یای گئجه‌لری‌نین بیری ایدی. آی چیخمامیشدی. گؤیده ده اولدوز یوخ ایدی. هاوا قارانلیقایدی. گئجه یاریسی ایدی، بؤجوک‌لرین جورولتوسوندن باشقا بیر سس یوخ ایدی. قارا بیر پیشیک، باشینی آشاغی سالاراق ایی چکه- چکه اهمالجا دیوارین او باشیندان گلیردی. آغ بیر پیشیک ده باشینی آشاغی سالاراق ایی چکرکن ساللانا- ساللانا دیوارین بو باشیندان گلیردی.
پیشیک‌لر گلدیلر، گلدیلر… دوز دیوارین اورتاسیندا، اونلارین کلّه‌لری بیر- بیرینه توققوشدو. پافیلدییاراق، هر ایکیسی ده جلد دالی چکیلرکن، گؤت‌لری اوسته اوتوراراق گؤزلرینی بیر- بیرلرینه زیللهدیلر. ایکی قاریشدان چوخ آرالاری یوخ ایدی. ایکی‌سی‌نین ده اوره‌یی گوپ- گوپ ووروردو. بیر نئچه آن بئله‌جه اوتوردولار. سونرا بیر- بیرلرینه باخاراق میریلدادیلار. نهایت قارا پیشیک ایره‌لی سوروندو. آغ پیشیک یئرینده ترپه‌شرک دئدی:
– مییاووو!.. ایره‌لی گلمه!..
قارا پیشیک اونو سایمادی. یئنه ده قاباغا سوروندو. پیشیک‌لر ایکیسیده میرتلانیردیلار. بیر قاریش قده‌ر آرالاری واریدی. قارا پیشیک یئنه‌ده ایره‌لی سوروندو. آغ پیشیک معطل ائتمه‌دن تئز جایناغینی اوزاداراق قارا پیشییین قولاغینی پارچالایاراق چیغیر- باغیر سالدی:
– مییاووو!…پیف‌ف!… آخماق دئمه‌دیم ایره‌لی گلمه.
قارا پیشیک ده مووولدایاراق چیغیردی:
– پاف‌ف!..
آنجاق او اؤز رقیبینی یارالایا بیلمه‌دییینه گؤره یامان حیرصلندی. بیر آز دالی چکیلیب آیاق اوسته دوروب دئدی:
– مییاوو!.. چکیل اویانا، قوی گئدیم. یول وئرمه‌سن پیسلییین مندن گؤرمه! قارا پیشیک قاققا چکیب گولدو. سیبیل‌لرینی یالارکن دئدی:
– قریبه گولمه‌لی دانیشیرسان. اؤزون چکیل اویانا قوی من گئدیم. یول وئرمک یاخشی‌دیرسا بس نه اوچون سن منه یول وئرمیرسن، گئده‌ک دیوارین او باشینا. قارا پیشیک دئدی:
– دئدیم کی، سن یول وئر من کئچیم، سونرادا سن اؤزون بیلیرسن نه جور اوره‌یین ایسترسه ائله کئچ گئت.
آغ پیشیک اوجادان گوله‌رک دئدی:
-اگر سؤزومه باخماسان, بیر تیکه ائله‌ییب اودارام سنی.
قارا پیشیک عصبی‌لشه‌رک, بیردن چیغیردی:
– مییاووو!.. دئدیم قاییت گئت داما, قوی من گئدیم سیچانین بیری سیچان!..
بو سؤز آغ پیشییین غئیرتینه توخوندوغونا گؤره, او گولوشونو کسدی. اونون سسی تیتره‌دی. دریندن بیر باغیرتی چکدی:
– مییاووو!.. دئدین سیچان آخماق!.. پیف‌ف!.. توت گؤروم!.. پیف‌ف!.. او بیر داها جایناغینی قارا پیشییه توللادی. قارا پیشیک بو دؤنه اونون جایناغی‌نین ضربه‌سیندن قاچاراق, جایناغی ایله ووروب آغ پیشییین بورنونو پارچالادی. آغ پیشییین بورنوندان قان شیریلدادی. ایندی داها آغ پیشییی ساخلاماق چتین ایدی. او بئلینی دونبالداراق بوتون توک‌لری بیز- بیز دوردو. ائله های- کوی سالدی کی, بؤجک‌لر جورولتولرینی کسه‌رک اونون های- کویونه قولاق آسدیلار. آچماق‌دا اولان بیر قیزیل گول ایسه یاریمچیق قالدی. گؤیده بؤیوک بیر اولدوز آخیب دوشدو.
قارا پیشیک حیرصلی- حیرصلی دئدی:
– مییاووو!.. ائشیتمه‌دین‌می دئدیم قاییت گئری‌یه قوی گئدیم؟ سیچانین بیری سیچان!.. ایندی قارا پیشییین گولمک نؤوبه‌سی ایدی. او گوله‌رک دئدی:
– بیرینجی بو کی, سیچان قارا اولماز، بلکه چوخو آغ اولار. ائله اونا گوره ده سیچان سن اوزون‌سن. ایکینجی‌سی ده بو کی, چوخ های- کوی سالارسان، آداملار یوخودان اویانارلار، چکیب هر ایکیمیزی ده کؤتک‌لرلر. منیم کی, های- کویدن قورخوم یوخدور؛ گئری ده قاییداسی دئییلم. او قده‌ر بورادا اوتوراجاغام کی, بلکه حؤوصله‌نی الدن وئریب قاییدیب گئده‌سن ایشیوین- گوجووون دالیجا.
آغ پیشیک بیر آز ساکیت‌له‌شرک دئدی:
-من حؤوصله‌دن چیخاسی دئییلم. بیر گون گؤره‌یدین کی, ناهار واختی من کلّه‌چی‌نین آشپازخاناسیندا بیر سیچان یوواسی‌نین قارشی‌سیندا نه جور کیپریک وورمادان اوچ ساعات بیر دیلیمه دایانمیشدیم.
قارا پیشیک داها دینمیردی، ساکیت‌جه‌سینه گؤتو اوسته اوتورموشدو. آغ پیشیک‌ده اونا تای دینمزدن گؤتو اوسته اوتورموشدو. بیر اوشاغین آغلاماسی‌نین سسی گلدی. سونرادا اونون سسی کسیلدی. بؤجک‌لر یئنه ده جورولده‌دیلر. آچیلماقدا اولان قیزیل گول آچیلماسینا داوام ائده‌رک خیشیلدادی. ایکی دقیقه‌یه قده‌ر پیشیک‌لر گؤزلرین بیر- بیرینه زیللهدیلر. هئچ بیری اوزدن گئتمه‌دی. آنجاق گؤرونوردو کی, صبیرلری توکنمکده‌دیر. هر بیری ایسته‌ییردی کی، او بیری‌سی سؤزه باشلاسین.
بیردن- بیره آغ پیشیک دیللندی:
-من بیر چیخیش یولو تاپمیشام.
قارا پیشیک سوروشدو:
-دیء گؤره‌ک نه‌دیر؟
آغ پیشیک دئدی:
-منیم واجیب ایشیم وار، اؤزو ده چوخ واجیب‌دیر؛ گل سن قاییت گئت دیوارین آخیرینا، من کئچیم گئدیم سونرادا سن گئت.
قارا پیشییی گولمک توتاراق دئدی:
-ائه، غریبه یول تاپدین، منیم ایشیم سنین‌کیندن ده واجیب‌دیر. بئله یاریم ثانیه ده یوبانا بیلمه‌رم.
آغ پیشیک ملول‌جاسینا دئدی:
-سن یئنه ده سازیوی باشقا جوره کؤکله‌دین. دئدیم کی, منیم واجیب ایشیم وار، گل سن قبول ائت، چکیل اویانا قوی من گئدیم.
قارا پیشیک سسینی اوجالتدی:
– ایه، سن نچی‌سن منیم اوچون امر بویوراسان؟.. دانیشیغینی آنلا!..
آغ پیشیک میریلدایاراق آیاغا قالخیب چیغیردی:
– من نه دانیشدیغیمی یاخشی باشا دوشورم، آنجاق سن عنادکار پیشیک‌سن، من حسن کلله‌چی ائوینه گئتمه‌لی‌یم. اورادان کلله‌پاچا اییی آلمیشام. ایندی آنلادین‌می ایشیم نه قده‌ر واجیب‌دیر؟
قارا پیشیک میریلدایاراق دئدی:
– مییاووو… سن ائله بیلیرسن کی، من بو دیوارلارین باشیندا ائله بئله‌سینه بوش- بئکار دولانیرام. من ده اویانلاردا قورماسبزی قوخوسو آلمیشام، یاماندا آجام. بیر داها یولومدا دایانماق ایسته‌سن ائله وورارام کی، دیواردان دوشرسن، بئینین پارتلار.
آغ پیشیک اؤزونو ساخلایا بیلمه‌ییب دریندن چیغیردی:
– مییاووو… آخماق دئدیم چکیل اویانا… پیف‌ف‌ا.. توت !.. گلدی و بیردن- بیره، جایناق‌لاری ایله قارا پیشییین توک‌لرینی قارماقلادی.
پیشییین توک‌لری بوتون هاوایا داغیلدی. هر ایکیسیده پیف- پیف ائده‌رک بیر- بیرلرینه یامان- یوووز یاغدیردیلار.
پیشیک‌لر ائلهجهده دالاشماغا مشغول ایدیلر، بیردن کیمسه اونلارین اوستونه سویوق سو سپدی. پیشیک‌لر ال- آیاق‌لارینی ایتیره‌رکن جلد قاییدیب قاچدیلار.
اونلارین ایکیسی ده گلدیک‌لری یول ایله قاچارکن قاییدیب دال‌لارینا دا باخمادیلار.
