق‌لو باغیران‌لار وار، نه سیلاح سس‌لری، نه بیبر گازی قوخوسو. نه ده موتورسیکلت‌لرین نریلتیسی. ایندییه قدر اونونلا بئله یاخین مسافه‌ده اولمامیشدیم. نفس‌لرینین سسینی ائشیدیرم. بونا دایانا بیلمیرم.اون‌دان قورخمامالییام، یوخ من اونو سئومملییم. او منیم دوشمانیم‌دیر، او منیم دوشمانیم‌دیر. او منیم دوشمانیم‌دیر. دورمادان بو سؤزو اورگیم‌ده تکرارلایرام.
«وور، وور اونو، سیلاحینی چک، وور، وور» کوماندیرین سسیدیر. أطرافیما باخیرام، امما او دار کوچه‌ده، من و اوندان سونرا کیمسه یوخویدور. بئینیم‌ده‌کی سس أل چکن دئییل، «نیه باخیرسان، سنه وور دئیرم. سن بیر عسگرسن، أمریمه اطاعت ائت.»
سیلاحی چکیرم، بوتون گؤوده‌می بوروین، اورک دؤیونتولریم، پارتلاییش سسینه قاریشیر. سس دام-دووارا دییب، قولاغیما یانسیییر. تئتیگی چکیرم، اؤزوم اولدوغونا اینانا بیلمیرم. ائفیرلی داها قاچمیر، منه ساری دؤنور. ماسکاسی، گونش گؤزلوگو اوزوندن دوشموش. جانسیز گؤزلری، گؤزلریمه سانجیلیر، سانجیر، زهرله‌ییر. دیرک‌دن آسلانان، سارامتیل ایشیقلی چیراق، جان وئریرمیشجه‌سینه یانیب-سؤنور. بیردن بیره کولک أسمیه باشلاییر. خزان وورموش، قوجا چینارین سارالمیش یاپراق‌لاری، اؤلوم دانسی ائدیرمیش کیمی، ساللانا-ساللانا یئره سوورولدو. ائفیرلی یئره یخیلیر. ساچ‌لاری گونش شعاع‌لاری کیمی اطرافینا دؤشه‌نیر. کاسکامی باشیم‌دان گؤتورورم. دیزلریم تیتره‌ییر. یئره سریلمیش ساچ‌لارینین آراسین‌دان، اینجه قان آخین‌لاری آسفالتی ناخیشلاییر. آخین‌لار بیر بیرینه قووشوب، ایرماغا دؤنوشور، جوشور، سئل اولور، قان سئلی، خیابان‌لاری آغزینا آلیر. قاچیرام، دلی‌لر کیمی قاچیرام، شهر نظریم‌ده غریبه‌دیر. هئچ یئری تانیمیرام. ایتمیشم. بینالار، کوچه‌لر، خیابان‌لار، هامیسی منه یاد اولوب. آماج‌سیز قاچیرام. بیلمرم هارا گئدیرم. آیاق‌لاریم، بئینیم‌دن فرمان آلمیر. سانکی باغیم‌سیز بیر وارلیغا دؤنوشوبلر.
اؤزومو ائویمیزین قاباغین‌دا گؤرورم. اوتاغیما سیغینیرام. اما قان سئلی آرخامی بوراخمیر. اوتاغیما هجوم ائدیر. قانا باتیرام، قا‌ن‌دا بوغولورام. او گؤزلر منی بوراخمیر. اوتاغیمین قاپیسی، دوواری، پنجره‌سی. هر یئر اونون گؤزلری اولوب، منه گؤز تیکیب. بدنیم آلولانیب یانیر. یورغانین آلتینا سیغینیرام، اما او بورادا دا وار، ایستی نفسی اؤزومه دئییر. یوماق کیمی اؤزومه بوکولورم. نفسینین سسی هر یئردن گلیر. أل‌لریمی قولاق‌لاریما باسیرام، گؤزلریمی یومورام. دلی اولماقدایام، بلکه ده اولموشام. لیلاسینین قاتیلی اولان مجنون اولموشام.
هاوا ایشیقلانیر، موبایلیمی گؤتوروب، اینستاگرامی آچان‌دا ائفیرلی ایچین‌ده رقص ائدیر. هر یئر اونون شکیل‌لری، ویدیولاریلا دولموش. ویدیولارین بیرین‌ده قاچیر، دونن گئجه‌کی کیمی جان هؤلویله یوخ، هرلنه-هرلنه، گوله-اوینایا قاچیر. کپنک کیمی اوچور. موبایلی یئره چیرپیرام. موبایل پارچا-پارچا اولور، ائفیرلی، هر پارچاسین‌دا هرلنیر، فیرلانیر، اوینویور. ألینی منه ساری اوزالداراق، منی اؤزونه چکیر.
کاسکامی باشیما تاخیرام. خیابان‌دا أمرلری اطاعت ائدن روباتا دؤنوشورم. یئینه یومروق‌لار هاوادا، یئینه توستو، اود، بیبر گازی، ماشین سیقنالی، موتورسیکلت‌لرین نریلتیسی، قیشقیراق‌لار، سیلوقان‌لار، کوماندرین أمرلری. باشیم دؤنور. گؤزلریمی یومورام. بئینیم بیر بئله دیتانی آلقیلاماقدان عاجیزدیر. گؤزلریمی آچان‌دا، توستویله اودون آراسین‌دان بیر جوت منه زیللنمیش گؤز، گؤزلریمه سانجیلیر. اونورغام‌دان قالخان گیزیلدی جانیمی بورویور. اینانا بیلمیرم اما اؤزودور. اورتا‌دا فیرلانیب، رقص ائدیر. باشینین دالین‌دا سیخی‌جا باغلانمیش اوزون آت قویروغو، سارقاچ کیمی، بیر ساغا-بیر سولا بئلین‌ده اویناییب، یئنه منی هیپنوز ائدیر. کاسکامی باشیم‌دان گؤتورورم. سیلاحمی یئره آتیب، جمعیتین ایچینه، اونون یانیا قاچیرام. قولاغ‌لاریم داها کوماندرین أمرلرین ائشیتمیر. چکینگن أل‌لریمی، اونا ساری اوزالدیرام. ائفیرلی وجودو، وارلا یوخ سینیرین‌دا بیر شئی کیمیدیر، کؤپوک کیمی، دومان کیمی، چن کیمی، توخونسام، اوچوب هاوادا یوخ اولاجاق سانکی. اونا ساریلیب، رقص ائتمگه باشلاییرام. اطرافیم‌داکی سس‌لر گئت-گئده اوزاقلاشیر. یونگوللشیرم. سس‌سیزلیک منی ده اوچوشدورور سانکی. اونا توخونان همی اونا دونوشورم. ائفیرلشیرم. اورگیم داها دؤیونمور. گؤزلریمی یومورام، گؤز قاپاق‌لاریمین دالین‌داکی، دالغالانان قارنلیق‌دا بوغولورام.
01/۹/۱۵