گولرکن بئله
زکیه ذلفقاری
بیز دؤرد قادینیق. بیر یئره ییغیشاندا ائلهیه بیلهریک گولک، غملی اولساق دا بئله. روژو اوزه یاخان پودورلاریمیزی بیر بیریمیزه تعاروف ائدهریک؛ الدن اله دولانان گوزگوده اؤزوموزه باخاریق. سؤزلریمیز اوشاقلاریمیزدان باشلار و کیشیلریمیزده بیتر.
بونا گؤره سسیمیز اوولده یوماشاق و اینجه اولار و سونرا یاواش – یاواش گوبودلاشار. بیز چوخ لذتله خیانتلریمیزدن دانیشاریق. ایندی آرتیق بیربیریمیزی یاخشی تانیریق و بیلریک هانکیمیز نئجه خیانت ائلیریک.
بیزدن بیری همشه معدهمیزی بولاندیرار. او عصبلشنده اغزینین سویولا ارینه کباب پیشیرر. او ایگرنجی حیکایهلر بیزه تعریف ائدهر. اوزوموزو بیر یئره ییغیب، قولاقلاریمیزی توتوب یالواراریق بوندان آرتیق دئمهسین دا…بیزیم ظنیمیزجه او گئری قالمیش قادیندی، چونکی اینتقاما فقط بیر یول باشاریر.
بیزدن بیری کیشیسین چاپار؛ آشکاردا، گیزلینده، یوخودا، آییقلیقدا، ائوده، بازاردا. او همشه سو، برق فاکتورون کیشینی قیرخماغا گؤره ساختالادار. همشه آل – وئردهدی. گئرچکدن حوققهبازین بیریدی.
من حیاتیملا باشقا معامله ائلهمیشم. ایللردیر کی اریم، ائوده اولان موبیلیا و یا دوواردان آسیلی اولان پینجدی و یا ماسا اوسته اولان بشقاب. احساسیمی اوندان آلمیشام؛ او دا هردن بیر شکله دوشور، ایللا ائوده اولمالی کیشیدن باشقا.
فقط بیر نفر وار هله اؤز خیانتیندن بیر سؤز دئمهییب. هامیمیز اونا باخیریق. قراریمیز او دئییلدی کی بیزدن بیری خیانت سیررین آچیقلامایا. ائحتمال وئریریک کی اونون خیانتی یئنی بیر شئیدی. چون قوناقلیغین اوولیندن اوزوندهکی بویاسیز گولوشون قورویوب. صندللریمیزی اونا یاخینلاشدیریریق؛ گؤزلریمیز مراکدان ایشیلداییر.
بیر آز سکوتدان سونرا کی هامینی بئزدیردی، گؤزلرین یوموب و زحمتله دئییر:
– من ده… من ده خیانت ائلهمیشم.
راحاتلیقلا نفس آلیریق و بیریمیز دئییر:
– آفرین…داوام ائت.
– اونا یوخ، اؤزومه!
– حیاتیمین بوتون ایللرینده اؤزوم دئیهن کیمی یاشامامیشام.
– اورهگین نه ایستیردی میه؟
– بیلمیرم…ایندی دا آرتیق بونو دا بیلمیرم.
هامیمیز ساکیتیک. بیریمیز سورخابین کیفیندن چیخاردیر و هامییا تعاروف ائدیر. هامیمیز گؤزگویه باخمادان، یاناق و دوداقلاریمیزی بویویوب و ائولریمیزه قاییدیریق…
ایضاح: بو حئکایه فریبا خانیم وفینین «حتی وقتی که میخندیم» کیتابیندا اولان بیر حئکایهنین ترجمهسیدیر.
