بوگون چهارشنبه 1 اردیبهشت 1400 ساعات 18:55
ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری

دارا
آراز احمداوغلو

شهردن چيخاندا ايکي قبريستانليق واردير: بيري بالاجا قبريستانليق، يولون ساغ- سولوندا بالاجا تپه اوستونده، ايکينجيسي ايسه بؤيوک قبريستانليق. بو بؤيوک قبريستانليغين سول الينده يئنيجه تيکيلميش بير بيلي‌يوردو، ساغ الينده ايسه بير شهرجيک واردي. گونو-گوندن مئتاستاز وئريردي بو تومورجوق. او بؤيودوکجه اينسانلار بير- بيرلريندن داها اوزاقلاشيرديلار. اوردا ياشايان اهالي هميشه اؤزلرينديديلر. چوخو آوتوبوسلا گل-گئت ائديرديلر. آوتوبوسلار سسسيز- سميرسيز اولوردو، لاپ شهرجيگين اؤزو کيمي؛ ايکي- اوچ آدام دا دانيشاندا بورجدان، خرجدن دانيشيرديلار.
روستم آغانين دا ائوي بو شهرجيکده يئرلشيردي. اونون ائوي چوخ خرج گؤتورموشدو، آمما، هله ده تيکينتي‌نین اوزو ايله حَيَطده خرجله‌مه‌يه چوخ يئر واردي. بونلارا باخماياراق حَيَطينده گؤزل گوللر، ها بئله بير- ايکي آغاج، بير بالاجا حوووض دا واردي. ايندي ايسه قيش فصلي‌نین بايرام آيي اولدوغونا گؤره گوللردن آنجاق قورو قول- بوداق قالميشدي. روستم آغا دانيشمازدي، دانيشاندا دا چوخ واخت اؤزو- اؤزونه دانيشاردي. اوزو- باشي بير- بيرينه قاريشميشدي، اونا گؤره ده هميشه يورغون گؤرونوردو. هر گون ايشدن گليب پنجره‌نین داليندا دايانيب حَيَطه بير باخاردي. بو گون ده او داها يورغون، داها دالغين گؤرونوردو. چانتاسي ايله جکئتيني قاپيدان گيررکن بير بوجاغا توللاييب گليب پنجره داليندا داياندي. حَيَطه باخماق ايسترکن آغزي‌نین هوفو جامي ترلتدي. الي ايله بير گيرده اوز چکدي. “بو گؤزلري، بو آغزي، بو دا بورنو “ دئييب شکيلين بورنونو قورتارماميش اونو پوزدو. ايندي ايسه حَيَط آيدينجاسينا گؤرونوردو.
يولداشي سارا اريندن تئز ايشدن قاييداردي، آمما بو گونلر ايداره ده ايشلري چوخ اولدوغونا گؤره يوبانيردي بير آز. ايچري گيررکن روستم آغانين يانينا گليب اليني اونون بوينونا ساليب “سالام، يورولما عزيزيم! “ دئييب بيرليکده حَيَطه باخماغا دوردولار.
“صاباح يوخ بيريگون چرشنبه آخشاميدير… “ سارا دئدي.
“اولاندااا! نه اولسون کي؟ “ اري چوخ سويوقجاسينا يانيت وئردي.
“هئچ نه؛ دئييرم بلکه بيري گون ايشدن بير آز تئز گلسن، گئدک بازارليغا، “- اؤزونه هئچ بير زاد آلماق ايستميردي، ارينه، قايناتاسينا، و بالديزلارينا هديه آلماق ايسته ييردي – “اوردان دا آتان گيله. چوخداندي اونلارا گئتمه‌ميشيک. بيرده کي بيليرسن دا بو عزيز گونو هامي بؤيوکلري‌نین ائوينه ييغيشيب شنليک… “
“نه عزيز گونو؟ ها زاماندان آتش‌پرست اولموشوق؟ “
“گؤزه ليم! آتش پرستليک هارا، چرشنبه آخشامي هارا؟! تاريخچيلر دئييرلر بو دب آتش پرستليک دؤوروندن ده داها اسکي چاغلارا قاييدان آتا- بابا دبيميزدير. بير ده من اودون اوستوندن آتيلماق گؤرموشم گؤزومو آچاندان بري، اودون قاباغيندا‌دیز چؤکوب آلين يئره سورتوب تاپينماق يوخ. “
“ياخشي، ياخشي، بيزه فلسفه توخوما. ناغيل افسانه‌دن نه چيخار؟ بو باهاليقدا بو بورج- خرج ايلن بازارا گئتمک اولار؟ “
“گؤزه ليم منيم هر زاديم وار، هئچ نه آلماق ايسته ميرم. منه آنجاق بازاردا خالقين شنليگي، اوشاقلارين “ – بو سؤزو ايشلتمکدن نيسه بير آز چکينردي هميشه – “… اوزلرينده کي گولوشلر، بازارين هاي-کويو، گل-گئدي گؤزلدير…”
“اوشاق گؤيلون ايستير بوشان، چيخ گئد آيريسينا. سننن‌دیيل کي، دوهدورلر دئيير مننندي… “
“اولسون، ائله دئمه، هميشه دئميشم يئنه ده دئييرم: `من سني مين اوشاقلا‌دیيشمه‌رم` “دئييب گؤزلري ياشاردي. اري‌نین اوره‌يي چوخ‌سیخيلماسين دئيه اوندان اوزاقلاشدي. روستم آغا چيگينلري ايله سولوق(نفس) آليردي. او اوزدن، جام گئت-گئده بوغلاندي. او داها بير زاد گؤره بيلمزدي جامدان، نه ايسه هله ده اوردا دوردوغو يئرده دايانميشدي.
روستم آغا هر گون ايداره دن آوتوبوس دوراغينا تاکسي ايله گئدردي. نه ايسه بو گون يئرده گئتمک ايسته‌دی. يول اوزرينده گؤزو بير ماغازايا ساتاشدي. ماغازا جاميندان چوخ عجيب- قريب يئني قولچاقلار، اويونجاقلار، ها بئله چوخلو يئني ماراقلي زادلار گؤرونوردو. او يئنيليگين اؤزونو يوخ، يئنيليکدن تؤرنن باشي چيخماديغي زادلاردان خوشو گه‌لردي. جامدان ايچري باخارکن دوکانچي اونون گؤزلريني اوخوموشدو. روستم آغانين هوفو جامي بير آز بوغلانديردي، اونا گؤره ده او بير آز گئري چکيلدي. بو حالدا ساتيجي بير بالاجا کدرلندي. جام آرخاسيندا ايکي قولچاق واردي. بيري آغ کؤينک، قارا باشماق، و قارا کوت- شالوار گئيينميشدي. اوزاقدان چوخ سئويملي، چکيجي، و دوزلو گؤرونوردو. آلتيندا بير کاغيذ اوستونده “دارا “ يازيلميشدي. او بيريسي ايسه بوندان داها گؤزل، ياراشيقلي، دادلي- دوزلو بير گلين ايدي. اونا دا “سارا “ يازميشديلار. دارا سارادان يوخاريدا دورموش، يئرده اوتوران سارايا اوستونلوکله باخيردي، بير حالداکي آجي باخيشلاريني اوزونده کي گولوشلري ايله ايتيره بيلمه‌ميشدي. روستم آغا درين دالميشدي. داها جامين آرخاسي گؤرونموردو. او سانکي بير‌سیناما ائکرانينا باخيردي.
کوچه ده اوشاقلارلا قاريشيب اويناييرديلار. هئچ بيري باشقالاريندان سئچيلميردي، هاميسي چيرکلي، جيندير اوست- باشلا قوشولوب اويناييرديلار شنليکله. بير ياي گونو قونشولاري‌نین نوه‌سي اوزاق بير يئردن قوناق گلميشدي آتا آناسي ايله بيرليکده. اوشاقلار هاميسي اونلارين قاپيسينا ييغيشيب قوناغين اونلارا قوشولماسيني گؤزله ييرديلر؛ اونلار دا آتا- بابالاري کيمي قوناغي اؤزلريندن چوخ سئورديلر. نه ايسه چوخ گؤزله‌دیکدن سونرا بير بالاجا اوغلان ائيوانا چيخيب اوشاقلاري بير سوزدوروب ايچري قاييتدي. سونرالار او هر گون اوشاقلارين اويونونا باخماق اوچون ائيوانا چيخاردي. او حسرتله اوشاقلارا باخاردي، آنجاق اوست- باشي باشقالاريندان سئچيلديگينه گؤره بالاجا روستمين گؤزونده بير ملک گؤرونوردو. بير ده آناسي اونونلا هئچ کسين باشا دوشمه‌دیگي بير‌دیلده دانيشيردي. نه ايسه بالاجا روستمين اونا قارشي اؤزل بير دويغوسو واردي، اونو باشقالاريندان اوستون گؤروب اونونلا اويناماغا حسرت آپاريردي، او دا روستمي هئچ سايميردي. اوشاقلارين هاميسي بير نئچه گوندن سونرا بو دوروما عادت ائتديلر، هره اؤز ايشينديدي، اؤز اويناماسيندا، اؤز شنليگينده. بير بالاجا روستم ايدي بير ده اونو سايمايان يولداشي. او گون دارا يئنه بولقوندا يالقيز دوروب اوشاقلاري سوزدوروردو حسرتله. گون اَييلدي. اوشاقلار هاميسي داغيليب گئتدي. روستم اوشاقلارين داغيلماسينا باخماياراق قونشولاري گيلين ائيواني قارشيسيندا دايانيب دالميشدي درين دوشلرينده. او آتا-آناسي ايله بيرليکده آوتوبوسدان يئنيب ننه‌سي گيله دوغرو گليرديلر. چوخ تميز گئيينميشدي، لاپ دارا کيمي. آتاسيندان اؤنجه قاپيدان ايچري گيريب “سلام مادربزرگ “ دئدي. ننه‌سي اونو ايستي باغرينا باسيب اؤپدو، آمما او هئچ ماجال وئرمه‌دی بؤيوکلره، آرديجيل ننه‌سينه گؤردوکلريندن سؤيله‌مه‌يه باشلادي. کيمسه اونو دوزگون باشا دوشموردو آنجاق هامي گولر اوزله اونا قولاق آسيردي، او دا بو دوروما چوخ فرحله‌نيردي اؤز ايچينده. ننه‌سي اونا “بالا اؤز ‌دیليمیزده دانيش گؤروم نه دئييرسن” دئينده حتّی آرتيقراق سئويندي. تله‌سيردي بولقونا چيخيب اوشاقلاري سوزدورسون. قاپيدان چيخارکن آناسي اونو سسله‌دی: “روستم …” . آناسي‌نین سسي “داارااا …” سسي ايله قاريشديقدا او اؤزونه گلدي. دارا دوردوغو بولقوندان ايچري قاييتماقدايدي.
“سالام” دئييب ايچري گيردي.
“باغيشلايين، او قولچاق نئچه‌دیر؟” سوراراق ويترينده کي همان قولچاغي گؤستردي.
دوکانچي بير آز فيکيرلشيب “قيرخ مين تومن” دئدي.
“قيرخ مين ؟! نييه نه اولوب؟” سوردو روستم آغا.
“آغا بو دارادير. ايندي تئهراندا بوتون دوهدور- موهدور اوشاغي، مهنديس- زاد اوشاغي … خلاصه هر نه کيلاسلي خانواده اوشاغي وار بونلاردان گؤتورور. تئلئويزييوندا گؤرمويوبسن، گئجه-گوندوز تبليغات اولونور؟”
قيرخ مين تومن بير بالاجا قولچاغا حتّی او زاماندا چوخ عاغيلا‌سیغيشماز بير پول ايدي. آمما روستم آغا هئچ بير چنه وورمادان او پولو وئردي. بيلميردي نييه اوندان خوشو گليب. دوکانچي قولچاغي قوتوسونا قويوب کادولاماق ايسته‌دی.
