قوچ پولاد
علیرضا ذیحق
ایل‌لرین یورغونلوغو و چکدییی آجی‌لار گؤزلرینده کی یئر سالمیش آغیر حوزون و کَدَر، اؤز ایزینی گؤسترسه ده آغارمیش باشی و آلنینداکی قیریشلار و بئینینده کئچن دولاشیق فیکیرلر اونو اؤزوندن بئزارلاداراق، دوشوندوکجه یومروقلاری دویونله‌نیردی. آمما داها یومروقلاری‌دا اسکیسی کیمی گوجلو، جسارتلی و ایراده‌لی دئییلدی. یئددی ایل حبسخانادا یاتماق اؤزوده آنا تورپاغدان اوتوبانلار و جاده‌لر واسیطه‌سیله یوزلرجه کیلومتر اوزاقدا اولماق، اونون غورورونو، گنجلییینی و کئچمیشده کی شوکتینی آیاقلار آلتدا تاپدالاییب، اَزسه ده، هله اوره‌یینده قیغیلجیم قَدَر بیر پاریلتی اونو یاشاما و وارلیغا باغلاییردی. بو یئددی ایل ده کیمسه‌دن بیر تئلفون یا مکتوب آلمادیغی‌دا اونو شاشیرتمیشدی و نه قَدَر چالیشسادا بیر باغلانتی قورانماییب و بیر نئچه گونلوک ایذین ده بیله‌سینه وئریلمه‌میشدی. بو ایللری تکجه بیر چینارا سؤیکه‌نیب زیندانین تیکانلی سیملرله دؤوره‌له‌نن اوجا دووارلارین آردیندان اوچان قوشلارا باخارکن، چینارین قیش قورتولوب یاز گلسه‌ده نئچه یاپراغی‌نین تؤکولمه‌مه‌سی، اونا یئنیلمزلییی و سارسیلمازلیغی خاطیرلادیردی.
ایشلرین نه سایاق بوروشوب بورایا گلیب چاتماسینا، ایللر کئچسه ده یئنه اینانا بیلمیردی. اَلیندن توتدوغو و اونا یاردیم گؤستردییی جان یولداشی‌نین، اونو آرخادان وورماسی هئچ عقلینه گلمزدی. بیر گون اؤزونه بیر بَی، بؤیوک تاجیر، آبیرلی ناموسلی بیر عائیله‌نین ائولادی و یورد یووا صاحیبی اولان بیرجه قیزی و حیات یولداشینان سعادتلی بیر یاشام سوره‌ن اینسان ایدی. مکّه‌یه گئتمه‌میشدن دوستلار و تانیشلار اونا ایگیتلییی و مردلییینه خاطیر قوچ پولاد دئسه‌لرده سونرالار بازاردا، کوچه ده و محله ده هامی اونا حاجی پولاد دئییب، درین حؤرمت ائده‌ردیلر.
اَل آچیقلیغی و خئیرخاهلیقی ایله، کیمسه‌سیز و یئتیم جوجوقلار ساخلایان دَرنَک‌لره اَلیندن گلدیکجه مادّی یاردیم ائدیب، چوخلی دده‌سیز قیزلارین جئهیزین آلیب اونلاری بخت ائوینه یوللامیشدی. آنجاق قلبی‌نین صافلیغی و بیر دوستا اینانماسی‌له بوتون وارلیغی خارابا و چؤکموش بیر دام کیمی باشینا تؤکولوب، اؤزونو تاپانا یوزلر یارا و بیرجه سینیق اوره‌یی‌نن اَللرینی کَلَفچه‌ده گؤروب، حیاتینی سورگونده و زیندان سورمه‌یه محکوم اولموشدور. کئچمیش اونا بیر گئرچک کیمی یوخ، بلکه بیر شیرین یوخو کیمی گلیردی کی اویانمادان، قارانلیق کابوسلار اونون دونیاسینی بورویوردو. بو یئددی ایلی سگگیز نفر اوچون ایکی قاتلی دؤرد تخت قویولموش بیر اُتاقدا یاشاسادا، یوزلرجه محکوم گلیب گئتسه ده ، آمما او هله آزادلیغینا قاووشماق اوچون، ایکی گون داها دؤزمه‌لی‌ایدی.
او بو سوره و زامان ایچره ائله آداملارلا گؤروشموشدو کی آداملیقدان‌دا اوره‌یی بولانیردی. کیشی‌لر گؤرموشدو کی کبینلی آروادلار و یئنی یئتمه گنج قیزلاری اوغورلاییب، یورد دیشیندا یابانجیلارا ساتمیشدیلار. آداملار گؤرموشدو کی اینسان باشی کسمک اونلار اوچون قوش باشینی اوزمکدن راحات ایدی و پولا خاطیر ساغلام اینسانلارین ایچ اورگانلارینی سیفاریشلر اوزره یئر آلتی دونیاسی‌نین چیرکین آلیش وئریشلرینده ساتیشا قویوردولار. قوماربازلار گؤرموشدو کی باکیره قیزلارینین ایلک گئجه‌لری اوزره، قومار ائدیب اودوب اودوزموشدولار.
اینسان‌لاردا گؤرموشدو اوره‌ک‌لری قوش اورهییندن اینجه و دوشونجه‌لری گوللر قَدَر عطیرلی اولاراق، ایناملاری و توتدوقلاری یولدا، دمیردن‌ده برک و دایاناقلی ایدیلار. دوسلوقلاری دوسلوقدان آشیب سئودیکلرینه یولداش یوخ بیر سیرداش ایدیلار و اونلارین جان ائوی، قارانلیقلاردا ایشیقلی بیر چیراغ. بونلاردان بیری ایسه سییاوَش ایدی. قوچ پولادلا جاندان، اوره‌کدن یولداش اولاراق، اوره‌ک‌لرینین دؤیونتوسویله، اورتاق دویغولار و دوشونجه‌لری ایله، بیرگه بیر نغمه‌نی ترنم ائدیردیلر.
پولاد کی زیندانا دوشمه‌یینجه، دوداغینا تکجه بیرسیقارا دا دَیمه‌میشدی، سییاوَش‌له گؤروشدویو زامان ایکی بسته سیقارا چکمه‌یی سو ایچیم کیمی بیر شئی ایدی. آمما بیر گون سییاوش، اونون سیقارالارینی گیزله‌درکن گئجه یاریسی اَلینی تختین آلتینا آتدیقدا، گؤرور سیقارلاری بسته‌نن یوخدی. دوشوب اویان بویانی آختارارکن دلی کیمی اولور و اُتاقی باشینا آلیب آغزیندان چیخانی دییه‌رکن هامینی یوخودان آییلدیر. اؤزگه‌لر دورومو آنلاییب اونا سیقارا وئرینجه سییاوَش توتوب اونلارین اَلیندن آلاراق، پولادین قانی قانین کسیر. آمما مکّه‌یه گئتمه‌دن یومروقلاری ایله قوچ آدی قازانسادا، بیر آندا کعبه‌ده کی ایلقاری تانری‌نان یادینا دوشه‌رک، یومروقلارینی سییاوَشه ساری یوخ، بلکه دووارا تاپداییب، اَللریندن قان آچیلیر. او گئجه شییاوَش، تر کؤینه‌یینی چیخاردیب جیراراق اونون یارالی بارماقلارینا باغلارکن سیقارالارینی قایتاریر :
” بو سیقارا چوخ چکمز سنی آیاقدان سالار. بیر آز آزاتسان یاخچی دی!”
سونرا پولاد چکدییی سیقارا دومانلاری ایچره یاتماغا چالیشیر. صاباحدان آمما دوسلوقلاری باشلاییر و اورا چاتیر کی سییاوَش بیر نئچه گون سورا چیخاراق، اونلارین یولداشلیغی ایکی سیرداش کیمی ایللر بویو دوام ائدیر. قوربت بیر ائلده و کیمسه‌سیز بیر حالدا کی حتتا قوهوم اَقرَبادان‌دا خبر یوخ ایدی، سییاوشی اَن یاخین اینسان بیلیب و اونون تاپشیریقی ایله یومروقلارینی برکیتمه‌یه چالیشیر. آمما هله ده کئچمیشده کی قوچ پولاددان بکله‌نن جسارتی اونلاردا گؤرموردو.
سییاوَش اونو تک قویمادان آراسیرا مولاقاتینا گلیب، دمیر بارماقلیقلار دالیندان، اونون اَلینی سیخیب باشینا نه اویون گلمه‌سی حاققیندا داها آرتیق بیلمه‌سی اوچون هئی اونو سورغو سوآلا چکیردی.
ایکی گون آزادلیغینا قالیرسادا، اوره‌یینی داها سیخیلمیش و توتغون گؤروب همه‌شه کی کیمی او قوجامان چینارا سؤیکه‌نرک مینلر فیکیر خییال بئنینده دالغا ووروب، وارلیغینی طوفانلی بیر دنیزده تک قالمیش بیر گمی‌یه چئویریردی.
گله جک اونو گؤرونمز و معمالار دولو بیر آدا کیمی ،حئیرانلیغا جومدوروب و او آدا دا باشینا گلنلری بیلمه‌دن آجی دویغولار و قورخولو فیکیرلر لحظه‌لرینی دهشتلی کابوسلارلا دولدوروردو. قارداشلاری، قوهوملاری و خانیمی ایله بیرجه قیزینین بو ایللرده اوندان خبر توتماماقلاری، اونو داها آرتیق کدره دالدیریردی. یوزلرجه دوشونجه ذهنیندن کئچه‌رک، خیانتین قوخوموش و پیس اییی مئعده‌سینی بولاندیرارکن قولاقلاریندا عصبلرینی پوزان بیر سس جینگیلدیردی. بو گونه‌جن، اوزونه گولوب آرخادان اونو عقله گلمه‌ین بیر تؤهمت و سوچلا حبسه سالدیران دوستو افشینی اؤز ایچَری دونیاسیندا مینلر دفعه اؤلدوروب، اینتیقام آلاولاری ایچره آلیشسادا، آدسیز نیشانسیز قورخولار اونو چولقالاییب جاندان اورکدن سئودیگی قیزی “سئوگی” نین تقدیری بیله‌سینی داها آرتیق اینجیدیب و نیگَران ائدیردی.
حبسخانانین سون گئجه‌سی ایدی و ایلک دوشوندویو تکجه ایرانشهردن آیریلینجا ” کرمان ” شهرینه گئدیب سییاوَش ایله ویداعلاشماقی و یئددی ایل اؤنجه جیبیندن چیخاریب زینداندا امانت اولان صدف دسته‌لی زنگان بیچاغینی آلماق ایدی کی اوزه‌رینده ” یا حسین ” سؤزونو قیزیللا یازدیریب و پولاد تیغه‌سینی گوموش سویو ایله زاغلاندیرمیشدی.
پولاد کی قارا بوغلاری و دولغون پارلاق ساچلاری ایله بیر گون اؤز شَهرینده آد-سان صاحیبی ایدی و عاشورا گونلری محله دسته‌سینین ایکی یوز ایللیک قارا عَلَمینی داشیییب، ائوینین اؤنونده دسته‌نین آیاقلاری آلتیندا قوربانلار کسدیریب و بوتون زنجیر ووران، نوحه دییه‌ن و سینه ووران حسینچی‌لره احسان ائده‌ردی و قاپیسینا گلن کیمسه‌نی اَلی بوش یولا سالمازدی، بو آنلاردا، یاشادیغی دیدرگین احوالاتینی دوشونوردو.
او سربازلیقدان قاییدیب بازاردا بیر زرگر توکانی یولا سالاراق، تانرینین برکتی اونون وار دؤولتینی گونو گوندن آرتیراراق، باغ باغات صاحیبی اولوب، اؤز شهرینین سؤزو کئچن آداملاریندان بیری ساییلیردی. آمما ایندی پولاد، دوغما یوردونا قاییدیب نه سایاق قارشیلانماسی اوچون فیکره دالدیقجا بو قَدَر قوهوم اَقرَبانین بیردن یوخا چیخماسی اونو لاپ دلی ائدیردی.
سون گئجه‌نی نئیله‌سه‌ده یاتا بیلمه‌دی و صوبح اذانی اولونجا، چانتاسینی باغلاییب گؤزله‌دی کی دمیر بارماقلیقلار دالیندان اونو چاغیریب آزادلیق حؤکمونو اَلینه آلارکن یئنی بیر یاشامین ایلک آددیملارینی آتا. ائله ده اولدو و اونون یئددی ایل اؤنجه کی پالتارینی بیله‌سینه قایتارارکن، اونلار اَینینه گئن گلدی. لیباسلار اَینینده تاولانسادا باشقا بیر سئچه‌نه‌یی یوخ ایدی. آنجاق اونا حبسی‌نین سونا چاتدیغی اوچون آزادلیق کاغاذی وئریلیب یولا دوشونجه، سیجیللی‌سینی اَله آلدیقدا، اونون فتو شکیلی اؤزونه عایید اولوب آدی و سوی آدی دوز اولسادا، نه رحمتلی آتاسی‌نین آدی دوز ایدی نه ده دوغوم ایلی ایله دوغولدوغو یئر. هم ده سیجیللی ده نه خانیمی‌نین آدی وارایدی نه ده اوشاغی‌نین. بو ایشه حئیران قالیب اعتراض ائدینجه بیلگی سایارا باخیب دئدیلر :
” سن ائله بیل قاریشدیریبسان. سن دییه‌ن بیر آیری آدام ایدی کی زیندانا گلدیکدن ایکی آی سونرا اؤله‌رک قبری ایرانشهرین قبریستانلیغیندا، یئتمیش یئددینجی سیرادادی.”
دونیا پولادین باشینا دولاناراق دینمز دانیشماز چانتاسینی گؤتوروب یئنی بیر کیملیک‌له دیشاری چیخدی. جیبلری بوش و کیمسه‌سیز قریب بو اینسان، اؤزونو بیر آن دا او قَدَر یالنیز و یازیق حیس ائتدی کی ایره‌لی گئتدیکجه باشی گیجه‌لرکن یئریمه‌یه ایمکانی اولمادی. آزجا دوروخوب اؤزونو تاپارکن زرگر بازارین آدرِسینی سوروشدی. گؤزونون تیکه‌جه‌یی تکجه بیر عقیق قاشلی قیزیل اوزوگ ایدی کی اونو ساتماقلا بیر تَهَر یولونو توتوب یوردونا دؤنمه‌لی ایدی. اوزوگو ساتیب یولا دوشمه‌دن اوّل بیر تاکسی توتوب گئتدی قبریستانلیغا و مزارینی آراییب تاپاراق، اؤزونه بیر فاتحه وئردی.
پولادی قات قاریشیق فیکیرلر آز قالا سئفئه ائدیردی کی اؤزونو اُتوبوسلا کرمانا یئتیردی. افشین‌ین فیکری و اونون اَلی ایله نئجه اَزیلدییی یادینا دوشه‌رک اوره‌یی آز قالا پاتلیردی.
کرماندا چتینلیکله جان یولداشی سییاوشین ائوینی آرارکن، قارا گؤزلو، قره‌شین و اوجا بویلو بیر قادین قاپینی اونون اوزونه آچیب، باشی آچیق اولدوغونا گؤره، اؤزونو قاپی آردیندا گیزله‌دیب اونون کیم اولدوغونو سوروشدو. پولاد او قادینین گؤزلرینه باخارکن سییاوَشیین گؤزلری نظریندن کئچدی: ” حاجی پولادام. سییاوشین دوسلاریندان. گلمیشدیم خدافیظلییه.”
بونو ائشیدن قادین، هئچ چکینمه‌دن پولادا خوش گلدین دئییب، بیله‌سینی ایچری آلدی. آناسینی سسلرکن اونو قیخلیق فرشلر و مُخدّه‌لرله دؤشنمیش بیر اوتاغا کئچیرتدی. پولاد اؤزونو تاپانا سییاوشین آغ بیرچک آناسی کی قیزی اونو عزیز سسلیردی ایچری گیره‌ن کیمی اونون آیاغینا دوردو و بو آندا باشی گیجه‌له‌رک زور گوج ایله اؤزونو ساخلاشدیریب ،اوتوردو یئره. عزیز دئدی:
” صفا گتیریبسیز. سییاوش سیزدن او قَدَر دانیشیب کی سنی گؤرمه‌سم ده بیر آنا کیمی قایغینی چکیردیم. سییاوش سنی قارشیلاماق اوچون ایکی گون بوندان قاباق یولا دوشسه‌ده، ماشینی یولدا کیچیک بیر قضا کئچیریب، سنی گلیب تاپانماییب. دونندندی ائله تئلفون ائدیر کی سن گلیب چیخیبسان یا یوخ ! “
عزیز بو آندا قیزی رعنانی چاغیریب، تئزراق چای و قلیان گتیرمه‌سین ایسته‌دی. سونرا سسلندی :
” هم ده سییاوشه بیر زنگ آچ و حاجی‌نین گلمه‌سین دئه.”
رعنا چای و میوه گتیردیکدن سونرا ایکی قلیان‌دا گتیریب اوتوردو آناسینین یانیندا. پولادین گؤزلری یئنی بیر کره رعنانین باخیشینا ساتاشارکن، دونیا قادینلاریندا اولان بوتون گؤزللیک‌لری اونون معصوم و گولر اوزونده گؤردی. او قوچ پولاد اولدوغو گونلری یادا سالیب بیر لوطی کیمی قلیان چکمه‌یی اونودماغا خاطیر، بیر آن یومروقلاری دویونلندی.
رعنا سوفره آچیب یئمک ایچمک حاضیرلایانا قَدَر اونو یاتاق اوداسینا کئچیریب، دوش توتوب دینجلمه‌یین ایسته‌دی. پولاد حامامدان چیخیب جانینی قورولارکن، بیله‌سینه حاضیرلانمیش تزه بیر کؤینک و پیژامه گؤروب، اَیین باشینی بوسبوتون دَییشدی. آزجا اوزانیب دینجین آلینجا، بیله‌سینی ائله یوخو آپاردی کی شام یئمه‌یینه اویاندیرسالاردا اونو یاتمیش گؤروب داها سسلمه‌دیلر. سونکی گون ناهارا یاخین ایدی کی گؤردویو بیر کابوسلا دیکسه‌نیب یوخودان دوردی. او یوخودا اؤز قبرینی گؤره‌رکن، اَل ده بئل قبرینی قازماقدا ایدی کی داشلار و سال‌لار آلتیندا بیر اسکلت گؤروب نه قَدَر باخسادا اؤزونه بنزه‌دنمه‌دی و اَل آتدی جومجومه‌سینی گؤتوره کی گؤزلرینین بوشلوغوندا ایکی بؤیوک ایلانین اونا ساری بویلانیب، داشلانماسی، پولادی قورخودوب آییلتدی. ندنسه او ایلان‌لارین گؤزلری افشینله افشانه‌نین گؤزلرینه اوخشاییردی و آییلسادا یئنه بدنی تیتره‌ییب اَسیردی.
رعنا پولادین پیلله‌لرده اوتورماسینی گؤرونجه اونا ساری گئدیب، ناهار یئمک اوچون اونلارا قاتیلماغین ایسته‌دی. رعنا اونو بو تَهَر کئفسیز و رنگی قاچمیش گؤردوکده دئدی:
– ” گوجونو توپلاییب آللاها توکّل ائت کی کیمسه تقدیرله ساواشا بیلمز. یئنی بیر باشلانیش اوچون قدم گؤتور و اودو سویو، تورپاغی و اَسَن یئل‌لری بوتون وارلیغینلا حیس ائت و قیزین ” سئوگی ” نی دوشون. سییاوش سندن بیزه او قَدَر دانیشیب کی حدّی یوخدی.”
– ” ایندی کی بئله‌دی سییاوشین بو کئفده غم غوصه‌یه باتماسینداندا منه دئه. اؤزوندن و کئچمیشیندن منه هئچ نه دئمه‌ییب.آمما گؤزلری سانکی ایللرجه آغلاییبدی. همه‌شه ائله توتغون و پوزغوندور؟”
– ” او چکن دردی داغ چکسه‌یدی اَریمیشدی. نئجه دییه‌رلر غم، غم اوسته یاغیب بیله‌سینه. ایران عراق جنگینده بیرجه اوغلونو شهید وئریب خانیمیدا دِپِرسییونا گیره‌رک اینتحار ائدیبدیر. اونو دونیایا باغلایان تکجه بیر زاد اولسادا آنام لا منیم وارلیغیمدیر. “
– ” مندن داها نه‌لر دئییب ؟”
– ” سنین دلی سوولوغوندان. هم ده گوناهسیز یئره حبیس یاتاراق یئددی ایل تامام بوتون کئچمیشیندن خبرسیز قالماغیندان. حتتا دئییب کی سن، سن دئییل سن…”
– ” باشا دوشمه‌دیم. نئجه یانی من، من دئییلم ؟”
– ” یاخشی بیلمیرم. شاید ده منظوری اوایمیش کی زیندان سنی سینیخدیریبدی. گئنه سن سن کی دوام گتیریبسن. یوخسا کیم اولسایدی ایندییه جان یوز دفعه کفن چوروتموشدی.”
رعنانین سؤزو هله بیتمه‌میشدی کی پولادین حالی قاریشیب بدنی دوشدو تیتره‌مه‌یه. آمما آز سونرا اؤزونو توپارلارکن رعنایا باخدیقدا دوروخدو :
– ” سن دوز دئییرسن، نه من و نه سییاوش داها کئچمیشده کی آداملار دئییلیک. ایسته‌سک ده بئله اولا بیلمه‌ریک. آمما سن نئجه؟ همان آدامسان کی وار ایدین یا سن ده همان آدام دئییلسن؟ دانیشیغیندا دنیزلر قَدَر غم دالغاسی واردیر و گولر اوزونده گیزلی بیر سیر، باخیشلاریندا اوچان سئوینج گؤیرچینلری، سانکی چنلی دومانلی بیر توزاناقدان چیخمیش کیمی‌دیلر. “
– رعنا گؤز یاشلارینا حاکیم اولمادان پولادین گؤزلرینه دالیب، گولومسه‌سه‌ده هیچقیرتلی بیر آغلاییشلا اوندان آیریلدی. پولادین اوره‌یی بو گؤرونوشله بام باشقا بیر تَهَر اولاراق، جوانلیقدا تجربه ائتدییی عشق دویغولارینین آلاوینی یوخ، آمما ایشیلتی‌لارینی خاطیرلادی. اؤزونو رعنایا چاتدیریب تسلّی وئره‌رکن دئدی :
– ” بو گؤز یاشلاری، سنین هله سن اولدوغونو آنلادیر. بیر آدام آغلایا بیلیرسه یعنی هله اینساندیر.
– زمانه هره‌نی بیر جوره آغلادیر. من ده ائله سنه و سییاوشه تای بیرییم. بیر قادینین بخت اولدوزونون سؤنمه‌سی ده ائله کیچیک یارا دئییل. یالنیزلیق، آجیلیق و آجیمالار اونودولان بیر زاد دئییل‌لر. “
– ” دئمه‌میش ده سؤزونو آنلاییرام. آتام اؤلدوکده، آنام اوننان سورا ایللر یاشاسادا ائله او آندان اودا اؤلموش ساییلیردی. “
– ” آمما قادینلارین کؤنولو گول یارپاغیندان اینجه اولسادا، سؤکوب دیده‌ن تیکانلاری دا واردی. هامی دا ائله سنین رحمتلیک آنان کیمی ایلقارلی وفالی چیخماز. “
– پولاد گولومسرکن رعنانین اوزونه بیر اُووج سو چیله‌رکن دئدی :
– ” اؤزگه‌لرله هله ایشیم یوخ. آمما سنین گوللر کیمی عطیرلی روحون، منه بیر گولو یوخ، گولن بیر گولوستانی خاطیرلادیر و آنام دا دویدوغوم ووقاری. گؤزلر یالان سؤیله‌مزلر و سنین هر باخیشیندا، چؤل چیمنده بیتن آل الوان گوللری گؤرورم کی ذاتَن تیکانسیزدیلار. “
– ” سن یوخودان دوراندان، احوالاتین چوخ دَییشیکدیر. رنگین قاچیب و اللرین تیتره‌ییری. سببی نه دیر ؟”
– ” یوخودا ایکی ایلان گؤردوم. بیرینین گؤزلری لاپ افشانه‌نین گؤزلری ایدی. “
– ” افشانه کیم ؟”
– ” حیات یولداشیم. گؤزلریندن اود پوسکوروردی و ندنسه اونو دوشوندوکجه حالیم بوسبوتون دَییشیلیری.”
– “گوجلو اول ! گوجدن گوج دوغار و کیشی‌یه صبیر یاراشار. هر زاد دوز‌ه‌لندی. فقط بیر آز دؤزوم لازیمدی.”
رعنا پولادین حوزونلی و چوخورا دوشموش گؤزلرینه باخیب باشینی آشاغی سالاراق سوسدو و گئتدی اوتاغا. پولاد دا ایچری گیریب عزیزه سلام وئره‌رکن کئچدی سوفره‌نین باشینا. یئمک ییه‌رکن گؤزلری ساتاشدی بیر عَکیزه کی سییاوشله آنا باجیسینی مکّه‌ده گؤستریردی. بو عکیز اونا کئچمیشی خاطیر لاداراق آناسی‌نان حجّه گئده‌ن گونلری یادینا دوشوب دولوخساندی. هم ده پیچاقی یادینا دوشدو کی مکّه‌یه گئتمه‌میش اوزه‌رینده یاحسین یازدیریب، آند ایچمیشدی کی فقط اؤز آبیر و ناموسونو قُوروماقدان اؤتور اونون ضامینینه فیشار وئریب لاتدیقی بیر یوللوق قویا یئره.
پولاد او زامانلار بارماق ساییندان آرتیق گؤزله وورولسادا، ائولنمه‌یی دوشونمه‌مک اوزره، بوتون سئویب سئویشدییی قیزلاری گؤزو گؤررکن بخت ائوینه آپاریردیلار و بو دردلر یاندیریجی زهر کیمی اوره‌یینی دئشسه‌ده، یئنه‌ده بو آجی‌لاری اؤز ایچینده داشیییب، او قیزلارا بیر ضرر وئرمزدی. سربازچیلیقدان قاییداراق بازار ایشینه قاتیلیب مکّه‌یه گئتمکله، کئچمیشیندن فاصیله آچیردی. داها پیچاق چکیب، بوی دئمه‌یی قویور یئره و الکل قوخویان ضیافتلردن کنارا چکیلیر. قوچ پولاد، حاجی پولاد اولماقلا حیات طرزینی بوسبوتون ده‌ییشیرک هر ایش ده آللاهین رضاسینی دوشونور. تا کی بیر گون قدیم دوستو افشین اونون یانینا گلمکله، ایسته‌ییر کی بیله‌سینه بیر ایش تاپسین. افشین‌ین بیر نئچه گون گلیب گئتمه‌یی‌نن اونودا اؤزو کیمی ناماز قیلان، آللاهدان قورخان و کئچمیشیندن توبه ائله‌میش گؤرورو. بو اوزدن ایسه اونو اؤز توکانیندا بیر گؤزه‌تچی کیمی اوتوردوب، بانک ایشلرینی اونا تاپشیریری. بیر ایل کئچدیکدن سونرا، اونو دوز، امین و باش آشاغی گؤروب، آیلیق معاشینی آرتیراراق داها دا آرتیقجا اؤز قانادی آلتینا آلیر.
پولادین مشتری‌لریندن چوخو قادین اولماغا گؤره، توکانا قیز گلین گلرکن افشین دیشاری چیخیب اونلار گئدندن سونرا ایچری گیرردی کی بو عادت پولادین اعتیمادینی اونون ناموسلو دَبَشدی‌یینه داها چوخ جلب ائده‌ردی. مشتریلر ایچره بیر آنا بالا دا وار ایدی کی چوخ حیالی و محجوب نظره گلمکله، قیزین ماوی گؤزلری و ساریشین صیفَتی ایستر ایسته‌مز حاجی‌نین قلبینده بیر محبت حیسّی اویادیردی. هردن ده او قیز گؤز آلتی اونا باخاراق گولومسه‌مه‌یی ایله لاپ اوره‌یینده یئر آچیردی. حاجی پولاد بو اوزدن افشینله دوستجا دانیشاراق اوندان ایسته‌دی کی بو قیزین عائیله دوروموندان بیر خبرلر اَله کئچیرتسین. سونرا آناسینا دا مصلحت ائتدی کی آناسی یئتیشیب یئتیرندن سونرا، گؤیولدن او ایشه هئچ راضی اولماسادا پولادین ائتدییی ایصرار اوزره او قیزا ائلچی گئتدی.
بیر آی ایچره ائوله‌نیب توی ائده‌رکن، توکانی افشینه تاپشیریب خانیمی افشانه ایله بال آیی اوچون کربلایا گئدیب ایلقارلارینی امام حسین ین بارگاهیندا بیر داها تَزه‌له‌دیلر.
یوردا دؤنوب اورتاق حیاتلارینی باشلارکن افشانه پولادا او قَدَر محبت و سئوگی گؤستریردی کی بیر لحظه حاجی‌نی پوزغون و یورغون گؤرنده آز قالا اؤزونو اؤلدوروردی. پولادین باشینی دیزینه آلیب او قَدَر اونو اَزدیریردی کی بلکه بوتون کدرلرینی اونودموش اولا. بئله‌لیکله اونلار شن بیر یاشام سوره‌رک ” سئوگی ” آدلی بیر قیز صاحیبی اولورلار. بئله‌لیکله آرادان سگگیز ایل کئچه‌رک سئوگی نین یئددی یاشی تامام اولدوق دا اونون دوغوم گونو اوچون بیر جشن توتوب کئفلرینه کئف چیخمیری. آمما ندنسه آز کئچمه‌دن، تقدیر اونون حیاتینی ائله آلت اوست ائدیر کی تکجه بیر داهادا قیزینین گؤزلرینه باخماق اوچون یئددی ایل هیجرانی، عذابی و عقربلی یاتاقلاری زیندان حوجره‌لرینده تاب گتیرمکله اینتحار دان چکینیری. ایندی ده سونو بللی اولمایان بیر یولون موسافیری اولموشدی. حتتا اؤزو اؤز قبری اوسته گئده‌رک جعلی بیر سیجیللی ایله صاباحا دغرو قدم آتمالی ایدی. اؤزللیکله رعنانین ” سن، سن دئییلسن ” دئمه‌سی لاپ اونو داغیتمیشدی. رعنانین اوزون قارا ساچلاری چییینلری اوسته تؤکولسه ده، حاجی پولاد باخیشلارینی گیزله‌دیب سئیر ائتمکدن چکینیردی. کربلادا کی ایلقاری یادینا دوشوردی و عشق، اونو قورخودوردی.
او گونو سیاوش گئژ گلیب چاتسادا آخیردا گلدی و ایکی یولداش بیر-بیرلرینه ساریلیب سؤز صؤحبتلری اوجالدی :
– ” گلمیشدیم دالینجا آمما حئییف کی یئتیرنمه‌دیم. سنی بیر داها گؤرمه‌مکدن چوخ قورخوردوم. نییه کی بیلدیییم بیر پارا سؤزلر وار ایدی کی گرک سنه آنلادایدیم. سیجیللی‌نینده قضیّه‌سینی ائشید‌ه‌رک لاپ اوزولدوم. شَهَره چیخیب دولاشماغا نه دئییر سن؟ بوردا دا گؤزل آز دئییل. هم ده بیر توکانا باش ووراق کی نئچه گوندی باغلی‌دی. خوی، تبریز و آذر شهر فرشلریمه ده بیر باخ و اونلاری کرمان دا توخونان فرشلرله بیر توتوشدور. سیزین خالچالاردا طبیعتین الوانلیغی باشاردیقجا گؤزه گلسه ده بیزیم خالچالاردا آمما کَویرین گونشی گؤرونور. “
کرمانین پاییز گونلرینین بیری ایدی و آخشامی خییابانلاردا گزیب دولانماق، نئون‌لو توکانلارین قاباغیندا دایانیب ویترینلره باخماق و بیر پارا ماغازالارین یئنیجه شکیل تاپمالاری کی چئشیدلی فیلملر ساتیب یا کیرایه وئریردیلر و جوره به جوره تئلویزیون، موبایل و اینترنتی شیرکت‌لرین ووجودا گلمه‌سی بیله‌سینه عجیب گلمه‌سه‌ده ایتیرمیش ایل‌لرینی خاطیرلاییردی. ماشینلارین مدلی دَییشیلدییی کیمی خلقین ترپه‌نیشی و گئییمی ده او قدر فرقلی اولموشدی. خورما آغاجلارینا گؤز تیکه‌رک دوغما یوردوندا کی سؤیودلر، قره آغاجلار و قَلَمه‌لر یادینا دوشوب قلبیندن کیچیردی کی کاش بو آندا دوغولدوغو خوی شهرینین چارراهیندان کئچردی و مقبره‌یه ساری آددیملایاراق دؤنردی کوچه‌لرینه. بو خیال‌لاردایدی کی سییاوش اونو بیر بوتیکه چکیب ایصرارلا بیله‌سینه یئنی کت شالوار، آیاق قابی و آیری پالتارلار آلدی. بیر سلمانییادا گئدیب پولادین ساچلارینی مرتب ائتدیردی و بئله‌لیک پولاد اوز-گؤزونه صفا وئردیکدن سونرا اوجا بوی بوخونو و مردانه سیماسینان حیس ائتدی کی سانکی یئنی بیر دونیایا آیاق باسیبدیر.
پولاد، سییاوشین توکانیندا اوتوروب اوننان دانیشاراق اوتانجاقدان قیزارمیش کیمی ایدی :
– ” سنین بو محبتلرین منی سئویندیرسه ده او قَدَر ده عذاب وئریر. کاش کی ائله کؤهنه پالتارلاریملا گزیب دولاشاردیم و اوزونه باخدیقدا هئچ واخت اوتانمایایدیم.سؤز وئرمه‌لیسن کی هرنه خَشلی‌ییبسن قیرانیناجان آلاسان.”
– ” کاش منی دوغرام دوغرام ائده‌ردین آمما بئله بیر دوروم دا بوراخمازدین. نییه کی سن اگر منیم یئریمه اولسایدین محبتین منه یوز قات آرتیق اولاجاقدی. بونلار نه سؤزدی کیشی ؟ اوغلومون روحونا آند ایچه‌رک سنی بو دولاشیق وضعیتدن قورتارماق اوچون اؤز ویجدانیما سؤز وئرمیشم.”
بو آندا ایدی کی هابئله سییاوش قلیانی بوراخیب اَل آتدی جیبینه و اوچ عکیز میزین اوستونه قویاراق، پولاد گؤروب تعجبلندی و دینمز دانیشماز بیر نئچه آن دوروخارکن باشینین گیجللمه‌سی چوخالدی :
– ” بونلار منیم دوسلاریم. هره‌سی واختیندا اؤزونه بیر ایییت. آمما ندنسه زمانه بونلارادا اثر قویوبدور و چوخ دوشگون گؤرونورلر. عؤمور تیرئنی منی آیاقلایان کیمی سانکی اونلاری دا اَزیب کئچیبدیر.”
سییاوش پولادین قیزارمیش گؤزلرینه باخاراق دئدی :
– ” سنین حَققینده بیلدیغیم چوخ شئی‌لر وار. روشوت ییین و اؤزلرینی پولا ساتان اینسانلار بعضی یئرلرده مقام – منصب صاحیبی اولاراق، هرنه اَللریندن رذالت گلیردی سنین حاققیندا ائدیبلر. ایشلر باشی دا افشین ایدی. گیزلینجه سنین ماشینیندا اویوشدوروجو و سیلاح گیزله‌درک سنی شیطانلاییب اَله وئره‌رک باشاردیقجا دا سنی محو ائتمه‌یه چالیشیبدیر. اؤلومون اوچون ساختا سَنَدلر جورله‌یه‌رک، یئنی بیر کیملیک و دوسیه ایله سنی دوستاقلاردا آغیر بیر دوروم دا بوراخیبدی.”
– ” ائویمدن اوشاغیمدان نه خبر؟ دوسلار نئینه‌ییرلر ؟”
– ” ایذین وئر دانیشماییم. حالین خوش دئییل. “
– ” سن ده منه حقیقتی آنلاتمایاجاقسان پس کیم آنلاداجاق ؟ دووارلار، داشلار یا کی ساتقین آدام لار !منیم اوچون قورخما. هرنه بیلیرسن دئه. صاباح یولا چیخمالییام و گرک کی هر زادی بیلمیش اولام. “
– ” سنین ائولیلییین ده ائله بیر توزاق ایمیش. وار دؤولتینی اَله کئچیرمک اوچون بیر نقشه ایدی. “
– ” اولا بیلمز. افشانه بیر بیاض ملک ایدی. مهربان و جان یاندیران. بَیه ایندی نه اولوب کی ؟ “
– ” سنین اؤلوم دامغاسی یئمیش سیجیللینله احصار وَرَثه چیخارداراق بوتون وار یوخونا صاحاب اولاراق قیزین سئوگی نین ده وکالتین آلیب هر زادی آدینا کئچیره رک قویوب گئدیب تهرانا. هم ده… دور گئده ک … ایندی شاما منتظردیلر. “
– ” هم ده نه ؟ من دن هئچ نه گیزلتمه. آدام بیر اوچوق دامین آلتیندا بَیه قراردی نئچه دفعه قالا ؟ افشیندن نه خبر؟ “
– ” قوهوم اَقرَبان و دوسلاریندا سنی اؤلموش بیلیب آدین گلدیکده سنه رحمت اوخویورلار. افشانه ده اَره گئدیب. افشین ین خانیمی‌دیر.”
– ” پس قیزیم سئوگی ؟ “
پولادین دیلی توتار توتماز سئوگی‌نین آدینی چکسه‌ده بیله‌سینه تشنّج گلیب دوشدو اَسمه‌یه. اونو تئز اورژانسا گؤتوروب ایینه داوا گوجو ایله حالی اؤزونه گلن کیمی قایتاردی ائوه.
پولادین آیاق اوسته دورماغا گوجو اولمادان گیردی یاتاغینا. سونرا سییاوَشین اَللرینی اَلینه آلاراق رعنانی سوروشدو و سییاوَش باشلادی اونون قضا قَدَریندن دئمه‌یه :
– ” رعنا نین کئشمَکئشلی بیر یاشامی اولوبدور. اَری جیبهه‌ده شیمیایی اولوب، آیلار بویو اونو خسته‌خانالارا چکیبدی. سونوندا دا اونو اَلدن وئره‌رک حامیله قالدیغی بیر اوغلان اوشاغینی دوغورارکن اوشاغی‌دا یئدینجی گون اکسیژن چاتیشمامازلیغی اوزره اؤلموشدی. او گرک اَریندن حامیله قالمایایدی کی دوکتورلار اوّلدن ائله بَبه‌یین ناقیص اولماسینا امین ایدیلر. آمما دونیادی دا، اولمویان ایشلر گؤرور سن آدامین باشینا گلیر. “
پولاد یئنه قیزی سئوگی دن خبر ایستیردی توتا کی یئنه حالی کورلانیب دیلی گلمز اولدی. بو حال دا سییاوَش هر نه اولور اولسون دییه رعنادان ایسته‌دی پولادا بیر مُرفین ایینه‌سی ویرا. پولاد کی یاری آییق یاری یوخودا ایدی اونا گئرچک‌لری بئله آنلاتدی :
– ” منی قانا قویورسان حاجی! آمما ایندی ده دئمه‌سم آخیردا گرک دییه‌م. گؤردویومه گؤره شاید اون بئش یاشی اولا. افشینله افشانه‌نین چیرکین حیاتلاری اونودا پوزوب سینسیدیبدیر. ساغلیغی یئرینده اولسادا سئچدییی یول دوز دئییل. اونو تاپیپ سنه تاپشیرماق منیم بوینوما… سن نیگَران اولما…”
سییاوش دانیشاراق پولادی دا یوخو آپاردی. اؤزوده پوزغون و یوخوسوز ایدی. باشینی آتدی یئره یاتسین کی رعنایا تاپشیردی پولادا گؤز اولا. پولاد یاتسادا اؤز – اؤزونه اوجادان دانیشیردی، آمما رعنا آنلاملارینی هئچ آنلامیردی. فقط اونون چکدییی آغیر نَفَسلردن و یئرینده چیرپینیب چابالاماسیندان، بونو آنلیردی کی قورخولو کابوسلار ایچره اَل آیاق چالیری.
پولادین بو دورومو سگگیز دوققوز گون دوام ائده‌رک، یوخودان آییلسادا آنجاق او، تووالئته گئتمک قَدَر اؤزونده گوج حیسّ ائدیردی. دوکتورلار باشی اوسته گلیب سِرُم آلتیندا قالاراق سییاوَش له رعنا اونو هئچ تک قویموردولار. تا کی بیر گون پولاد اؤزونو توپارلاراق آزجا حالینی یاخشی گؤروب آیاغا قالخارکن رعنانی گؤردو کی ساچلاری یاناغینی اؤرترکن اونون باشی اوسته، اوتوردوغو یئرده یوخلاییبدیر. اونو آییلتمادان دیشاری چیخیب ووجودوندا بیر یونگوللوک و ساغلاملیق دویدی. پولاد ائوین باغچاسیندا بیر نئچه دقیقه قدم ووراراق بیر دن گؤردو رعنا اونو ایزله‌ییری. اونا یاخینلاشیب دئدی :
– ” بیلمیرم کی نئچه گوندی یاتاقدایام ، آمما هر آییلدیقدا، یا سنی، یادا سییاوَشی باشیم اوسته گؤروب سیزه وئردیییم بو قَدَر آجییا اؤزوم ده ناراحاتام. منی اؤز عائیله‌زدن بیری بیلیب بو کئفده محبتیز اوچون دوغوردان ساغ اولون. من بوتون سئودیییم گؤزللری واختیندا ایتیرسَم ده بو دفعه سنی اَلدن وئرمه‌یه هئچ نیّتیم یوخدور. سنی سئویرم رعنا. اگر ده اوره‌ک ایسته‌ییمی بو کئف ده جسارتله دئییره‌م، منی باغیشلا. سئوگی گوناه دئییل. سن ده سئویرسن اگر دورومو سییاوَشه اؤزوم آچیقلامالییام. آمما ایندی یوخ. قیزیم سئوگی نی تاپیپ افشیندن ایتیقامیمی آلاندان سونرا، اگر بو آرادا اؤلمه‌یم و قالام، یقین بیل کی سندن باشقا کیمسه منی بو دونیایا باغلایانمایاجاق.”
رعنا اوتانجیندان یاناقلاری قیزاراراق گؤز اوجونان پولادا باخیب اونودا اؤزو کیمی پؤرتولموش و اوتانجاق گؤردو. حیس ائتدی کی پولادین جوابیندا بیر سؤز دئمه‌سه او بیر داها باشینی قاغزاییب اونون اوزونه باخانمایاجاق. اؤز اوره‌یی و دویغوسونا باخدیقدا ایسه، پولادی جاندان سئودییی بیر وارلیق گؤروب گولومسه‌دی :
– ” ندن بیر داها قادینلارا اینانماق ایستیرسن ؟ سن کی بیر قادین اوزوندن یاشامینی اؤلوم پنجه‌لرینده آز قالا ایتیریردین. فیکر ائله‌میسن کی یانیلیرسان ؟ “
– ” من بیر قادین اوزره یوخ بلکه بیر خیانت اوزوندن آجی چکیرم. خسته یاتدیغیم گونلر ده هردن باشیم اوسته آغ قانادلی بیر مَلَک گؤروردوم و هئچ اراده‌م اولمادان، ووجودوم کوره ده کی دمیر کیمی اود توتوب یانسادا، رحمتلی آنامین بیر سؤزو هئی یادیما دوشوب منی دوشوندورورک، اؤزومه سؤز وئرمیشدیم کی بو دفعه عشقیمی گیزلتمه یم.”
– ” بَیه او نه دئمیشدی کی بو جان قماریندا سنی بو قَدَر دوشوندوروردی ؟ “
پولاد گؤز یاشلارینی توتانمادان بیر آلما آغاجینا دایاناراق دئدی :
” او دییه‌ردی کی جان وایینا قالان بیر انسانین اوره‌یی اونا یالان دانیشماز. او آنلاردا انسان دویغولاری بیر بولاغ کیمی چاغلاییب آخاراق دورولوق و صافلیقدان باشقا هئچ نه اوندا گؤرونمز. بو واختلاردا نه‌یی حیسّ ائتسن اونا اینانمالیسان !”
رعنا بارماق لارینان اونون گؤز یاشلارینی سیله‌رک دئدی :
– ” پارچالانمیش اوره‌کلرده هایلادیلار. یاشاییشدا چوخلی درده و کدره اوغراسام دا جانا دویدوقدا هئچ واخت عاغلیما یوخ اوره‌ییمه قولاغ آسارام. محبت بیر زاد دیر کی اونو گیزلتمک اولمور. سنی سئویرم پولاد !”
– پولاداونون سئویج دولو گؤز یاشلارینی گؤررکن دؤزه بیلمه دن جانینا دوشن لاوغانان گئتدی کی تک باشینا، بیر آز داها دوشونمک اوچون دینجلسین.
گونلر گئچه‌رک پولاد اؤزونو قیوراق و سالیم حیس ائتمکله اراده‌لی بیر سایاقدا گله‌جه‌یه ساری آددیملاماق اوچون آیاقلاریندا گوج دویوب و بیر گون ویداعلاشماق قرارینا گلدیک ده سییاوش دئدی :
– ” سن، منسیز بیر یئره گئتمه‌یه‌جکسن. ایلک ایشیمیز گئدیب بیر ایستیشهاد دوزلتمک و وکیل توتاراق سنین اصیل کیملی‌یینی بیر داها اؤزونه قایتارمالی‌ییق. “
پولاد سیاوشین بو کئفده دوسلوغونا حئیران قالیب هئچ نه دئمه‌دن سوسدی و صاباحی گؤزله‌دی. سون کی گون عزیز، ائولادی سییاوشی قوینونا باسار کیمی پولادی دا بیر آنا سئوگیسی‌نن باغرینا آلیب اونلارا خئییر دوعا ائتدی. رعنا دا پولادین گؤزلرینه گؤز تیکه‌رک دامجی – دامجی آخان گؤز یاشلارینی گیزلتمک ایسته‌سه‌ده اونلارلا خدافیظ‌لشرکن هیچقیرتی ایله آیریلیب باشین قویدی عزیزین چیی‌نینه.
پولادلا سییاوش یوللاری سورعتله گئریده قویوب تهرانا یئتیردیکده پولاد دؤنوب دئدی :
– ” منجه سئوگی‌نی قورتارمادان خویا گئتمک، بیله‌مه بیر جوره غیرتسیزلیق گلیر. کیشیلی‌یه یاراشمایان بیر زاد و قایغیسیز بیر آتا اولماق کیمی. منه ایذین وئر بیر پارا ایشلری بیتیریم حاجی !”
– ” سن فیکر ائلیرسن سنین قلبینده کئچنلری من بیلمیرم ؟ یارالی اورهییندن آخان قانلارین شیریلتیسینی دویورام، آمما اؤنجه سنین قانون قارشیندا وارلیغین و یاشامین اوزه چیخمالی‌دی. هر زادین فیکرینی ائتمیشم و مولا علی نین ذولفَقارینا آند ایچیرم کی خوی دان قاییتدیقدان سورا، سن نه دئسن او اولا.”
پولاد اوره ک قانینی اودارکن دینمز دانیشماز گئجه‌نی سییاوَش‌له بیر لیک ده فیروزه آدلی بیر هتل ده کئچیریب سحری حسابلارینی اؤده‌مک ایسترکن صاندیق باشیندا کی گنج بیر کیشی دئدی :
– ” سیزدن پول آلماغا ایذنیم یوخ دی. حسابیز اؤده‌نیبدی.”
هر ایکیسی بو ایشه مات قالاراق کیمین اؤده‌مه‌سینی سوروشدولار کی دئدی :
– ” هتل ین مدیری. دئییردی پولاد لا چوخ قدیم دوسلوقلاری واردی. “
پولاد اونون کیم اولدوسونو سوروشاراق او هئچ نه دئمه دن ،بیر تئلفون آچیب گؤزله‌مه‌لرین ایسته‌دی.
پولادلا سییاوَش رستورانا کئچیب بیر چای ایچَنه، بیرینین اونلارا ساری گلمه‌سین گؤردولر. پولاد دقّتله باخیب اونو تانیدیقدا گؤردو اسکی دوستو ” ماحمود ” دی. اؤپوشوب گؤروشوب اوردان بوردان سؤز آچارکن ماحمود دئدی :
– ” تهرانا کؤچمه‌ییمیز کی یادیندادی ؟ ائله او کؤچمک ایله بیر یوللوق بوردا قالمالی اولوب، قدیم یولداشلاردان خبرسیز قالدیم. آنجاق بیر گون خویا گئدینجه ائشیتدیم کی اؤلوبسن. حتمن منه گوله‌جکسن! آمما بو سؤزی هر آغیزدان ائشیدیردیم. دئمک کی یالان ایمیش. دونن سنی گؤردوکده گؤزلریمه اینانماسام دا، آمما بَیه قوچ پولادی اونوتماق دا اولار می؟
– قیرقی کیمی ساواشیب پیچاغیندان بیر شَهَرین حساب آپاردیغی پولادی دا اولار کی بیر دوستودا تانی مایا ؟”
– ” سؤیود آغاجینا چیخیب لاپ اوجا بوداقدان زلزله بولاغینا شیرجه وورماغین هله یادیمدادی. مئیخانادان چیخیب کئفلی – کئفلی گئجه‌لری اوخوماغیمیزی دا هله اونوتمامیشام. آمما زامان هر ایکیمیزی ده دَییشیب. نه من او قوچ پولادام ،نه سن او ماحمود فیروزه. فیروزه کی اونون گؤزللییین ده شَهَرده بیر قیز یوخ ایدی. آمما نئینه‌دین؟ بیله‌سین آلدین یا کی ائله اوندان دا هتل اوسته قویدوغون بیر آد قالیبدی ؟”
– ” بولوردون کی بوتون عشقیم فیروزه ایدی و ایندی ایللردی کی حیات یولداشیمدی. بو گئجه‌نی شاما بیزده‌سیز کی فیروزه ده سیزی صبیرسیزلیکله گؤزله‌ییر. همه‌شه دئیه‌ر کی پولادین قورخوسوندان هئچ کس اوناسؤز آتانمازدی.”
سییاوَش اونلارین تورکجه دانیشدیقلاری اوچون بیر زاد آنلامادی، آمما پولادین آلنیندان سوزولن ترلردن بیلدی کی آنلاشیلماز بیر هیجان یاشاییر. سونرا پولاد ،گئتدیکلرین دن سؤز آچاراق ماحمود ائو و جیب تئلفونون نومره‌لرینی اونا وئره‌رک سایقیلارلا اونلاری یولا سالدی.
پولادلا سییاوش ین اون ایکی ساعاتلیق بیر یول قارشیلاریندا اولاراق، تهران کرج اُتوبانی له یولا دوشدولر.
سییاوش یولدا کئچمیشین دن، اوغلوندان و خانیمی نان یاشادیغی گونلردن و اؤزللیکله عائیله ایله بیرلیکده تبریزه گئتدیک‌لریندن سؤز آچدی و تبریزه چاتدیقدا هر کسی کدرلی گؤروب توکان بازارین باغلی‌لیغیندان و خلقین کوچه خییاباندا کی ایزدَحامینا متعجب قالدیقلاریندان سؤز آچدی.سونرا ائشیتدیکلری خبردن غوصصه‌له‌نیب خلقه قوشولمالاریندان دئدی :
– ” آلدیغیمیز خبر استادشهریارین ایتگی سی ایدی. بیزده جماعته قاتیشاراق” شهریار” ین طاهیر و ملکوتی بدنی نی شاعیر لر مقبره سینه جان تشییع ائتدیک. هامی نین دیلینده استاد شهریارین شعر ی وار ایدی و هر دیلدن حیدربابایا سلام ائشیدیلیردی. “
پولاد بوسؤزلری ائشیده رک هردن ده جوموردی اؤزاحوالینا و قوچ پولاد اولدوغو گونلری خاطیر لاییردی و محله نین ناموسونو اؤز ناموسو بیلن گونلری. هردن ده الی جیبین ده کی پیچاقا گئدیب اینتیقام دویغولاری اونا یاشام گوجو وئریردی. رعنانین سئویملی گؤزلری و اوزونده کی گیزلی گولوش لری ایسه یادینا دوشوب گله جک اونا قارانلیق و سونسوز بیر تونل کیمی گلیردی.
سییاوَش یورولماق بیلمه دن ماشین سوروردی و تبریزه یئتیره نه کیمی فقط نمار و ناهار یئمه یی اوچون ماشینی سا خلامیشدی. تبریزه چاتدیقدا پولادین اسکی دوسلاریندان بیری “سلیمان ” یادینا دوشوب و سییاوَش دن ایسته دی کی او دییه ن یول ایله گئتسین. تاکی پولادین ایسته یی له بیر قاپی نین اؤنون ده ساخلارکن پولاد یئنیب زنگی چالدی. آیفون دان سلیمانی سوروشارکن قاپی آچیلسادا ایچَری گیرمه دن دؤزدی کی بیر ی قاپی یا گله. قاپی اؤنونده سلیمانی گؤره رک اینانیلماز بیر شکیل ده ایکی سی ده توتولدولار. سلیمان ین بیر قیچی اولمادان قولتوق آغاجینا دایانارکن اونا باخیردی و اودا سلیمانا.
– ” نییه به بو حالدا سلیمان ؟ “
– ” سن ده داها او پهلوان دئییل سن کیشی ! قیوریم ساچلی و قارتال باخیشلی قوچ پولاد دا داها او قوچ لوق قالماییب. بو ایللرده نییه به هئچ دئمه ییب سن سلیمان اؤلوری قالیری یا کی ؟… هله کئچ ایچری گؤره ک بو ایللری هاردایدین و بو آیریلیقین سببی نه ایمیش؟ “
پولاد، سییاوش دن ماشینی پارک ائدیب ایچری گیریب آزجا دینجَلمک لرین رجا ائده رک سلیمان دا قادینی نی چاغیریب آیاغینی ایسته دی. قادینی اونون قیچین گتیریب یئرینه سالاراق قولتوق آغاجینی کنار ا قویوب چیخدی کوچه قاپیسینا کی قوناقلارا خوش گلدین دییه.
پولاد، سییاوَش له سلیمانی بیر – بیر لری ایله تانیش ائده رک ایچری کئچیب بیر چای ایچه رک سؤزسؤزو گتیردی آرشین بئزی :
– ” جیبهه ده یارالانیب اؤلومه جان گئتسه م ده تکجه بیر قیچیمی ال دن وئردیم. ایکی قیزیم واردی کی مدرسه ده دیلرو خانیمیم د ا دای قیزیم دی. سن نئجه ؟ نییه بو مدت یوخ ایدین. بیر ایکی سری ده خبر توتدوم کی سئر سئفئه سؤزلر دئدیلر. دئییردیلر قاچاق چی ایدی و اؤلدوروب لر… “
پولاد دینمه دن، بیر آه چکیب آزجا دینجه لدیک دن سورا خودافیظ له شه رک سلیمان دان آیریلاراق خویا ساری یولا دوشدولر.
دونیا سانکی پولادی، سییاوشی، سلیمانی و مین لرجه او نسلین اینسانین، قارقیمیشدی و اینانجی اولان هر بیر شرف بایراقی داشی یان دوز اینسانی، سرنوشت پیس جوره اَزمیشدی.
خویا یئتیرینجه پولاد یوزلر دفعه اؤلوب دیریلسه ده اوره یی دؤیونوب چیرپینیردی.گؤزلرینه اینانمادان دوغما یوردو خویون هاواسینی جی یَر لرینه چکیردی و کئچمیش، دالی یا چکیلمیش بیر ویدئو فیلمی کیمی گؤزلرین ده جانلانیب هیجان ایچره چیر پینیردی.پاییز گئجه لری نین اوره ک سیخیجی گونلرین دن بیر ایدی و سازاق وار گوجو ایله آغاجلارین یارپاقینی قوپاریردی.
سییاوش خوی شهرینه یئتیرجک فرمانی آلدی بیر خییابانا ساری و نئچه کوچه دؤندوکدن سورا دایاندی :
– ” ایندی دییه‌جکسن سییاوش بورانی هاردان تانی‌ییر؟ “
– ” بورا اصلان گیلین ائوی‌دی. یولو لاپ دوز گلیب سن. آمما نییه بورا ؟”
– ” تبریزدن چیخاندا زنگ آچیب جریانی اصلانا دئمکله هامی اَقرَبان و سنی سئوه‌ن و تانییان همشهری‌لرین ییغیلیب لار بورا. شهریزین عدلیه رئیسی ده بیر وکیل‌له بیرگه بوردا اولاجاق لار. گرک کی تئزلیکله اداری ایشلری بیتیریب گئده‌ک تهرانا. اصلی ایشیمیز هله اوردادی. “
ائوین قاپیسینی چالاراق سییاوشین سسینی دینله‌ین اصلان، قیرخا یاخین آدام‌لا بیرگه، قاپی‌یا چیخیب، پولادی قوینولارینا آلاراق،سلام صلوات‌لا قاباغیندا بیر قوربان کسدیلر.
دوسلار و قوهوم قونشولار، اونو اؤپوپ، گؤز یاشلارینی توتانمادان ، باشلاییرلار اونا توتدوقلاری یاسدان دانیشیب و افشانه‌نین دؤزمه‌دن اره گئتمه‌سیندن. گئجه‌نی سحره یاخین اوتوروب دانیشسالاردا سحر اولجاق هامی آیریلارکن اصلاندان ایستیر کی اونو آناسینین مزاری اوسته آپارا. اصلان اونون مدرسه یولداشی اولسادا بؤیودوکجه دوسلوقلاری برکیییب، بوتون دعوالاردا ویریب ویریلسالاردا، هئچ زامان بیر – بیرلرینی تک قویمازدیلار. دعوالاردا یا محله قیزلارینین اوستونده ایدی یا کی قمار اوزره. شَهَرده بیر نئچه روسپی‌ده وار ایدی کی هردن اونلاری اؤز ضییافتلرینده اوینادیب، قوناق ائده‌رک کئفلی‌لیک عالمینده دوشَردیلر بیر – بیرلرینین جانینا.
اصلان بیر نئچه گون شَهَری گزیب بوتون تار- تانیشلارلا گؤرو‌شه‌رک، حقوقی و قانونی ایشلرده وکیل طرفیندن اؤز سئیرینی سورورودی. هردنده اسکی دوسلار و قوهوملارین باغلاردا و ائولرده وئردیکلری ضیافتلره قوشولوب منتظر ایدی کی ایشلر بلکه تئزلیکله بیتمیش اولا.
خویون پاییزی یئنه همه‌شه کی کیمی سویوق ایدی و سییاوش اوچون بو سویوق چوخ عجیب گلیردی. کرمانین طبیعتیله اورانین طبیعتی یئردن گؤیه قده‌ر فرقلی ایدی. بیر گون سییاوشی ده گؤتوروب گئتدیلر زلزله بولاغینا و اصلان تونقال قوروب قیزیشسالاردا بیردن بیره پولاد چیپلاق حالدا اؤزونو ووردی بولاغین سویونا کی اوچ دؤرد متر درینلییی ایدی و سویو آدامی بوز کیمی کسیردی. شاپپیلتی سسینه سیاوش‌له پولاد دؤنوب باخارکن گؤردولر کی پولاد شیرین – شیرین چیممک‌ده‌دیر. بولاغین سویو گؤزه – گؤزه درینلیک‌لردن چاغلاییب قاینار حالدا سویون اوزونه یاییلسادا پولادین هئی چیخیب شیرجه وورماسی قاینار کؤپوکلری ایتیریردی. اصلان اونا آند وئره‌رک زور بیللاه لا سودان چیخیب اَینی باشین قورولارکن دئدی :
– ” بوزلو سویون بو تَهَر قایناماسی دا دوغرودان عجاییب بیر شئی دی. “
اصلان‌دا ” سن ائله اؤزون ده عجاییب بیر زاد سان ” دئیه رک هر اوچونو گولمک توتوب ییغیشدیلار تونقالین باشینا.
پولاد “بو چیممک منه قول‌لاریم‌دا و بیلک‌لرده هله قالان گوجومو خاطیرلارکن اوجا آغاجلارا دیرماشیب، گؤی‌دن ماغاللاق ویریب سویا شیرجه گئدن گونلریمی ده یادا سالدی. “
بیر نئچه گون سونرا ایدی کی اونون گئرچک کیملییی عدلیه قووه‌لرینه ثابیت اولدی و ساختا سندلر دوزه‌نله‌ین آداملاری آراشدیریب تاپماقی گیزلی پُلیس تشکیلاتینا تاپشیردیلار. پولادین اصیل کیملییی صادر اولدی و بو ماجرادا موجود اولان ایپ اوج‌لاری اله کئچیریلینجه افشانه ایله افشین علیهینه ده شیکایت اولوندی.
پولادلا سییاوش تهرانا گئده‌رک گئجه‌نی هتلده‌ایدیلر کی سئوگی دن آلدیقلاری خبر اوزره پولاد اوزون سییاوشه توتاراق دئدی :
– ” حاجی‌جان منه بیر زاد اولورسا سئوگی‌یه صاحاب‌دور. اونو بو باتلاق‌دان چیخارتماق منه دوشسه‌ده آنجاق جان قورتارانماسام سؤز وئر کی اونا ائولاد کیمی باخاسان. بیر ده دوسلوق‌دا بیر زادی سندن گیزلتسَم کیشی لیکدن دئییل. اودا او کی رعنانی مندن اسیرگه‌مه. سئویب سئومک بعضن آدامین اؤز الینده دئییل !”
سییاوَش پولادین تیتره‌ر اللرینی سیخارکن دئدی :
– ” من هئچ نه‌یی آنلاماسام دا عشقی و دویغونو یاخشی آنلارام. نییه کی گل ها گل ده رعنا سنی منه تاپشیراراق حیس ائتدیم کی اودا سنی سئویری. ایشیمیز بیتدیک ده اونودا دوشونه‌ریک قوچ پولاد ! ایندی تکجه فیکریم سئوگی نی قورتارماق و افشینله افشانه قانون الینه وئریب، سنین کئچمیش شوکتینی بیر داها گئری قایتارماغیمدیر.”
پولادلا سییاوش یاتاقا گیریب یاتماق ایسته‌سه‌لرده پولادین فیکری سییاوشی یوخویا وئریب گیزلینجه اَکیلمک ایدی. جان دوستو اصلان دان افشین‌ین آدرسینی ده بیر تَهَر اله کئچیریب نیّتی بو گئجه اونو گؤرمک ایدی. پولاد، سییاوشی یوخویا وئردیکده پالتارلارین گئییب ال آتدی پیچاغینا و نیفرت دولو اوره‌ک‌له، هتل‌دن دیشاری چیخدی. اؤزونو چاتدیردی شیمرانین باغ باغاتلی کوچه‌لرینه و بیر باغین اؤنونده کی ایچینده نئچه قاتلی بیر محتشم ساختمان وار ایدی دایاندی. پولاد اَن بیر اویغون یئر سئچیب، دووارا دیرمانارکن دوشدو ویلایا. اؤزونو اِهمالجا پنجره‌لرین اؤنونه وئره‌رک اوتاقلارین بیرینده بیر ایشیلتی گؤردوکده چیخدی ایکینجی قاتا. دقتله باخدیقدا افشانه‌نی بیرینین قوینوندا گؤره‌رک صبری قالماییب گیردی ائوه و او اوتاقی تاپیپ وار گوجو ایله قاپینی دووارا چیرپاراق افشانه اونو باشی اوسته گؤردو. آنجاق اَلی پیچاغا گئدیب افشانه‌نی وورماق ایسته‌ینده گؤزو ساتاشدی سئوگی یه کی آناسینین یانیندا یاتمیشدی.
پولادین بیر گؤزو سئوگی ده اولسادا اَل آتدی افشانه‌نین ساچلارینا و اونو دیشاری چکه‌رک پیچاقی یئندیرمک ایسترکن سیرتینا بیر تاپانچا دایاندی. افشین گوله‌رک اونو بوراخیب قیزینا صاحاب دورماغین ایسته‌دی:
– ” گئت قیزین ییغیشدیر کی نئشه حالدا گونده بیرینین قوجاغیندادی. آمما حئییف کی اونودا باشارانمایاجاقسان. نییه کی او هله قوللاندیغی هروئین‌ین تأثیریندن چیخمامیش سنین جانین چیخاجاقدیر. خبرینی آلمیشدیم و بیلیردیم کی تئز گئژ دالیمجا گلیب زهرینی تؤکه‌جکسن ! “
پیچاق پولادین اَلینده قورویان کیمی اولوب گئری‌یه دؤنرکن بیر گولله آچیلدی. گولله دوواری دئشیب سؤکسه ده افشین‌ین تاپانچاسیندان دئییلدی. چون او اؤزی ده دیکسه‌نه‌رک اویان بویانا باخیردی کی پولاد پیچاقینی بیردن توزارلارکن افشین‌ین بوینونا توخونوب دوشدی یئره. افشین بو اوزدن یارالانسادا، پولادی ایستیردی گولله‌لسین کی، آچیلمیش یئنی بیر گولله اونو شاشیرداراق گؤردو کی نئچه پلیس اونو دؤوره‌له‌دی.
پولاد باخدیقدا دوستو سییاوشی ده گؤردو کی یونیفورم گئیمه‌سه ده پُلیس‌لر اونون امرینده دیلر.
پلیس ماشینلاری یئتیریب افشینله افشانه‌نی توتوقلویوب آپاراراق پولاد قیزی سئوگی‌نی باغرینا باسیب گؤتوردی اورژانس ماشینینا. سییاوش ده پولادین قانلی پیچاقینی یئردن گؤتوروب قاتلارکن قایتاردی پولادا :
– ” قراریمیز بو دئییلدی یولداش. آز قالمیشدی هر زادی بیر داها یوخ ائده‌سن. آمما نئیله‌مک کی قوچ پولادادا ائله بو یاراشیری. سن هتل دن چیخارکن پُلیس‌لر بو اطرافی گیزلی حالدا کنترل ائده‌رکن دووارا هله دیرمانمامیشدین کی من ایچری‌ده‌یدیم.”
پولادین کی بوتون فیکری سئوگی نین یانیندا ایدی و اونون بایقینلیق کئچیرمه‌سی لاپ بیله‌سینی اوزموشدو سانکی هئچ نه ائشیتمیردی.
سئوگی‌نین حالی بیر نئچه گون ایچره یئرینه گلدیکده، اونون اعتیادینی ترک ائتدیرمک اوچون بیر کلینیکه گؤتوردولر. پولاد قیزیندان آیریلماق ایسته مه‌یینجه رعنانی گؤردو و بیر قادینی کی اوّل اونو تانیماسادا سورا بیلدی کی فیروزه دیر. اونلار سؤز وئردیلر کی سئوگی نین باشی اوسته اولاراق هئچ واخت اونو تک قویمایالار.
آرادان بیر هفته کئچمیشدی کی بیر گون پولاد، سحری یوخودان قالخاراق قیزی سئوگی‌نی باشی اوسته گؤروب فیروزه نین سسینی ائشیتدی کی دئییردی :
– ” سحرلیک یئمک اوچون اَل آیاق ائدین کی حاجی سییاوشله ماحمود آجلاریندان آز قالا قیریلیرلار. “
پولاد بو دورومو تعجبله قارشیلارکن سئوگی نی قوجاغینا آلیب سئوینجیندن بیلمیردی آغلاسین یا گولسون.
او گونو هامی‌لیغان شامی بیر رستوراندا یییه‌رک سییاوِش رعنانان پولادی اَل اَله وئره‌رک یئنی بیر یاشام اوچون حاضیرلانماقلارین ایسته‌دی. سورادا سئوگی ایله فیروزه هره‌سی بیر حلقه چیخاریب قویدولار میزین اوستونه. ماحمودلا سییاوش ده موبارک اولسون دییه رعنانان پولادی نیشانلادیلار. سونرا سئوگی رعنانی بیر آنا کیمی باغرینا باسیب رستوراندان دؤنمک ایسته‌دیلر. ماحمود‌گیله یئتیردیکده گؤردولر چال چاغیردی و دئمه کی ماحمودون اوغلونان قیزی سورپیرایز اولسون دییه بو شنلیک مجلیسینی، اونلارین سئوینجی اوچون قوروبلار. قیز اوغلانلار موزیکین دالغالاری ایله شور سالاراق پولاد لا سییاوَشین ده اویناماقلارین ایسته‌دیلر.
مجلیس سونا چاتدیقدا، سییاوش پولادا بیر هدیه وئرمک اوچون هامی‌نین سوسماسین ایسترکن جیبیندن عقیق قاشلی قیزیل بیر اوزوک چیخارتدی. پولاد گؤردو کی اؤز اوزویودی و سییاوشی اؤپه‌رک اوجادان دئدی :
– ” باجین بیر ملک اولسادا سن ده چوخ کلکسن حاجی. دوزون دئه گؤروم سن کیمسن ؟ “
سیاوش گوله‌رک رعنایا گؤز ائله‌دی و رعنا ایره‌لی گله‌رک دئدی :
– ” سییاوش، ائله سییاوش‌دی. بیر فرش تاجیری. منیم قارداشیم. آنجاق دولتده نفوذلی دوسلاری اولاراق هردنده سؤزونو یئره سالمازلار. زیندانا دوشمه‌سی‌ده بیر تصادف اوزره ایدی کی بیر نئچه گون سونرا اونو بوراخماق ایسته‌سه‌لرده سنین دورومون اونون ایلگیسینی چکه‌رک اؤز ایسته‌یی ایله اوردا قالمیشدی. “
بو آن دا پولاد اوزونو قوناقلارا توتاراق، سییاوش وئره‌ن اوزویو یادیگار اولسون دییه هدیه ائتدی ماحمودا و اونا بوسعادتی یاشادان هامییا تشکّرلرینی بیلدیره‌رک، سئوگی‌نی و بوتون جوانلاری اؤز جمع‌لرینه چاغیرارکن هامی بیرلیکده اَل اَله وئریب باشلادیلار یاللی گئتمه‌یه.
۱۳۸۴
