ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری

zihaghقوچ پولاد
عليرضا ذيحق

ايل‌لرين يورغونلوغو و چكدييي آجي‌لار گؤزلرينده كي يئر سالميش آغير حوزون و كَدَر‌، اؤز ايزيني گؤسترسه ده آغارميش باشي و آلنينداكي قيريشلار و بئینينده كئچن دولاشيق فيكيرلر اونو اؤزوندن بئزارلاداراق‌، دوشوندوكجه يومروقلاري دويونله‌نيردي. آمما داها يومروقلاري‌دا اسكيسي كيمي گوجلو‌، جسارتلي و ايراده‌لي دئييلدي. يئددي ايل حبسخانادا ياتماق اؤزوده آنا  تورپاغدان اوتوبانلار و جاده‌لر واسيطه‌سيله يوزلرجه كيلومتر اوزاقدا اولماق‌، اونون غورورونو، گنجليييني و كئچميشده كي شوكتيني آياقلار آلتدا تاپدالایيب، اَزسه ده‌، هله اوره‌يينده قيغيلجيم قَدَر بير پاريلتي اونو ياشاما و وارليغا باغلاييردي. بو يئددي ايل ده كيمسه‌دن بير تئلفون يا مكتوب آلماديغي‌دا اونو شاشيرتميشدي و نه قَدَر چاليشسادا بير باغلانتي قورانماييب و بير نئچه گونلوك ايذين ده بيله‌سينه وئريلمه‌ميشدي. بو ايل‌لري تكجه بير چينارا سؤيكه‌نيب زيندانين تيكانلي سيملرله دؤوره‌له‌نن اوجا دووارلارين آرديندان اوچان قوشلارا باخاركن‌، چينارين قيش قورتولوب ياز گلسه‌ده نئچه ياپراغي‌نين تؤكولمه‌مه‌سي‌، اونا يئنيلمزلييي و سارسيلمازليغي خاطيرلاديردي.

ايشلرين نه ساياق بوروشوب بورايا گليب چاتماسينا‌، ايللر كئچسه ده يئنه اينانا بيلميردي. اَليندن توتدوغو و اونا يارديم گؤستردييي جان يولداشي‌نين‌، اونو آرخادان وورماسي هئچ عقلينه گلمزدي. بير گون اؤزونه بير بَي، بؤيوك تاجير‌، آبيرلي ناموسلي بير عائيله‌نين ائولادي و يورد يووا صاحيبي اولان بيرجه قيزي و حيات يولداشينان سعادتلي بير ياشام سوره‌ن اينسان ايدي. مكّه‌يه گئتمه‌ميشدن دوستلار و تانيشلار اونا ايگيتلييي و مردلييينه خاطير قوچ پولاد دئسه‌لرده سونرالار بازاردا‌، كوچه ده و محله ده هامي اونا حاجي پولاد دئييب، درين حؤرمت ائده‌رديلر.

اَل آچيقليغي و خئيرخاهليقي ايله‌، كيمسه‌سيز و يئتيم جوجوقلار ساخلايان دَرنَك‌لره اَليندن گلديكجه مادّي يارديم ائديب، چوخلي دده‌سيز قيزلارين جئهيزين آليب اونلاري بخت ائوينه يوللاميشدي. آنجاق قلبي‌نين صافليغي و بير دوستا اينانماسي‌له بوتون وارليغي خارابا و چؤكموش بير دام كيمي باشينا تؤكولوب، اؤزونو تاپانا يوزلر يارا و بيرجه سينيق اوره‌يي‌نن اَللريني كَلَفچه‌ده گؤروب، حياتيني سورگونده و زيندان سورمه‌يه محكوم اولموشدور. كئچميش اونا بير گئرچك كيمي يوخ، بلكه بير شيرين يوخو كيمي گليردي كي اويانمادان‌، قارانليق كابوسلار اونون دونياسيني بورويوردو. بو يئددي ايلي سگگيز نفر اوچون ايكي قاتلي دؤرد تخت قويولموش بير اُتاقدا ياشاسادا‌، يوزلرجه محكوم گليب گئتسه ده ، آمما او هله آزادليغينا قاووشماق اوچون‌، ايكي گون داها دؤزمه‌لي‌ايدي.

او بو سوره و زامان ايچره ائله آداملارلا گؤروشموشدو كي آدامليقدان‌دا اوره‌يي بولانيردي. كيشي‌لر گؤرموشدو كي كبينلي آروادلار و يئني يئتمه گنج قيزلاري اوغورلاييب، يورد ديشيندا يابانجيلارا ساتميشديلار. آداملار گؤرموشدو كي اينسان باشي كسمك اونلار اوچون قوش باشيني اوزمكدن راحات ايدي و پولا خاطير ساغلام اينسانلارين ايچ اورگانلاريني سيفاريشلر اوزره يئر آلتي دونياسي‌نين چيركين آليش وئريشلرينده ساتيشا قويوردولار. قوماربازلار گؤرموشدو كي باكيره قيزلارينين ايلك گئجه‌لري اوزره‌، قومار ائديب اودوب اودوزموشدولار.

اينسان‌لاردا گؤرموشدو اوره‌ك‌لري قوش اوره‌ييندن اينجه و دوشونجه‌لري گوللر قَدَر عطيرلي اولاراق، ايناملاري و توتدوقلاري يولدا‌، دميردن‌ده برك و داياناقلي ايديلار. دوسلوقلاري دوسلوقدان آشيب سئوديكلرينه يولداش يوخ بير سيرداش ايديلار و اونلارين جان ائوي‌، قارانليقلاردا ايشيقلي بير چيراغ. بونلاردان بيري ايسه سيياوَش ايدي. قوچ پولادلا جاندان، اوره‌كدن يولداش اولاراق‌، اوره‌ك‌لرينين دؤيونتوسویله‌، اورتاق دويغولار و دوشونجه‌لري ايله‌، بيرگه بير نغمه‌ني ترنم ائديرديلر.

پولاد كي زيندانا دوشمه‌يينجه‌، دوداغينا تكجه بيرسيقارا دا دَيمه‌ميشدي‌، سيياوَش‌له گؤروشدویو زامان ايكي بسته سيقارا چكمه‌يي سو ايچيم كيمي بير شئي ايدي. آمما بير گون سيياوش‌، اونون سيقارالاريني گيزله‌دركن گئجه ياريسي اَليني تختين آلتينا آتديقدا‌، گؤرور سيقارلاري بسته‌نن يوخدي. دوشوب اويان بوياني آختاراركن دلي كيمي اولور و اُتاقي باشينا آليب آغزيندان چيخاني دييه‌ركن هاميني يوخودان آييلدير. اؤزگه‌لر دورومو آنلاييب اونا سيقارا وئرينجه سيياوَش توتوب اونلارين اَليندن آلاراق‌، پولادين قاني قانين كسير. آمما مكّه‌يه گئتمه‌دن يومروقلاري ايله قوچ آدي قازانسادا‌، بير آن‌دا كعبه‌ده كي ايلقاري تانري‌نان يادينا دوشه‌رك، يومروقلاريني سيياوَشه ساري يوخ، بلكه دووارا تاپداييب، اَللريندن قان آچيلير. او گئجه شيياوَش‌، تر كؤينه‌ييني چيخارديب جيراراق اونون يارالي بارماقلارينا باغلاركن سيقارالاريني قايتارير :

” بو سيقارا چوخ چكمز سني آياقدان سالار. بير آز آزاتسان ياخچي دي!”

سونرا پولاد چكدييي سيقارا دومانلاري ايچره ياتماغا چاليشير. صاباحدان آمما دوسلوقلاري باشلايير و اورا چاتير كي سيياوَش بير نئچه گون سورا چيخاراق‌، اونلارين يولداشليغي ايكي سيرداش كيمي ايللر بويو دوام ائدير. قوربت بير ائلده و كيمسه‌سيز بير حالدا كي حتتا قوهوم اَقرَبادان‌دا خبر يوخ ايدي، سيياوشي اَن ياخين اينسان بيليب و اونون تاپشيريقي ايله يومروقلاريني بركيتمه‌يه چاليشير. آمما هله ده كئچميشده كي قوچ پولاددان بكله‌نن جسارتي اونلاردا گؤرموردو.

سيياوَش اونو تك قويمادان آراسيرا مولاقاتينا گليب، دمير بارماقليقلار داليندان‌، اونون اَليني سيخيب باشينا نه اويون گلمه‌سي حاققيندا داها آرتيق بيلمه‌سي اوچون هئي اونو سورغو سوآلا چكيردي.

ايكي گون آزادليغينا قاليرسادا‌، اوره‌ييني داها سيخيلميش و توتغون گؤروب همه‌شه كي كيمي او قوجامان چينارا سؤيكه‌نرك مينلر فيكير خييال بئنينده دالغا ووروب، وارليغيني طوفانلي بير دنيزده تك قالميش بير گمي‌يه چئويريردي.