“ايسته مز، لوطفا “ دئيه‌رک روستم آغا قولچاغي آليب ماغازادان چيخدي. قولچاق قوتونون تلقي آرخاسيندان روستم آغايا گولومسه ييب گؤز ووردو.
“بو نامومکوندي ! او فقط بير عروسکدي!” دئييب اونو قولتوغونا ووروب دوراغا دوغرو يوللاندي.
دوراقدا صفه بنزر بير قالاباليق واردي. او دا گليب بو قالاباليغا قاريشدي. چوخ چکمه‌دی، اوچ روبدان سونرا توستو داغيرجاغي يئتيشدي. بير باسا- باس اولدو ماشينا دوغرو، آمما هامي دوردوغو يئرينده برک داياندي. سوروجو حضرتلري قاپيلاري باغلاييب ياخينداکي قهوخانايا يوللاندي. بير- ايکي نفر دئيينن اولدو، آنجاق، دالدان هورومک ايدي هاميسي. چونکي سوروجو حضرتلري گلنده قاپييا ياخين اولانلاردان چوخلوسو اونونلا ائله کئف ـ احوال ائله‌دیلر سانکي اونلارا پول- مول وئره‌جکدي.
“بيليتلري گتيرين” قاپيدا حسن پاشا کيمي دايانيب امير وئرن سوروجو بويوردو.
“برو ، گم شو مرديكه!” بيري او آرادان سسلندي. قورباغا گؤلونه داش آتديلار سانکي بير آن. اورتاليقدا يئددي- سککيز ياشيندا بير اوغلان اوشاغي واردي. هامي اونا باخدي. او يازيق دا هئچ ندن خبري اولماياراق او سسين داليجا روستم آغاني گزديردي، چونکي اونا ياخين دورموشدو.
آوتوبوس انگ- بنگ دولموشدو. يورغون ايشچيلر باشلاريني جاملارا داياييب مورگوله‌دیلر. آياق اوستده کي‌لر ده هره بير يئره ال آتيب آسيلديلار. مورگوله‌ينلري ده واردي. يول ياريسيندا سوروجو ياتانلار داماغيني پوزماق اوچون ايتي بير بوروق وئردي. آياق اوستده دوران بير قوجا کيشي اؤزونو ساخلايا بيلمه ييب روستم آغايا دوغرو ييخيلدي.
“پير خرفتِ پدر سوخته” دئين بير سس هاميني اؤزونه چکدي. بو سس روستم آغايا ياراشماسايدي دا هامي اونا ساري باخدي. او بير آز قيزاردي. “بو نامومکوندي! او فقط بير عروسکدي!” دئدي دوداقلاري آراسيندا روستم آغا.
ائوينه ياخين بير دوراقدا روستم آغا آوتوبوسدان ائنيب آيلاردان بري سوپورگه اوزو گؤرمه ميش کوچه‌يه گيردي.
“ايندي سني آپاريب سارايا نيشان وئررم. يوخ، يوخ. صاباح اونا سورپريز اولاراق کادو وئره‌رم. بلکه آللاه بير گون منه دوغرو بير دارا وئردي. دارا … سارا … نه گؤزل اولار! هه؟سن نه دئييرسن؟ … سن … آمما بو کي بير عروسکدي!”
يول اوسته دايانيب قولچاغا بير موشتري گؤزو ايله باخدي. او گولومسه‌ييردي. روستم آغا چوخدان اونونلا دردلشمه‌یه باشلاميشدي. درين بير آه چکدي. هاوا کسيردي. يئنه گؤزلري‌نین اؤنونو دومان بورودو. دارانين اليندن ياپيشيب اوشاق باخچاسينا آپاريردي. اونون دوغرو تربيت ائتمه فيکري روستم آغاني بوغموشدو. يولدا اونا باشارديغي شعرلردن اوخويوردو:
“من سطل آشغال هستم، توي کلاس نشستم … عمو زنجيرباف! بعلي؟ زنجير منو بااافتي؟ . . . ”
کوچه دن کئچن قونشولار سالام وئرمک ايسته‌دیلر اونا، آمما “يازيق هئچ اؤزونده دئييل” دئييب يان کئچديلر.
روستم آغا سورپريزي ساخلاماق اوچون قولچاغي قاپيدان گيررکن پيلله‌لرين آلتيندا خيريم- خيردانين ايچينه قويدو. روستم آغا هميشه سسسيز گيرردي ائوه، سارا دا چوخ واخت‌دیکسينردي، آمما اري‌نین اوزونه بئله گلمزدي. يئرينه روستم بيي سالام وئرمکده قاباقلاياردي گولر اوزو ايله. بو دؤنه ده روستم آغا ايلان کيمي ائوه سوزدو. سارا آشمانخانادا ايشلرکن گؤزل سسي ايله اوخويوردو:
“…گئدين دئيين خان چوبانا
گلمه‌سین بو ايل موغانا
گلسه باتار ناحاق قانا
آپاردي سئللر ساراني
بير آلا گؤزلو بالاني …”
“او ندي اوخويورسان؟” ساراني ‌دیکسينديردي، “قديم اوخوماقلار! هئچ آرواد دا اوخويار؟ اوخويورسان باري تزه بير شئي اوخو …”
“واي…سالام، سنمي سن؟ يورولماياسان! . . . هئچ نه … داريخميشديم، اؤز- اؤزومه ميزيلدانيرديم اؤز ماهنيلاريميزدان. رحمتليک آنام ياديما دوشموشدو …”
“دئييرم نه ياخشي اولاردي بيزيم ده بير اوغلوموز اولاردي. آديني دارا قويارديم …”
“دارا؟!”
“هه! نييدي کي؟ داشي وار، قومو؟”
“سن ايسته‌سن هئچ نه. آمما دارا ايله سارا هئچ واخت بير يئره ييغيشماز، قازاندا قاينادسان بئله …”
“نييه؟ دارا، سارا. ايکيسي ده بير وزنيده. قافيه‌سی ده بيردي. … بير ده تاريخي – مئلليده …”
“هانسي تاريخ؟ هانسي ميللت؟ . . . دوننجن ايسلامدان قاباغي قبول ائتمه‌ييب پيسله‌ييرديز، بو گون ايسلامي اؤتوروب کؤهنه اؤلولردن ياپيشيبسيز. بير عدّه خالقي چاپماق اوچون هر دونا گيرير. بس‌سیزلره کي بير قيرانليق خئيري يوخدور نييه؟ … دوغرودورسا اؤزلري آپاريب او گؤيچک قولچاقلاري موفته‌سینه پايلاسينلار اؤز اوشاقلارينا …”
“دي ياخشي، فلسفه توخوما گؤرک. ” هميشه بو سؤز ايله “نئيله ييم، نئجه ائله‌ييم؟” چالاردي روستم آغا.
ساراني ايلک کره اونيوئرسيته ده کيتابخانادان چيخارکن گؤردويونو خاطيرلادي. او گوندن بري هر گون روستم آغا ساراني گؤرمک اوچون کيتابخانايا گئديب اورالاردا وورنوخاردي، سارا ماسانين اوستونه اوچولوب کيتاب اوخويارکن. سارا کيتابخانادان چيخارکن قاچيب اؤزونو کيتاب فيشلريني آختاران کيمي گؤسترمه‌یه چاليشاردي، سارا دا اونون ايشلريني گؤروب آلتدان-آلتدان گولومسونردي. او هميشه دوشونردي:
“گؤره‌سن هانسي يازيغين بالاسي يازيق بو مايماغين قيسمتي اولاجاق. ”
“واختيميزي او خارابادا الواطليغا گئچيرتديک. يا بازاري گزديک يا خالقي پارکلاردا گوددوک. ايمتاحان گئجه‌سی ده بير جوزوه اوخويوب نومره آلا بيلمه‌ينده ده اوستادلارا يالوارديق. هئچ اولماسين ايکي- اوچ دنه کيتاب- ميتاب اوخوسايديق، اسکيک گتيرمزديک بونون قاباغيندا. بو دا کي آللاه گؤرستمه‌سین! کيتاب اولوب بونون آتا-آناسي، هئچ اليندن دوشمور … آمما اؤز آراميزدي، ائله اونا گؤره ده سؤزلري بئيينه باتاندي … يوخ! کيشييه ده کيشي دئييبلر … آرواد قاباغيندا ‌سینماق بيزه ياراشماز! . . . ” دئيه‌رک باشيني آشاغي ساليب پنجره‌یه دوغرو يوللاندي.
“سن اؤلسن! دارام اولسا قويمارام منيم کيمي اولا. هئچ واخت…” قولاغيندا قاهقا گولوش سسلري جينگيلده‌دی. اؤيرنجي اولدوغو گونلريني آنيلادي. يولداشلاري اونا “لهجه رو باش …” دئيه‌رک لاغا قويوب آرديجا جوک دئييرديلر. او قيپ- قيرميزي قيزارميشدي. هر يئريندن تر آخيردي. بارماغييلا جامدا بير گيرده اوز چکيردي. او دا ترله‌مکده ايدي. دووارين اوستونده اوتوران بير پيشيک اونون گؤزلريني گؤررکن قونشو داما آتيليب اوزاقلاشدي. ايلديريم شاخدي. دئييرلر ايلديريم قيشين قورتولماسي دئمکدير. آمما هاوادا زهر قوخوردو سانکي. روستم آغانين باشي فيرلاندي، اوتاغي ترسينه چئويرديلر بيردن، آياق اوسته دورا بيلمه‌دی. تاپپيلتي سسينه سارا اؤزونو قيرقي کيمي يئتيردي. اوستالانميشدي بو ايشده. روستم آغانين آياقلاريني قالديريب آلتينا ايکي- اوچ باليش قويدو، آلنينا بير آز سرين سو داميزدي. روستم آغا گؤزلريني آچماق ايسترکن سارانين گؤزوندن بير اينجي دوشوب اري‌نین آلنينداکي شور سولارا قاريشدي.
“اولسون داريخما دئديم، آديني دارا قوياريق، سن هر نه ايسته‌سن … آنجاق سن اوره‌ييني ‌سیخما عزيزيم …” دئدي سارا، گؤزل سسي تيتريه‌رک.
هر اوتاقدا بير گاز سوباسي اولدوغونا باخماياراق يئنه ده سويوق ايدي بو ائو. سارا اريني راحاتلادي. ائو-ائشيگي، قاپي- باجاني ساهمانلاييب ياتاغينا گيردي. شيمشکلرين ايشيغي، سسي ياتماغا آمان وئرميردي. بير ده نه ايسه “آپاردي سئللر ساراني” مئلوديسي بئينينه دوشموشدو، اوشونوردو بير آز. اري ده هميشه اولدوغو کيمي يوخودا دئيينيب قايناشيردي. آمما بو گئجه داها چوخالميشدي او ايشلري. آغزيندان کؤپوک آخيردي، اليني ساليب ياخاسيني‌ دیديردي، گاهدان تپه‌سینه دؤيوب باغيريردي. سارا ياواشجا قاپيني آچيب حَيَطه چيخدي. ياغيشدان خبر يوخ ايدي، بولوتلار دا گئتديکجه چکيليردي. بئينينه بير فيکير وورموشدو. بولقون آلتيندا بير آز اودون ييغيب ساخلاميشدي. اودونلاري توپارلاييب حَيَطين اورتاسيندا آغاجلاردان اوزاق يئرده بير تونقال قوردو.
“صاباح قايين- قودامي قوناق چاغيررام شاما، آخشام دا بونلاري يانديريب شنليک ائدريک، بلکه بو کيشي‌نین يورغونلوغو چيخسين” دئدي اؤز- اؤزونه. حَيَطه چيخاندا چيراق يانديرماميشدي” قوي ياتسين، يازيقدي “ دئيه ارينه.
اوتاقدا گؤز گؤزو گؤرموردو قاييدارکن. ياتاغينا گيررکن بير سس گلدي:
“پدر سوخته” .
“دانيشيقلاريميزين سونوجودور!” دئييب آلا گؤزلري گيزلتدي اوخ کيپريکلر آلتيندا، بير آز اؤزونو توپلاياندان سونرا.
صاباح تئزدن قالخميشدي روستم آغا. ياتاقدان دوروب اوز- اليني يويوب قاييداندا نه گؤردو! گؤردو سارا ساري بولبول قيزيل گوللر آراسيندا! ايستي قاني هله ده آخيردي. سارادان بير آز او يانا بير يئکه بيچاق، بير آز او يانا دارا اوزانميشدي يئرده، اوزونده کي او هميشه کي گولوشو ايله.
“هئئئئئه، هئه … هئه … هئه …!”
“بو نامومکوندي! او فقط بير عروسکدي!” دئيه‌رک داراني گؤتوردو يئردن روستم آغا. حَيَطه دوغرو گئتدي. قاپيدان چيخارکن حَيَطين اورتاسيندا قورولموش تونقالا گؤزو ساتاشدي. ائوه دؤندو. آشمانخانادان بير کيبريت گؤتوردو، بير آز دا کاغيذ- ماغيز. حَيَطه دؤندو. بتر يئل اسيردي. او کيبريت چکدي، يئل سؤندوردو. او کيبريت چکدي يئل سؤندوردو. کيبريت توکندي. بير ده ائوه گئتمه لي ايدي. دارايا باخدي. کرديني قازيب اونو يئرده قويلادي،
“هله بوردا دور، ايشيم وار سنله. سنين گولوشلرين شئيطاني دا يولدان چيخاردار. ”
آشمانخانادان فنديي گؤتوروب قاييتدي. قاپيدان حَيَطه چيخارکن داراني اوزو-گؤزو پالچيقلي گؤروب‌دیکسيندي. وار گوجو ايله باغيردي، آمما هئچ سسي چيخمادي. اييليب اونو گؤتوردو. تونقالا چاتماميش بولقونا دوغرو دؤندو. بولقون آلتيندا بير چللک نفت واريدي. نفتين چوخونو اودونلارين اوستونه تؤکدو.
“بو قارا او قارالارا بنزه‌مز. بو سنين فاتحه‌ني اوخويار!” دئدي دارايا. فنديي يانديريب تونقالا توتدو. اود آلاولانيب قيرميزي، نارينجي، ساري بويالارلا آليشدي. قاپ- قارا توستو گؤيه قالخدي. اوجا بير باغيرتي سسي چيخدي. گئتديکجه باغيرتي قاهقاه گولوشلره اوخشادي.
“چوخ شوکور! دئيه سن روستم آغا دا بايرام توتوب شنليک ائده‌جک بو ايل!” دئديلر ائشيدن قونشولار. آمما سسلر چوخ قاريشدي گئتديکجه. قونشولار سسه گلديلر. اودون آلاولاري گؤيه قالخميشدي روستم آغا ايلان کيمي قيوريليب آچيلارکن آلاولار ايچينده. قونشولار اونون آنجاق سون قيوريلماسيني گؤردولر. باشقا بير ايش گؤرمه‌یه ماجال قالماميشدي. اودون يانيندا دارا قونشولارا گولومسه‌ييردي هميشه کي گولوشو ايله.
فئورال\02\2005- خوي.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *