چئویرن: سحر خیاوی
ترجمه: سحر خیاوی
سحر خیاوی
00:00
00:00

ناهار چاغی فهله‌لرین باشچیسی باغ اوزونو قیی ووروب، میوه درنلری ناهار یئمه‌یینه چاغیردی. فهله‌لر خؤره‌ک یئمه‌یه معین اولان یئره توپلاشدیلار.
ارباب ناهار یئمه‌یینه فهله‌لرین ساییجا پیتی آلمیشدی.
تزه ایستی سنگگ‌ین گؤزه‌ل قوخوسو، شوربا اییسینه قاریشیب، بایاقدان ایشله‌مکدن قابیغدان چیخان فهله‌لری اشتهایا گتیرمیشدی. آجلاریندان اؤلوردولر.
فهله باشچیسی، بیر ایکی فهله‌نین یاردیمی ایله پیتی‌لری، کاسا- قاشیقلاری، سوغانلاری فهله‌لرین آراسیندا بؤلوشدوردو.
فهله‌لر اربابدان ایذین آلیب اوخونموش گون قزئته‌سینی سوفرا عنواندا قارشیلارینا سَردیلر. شوربانین سویونو کاسالارینا تؤکدو‌لر، سو آز اولدوغونا بعضی‌لری دویماریق دئیه، شوخلوقجا اوجاغین اوستونده قاینایان یئکه قارا چایداندان شوربالارینین اوستونه داغ سو تؤکدولر. دئیه- گوله هره‌سی بیر کاسا اَتین سویونو دوغراییب شیرین- شیرین سوغانلا یئدیلر.
یوسف فهله‌لرین بیری و اَن جاوانی ایدی. شوربانی یئیه‌ندن سونرا دیبینی ده بیر تیکه چؤره‌ک ایله سیویردی؛ بیر پارا سوغانلا آغزینا قویدو؛ سونرا اللرینی قووزاییب شوکور ائتدی.
پیتی‌نین آغزینی اَتی یئمک اوچون آچدی؛ لاپبادان عائیله‌سی و ایکی آج بالاسی گؤزونون اؤنونه گلدی. نئچه آی اولاردی یئتیریب عائیله‌سینه اَت آلا بیلمیردی. بوغازی بیچیلدی. داها او اَت اونا زَهریمار اولاردی. یئیه بیلمیه‌جکدی. قَهَر بوغازینی کسیردی. اوجاغین توستوسونو بهانه ائدیب، یولداشلاریندان اوزونو یان توتوب گؤزونده گیله‌لنمیش یاشی اَلی‌نین آرخاسی ایله سیلدی. اؤزونه توختاقلیق وئریب یولداشلارینا یالاندان: «شوربانین سویو چوخ ایدی منی توتدو.»- دئدی. بیر حالدا کی او آز خؤره‌ک ایشلک گنجین یالنیز دیشی‌نین دیبینده قالمیشدی. هئچ دویمامیشدی.
شوربانین اَتینی همیشه چانتاسیندا اولان آغزی باغلی قابا تؤکوب، سلیقه ایله چانتاسینا قایتاردی. اونو شام اوچون کؤرپه بالالارینا آپاراجاقدی.
باشقا فهله‌لر ده خؤره‌ک‌لرینی یئدیلر. بعضیلری ده اونا تای اتلرینی گؤتوردولر. قاب- قاشیغی ییغیشدیریب بیر طرفه قویدولار. سونرا اؤزلرینه چای سوزوب، سیگارئت چکنلری سیگارئتلرینی آلیشدیردیلار.
اوجوزلو سیگارئتلرین کولونو قزئته‌نین اوستونه تؤکوب، یئربه یئر یالانچی سیاستچی‌لرین، اختلاسچیلارین، اوغرولارین ساققالینی، آلینلاریندا کی ریا مؤهور یئرینی اودا چکیب، دلیک- دلیک ائله‌دیلر و بو ایشه اؤز آرالاریندا بیر سیرر اولان کیمی اوغرون- اوغرون گولدولر. سوندا یانمیش قزئته‌نین کولو توزلانماسین دئیه بوکوب باغدا اولان یئکه زیبیل دولونا باسدیلار.
آج قارینلی‌لارا، عائیله‌سینین گونده‌لیک یاوان چؤره‌یینی چتینلیک‌له تاپان اینسانلارا، قزئته‌نین یالان- یارغانی یامان- یووزدان پیس ایدی؛ یارالارینین اوستونه دوز سَپیردی. او یالانلارین، او ریاکار یالانچیلارین، اوغرولارین یئری آرتیق زیبیل دولو ایدی.
اونلار یالنیز آخشام چاغینی و اَلی دولو ائوه دؤنمه‌یی دوشونوردولر. بو گونلری ده بئله کئچه‌جکدی. بس صاباح و یاشامین سایسیز صاباحلاری نئجه اولاجاق؟!
گؤره‌سن فهله‌لرین بو عصیانجیل ایشی، یاخیندا کی قابارلی اللرین، دمیر یوموروقلارین، آج قارینلارین، آیاق یالینلارین آجیق و عوصیان موشتولوقچیسی ایدی می؟!

چاپ

مجله ایشیق شماره 4

آذربایجان توی‌لاری

مجله ایشیق شماره 3

آذربایجان و مهاجرت مساله‌سی

مجله ایشیق شماره 2

آذربایجان قفه‌خانالاری

مجله ایشیق شماره 1

آذربایجان معلم‌لری و تحصیل مساله‌سی

باشقا اثرلری

دیدگاهتان را بنویسید

نشانی ایمیل شما منتشر نخواهد شد.

قزئت

سحر خیاوی
www.ishiq.net

آذربایجان ادبیات و اینجه‌صنعت سایتی

قزئت

سحر خیاوی
www.ishiq.net

آذربایجان ادبیات و اینجه‌صنعت سایتی