گله جك اونو گؤرونمز و معمالار دولو بير آدا كيمي ،حئيرانليغا جومدوروب و او آدا دا باشينا گلنلري بيلمه‌دن آجي دويغولار و قورخولو فيكيرلر لحظه‌لريني دهشتلي كابوسلارلا دولدوروردو. قارداشلاري‌، قوهوملاري و خانيمي ايله بيرجه قيزينين بو ايللرده اوندان خبر توتماماقلاري‌، اونو داها آرتيق كدره دالديريردي. يوزلرجه دوشونجه ذهنيندن كئچه‌رك‌، خيانتين قوخوموش و پيس اييي مئعده‌سيني بولانديراركن قولاقلاريندا عصبلريني پوزان بير سس جينگيلديردي. بو گونه‌جن‌، اوزونه گولوب آرخادان اونو عقله گلمه‌ين بير تؤهمت و سوچلا حبسه سالديران دوستو افشيني اؤز ايچَري دونياسيندا مينلر دفعه اؤلدوروب، اينتيقام آلاولاري ايچره آليشسادا‌، آدسيز نيشانسيز قورخولار اونو چولقالاييب جاندان اوركدن سئوديگي قيزي “سئوگي” نين تقديري بيله‌سيني داها آرتيق اينجيديب و نيگَران ائديردي.

حبسخانانين سون گئجه‌سي ايدي و ايلك دوشوندويو تكجه ايرانشهردن آيريلينجا ” كرمان ” شهرينه گئديب سيياوَش ايله ويداعلاشماقي و يئددي ايل اؤنجه جيبيندن چيخاريب زينداندا امانت اولان صدف دسته‌لي زنگان بيچاغيني آلماق ايدي كي اوزه‌رينده ” يا حسين ” سؤزونو قيزيللا يازديريب و پولاد تيغه‌سيني گوموش سويو ايله زاغلانديرميشدي.

پولاد كي قارا بوغلاري و دولغون پارلاق ساچلاري ايله بير گون اؤز شَهرينده آد-سان صاحيبي ايدي و عاشورا گونلري محله دسته‌سينين ايكي يوز ايلليك قارا عَلَميني داشيييب، ائوينين اؤنونده دسته‌نين آياقلاري آلتيندا قوربانلار كسديريب و بوتون زنجير ووران‌، نوحه دييه‌ن و سينه ووران حسينچي‌لره احسان ائده‌ردي و قاپيسينا گلن كيمسه‌ني اَلي بوش يولا سالمازدي، بو آنلاردا‌، ياشاديغي ديدرگين احوالاتيني دوشونوردو.

او سربازليقدان قاييديب بازاردا بير زرگر توكاني يولا سالاراق‌، تانرينين بركتي اونون وار دؤولتيني گونو گوندن آرتيراراق، باغ باغات صاحيبي اولوب، اؤز شهرينين سؤزو كئچن آداملاريندان بيري ساييليردي. آمما ايندي پولاد‌، دوغما يوردونا قاييديب نه ساياق قارشيلانماسي اوچون فيكره دالديقجا بو قَدَر قوهوم اَقرَبانين بيردن يوخا چيخماسي اونو لاپ دلي ائديردي.

سون گئجه‌ني نئيله‌سه‌ده ياتا بيلمه‌دي و صوبح اذاني اولونجا‌، چانتاسيني باغلاييب گؤزله‌دي كي دمير بارماقليقلار داليندان اونو چاغيريب آزادليق حؤكمونو اَلينه آلاركن يئني بير ياشامين ايلك آدديملاريني آتا. ائله ده اولدو و اونون يئددي ايل اؤنجه كي پالتاريني بيله‌سينه قايتاراركن‌، اونلار اَينينه گئن گلدي. ليباسلار اَينينده تاولانسادا باشقا بير سئچه‌نه‌يي يوخ ايدي. آنجاق اونا حبسي‌نين سونا چاتديغي اوچون آزادليق كاغاذي وئريليب يولا دوشونجه‌، سيجيللي‌سيني اَله آلديقدا‌، اونون فتو شكيلي اؤزونه عاييد اولوب آدي و سوي آدي دوز اولسادا‌، نه رحمتلي آتاسي‌نين آدي دوز ايدي نه ده دوغوم ايلي ايله دوغولدوغو يئر. هم ده سيجيللي ده نه خانيمي‌نين آدي وارايدي نه ده اوشاغي‌نين. بو ايشه حئيران قاليب اعتراض ائدينجه بيلگي سايارا باخيب دئديلر :

” سن ائله بيل قاريشديريبسان. سن دييه‌ن بير آيري آدام ايدي كي زيندانا گلديكدن ايكي آي سونرا اؤله‌رك قبري ايرانشهرين قبريستانليغيندا، يئتميش يئددينجي سيرادادي.”

دونيا پولادين باشينا دولاناراق دينمز دانيشماز چانتاسيني گؤتوروب يئني بير كيمليك‌له ديشاري چيخدي. جيبلري بوش و كيمسه‌سيز قريب بو اينسان‌، اؤزونو بير آن دا او قَدَر يالنيز و يازيق حيس ائتدي كي ايره‌لي گئتديكجه باشي گيجه‌لركن يئريمه‌يه ايمكاني اولمادي. آزجا دوروخوب اؤزونو تاپاركن زرگر بازارين آدرِسيني سوروشدي. گؤزونون تيكه‌جه‌يي تكجه بير عقيق قاشلي قيزيل اوزوگ ايدي كي اونو ساتماقلا بير تَهَر يولونو توتوب يوردونا دؤنمه‌لي ايدي. اوزوگو ساتيب يولا دوشمه‌دن اوّل بير تاكسي توتوب گئتدي قبريستانليغا و مزاريني آراييب تاپاراق، اؤزونه بير فاتحه وئردي.

پولادي قات قاريشيق فيكيرلر آز قالا سئفئه ائديردي كي اؤزونو اُتوبوسلا كرمانا يئتيردي. افشين‌ين فيكري و اونون اَلي ايله نئجه اَزيلدييي يادينا دوشه‌رك اوره‌يي آز قالا پاتليردي.

كرماندا چتينليكله جان يولداشي سيياوشين ائويني آراركن‌، قارا گؤزلو‌، قره‌شين و اوجا بويلو بير قادين قاپيني اونون اوزونه آچيب، باشي آچيق اولدوغونا گؤره‌، اؤزونو قاپي آرديندا گيزله‌ديب اونون كيم اولدوغونو سوروشدو. پولاد او قادينين گؤزلرينه باخاركن سيياوَشيين گؤزلري نظريندن كئچدي: ” حاجي پولادام. سيياوشين دوسلاريندان. گلميشديم خدافيظلييه.”

بونو ائشيدن قادين‌، هئچ چكينمه‌دن پولادا خوش گلدين دئييب، بيله‌سيني ايچري آلدي. آناسيني سسلركن اونو قيخليق فرشلر و مُخدّه‌لرله دؤشنميش بير اوتاغا كئچيرتدي. پولاد اؤزونو تاپانا سيياوشين آغ بيرچك آناسي كي قيزي اونو عزيز سسليردي ايچري گيره‌ن كيمي اونون آياغينا دوردو و بو آن‌دا باشي گيجه‌له‌رك زور گوج ايله اؤزونو ساخلاشديريب ،اوتوردو يئره. عزيز دئدي:

” صفا گتيريبسيز. سيياوش سيزدن او قَدَر دانيشيب كي سني گؤرمه‌سم ده بير آنا كيمي قايغيني چكيرديم. سيياوش سني قارشيلاماق اوچون ايكي گون بوندان قاباق يولا دوشسه‌ده، ماشيني يولدا كيچيك بير قضا كئچيريب، سني گليب تاپانماييب. دونندندي ائله تئلفون ائدير كي سن گليب چيخيبسان يا يوخ ! “

عزيز بو آندا قيزي رعناني چاغيريب، تئزراق چاي و قليان گتيرمه‌سين ايسته‌دي. سونرا سسلندي :

” هم ده سيياوشه بير زنگ آچ و حاجي‌نين گلمه‌سين دئه.”

رعنا چاي و ميوه گتيرديكدن سونرا ايكي قليان‌دا گتيريب اوتوردو آناسينين يانيندا. پولادين گؤزلري يئني بير كره رعنانين باخيشينا ساتاشاركن‌، دونيا قادينلاريندا اولان بوتون گؤزلليك‌لري اونون معصوم و گولر اوزونده گؤردي. او قوچ پولاد اولدوغو گونلري يادا ساليب بير لوطي كيمي قليان چكمه‌يي اونودماغا خاطير، بير آن يومروقلاري دويونلندي.

رعنا سوفره آچيب يئمك ايچمك حاضيرلايانا قَدَر اونو ياتاق اوداسينا كئچيريب، دوش توتوب دينجلمه‌يين ايسته‌دي. پولاد حامامدان چيخيب جانيني قورولاركن، بيله‌سينه حاضيرلانميش تزه بير كؤينك و پيژامه گؤروب‌، اَيين باشيني بوسبوتون دَييشدي. آزجا اوزانيب دينجين آلينجا‌، بيله‌سيني ائله يوخو آپاردي كي شام يئمه‌يينه اويانديرسالاردا اونو ياتميش گؤروب داها سسلمه‌ديلر. سونكي گون ناهارا ياخين ايدي كي گؤردويو بير كابوسلا ديكسه‌نيب يوخودان دوردي. او يوخودا اؤز قبريني گؤره‌ركن‌، اَل ده بئل قبريني قازماقدا ايدي كي داشلار و سال‌لار آلتيندا بير اسكلت گؤروب نه قَدَر باخسادا اؤزونه بنزه‌دنمه‌دي و اَل آتدي جومجومه‌سيني گؤتوره كي گؤزلرينين بوشلوغوندا ايكي بؤيوك ايلانين اونا ساري بويلانيب، داشلانماسي‌، پولادي قورخودوب آييلتدي. ندنسه او ايلان‌لارين گؤزلري افشين‌له افشانه‌نين گؤزلرينه اوخشاييردي و آييلسادا يئنه بدني تيتره‌ييب اَسيردي.

رعنا پولادين پيلله‌لرده اوتورماسيني گؤرونجه اونا ساري گئديب، ناهار يئمك اوچون اونلارا قاتيلماغين ايسته‌دي. رعنا اونو بو تَهَر كئفسيز و رنگي قاچميش گؤردوكده دئدي:

–    ” گوجونو توپلاييب آللاها توكّل ائت كي كيمسه تقديرله ساواشا بيلمز. يئني بير باشلانيش اوچون قدم گؤتور و اودو سويو‌، تورپاغي و اَسَن يئل‌لري بوتون وارلیغينلا حيس ائت و قيزين ” سئوگي ” ني دوشون. سيياوش سندن بيزه او قَدَر دانيشيب كي حدّي يوخدي.”

–    ” ايندي كي بئله‌دي سيياوشين بو كئفده غم غوصه‌يه باتماسينداندا منه دئه. اؤزوندن و كئچميشيندن منه هئچ نه دئمه‌ييب.آمما گؤزلري سانكي ايللرجه آغلاييبدي. همه‌شه ائله توتغون و پوزغوندور؟”

–    ” او چكن دردي داغ چكسه‌يدي اَريميشدي. نئجه دييه‌رلر غم، غم اوسته ياغيب بيله‌سينه. ايران عراق جنگينده بيرجه اوغلونو شهيد وئريب خانيميدا دِپِرسييونا گيره‌رك اينتحار ائديبدير. اونو دونيايا باغلايان تكجه بير زاد اولسادا آنام لا منيم وارلیغيمدير. “

–    ” مندن داها نه‌لر دئييب ؟”

–    ” سنين دلي سوولوغوندان. هم ده گوناهسيز يئره حبيس ياتاراق يئددي ايل تامام بوتون كئچميشيندن خبرسيز قالماغيندان. حتتا دئييب كي سن‌، سن دئييل سن…”

–    ” باشا دوشمه‌ديم. نئجه ياني من‌، من دئييلم ؟”

–    ” ياخشي بيلميرم. شايد ده منظوري اوايميش كي زيندان سني سينيخديريبدي. گئنه سن سن كي دوام گتيريبسن. يوخسا كيم اولسايدي ايندييه جان يوز دفعه كفن چوروتموشدي.”

رعنانين سؤزو هله بيتمه‌ميشدي كي پولادين حالي قاريشيب بدني دوشدو تيتره‌مه‌يه. آمما آز سونرا اؤزونو توپارلاركن رعنايا باخديقدا دوروخدو :

–    ” سن دوز دئييرسن، نه من و نه سيياوش داها كئچميشده كي آداملار دئييليك. ايسته‌سك ده بئله اولا بيلمه‌ريك. آمما سن نئجه؟ همان آدامسان كي وار ايدين يا سن ده همان آدام دئييلسن؟ دانيشيغيندا دنيزلر قَدَر غم دالغاسي واردير و گولر اوزونده گيزلي بير سير، باخيشلاريندا اوچان سئوينج گؤيرچينلري‌، سانكي چنلي دومانلي بير توزاناقدان چيخميش كيمي‌ديلر. “

–    رعنا گؤز ياشلارينا حاكيم اولمادان پولادين گؤزلرينه داليب، گولومسه‌سه‌ده هيچقيرتلي بير آغلاييشلا اوندان آيريلدي. پولادين اوره‌يي بو گؤرونوشله بام باشقا بير تَهَر اولاراق، جوانليقدا تجربه ائتدييي عشق دويغولارينين آلاويني يوخ، آمما ايشيلتي‌لاريني خاطيرلادي. اؤزونو رعنايا چاتديريب تسلّي وئره‌ركن دئدي :

–    ” بو گؤز ياشلاري‌، سنين هله سن اولدوغونو آنلادير. بير آدام آغلايا بيليرسه يعني هله اينساندير.

–    زمانه هره‌ني بير جوره آغلادير. من ده ائله سنه و سيياوشه تاي بيرييم. بير قادينين بخت اولدوزونون سؤنمه‌سي ده ائله كيچيك يارا دئييل. يالنيزليق‌، آجيليق و آجيمالار اونودولان بير زاد دئييل‌لر. “

–    ” دئمه‌ميش ده سؤزونو آنلاييرام. آتام اؤلدوكده‌، آنام اوننان سورا ايللر ياشاسادا ائله او آندان اودا اؤلموش ساييليردي. “

–    ” آمما قادينلارين كؤنولو گول يارپاغيندان اينجه اولسادا‌، سؤكوب ديده‌ن تيكانلاري دا واردي. هامي دا ائله سنين رحمتليك آنان كيمي ايلقارلي وفالي چيخماز. “

–    پولاد گولومسركن رعنانين اوزونه بير اُووج سو چيله‌ركن دئدي :

–    ” اؤزگه‌لرله هله ايشيم يوخ. آمما سنين گول‌لر كيمي عطيرلي روحون‌، منه بير گولو يوخ، گولن بير گولوستاني خاطيرلادير و آنام دا دويدوغوم ووقاري. گؤزلر يالان سؤيله‌مزلر و سنين هر باخيشيندا‌، چؤل چيمنده بيتن آل الوان گوللري گؤرورم كي ذاتَن تيكانسيزديلار. “

–    ” سن يوخودان دوراندان، احوالاتين چوخ دَييشيكدير. رنگين قاچيب و اللرين تيتره‌ييري. سببي نه دير ؟”

–    ” يوخودا ايكي ايلان گؤردوم. بيرينين گؤزلري لاپ افشانه‌نين گؤزلري ايدي. “

–    ” افشانه كيم ؟”

–    ” حيات يولداشيم. گؤزلريندن اود پوسكوروردي و ندنسه اونو دوشوندوكجه حاليم بوسبوتون دَييشيليري.”

–    “گوجلو اول ! گوجدن گوج دوغار و كيشي‌يه صبير ياراشار. هر زاد دوز‌ه‌لندي. فقط بير آز دؤزوم لازيمدي.”

رعنا پولادين حوزونلي و چوخورا دوشموش گؤزلرينه باخيب باشيني آشاغي سالاراق سوسدو و گئتدي اوتاغا. پولاد دا ايچري گيريب عزيزه سلام وئره‌ركن كئچدي سوفره‌نين باشينا. يئمك ييه‌ركن گؤزلري ساتاشدي بير عَكيزه كي سيياوشله آنا باجيسيني مكّه‌ده گؤستريردي. بو عكيز اونا كئچميشي خاطير لاداراق آناسي‌نان حجّه گئده‌ن گونلري يادينا دوشوب دولوخساندي. هم ده پيچاقي يادينا دوشدو كي مكّه‌يه گئتمه‌ميش اوزه‌رينده ياحسين يازديريب، آند ايچميشدي كي فقط اؤز آبير و ناموسونو قُوروماقدان اؤتور اونون ضامينينه فيشار وئريب لاتديقي بير يوللوق قويا يئره.

پولاد او زامانلار بارماق ساييندان آرتيق گؤزله وورولسادا، ائولنمه‌يي دوشونمه‌مك اوزره‌، بوتون سئويب سئويشدييي قيزلاري گؤزو گؤرركن بخت ائوينه آپاريرديلار و بو دردلر يانديريجي زهر كيمي اوره‌ييني دئشسه‌ده‌، يئنه‌ده بو آجي‌لاري اؤز ايچينده داشيييب، او قيزلارا بير ضرر وئرمزدي. سربازچيليقدان قاييداراق بازار ايشينه قاتيليب مكّه‌يه گئتمكله‌، كئچميشيندن فاصيله آچيردي. داها پيچاق چكيب، بوي دئمه‌يي قويور يئره و الكل قوخويان ضيافتلردن كنارا چكيلير. قوچ پولاد، حاجي پولاد اولماقلا حيات طرزيني بوسبوتون ده‌ييشيرك هر ايش ده آللاهين رضاسيني دوشونور. تا كي بير گون قديم دوستو افشين اونون يانينا گلمكله‌، ايسته‌يير كي بيله‌سينه بير ايش تاپسين. افشين‌ين بير نئچه گون گليب گئتمه‌يي‌نن اونودا اؤزو كيمي ناماز قيلان‌، آللاهدان قورخان و كئچميشيندن توبه ائله‌ميش گؤرورو. بو اوزدن ايسه اونو اؤز توكانيندا بير گؤزه‌تچي كيمي اوتوردوب، بانك ايشلريني اونا تاپشيريري. بير ايل كئچديكدن سونرا‌، اونو دوز‌، امين و باش آشاغي گؤروب‌، آيليق معاشيني آرتيراراق داها دا آرتيقجا اؤز قانادي آلتينا آلير.

پولادين مشتري‌لريندن چوخو قادين اولماغا گؤره‌، توكانا قيز گلين گلركن افشين ديشاري چيخيب اونلار گئدندن سونرا ايچري گيرردي كي بو عادت پولادين اعتيماديني اونون ناموسلو دَبَشدي‌يينه داها چوخ جلب ائده‌ردي. مشتريلر ايچره بير آنا بالا دا وار ايدي كي چوخ حيالي و محجوب نظره گلمكله‌، قيزين ماوي گؤزلري و ساريشين صيفَتي ايستر ايسته‌مز حاجي‌نين قلبينده بير محبت حيسّي اوياديردي. هردن ده او قيز گؤز آلتي اونا باخاراق گولومسه‌مه‌يي ايله لاپ اوره‌يينده يئر آچيردي. حاجي پولاد بو اوزدن افشينله دوستجا دانيشاراق اوندان ايسته‌دي كي بو قيزين عائيله دوروموندان بير خبرلر اَله كئچيرتسين. سونرا آناسينا دا مصلحت ائتدي كي آناسي يئتيشيب يئتيرندن سونرا‌، گؤيولدن او ايشه هئچ راضي اولماسادا پولادين ائتدييي ايصرار اوزره او قيزا ائلچي گئتدي.

بير آي ايچره ائوله‌نيب توي ائده‌ركن، توكاني افشينه تاپشيريب خانيمي افشانه ايله بال آيي اوچون كربلايا گئديب ايلقارلاريني امام حسين ين بارگاهيندا بير داها تَزه‌له‌ديلر.

يوردا دؤنوب اورتاق حياتلاريني باشلاركن افشانه پولادا او قَدَر محبت و سئوگي گؤستريردي كي بير لحظه حاجي‌ني پوزغون و یورغون گؤرنده آز قالا اؤزونو اؤلدوروردي. پولادين باشيني ديزينه آليب او قَدَر اونو اَزديريردي كي بلكه بوتون كدرلريني اونودموش اولا. بئله‌ليكله اونلار شن بير ياشام سوره‌رك ” سئوگي ” آدلي بير قيز صاحيبي اولورلار. بئله‌ليكله آرادان سگگيز ايل كئچه‌رك سئوگي نين يئددي ياشي تامام اولدوق دا اونون دوغوم گونو اوچون بير جشن توتوب كئفلرينه كئف چيخميري. آمما ندنسه آز كئچمه‌دن‌، تقدير اونون حياتيني ائله آلت اوست ائدير كي تكجه بير داهادا قيزي‌نين گؤزلرينه باخماق اوچون يئددي ايل هيجراني، عذابي و عقربلي ياتاقلاري زيندان حوجره‌لرينده تاب گتيرمكله اينتحار دان چكينيري. ايندي ده سونو بللي اولمايان بير يولون موسافيري اولموشدي. حتتا اؤزو اؤز قبري اوسته گئده‌رك جعلي بير سيجيللي ايله صاباحا دغرو قدم آتمالي ايدي. اؤزل‌ليكله رعنانين ” سن‌، سن دئييلسن ” دئمه‌سي لاپ اونو داغيتميشدي. رعنانين اوزون قارا ساچلاري چييينلري اوسته تؤكولسه ده‌، حاجي پولاد باخيشلاريني گيزله‌ديب سئير ائتمكدن چكينيردي. كربلادا كي ايلقاري يادينا دوشوردي و عشق‌، اونو قورخودوردي.

او گونو سياوش گئژ گليب چاتسادا آخيردا گلدي و ايكي يولداش بير-بيرلرينه ساريليب سؤز صؤحبتلري اوجالدي :

–    ” گلميشديم دالينجا آمما حئييف كي يئتيرنمه‌ديم. سني بير داها گؤرمه‌مكدن چوخ قورخوردوم. نييه كي بيلديييم بير پارا سؤزلر وار ايدي كي گرك سنه آنلادايديم. سيجيللي‌نينده قضيّه‌سيني ائشيد‌ه‌رك لاپ اوزولدوم. شَهَره چيخيب دولاشماغا نه دئيير سن؟ بوردا دا گؤزل آز دئييل. هم ده بير توكانا باش ووراق كي نئچه گوندي باغلي‌دي. خوي‌، تبريز و آذر شهر فرشلريمه ده بير باخ و اونلاري كرمان دا توخونان فرشلرله بير توتوشدور. سيزين خالچالاردا طبيعتين الوانليغي باشارديقجا گؤزه گلسه ده بيزيم خالچالاردا آمما كَويرين گونشي گؤرونور. “

كرمانين پاييز گونلرينين بيري ايدي و آخشامي خييابانلاردا گزيب دولانماق‌، نئون‌لو توكانلارين قاباغيندا دايانيب ويترينلره باخماق و بير پارا ماغازالارين يئنيجه شكيل تاپمالاري كي چئشيدلي فيلملر ساتيب يا كيرايه وئريرديلر و جوره به جوره تئلويزيون‌، موبايل و اينترنتي شيركت‌لرين ووجودا گلمه‌سي بيله‌سينه عجيب گلمه‌سه‌ده ايتيرميش ايل‌لريني خاطيرلاييردي. ماشينلارين مدلي دَييشيلدييي كيمي خلقين ترپه‌نيشي و گئييمي ده او قدر فرقلي اولموشدي. خورما آغاجلارينا گؤز تيكه‌رك دوغما يوردوندا كي سؤيودلر‌، قره آغاجلار و قَلَمه‌لر يادينا دوشوب قلبيندن كيچيردي كي كاش بو آندا دوغولدوغو خوي شهري‌نين چارراهيندان كئچردي و مقبره‌يه ساري آدديملاياراق دؤنردي كوچه‌لرينه. بو خيال‌لاردايدي كي سيياوش اونو بير بوتيكه چكيب ايصرارلا بيله‌سينه يئني كت شالوار، آياق قابي و آيري پالتارلار آلدي. بير سلمانييادا گئديب پولادين ساچلاريني مرتب ائتديردي و بئله‌ليك پولاد اوز-گؤزونه صفا وئرديكدن سونرا اوجا بوي بوخونو و مردانه سيماسينان حيس ائتدي كي سانكي يئني بير دونيايا آياق باسيبدير.

پولاد‌، سيياوشين توكانيندا اوتوروب اوننان دانيشاراق اوتانجاقدان قيزارميش كيمي ايدي :

–    ” سنين بو محبتلرين مني سئوينديرسه ده او قَدَر ده عذاب وئرير. كاش كي ائله كؤهنه پالتارلاريملا گزيب دولاشارديم و اوزونه باخديقدا هئچ واخت اوتانمايايديم.سؤز وئرمه‌ليسن كي هرنه خَشلي‌ييبسن قيرانيناجان آلاسان.”

–    ” كاش مني دوغرام دوغرام ائده‌ردين آمما بئله بير دوروم دا بوراخمازدين. نييه كي سن اگر منيم يئريمه اولسايدين محبتين منه يوز قات آرتيق اولاجاقدي. بونلار نه سؤزدي كيشي ؟ اوغلومون روحونا آند ايچه‌رك سني بو دولاشيق وضعيتدن قورتارماق اوچون اؤز ويجدانيما سؤز وئرميشم.”

بو آندا ايدي كي هابئله سيياوش قلياني بوراخيب اَل آتدي جيبينه و اوچ عكيز ميزين اوستونه قوياراق، پولاد گؤروب تعجبلندي و دينمز دانيشماز بير نئچه آن دوروخاركن باشينين گيجللمه‌سي چوخالدي :

–    ” بونلار منيم دوسلاريم. هره‌سي واختيندا اؤزونه بير ايييت. آمما ندنسه زمانه بونلارادا اثر قويوبدور و چوخ دوشگون گؤرونورلر. عؤمور تيرئني مني آياقلايان كيمي سانكي اونلاري دا اَزيب كئچيبدير.”

سيياوش پولادين قيزارميش گؤزلرينه باخاراق دئدي :

–    ” سنين حَققينده بيلديغيم چوخ شئي‌لر وار. روشوت ييين و اؤزلريني پولا ساتان اينسانلار بعضي يئرلرده مقام – منصب صاحيبي اولاراق‌، هرنه اَللريندن رذالت گليردي سنين حاققيندا ائديبلر. ايشلر باشي دا افشين ايدي. گيزلينجه سنين ماشينيندا اويوشدوروجو و سيلاح گيزله‌درك سني شيطانلاييب اَله وئره‌رك باشارديقجا دا سني محو ائتمه‌يه چاليشيبدير. اؤلومون اوچون ساختا سَنَدلر جورله‌يه‌رك‌، يئني بير كيمليك و دوسيه ايله سني دوستاقلاردا آغير بير دوروم دا بوراخيبدي.”

–    ” ائويمدن اوشاغيمدان نه خبر؟ دوسلار نئينه‌ييرلر ؟”

–    ” ايذين وئر دانيشماييم. حالين خوش دئييل. “

–    ” سن ده منه حقيقتي آنلاتماياجاقسان پس كيم آنلاداجاق ؟ دووارلار، داش‌لار يا كي ساتقين آدام لار !منيم اوچون قورخما. هرنه بيليرسن دئه. صاباح يولا چيخمالييام و گرك كي هر زادي بيلميش اولام. “

–    ” سنين ائوليلييين ده ائله بير توزاق ايميش. وار دؤولتيني اَله كئچيرمك اوچون بير نقشه ايدي. “

–    ” اولا بيلمز. افشانه بير بياض ملك ايدي. مهربان و جان يانديران. بَيه ايندي نه اولوب كي ؟ “

–    ” سنين اؤلوم دامغاسي يئميش سيجيللينله احصار وَرَثه چيخارداراق بوتون وار يوخونا صاحاب اولاراق قيزين سئوگي نين ده وكالتين آليب هر زادي آدينا كئچيره رك قويوب گئديب تهرانا. هم ده… دور گئده ك … ايندي شاما منتظرديلر. “

–    ” هم ده نه ؟ من دن هئچ نه گيزلتمه. آدام بير اوچوق دامين آلتيندا بَيه قراردي نئچه دفعه قالا ؟ افشين‌دن نه خبر؟ “

–    ” قوهوم اَقرَبان و دوسلاريندا سني اؤلموش بيليب آدين گلديكده سنه رحمت اوخويورلار. افشانه ده اَره گئديب. افشين ين خانيمي‌دير.”

–    ” پس قيزيم سئوگي ؟ “

پولادين ديلي توتار توتماز سئوگي‌نين آديني چكسه‌ده بيله‌سينه تشنّج گليب دوشدو اَسمه‌يه. اونو تئز اورژانسا گؤتوروب ايينه داوا گوجو ايله حالي اؤزونه گلن كيمي قايتاردي ائوه.

پولادين آياق اوسته دورماغا گوجو اولمادان گيردي ياتاغينا. سونرا سيياوَش‌ين اَللريني اَلينه آلاراق رعناني سوروشدو و سيياوَش باشلادي اونون قضا قَدَريندن دئمه‌يه :

–    ” رعنا نين كئشمَكئشلي بير ياشامي اولوبدور. اَري جيبهه‌ده شيميايي اولوب، آيلار بويو اونو خسته‌خانالارا چكيبدي. سونوندا دا اونو اَلدن وئره‌رك حاميله قالديغي بير اوغلان اوشاغيني دوغوراركن اوشاغي‌دا يئدينجي گون اكسيژن چاتيشمامازليغي اوزره اؤلموشدي. او گرك اَريندن حاميله قالمايايدي كي دوكتورلار اوّلدن ائله بَبه‌يين ناقيص اولماسينا امين ايديلر. آمما دونيادي دا‌، اولمويان ايشلر گؤرور سن آدامين باشينا گلير. “

پولاد يئنه قيزي سئوگي دن خبر ايستيردي توتا كي يئنه حالي كورلانيب ديلي گلمز اولدي. بو حال دا سيياوَش هر نه اولور اولسون دييه رعنادان ايسته‌دي پولادا بير مُرفين ايينه‌سي ويرا. پولاد كي ياري آييق ياري يوخودا ايدي اونا گئرچك‌لري بئله آنلاتدي :

–    ” مني قانا قويورسان حاجي! آمما ايندي ده دئمه‌سم آخيردا گرك دييه‌م. گؤردويومه گؤره شايد اون بئش ياشي اولا. افشين‌له افشانه‌نين چيركين حياتلاري اونودا پوزوب سينسيديبدير. ساغليغي يئرينده اولسادا سئچدييي يول دوز دئييل. اونو تاپيپ سنه تاپشيرماق منيم بوينوما… سن نيگَران اولما…”

سيياوش دانيشاراق پولادي دا يوخو آپاردي. اؤزوده پوزغون و يوخوسوز ايدي. باشيني آتدي يئره ياتسين كي رعنا‌يا تاپشيردي پولادا گؤز اولا. پولاد ياتسادا اؤز – اؤزونه اوجادان دانيشيردي، آمما رعنا آنلاملاريني هئچ آنلاميردي. فقط اونون چكدييي آغير نَفَسلردن و يئرينده چيرپينيب چابالاماسيندان‌، بونو  آنليردي كي قورخولو كابوسلار ايچره اَل آياق چاليري.

پولادين بو دورومو سگگيز دوققوز گون دوام ائده‌رك، يوخودان آييلسادا آنجاق او، تووالئته گئتمك قَدَر اؤزونده گوج حيسّ ائديردي. دوكتورلار باشي اوسته گليب سِرُم آلتيندا قالاراق سيياوَش له رعنا اونو هئچ تك قويموردولار. تا كي بير گون پولاد اؤزونو توپارلاراق آزجا حاليني ياخشي گؤروب آياغا قالخاركن رعناني گؤردو كي ساچلاري ياناغيني اؤرتركن اونون باشي اوسته‌، اوتوردوغو يئرده يوخلاييبدير. اونو آييلتمادان ديشاري چيخيب ووجودوندا بير يونگوللوك و ساغلامليق دويدي. پولاد ائوين باغچاسيندا بير نئچه دقيقه قدم ووراراق بير دن گؤردو رعنا اونو ايزله‌ييري. اونا ياخينلاشيب دئدي :

–    ” بيلميرم كي نئچه گوندي ياتاقدايام ، آمما هر آييلديقدا‌، يا سني‌، يادا سيياوَشي باشيم اوسته گؤروب سيزه وئرديييم بو قَدَر آجييا اؤزوم ده ناراحاتام. مني اؤز عائيله‌زدن بيري بيليب بو كئفده محبتيز اوچون دوغوردان ساغ اولون. من بوتون سئوديييم گؤزللري واختيندا ايتيرسَم ده بو دفعه سني اَلدن وئرمه‌يه هئچ نيّتيم يوخدور. سني سئويرم رعنا. اگر ده اوره‌ك ايسته‌ييمي بو كئف ده جسارتله دئييره‌م‌، مني باغيشلا. سئوگي گوناه دئييل. سن ده سئويرسن اگر دورومو سيياوَشه اؤزوم آچيقلامالييام. آمما ايندي يوخ. قيزيم سئوگي ني تاپيپ افشيندن ايتيقاميمي آلاندان سونرا‌، اگر بو آرادا اؤلمه‌يم و قالام‌، يقين بيل كي سندن باشقا كيمسه مني بو دونيايا باغلايانماياجاق.”

 رعنا اوتانجيندان ياناقلاري قيزاراراق گؤز اوجونان پولادا باخيب اونودا اؤزو كيمي پؤرتولموش و اوتانجاق گؤردو. حيس ائتدي كي پولادين جوابيندا بير سؤز دئمه‌سه او بير داها باشيني قاغزاييب اونون اوزونه باخانماياجاق. اؤز اوره‌يي و دويغوسونا باخديقدا ايسه‌، پولادي جاندان سئودييي بير وارلیق گؤروب گولومسه‌دي :

–    ” ندن بير داها قادينلارا اينانماق ايستيرسن ؟ سن كي بير قادين اوزوندن ياشاميني اؤلوم پنجه‌لرينده آز قالا ايتيريردين. فيكر ائله‌ميسن كي يانيليرسان ؟ “

–    ” من بير قادين اوزره يوخ بلكه بير خيانت اوزوندن آجي چكيرم. خسته ياتديغيم گونلر ده هردن باشيم اوسته آغ قانادلي بير مَلَك گؤروردوم و هئچ اراده‌م اولمادان‌، ووجودوم كوره ده كي دمير كيمي اود توتوب يانسادا‌، رحمتلي آنامين بير سؤزو هئي ياديما دوشوب مني دوشوندورورك، اؤزومه سؤز وئرميشديم كي بو دفعه عشقيمي گيزلتمه ‌یم.”

–    ” بَيه او نه دئميشدي كي بو جان قماريندا سني بو قَدَر دوشوندوروردي ؟ “

پولاد گؤز ياشلاريني توتانمادان بير آلما آغاجينا داياناراق دئدي :

” او دييه‌ردي كي جان وايينا قالان بير انسانين اوره‌يي اونا يالان دانيشماز. او آنلاردا انسان دويغولاري بير بولاغ كيمي چاغلاييب آخاراق دورولوق و صافليقدان باشقا هئچ نه اوندا گؤرونمز. بو واختلاردا نه‌يي حيسّ ائتسن اونا اينانماليسان !”

 رعنا بارماق لارينان اونون گؤز ياشلاريني سيله‌رك دئدي :

–    ” پارچالانميش اوره‌كلرده هايلاديلار. ياشاييشدا چوخلي درده و كدره اوغراسام دا جانا دويدوقدا هئچ واخت عاغليما يوخ اوره‌ييمه قولاغ آسارام. محبت بير زاد دير كي اونو گيزلتمك اولمور. سني سئويرم پولاد !”

–    پولاداونون سئويج دولو گؤز ياشلاريني گؤرركن دؤزه بيلمه دن جانينا دوشن لاوغانان گئتدي كي تك باشينا، بير آز داها دوشونمك اوچون دينجلسين.

گونلر گئچه‌رك پولاد اؤزونو قيوراق و ساليم حيس ائتمكله اراده‌لي بير ساياقدا گله‌جه‌يه ساري آدديملاماق اوچون آياقلاريندا گوج دويوب و بير گون ويداعلاشماق قرارينا گلديك ده سيياوش دئدي :

–    ” سن‌، منسيز بير يئره گئتمه‌يه‌جكسن. ايلك ايشيميز گئديب بير ايستيشهاد دوزلتمك و وكيل توتاراق سنين اصيل كيملي‌ييني بير داها اؤزونه قايتارمالي‌ييق. “

پولاد سياوشين بو كئفده دوسلوغونا حئيران قاليب هئچ نه دئمه‌دن سوسدي و صاباحي گؤزله‌دي. سون كي گون عزيز‌، ائولادي سيياوشي قوينونا باسار كيمي پولادي دا بير آنا سئوگيسي‌نن باغرينا آليب اونلارا خئيير دوعا ائتدي. رعنا دا پولادين گؤزلرينه گؤز تيكه‌رك دامجي – دامجي آخان گؤز ياشلاريني گيزلتمك ايسته‌سه‌ده اونلارلا خدافيظ‌لشركن هيچقيرتي ايله آيريليب باشين قويدي عزيزين چيي‌نينه.

پولادلا سيياوش يوللاري سورعتله گئريده قويوب تهرانا يئتيرديكده پولاد دؤنوب دئدي :

–    ” منجه سئوگي‌ني قورتارمادان خويا گئتمك‌، بيله‌مه بير جوره غيرتسيزليق گلير. كيشيلي‌يه ياراشمايان بير زاد و قايغيسيز بير آتا اولماق كيمي. منه ايذين وئر بير پارا ايشلري بيتيريم حاجي !”

–    ” سن فيكر ائليرسن سنين قلبينده كئچنلري من بيلميرم ؟ يارالي اوره‌يين‌دن آخان قانلارين شيريلتيسيني دويورام، آمما اؤنجه سنين قانون قارشيندا وارلیغين و ياشامين اوزه چيخمالي‌دي. هر زادين فيكريني ائتميشم و مولا علي نين ذولفَقارينا آند ايچيرم كي خوي دان قاييتديقدان سورا‌، سن نه دئسن او اولا.”

پولاد اوره ك قانيني اوداركن دينمز دانيشماز گئجه‌ني سيياوَش‌له بير ليك ده فيروزه آدلي بير هتل ده كئچيريب سحري حسابلاريني اؤده‌مك ايستركن صانديق باشيندا كي گنج بير كيشي دئدي :

–    ” سيزدن پول آلماغا ايذنيم يوخ دي. حسابيز اؤده‌نيبدي.”

هر ايكيسي بو ايشه مات قالاراق كيمين اؤده‌مه‌سيني سوروشدولار كي دئدي :

–    ” هتل ين مديري. دئييردي پولاد لا چوخ قديم دوسلوقلاري واردي. “

 پولاد اونون كيم اولدوسونو سوروشاراق او هئچ نه دئمه دن ،بير تئلفون آچيب گؤزله‌مه‌لرين ايسته‌دي.

پولادلا سيياوَش رستورانا كئچيب بير چاي ايچَنه‌، بيرينين اونلارا ساري گلمه‌سين گؤردولر. پولاد دقّتله باخيب اونو تانيديقدا گؤردو اسكي دوستو ” ماحمود ” دي. اؤپوشوب گؤروشوب اوردان بوردان سؤز آچاركن ماحمود دئدي :

–    ” تهرانا كؤچمه‌ييميز كي ياديندادي ؟ ائله او كؤچمك ايله بير يوللوق بوردا قالمالي اولوب، قديم يولداشلاردان خبرسيز قالديم. آنجاق بير گون خويا گئدينجه ائشيتديم كي اؤلوبسن. حتمن منه گوله‌جكسن! آمما بو سؤزي هر آغيزدان ائشيديرديم. دئمك كي يالان ايميش. دونن سني گؤردوكده گؤزلريمه اينانماسام دا، آمما بَيه قوچ پولادي اونوتماق دا اولار مي؟

–    قيرقي كيمي ساواشيب پيچاغيندان بير شَهَرين حساب آپارديغي پولادي دا اولار كي بير دوستودا تاني مايا ؟”

–    ” سؤيود آغاجينا چيخيب لاپ اوجا بوداقدان زلزله بولاغينا شيرجه وورماغين هله ياديمدادي. مئيخانادان چيخيب كئفلي – كئفلي گئجه‌لري اوخوماغيميزي دا هله اونوتماميشام. آمما زامان هر ايكيميزي ده دَييشيب. نه من او قوچ پولادام ،نه سن او ماحمود فيروزه. فيروزه كي اونون گؤزللييين ده شَهَرده بير قيز يوخ ايدي. آمما نئينه‌دين؟ بيله‌سين آلدين يا كي ائله اوندان دا هتل اوسته قويدوغون بير آد قاليبدي ؟”

–    ” بولوردون كي بوتون عشقيم فيروزه ايدي و ايندي ايللردي كي حيات يولداشيمدي. بو گئجه‌ني شاما بيزده‌سيز كي فيروزه ده سيزي صبيرسيزليكله گؤزله‌يير. همه‌شه دئيه‌ر كي پولادين قورخوسوندان هئچ كس اوناسؤز آتانمازدي.”

سيياوَش اونلارين توركجه دانيشديقلاري اوچون بير زاد آنلامادي، آمما پولادين آلنيندان سوزولن ترلردن بيلدي كي آنلاشيلماز بير هيجان ياشايير. سونرا پولاد ،گئتديكلرين دن سؤز آچاراق ماحمود ائو و جيب تئلفونون نومره‌لريني اونا وئره‌رك سايقيلارلا اونلاري يولا سالدي.

پولادلا سيياوش ين اون ايكي ساعاتليق بير يول قارشيلاريندا اولاراق‌، تهران كرج اُتوباني له يولا دوشدولر.

سيياوش يولدا كئچميشين دن‌، اوغلوندان و خانيمي نان ياشاديغي گونلردن و اؤزلليكله عائيله ايله بيرليكده تبريزه گئتديك‌لريندن سؤز آچدي و تبريزه چاتديقدا هر كسي كدرلي گؤروب توكان بازارين باغلي‌ليغيندان و خلقين كوچه خيياباندا كي ايزدَحامينا متعجب قالديقلاريندان سؤز آچدي.سونرا ائشيتديكلري خبردن غوصصه‌له‌نيب خلقه قوشولمالاريندان دئدي :

–    ” آلديغيميز خبر استادشهريارين ايتگي سي ايدي. بيزده جماعته قاتيشاراق” شهريار” ين طاهير و ملكوتي بدني ني شاعير لر مقبره سينه جان تشييع ائتديك. هامي نين ديلينده استاد شهريارين شعر ي وار ايدي و هر ديلدن حيدربابايا سلام ائشيديليردي. “

پولاد بوسؤزلري ائشيده رك هردن ده جوموردي اؤزاحوالينا و قوچ پولاد اولدوغو گونلري خاطير لاييردي و محله نين ناموسونو اؤز ناموسو بيلن گونلري. هردن ده الي جيبين ده كي پيچاقا گئديب اينتيقام دويغولاري اونا ياشام گوجو وئريردي. رعنانين سئويملي گؤزلري و اوزونده كي گيزلي گولوش لري ايسه يادينا دوشوب گله جك اونا قارانليق و سونسوز بير تونل كيمي گليردي.

سيياوَش يورولماق بيلمه دن ماشين سوروردي و تبريزه يئتيره نه كيمي فقط نمار و ناهار يئمه يي اوچون ماشيني سا خلاميشدي. تبريزه چاتديقدا پولادين اسكي دوسلاريندان بيري “سليمان ” يادينا دوشوب و سيياوَش دن ايسته دي كي او دييه ن يول ايله گئتسين. تاكي پولادين ايسته يي له بير قاپي نين اؤنون ده ساخلاركن پولاد يئنيب زنگي چالدي. آيفون دان سليماني سوروشاركن قاپي آچيلسادا ايچَري گيرمه دن دؤزدي كي بير ي قاپي يا گله. قاپي اؤنونده سليماني گؤره رك اينانيلماز بير شكيل ده ايكي سي ده توتولدولار. سليمان ين بير قيچي اولمادان قولتوق آغاجينا داياناركن اونا باخيردي و اودا سليمانا.

–    ” نييه به بو حالدا سليمان ؟ “

–    ” سن ده داها او پهلوان دئييل سن كيشي ! قيوريم ساچلي و قارتال باخيشلي قوچ پولاد دا داها او قوچ لوق قالماييب. بو ايللرده نييه به هئچ دئمه ييب سن سليمان اؤلوري قاليري يا كي ؟… هله كئچ ايچري گؤره ك بو ايللري هاردايدين و بو آيريليقين سببي نه ايميش؟ “

 پولاد‌، سيياوش دن ماشيني پارك ائديب ايچري گيريب آزجا دينجَلمك لرين رجا ائده رك سليمان دا قاديني ني چاغيريب آياغيني ايسته دي. قاديني اونون قيچين گتيريب يئرينه سالاراق قولتوق آغاجيني كنار ا قويوب چيخدي كوچه قاپيسينا كي قوناقلارا خوش گلدين دييه.

پولاد‌، سيياوَش له سليماني بير – بير لري ايله تانيش ائده رك ايچري كئچيب بير چاي ايچه رك سؤزسؤزو گتيردي آرشين بئزي :

–    ” جيبهه ده يارالانيب اؤلومه جان گئتسه م ده تكجه بير قيچيمي ال دن وئرديم. ايكي قيزيم واردي كي مدرسه ده ديلرو خانيميم د ا داي قيزيم دي. سن نئجه ؟ نييه بو مدت يوخ ايدين. بير ايكي سري ده خبر توتدوم كي سئر سئفئه سؤزلر دئديلر. دئييرديلر قاچاق چي ايدي و اؤلدوروب لر… “

پولاد دينمه دن‌، بير آه چكيب آزجا دينجه لديك دن سورا خودافيظ له شه رك سليمان دان آيريلاراق خويا ساري يولا دوشدولر.

دونيا سانكي پولادي‌، سيياوشي‌، سليماني و مين لرجه او نسلين اينسانين‌، قارقيميشدي و اينانجي اولان هر بير شرف بايراقي داشي يان دوز اينساني‌، سرنوشت پيس جوره اَزميشدي.

خويا يئتيرينجه پولاد يوزلر دفعه اؤلوب ديريلسه ده اوره يي دؤيونوب چيرپينيردي.گؤزلرينه اينانمادان دوغما يوردو خويون هاواسيني جي يَر لرينه چكيردي و كئچميش‌، دالي يا چكيلميش بير ويدئو فيلمي كيمي گؤزلرين ده جانلانيب هيجان ايچره چير پينيردي.پاييز گئجه لري نين اوره ك سيخيجي گونلرين دن بير ايدي و سازاق وار گوجو ايله آغاجلارين يارپاقيني قوپاريردي.

سيياوش خوي شهرينه يئتيرجك فرماني آلدي بير خييابانا ساري و نئچه كوچه دؤندوكدن سورا داياندي :

–    ” ايندي دييه‌جكسن سيياوش بوراني هاردان تاني‌يير؟ “

–    ” بورا اصلان گيلين ائوي‌دي. يولو لاپ دوز گليب سن. آمما نييه بورا ؟”

–    ” تبريزدن چيخاندا زنگ آچيب جرياني اصلانا دئمكله هامي اَقرَبان و سني سئوه‌ن و تانييان همشهري‌لرين ييغيليب لار بورا. شهريزين عدليه رئيسي ده بير وكيل‌له بيرگه بوردا اولاجاق لار. گرك كي تئزليكله اداري ايشلري بيتيريب گئده‌ك تهرانا. اصلي ايشيميز هله اوردادي. “

ائوين قاپيسيني چالاراق سيياوشين سسيني دينله‌ين اصلان‌، قيرخا ياخين آدام‌لا بيرگه، قاپي‌يا چيخيب، پولادي قوينولارينا آلاراق،سلام صلوات‌لا قاباغيندا بير قوربان كسديلر.

دوسلار و قوهوم قونشولار، اونو اؤپوپ، گؤز ياشلاريني توتانمادان ، باشلاييرلار اونا توتدوقلاري ياسدان دانيشيب و افشانه‌نين دؤزمه‌دن اره گئتمه‌سيندن. گئجه‌ني سحره ياخين اوتوروب دانيشسالاردا سحر اولجاق هامي آيريلاركن اصلاندان ايستير كي اونو آناسي‌نين مزاري اوسته آپارا. اصلان اونون مدرسه يولداشي اولسادا بؤيودوكجه دوسلوقلاري بركيييب، بوتون دعوالاردا ويريب ويريلسالاردا‌، هئچ زامان بير – بيرلريني تك قويمازديلار. دعوالاردا يا محله قيزلاري‌نين اوستونده ايدي يا كي قمار اوزره. شَهَرده بير نئچه روسپي‌ده وار ايدي كي هردن اونلاري اؤز ضييافتلرينده اويناديب، قوناق ائده‌رك كئفلي‌ليك عالمينده دوشَرديلر بير – بيرلرينين جانينا.

 اصلان بير نئچه گون شَهَري گزيب بوتون تار- تانيشلارلا گؤرو‌شه‌رك، حقوقي و قانوني ايشلرده وكيل طرفيندن اؤز سئيريني سورورودي. هردن‌ده اسكي دوسلار و قوهوملارين باغلاردا و ائولرده وئرديكلري ضيافتلره قوشولوب منتظر ايدي كي ايشلر بلكه تئزليكله بيتميش اولا.

خوي‌ون پاييزي يئنه همه‌شه كي كيمي سويوق ايدي و سيياوش اوچون بو سويوق چوخ عجيب گليردي. كرمان‌ين طبيعتيله اورانين طبيعتي يئردن گؤيه قده‌ر فرقلي ايدي. بير گون سيياوشي ده گؤتوروب گئتديلر زلزله بولاغينا و اصلان تونقال قوروب قيزيشسالاردا بيردن بيره پولاد چيپلاق حالدا اؤزونو ووردي بولاغين سويونا كي اوچ دؤرد متر درينلييي ايدي و سويو آدامي بوز كيمي كسيردي. شاپپيلتي سسينه سياوش‌له پولاد دؤنوب باخاركن گؤردولر كي پولاد شيرين – شيرين چيممك‌ده‌دير. بولاغين سويو گؤزه – گؤزه درينليك‌لردن چاغلاييب قاينار حالدا سويون اوزونه ياييلسادا پولادين هئي چيخيب شيرجه وورماسي قاينار كؤپوكلري ايتيريردي. اصلان اونا آند وئره‌رك زور بيللاه لا سودان چيخيب اَيني باشين قورولاركن دئدي :

–    ” بوزلو سويون بو تَهَر قايناماسي دا دوغرودان عجاييب بير شئي دي. “

اصلان‌دا ” سن ائله اؤزون ده عجاييب بير زاد سان ” دئيه رك هر اوچونو گولمك توتوب ييغيشديلار تونقالين باشينا.

پولاد “بو چيممك منه قول‌لاريم‌دا و بيلك‌لرده هله قالان گوجومو خاطيرلاركن اوجا آغاجلارا ديرماشيب، گؤي‌دن ماغاللاق ويريب سويا شيرجه گئدن گونلريمي ده يادا سالدي. “

بير نئچه گون سونرا ايدي كي اونون گئرچك كيملييي عدليه قووه‌لرينه ثابيت اولدي و ساختا سندلر دوزه‌نله‌ين آداملاري آراشديريب تاپماقي گيزلي پُليس تشكيلاتينا تاپشيرديلار. پولادين اصيل كيملييي صادر اولدي و بو ماجرادا موجود اولان ايپ اوج‌لاري اله كئچيريلينجه افشانه ايله افشين عليهينه ده شيكايت اولوندي.

پولادلا سيياوش تهرانا گئده‌رك گئجه‌ني هتلده‌ايديلر كي سئوگي دن آلديقلاري خبر اوزره پولاد اوزون سيياوشه توتاراق دئدي :

–    ” حاجي‌جان منه بير زاد اولورسا سئوگي‌يه صاحاب‌دور. اونو بو باتلاق‌دان چيخارتماق منه دوشسه‌ده آنجاق جان قورتارانماسام سؤز وئر كي اونا ائولاد كيمي باخاسان. بير ده دوسلوق‌دا بير زادي سندن گيزلتسَم كيشي ليكدن دئييل. اودا او كي رعناني مندن اسيرگه‌مه. سئويب سئومك بعضن آدامين اؤز الينده دئييل !”

سيياوَش پولادين تيتره‌ر اللريني سيخاركن دئدي :

–    ” من هئچ نه‌يي آنلاماسام دا عشقي و دويغونو ياخشي آنلارام. نييه كي گل ها گل ده رعنا سني منه تاپشيراراق حيس ائتديم كي اودا سني سئويري. ايشيميز بيتديك ده اونودا دوشونه‌ريك قوچ پولاد ! ايندي تكجه فيكريم سئوگي ني قورتارماق و افشين‌له افشانه ‌قانون الينه وئريب، سنين كئچميش شوكتيني بير داها گئري قايتارماغيمدير.”

پولادلا سيياوش ياتاقا گيريب ياتماق ايسته‌سه‌لرده پولادين فيكري سيياوشي يوخويا وئريب گيزلينجه اَكيلمك ايدي. جان دوستو اصلان دان افشين‌ين آدرسيني ده بير تَهَر اله كئچيريب نيّتي بو گئجه اونو گؤرمك ايدي. پولاد‌، سيياوشي يوخويا وئرديكده پالتارلارين گئييب ال آتدي پيچاغينا و نيفرت دولو اوره‌ك‌له‌، هتل‌دن ديشاري چيخدي. اؤزونو چاتديردي شيمرانين باغ باغاتلي كوچه‌لرينه و بير باغين اؤنونده كي ايچينده نئچه قاتلي بير محتشم ساختمان وار ايدي داياندي. پولاد اَن بير اويغون يئر سئچيب، دووارا ديرماناركن دوشدو ويلايا. اؤزونو اِهمالجا پنجره‌لرين اؤنونه وئره‌رك اوتاقلارين بيرينده بير ايشيلتي گؤردوكده چيخدي ايكينجي قاتا. دقتله باخديقدا افشانه‌ني بيرينين قوينوندا گؤره‌رك صبري قالماييب گيردي ائوه و او اوتاقي تاپيپ وار گوجو ايله قاپيني دووارا چيرپاراق افشانه اونو باشي اوسته گؤردو. آنجاق اَلي پيچاغا گئديب افشانه‌ني وورماق ايسته‌ينده گؤزو ساتاشدي سئوگي يه كي آناسي‌نين يانيندا ياتميشدي.

پولادين بير گؤزو سئوگي ده اولسادا اَل آتدي افشانه‌نين ساچلارينا و اونو ديشاري چكه‌رك پيچاقي يئنديرمك ايستركن سيرتينا بير تاپانچا داياندي. افشين گوله‌رك اونو بوراخيب قيزينا صاحاب دورماغين ايسته‌دي:

–    ” گئت قيزين ييغيشدير كي نئشه حالدا گونده بيرينين قوجاغيندادي. آمما حئييف كي اونودا باشارانماياجاقسان. نييه كي او هله قوللانديغي هروئين‌ين تأثيريندن چيخماميش سنين جانين چيخاجاقدير. خبريني آلميشديم و بيليرديم كي تئز گئژ داليمجا گليب زهريني تؤكه‌جكسن ! “

پيچاق پولادين اَلينده قورويان كيمي اولوب گئري‌يه دؤنركن بير گولله آچيلدي. گولله دوواري دئشيب سؤكسه ده افشين‌ين تاپانچاسيندان دئييلدي. چون او اؤزي ده ديكسه‌نه‌رك اويان بويانا باخيردي كي پولاد پيچاقيني بيردن توزارلاركن افشين‌ين بوينونا توخونوب دوشدي يئره. افشين بو اوزدن يارالانسادا‌، پولادي ايستيردي گولله‌لسين كي‌، آچيلميش يئني بير گولله اونو شاشيرداراق گؤردو كي نئچه پليس اونو دؤوره‌له‌دي.

پولاد باخديقدا دوستو سيياوشي ده گؤردو كي يونيفورم گئيمه‌سه ده پُليس‌لر اونون امرينده ديلر.

پليس ماشينلاري يئتيريب افشين‌له افشانه‌ني توتوقلويوب آپاراراق پولاد قيزي سئوگي‌ني باغرينا باسيب گؤتوردي اورژانس ماشينينا. سيياوش ده پولادين قانلي پيچاقيني يئردن گؤتوروب قاتلاركن قايتاردي پولادا :

–    ” قراريميز بو دئييلدي يولداش. آز قالميشدي هر زادي بير داها يوخ ائده‌سن. آمما نئيله‌مك كي قوچ پولادادا ائله بو ياراشيري. سن هتل دن چيخاركن پُليس‌لر بو اطرافي گيزلي حالدا كنترل ائده‌ركن دووارا هله ديرمانماميشدين كي من ايچري‌ده‌يديم.”

پولادين كي بوتون فيكري سئوگي نين يانيندا ايدي و اونون بايقينليق كئچيرمه‌سي لاپ بيله‌سيني اوزموشدو سانكي هئچ نه ائشيتميردي.

سئوگي‌نين حالي بير نئچه گون ايچره يئرينه گلديكده، اونون اعتياديني ترك ائتديرمك اوچون بير كلينيكه گؤتوردولر. پولاد قيزيندان آيريلماق ايسته مه‌يينجه رعناني گؤردو و بير قاديني كي اوّل اونو تانيماسادا سورا بيلدي كي فيروزه دير.  اونلار سؤز وئرديلر كي سئوگي نين باشي اوسته اولاراق هئچ واخت اونو تك قويمايالار.

آرادان بير هفته كئچميشدي كي بير گون پولاد‌، سحري يوخودان قالخاراق قيزي سئوگي‌ني باشي اوسته گؤروب فيروزه نين سسيني ائشيتدي كي دئييردي :

–    ” سحرليك يئمك اوچون اَل آياق ائدين كي حاجي سيياوش‌له ماحمود آجلاريندان آز قالا قيريليرلار. “

پولاد بو دورومو تعجبله قارشيلاركن سئوگي ني قوجاغينا آليب سئوينجيندن بيلميردي آغلاسين يا گولسون.

او گونو هامي‌ليغان شامي بير رستوراندا يييه‌رك سيياوِش رعنانان پولادي اَل اَله وئره‌رك يئني بير ياشام اوچون حاضيرلانماقلارين ايسته‌دي. سورادا سئوگي ايله فيروزه هره‌سي بير حلقه چيخاريب قويدولار ميزين اوستونه. ماحمودلا سيياوش ده موبارك اولسون دييه رعنانان پولادي نيشانلاديلار. سونرا سئوگي رعناني بير آنا كيمي باغرينا باسيب رستوراندان دؤنمك ايسته‌ديلر. ماحمود‌گيله يئتيرديكده گؤردولر چال چاغيردي و دئمه كي ماحمودون اوغلونان قيزي سورپيرايز اولسون دييه بو شنليك مجليسيني‌، اونلارين سئوينجي اوچون قوروبلار. قيز اوغلانلار موزيكين دالغالاري ايله شور سالاراق پولاد لا سيياوَشين ده اويناماقلارين ايسته‌ديلر.

مجليس سونا چاتديقدا‌، سيياوش پولادا بير هديه وئرمك اوچون هامي‌نين سوسماسين ايستركن جيبيندن عقيق قاشلي قيزيل بير اوزوك چيخارتدي. پولاد گؤردو كي اؤز اوزويودي و سيياوشي اؤپه‌رك اوجادان دئدي :

–    ” باجين بير ملك اولسادا سن ده چوخ كلكسن حاجي. دوزون دئه گؤروم سن كيمسن ؟ “

سياوش گوله‌رك رعنايا گؤز ائله‌دي و رعنا ايره‌لي گله‌رك دئدي :

–    ” سيياوش‌، ائله سيياوش‌دي. بير فرش تاجيري. منيم قارداشيم. آنجاق دولتده نفوذلي دوسلاري اولاراق هردنده سؤزونو يئره سالمازلار. زيندانا دوشمه‌سي‌ده بير تصادف اوزره ايدي كي بير نئچه گون سونرا اونو بوراخماق ايسته‌سه‌لرده سنين دورومون اونون ايلگيسيني چكه‌رك اؤز ايسته‌يي ايله اوردا قالميشدي. “

 بو آن دا پولاد اوزونو قوناقلارا توتاراق‌، سيياوش وئره‌ن اوزويو ياديگار اولسون دييه هديه ائتدي ماحمودا و اونا بوسعادتي ياشادان هامييا تشكّرلريني بيلديره‌رك، سئوگي‌ني و بوتون جوانلاري اؤز جمع‌لرينه چاغيراركن هامي بيرليكده اَل اَله وئريب باشلاديلار ياللي گئتمه‌يه.

1384

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *