اوخوماق زامانی: 7 دقیقه

اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
چئویرن: ایشیق
ترجمه: ایشیق
ایشیق
00:00
00:00

بو یازی‌نین سس فایلی هله حاضیرلانماییبدیر. بو یازی‌نی اؤز سسینیزله اوخویوب بیزه گؤندره بیلرسینیز.

reza kazemi
آغ پاپاق، قارا پاپاق
رضا کاظمی

 کاناپه اوستونده شئللنمیش، تلویزیون کانال‌لارینی دالبادال دَییشیردیم. ائلمیرا یویولموش پالتارلاری ائیواندان ییغیب گتیردیییندن سونرا، ائله او جور، بیر قوجاق رنگ به رنگ لیباسلا قاباغیمدا دایانیب دئدی: ـ «گینه او کیشی اوردادی!»
نه‌یه باخدیغیم یادیمدا دئییل. دئدیم: ـ «مریضدی دا!»
قاباغیمدان چکیلمه‌دی. کنترولو قیچی‌نین بؤیروندن تلویزیونا ساری توتوب تزه‌دن کانالی دَییشدیم. کیمسه قاوال چالیردی. بیر نئچه ثانیه قولاق آسدیم. دئدیم: ـ «من نه ایش گؤروم ایندی؟»
دئدی: ـ «من ده ائله اوندان قورخورام… اولمایا مریضدن زادداندی؟»
دئدیم: ـ «بیزه نه؟! آدام‌لاری گؤتورسون آپارسین دَلی‌خانایا!»
قاباغیمدان چَکیلجه‌یین، یئنیدن کانالی دَییشدیم. ائلمیرا او بیری اوتاغین قاپیسی آغزیندا، دئیینه- دئیینه دئدی: ـ «گینه کنترولو آلدی الینه دای!»
جورابیمین بیر تایی دوشموشدو دهلیزین اورتاسینا. کانال‌لارین بیرینده قارا پاپاقلی بیر کیشی موغامات اوخویوردو. تلویزیونون خودونو آخیرا کیمی آلیب، اوجا سسله دئدیم: ـ «پالتارلاری سالا- سالا گئدیرسن ها!»
اوندان های چیخمادی. میز اوستونده‌کی چاییمدان بیر قورتوم ایچیب، استیکانی قویدوم نعلبکی‌نین ایچینه. چاییم سویموشدو. کیشی آغزی آچیق قالدیغی حالدا، الینی پاپاغینا آپاریب اونو باشیندا یئر به یئر ائله‌دی.
یئریمدن دوروب جورابی گؤتوردوم. یاتاق اوتاغینا کئچیب تختین اوستونده اَیله‌شدیم. ائلمیرا باشینی قووزاییب هئچ منه باخمادی. دئدیم: ـ «بس منه نییه قاش قاباق ساللاییب‌سان؟!»
منیم پالتارلاریملا اؤز پالتارلارینی بیر بیریندن آییریردی. دئدی: ـ «آدام ائله بیلیر دونوخوب ائوین ایچینه!»
دئدیم: ـ «دَلی شئیطان دئییر دور گئت شالوارینی چیخارت!»
دئدی: ـ «سن نییه هامینی یامانلاییرسان؟»
دئدیم: ـ «ائلنچی آدامی گره‌ک ائوینی‌نین ائیوانیندان آسلایاسان… »
دئدی: ـ «اؤزو ده دالبادال سیقار چکیر.»
جورابی آتدیم او بیری پالتارلارین یانینا. اؤز- اؤزومه فیکیرلَشدیم: او صاباحدان گونده اوردا اَیله‌شیب سیقار چکسه، حتمن گئدیب پولیسه زادا شیکایت ائله‌رم. شیکایت ائله‌یه- ائله‌یه، قوناق اوتاغی‌نین پنجره‌سینه ساری گئدیب، بورنومو یاپیشدیردیم شیشه‌یه. قونشو آپارتمانین بئشینجی مرتبه‌سینده، دوز بیزیم ائوله قارشی، او یئنه صندلی‌یه اوخشار بیر شئیین اوستونده اَیلشمیشدی. گؤزومو قییسام دا، اونون اوزونو یاخشی گؤره بیلمه‌دیم. آنجاق منه ائله گلدی کی، او بوتون اوردا اَیلشدییی زامان‌لاردا، یالنیز، قاباغینا، هانسی‌سا خیالدان اولان بیر نؤقطه‌یه دونوخاراق، گؤت- گؤته سیقار آلیشدیریر.
شیشه دالیندان چکیلیب کاناپه‌ده اَیله‌شدیم. کنترولو گؤتوروب یئنه کانالی دَییشمک ایسته‌دیم. بایاقدان بَری سسسیزجه اوخویان آغ پاپاقلی کیشی الینی قولاغینا قویوب گؤزلرینی یومموشدو. قاباق دیش‌لری‌نین هامیسی قاییرما قیزیلدان ایدی.
ائلمیرا رنگ‌روفو آغ آپباق، گلیب کاناپه‌ده اَیله‌شدی. الینده‌کی درگینی آچیب، قیچی‌نین اوستونه قویدو. درگی هفته ایچی باش وئرن حادیثه‌لردن، جینایت‌لردن (و منجه بوش بوش شئی‌لردن) یازاردی. دئدی: ـ «بونون سسینی نییه کَسیب‌سن؟!»
جاواب وئرمه‌دیم. بیر آن تلویزیونون ایچینی سویلا دولو گؤردوم؛ پاپاقلی کیشی ده باشینی اونون ایچینه سالیب موغامات اوخویوردو. ماهنی‌نین کلمه‌لری مینجیق‌لارین ایچینده یاواش- یاواش اوسته گلیردی‌…
ائلمیرا‌یا باخدیم. آچدیغی صفحه‌نین هانسی‌سا کلمه‌سینه دونوخوب قالمیشدی. تلویزیونو کئچیردیب کنترولو بیر قیراغا توللادیم.
او گوندن بَری، او، ائیوانداکی کیشینی دئییرم، بیزه مسئله اولدو. صوبح‌لر من ایشه گئتمه‌میشدن قاباق، شیشه‌دن ائشییه باخاندا اونو اوردا گؤروردوم. کیشی هر گون ائرته‌دن مجسمه کیمی ائیواندا اَیله‌شیردی. ائلمیرایا دئدیم من اولمادیغیم زامان‌لار، تک باشینا پالتار سَرمه‌یه زادا ائیوانا چیخماسین. ایشدن قاییتدیغیمدا، صوبحدن پالتار یویان ایچینده قالمیش لیباس‌لاری گؤتوروب، ائیوانین ایپینه سَره- سَره، اوزاقدان اوزاغا گؤز اوجو اونا باخیردیم. هاراسا باخدیغینی باشا دوشمک اولموردو. بیر سئری تَر کؤینه‌ییمی ایپدن گؤتوروب اونو باشیمین اوستونده تَرپه‌ده-‌ تَرپه‌ده، کیشیدن بیر اؤزونه گتیرمک، حتتا بالاجا بیر ترپه‌نیش گؤزله‌دیم. او ائله‌بیل هئچ بیر یئری گؤرموردو.
گئجه‌لر یاتاندا، نئچه یول دوروب پنجره‌دن اونلارین ائیوانینا باخیردیم. همیشه اونون کؤلگه‌سی گؤرسه‌نیردی. هر دن ده اوتاق چیراغی‌نین سؤنوک اولدوغوندا، اونون اوردا اولوب اولماماسینی سئزه بیلمیردیم. قارانلیق بیر قارالتی گؤروب ائلمیرانی سَسله‌ییردیم. اوچ سئری اونو یوخودان اویاتمیشام، ـ «گَل باخ گؤر اونو گؤره بیلیرسن…» و او یوخولو- یوخولو، ائله یاتاق پالتارییلا گلیب پنجره‌نین قیراغیندا دایانمیشدی.
ـ «هه، ائله بیل اوردادی،‌… یوخ، قوی گؤروم‌…»
او، قارالتی‌یا چئوریلن زامان، یوخو باشیمدان قاچیردی. تختین اوستونده، بو بؤیوردن او بؤیوره اولوردوم. یوخویا قاپیلماغیم گئجه یاریسینا کیمی چکیردی. بیر دفعه گؤزوم زورلا قیزیشمیشدی کی، ائلمیرا دیرسه‌ییله منی دیکسیندیردی.
ـ «نه اولوب؟»
ـ «ائودن سیقار اییسی گلیر… سن سیقار چکیب‌سن؟!»
یئریمده‌جه اَیله‌شیب اونا باخدیم. ـ «قاریشدیریب‌سان ها؟!»
ائلمیرا یان‌یؤره‌سینی اییله‌مه‌یه باشلادی. دئدیم: ـ «هلبت او گئده‌نین فیکری‌نن یاتیب‌سان… یوخووا گیرمه‌میشدی؟ هه؟!»
آرخاسی اوسته اوزاندیغی حالدا، الینی قویدو آلنینا. ـ «یوخ… یعنی هئچ زاد یادیما گلمیر.»
آدام هر دن اویاندیغیندان سونرا دا، یوخودا گؤردویو بعضی شئی‌لرین تاثیری آلتیندا قالیر. بونو نم هانسی کیتابدا اوخوموشام. بیر ده ائلمیرا‌یا دئدیم: ـ «مثلن یوخودان دورورسان، گؤرورسن بالیق اییسی بورنوندا وورنوخور… او اییی، بلکه ده یوخودا الینه آلدیغین بیر بالیغین اییسی‌دیر.»
ائلمیرا دالینی چئویردی منه، ـ «نه بیلیم، بلکه ده یوخو گؤرموشم.»
ائرته‌سی گون، ائلمیرا ساعاتی قوردوغومدان بیر نئچه دقیقه تئز منی سیلکه‌له‌یه- سیلکه‌له‌یه اویاتدی. ـ «تئز اول دور!… تئز اول یوخسا گئده‌ر ها…»
یوخو هاواسی سوروشدوم: ـ «کیم گئده‌ر؟»
ـ «بایاق اونون تراسیندا جاوان آروادگؤردوم… گلدی کیشی‌نین قاباغینا بوشقاب قویدو. هله ده اوردا… دایانیب آشاغی‌یا باخیر.»
یورغانی بیر قیراغا آتیب گؤزلریمی اوواراق، پنجره‌یه ساری گئتدیم. روزنامه‌نین دَلیییندن اونا باخدیغیمدا، او تک‌تنها اؤز یئرینده اَیله‌شمیشدی. دئدیم: ـ «یانیندا هئچ کس یوخدور.»
ـ «هلبت قاییدیب اوتاغا.»
ائلمیرایا طرف دؤندوم. گؤزلری‌نین آلتی شیشمیشدی. ناماز چادیراسینی چیینینه آتیب قاباغیمدا دایانمیشدی. من بیر سؤز دئمه‌دن تختین اوستونه قاییتماق ایسته‌دیم. او دا دالیما دوشدو. ـ «وآللاه گؤردوم. اؤزو ده لئچکلی آرواد ایدی. الینی تراسین سَکی‌سینه قویوب آشاغی‌یا دا باخدی… کیشی‌نین بؤیرونده بوشقابی گؤرمه‌دین؟»
هئچ زاد دئمه‌دیم. یانینداکی بوشقابا سیقار کؤتویو بوشالدیردی. تیک تاک سسی قولاغیما دوشدو. قوردوغوم ساعاتا بیر شئی قالمیردی. ائلمیرا دئدی: ـ «هلبت قیزیندان زاددان‌دیر…»
ساعات زنگ چالماغا باشلادی. یورغان آلتینا سوزولوب اونو باشیمین اوستونه چکدیم. یورغانین او اوزونده ساعات اؤز- اؤزونه چالیردی. ائلمیرا دا هلبت قاییدیب روزنامه دَلیییندن اونلارین ائیوانینا باخیردی. حتمن آروادی گودوردو؛ اونو گؤرجک قیشقیراجاقدی دا. دئیه‌جکدی گؤردون من دوز دئییردیم. ائلمیرا دئدییی دوز اولسا، آرواد آیدا هفته‌ده بیر سئری دده‌سینه باش چکیب، اونو حاماما آپاریر، پالتارلارینی ماشینا آتیر، ائوی سیل‌سوپور ائله‌ییر. یورغانی اوستومدن چَکدیم. ائلمیرا بایاقدان بری قاپی آغزیندا دایانیب تعججوب‌له منه باخیردی. ساعاتین سسینی کَسدیم. دئدیم: ـ «بونا فیکیرلشیردیم کی… حتمن آروادی یوخدو، یوخسا قیزی نه اوچون گلیب اونلاردا ایشله‌‌مه‌لی‌دی؟»
ائلمیرا تخته ساری گلیب یورغانی صافالتماغا باشلادی. ـ «سیقار چکمه‌ییندن بَللی‌دیر… آروادی حتمن یورغان دؤشه‌یه ده دوشموش، قاباقکی ائولرینده. اؤلمه‌میشدن قاباغی دئییرم. اوندان اؤترو دا ائوی ساتیب گلیب بورا. نم هاردا اوخوموشام، بئله کیشی‌لر بیر عؤمور آروادلاری‌نان بیر یئرده یاشادیق‌لاری یئرده قالا بیلمزلر.»، بیر آز دایاندی، ـ «گؤر نه قده‌ر آروادینی سئویرمیش دا!»
دئدیم: ـ «بونلارین هامیسی سنین ناغیلین‌دی. هاردان بللی، بلکه آروادی اونو بوراخیب آیری بیر یئره گئدیب.»
ائلمیرا بیر سؤز دئیه‌نمه‌دی، آنجاق اونون فیکیرلَشدییینی یاخشی بیلیردیم. ال اوزومه سو جالاماغا گئتدیم دستشویی‌یه.
اونا گؤره مین جوره ناغیل سؤیله‌مک اولاردی، بیری بیریندن ماراقلی. آینادا اؤزومه باخدیم. مطبخدن ایستیکان نعلبکی سسی گلیردی. اوجا سسله دئدیم: ـ «قشنگ فیکیرلش… بیری‌نین آروادی اؤلسه بو گونه دوشمز، آمما آروادی اونو قویوب آیری بیر یئره گئتسه کیشی پیس گونه قالار. ائله اونون کیمی.»
شیرین چایین آخیر قورتومونو باشیما چَکنده، ائلمیرا هله چای چؤره‌یه اَل وورمامیشدی. قارشیمدا اوتوروب منه باخسایدی دا، سانکی هئچ منی گؤرموردو. اؤزویله دانیشان کیمی دئدی: ـ «ائله اوندان قورخورام… پیس گونه قالمیش اولسا، بایقوش- بایقوش بیزیم ائویمیزین ایچینه دونوخماسی چوخ دا یاخشی دئییل، یوخ؟!»
او گون ائلمیرانین چایی سویدو. بونو، قاپیدان چیخیب ـ بیر آزدان ـ بیر ده ائوه قاییدیغیمدا بیلدیم. چایینی ایچمه‌دن، میز اوستونده‌کی پنیر چؤره‌یی ییغمیشدی. دئدیم:ـ «آشاغی طبقه‌نین آروادلاری پیچیلداشیردیلار. دئییرم، اولمایا اونلار دا اونا گؤره دانیشیرلار… »
من دئدیییم دوز ایدی. ائلمیرا گئجه چاغی تاوانا دونوخدوغوم زامان, دئدی: ـ «آپارتمانین آروادلاری اونون جیکینی ده بیلیرلر، بؤکونو ده.»
یورغانین آلتیندا قیمیلداندیم؛ و اوندان سونرا بیر نئچه مدت ایشیمیز اولدو آروادلارین سؤزلرینی بیر- بیری‌نین یانینا قویماق. هره‌سی بیر ناغیل دئییردی، بیر- بیرییله اوخومایان آیری- آیری سؤزلر. ائلمیرا دئدی: ـ «بیری دئییر  دول بیر آرواد گونده اوچ ساعات اونلارا گئدیب، اونون ائو ایش‌لرینی ساهمانا سالیرمیش…»، چیراغی یاندیریب گؤزلریمه باخدی، ـ «گؤردون او گون‌لری یوخو زاد گؤرمه‌میشدیم؟»
من تاواندا، دول آروادین قاش گؤزونه فیکیرلَشیردیم. ـ «بَس او آرواد نئجه اولور؟»
ـ «یازیق آرواد ائوین بوجاق‌لاریندان، او یانیندان بو یانیندان سیقار کؤتویو ییغماقدان بئزمیشمیش… سونرا دا چوخ چکمیر؛ کیشی پولو قویور میزین اوستونه، آروادا دئییر داها گلمه‌سین. قونشولاردان بیری آند ایچیردی اؤز قولاغی‌نان ائشیدیب آرواد دئییرمیش ایندی اونون ائوی‌نین دؤشه‌نه‌یی دوپ- ‌دولودور سیقار کؤتوک‌لری‌نن.»
سیقار کؤتوک‌لری‌یله آروادین قاش‌لارینی قارالدیب یاتدیم.
ایکی اوچ گون کئچمه‌میش، ائلمیرا دئدی قونشولاردان بیری اوردان بوردان سوراغلاشاندان سونرا, اونون سون‌سوز اولدوغونو دئییر. اؤزو ده، ائلمیرانین قولاغینا پیچیلداییب کی، اونون یامان پولو زادی وار. او گئجه، ائوی‌نین یئر دؤشه‌نه‌یی، مُبل‌لاری و یئمک میزی‌نین اوستونده‌کی بوتون سیقار کؤتوک‌لرینی شاخ مین‌لیک‌لرله دَییشدیک. دئدیم: ـ «ایندی, او, کابینتی آچیب بوشقابدان زاددان گؤتورَنده، هئچ اولماسا سیقار کؤتویو عوضینه اونلارین ایچینده خیردا پول گؤره‌جک!»
ائلمیرا آجیقلاندی. ـ «اوشاق اولمایان یئرده، او بئله پولون نه فایداسی وار؟!»
ـ «ایسته‌دییی قدَر سیقار آلیب چکه بیلر!»
او گئجه اسکیناس‌لاری‌نین آراسینا توتون تَنبه‌کی دولدوروب سیقار دوزه‌لده- دوزه‌لده, یوخوموز آپاردی. صوبحه یاخین ائلمیرا یوخودا آغلادی. اونو یوخودان اویادیب نه گؤردویوندن سوروشدوم. مَلفه‌نین قیراغی‌یلا گؤز یاش‌لارینی سیلیب دئدی: ـ «اونون اوزونو لاپ یاخیندان گؤردوم… لومبه‌له‌لوت اونون قاباغیندا دایاندیم، گؤزلری‌نین ایچینه باخدیم. بیلیرسن، گؤزلری‌نین ایچی آغ آپباق‌ ایدی… خال بویدا دا قاراسی یوخ ایدی»، تاوانا باخدی، گؤزلرینی قییدی، ـ «سیقار چکمه‌یی ده بیر تَهر ایدی. آدام دئییر هلبت دونیا اونا قورتاریب.»
او گون ایشه گئتمه‌دیم. دئدیم: ـ «او بئله سیقار چکن آدام مریضدی، روحو مریضدی… بیلمیرم وآللاه، حتمن ده گونده بیر اوووج قورص آتیر. هئچ بیلیرسن قورص‌لاری‌نین بیری یادیندان چیخسا، الینه ایش وئره‌ بیلر ده؟… »
یئریمدن دوروب دستشویی‌یه گئتدیم. ال اوزومو یویاندا، گؤزوم آیناداکی اؤزومه دوشدو. گؤزلریمین ایچی آغ آپباق ایدی. اوردا من کور اولموشدوم. آینایا سو جالاییب، ال اوزومو قورولایا- قورولایا میز باشینا گئتدیم. میز اورتاسینداکی بوشقاب ایری نارین قورص‌لارلا دولویدو. اوجادان چیغیردیم: ـ «بونلار آدامی کئییدیب هئیدن سالار…»
ائلمیرا تئز آتیلدی سؤزومون اورتاسینا. ـ  «بس گؤرمورسن او صوبحدن آخشاما ترپنمه‌دن صندلی اوستونده اَیله‌شیر!»
داها بیر سؤز دئمه‌دیم. بوتون او گئجه‌لرده، تلویزیونون خودونو آخیرا کیمی آلیب، ائلمیرانین ناغیل‌لارینا قولاق آسیردیم. حتتا ناغیل‌لاری اؤزوندن چیخاردیر دئیه اونا شوبهه‌لَندیم ده. بیر سئری ـ سس‌سیز بیر ناغارا چالماق اورتاسیندا ـ دئدیم: ـ «هئچ بیلیرسن آروادلارین سؤزونو تعریفله‌ینده، مین بیر گئجه شهرزادینا اوخشاییرسان؟»
گؤزلری پاریلدادی، آنجاق چییین‌لرینی آتیب دئدی: ـ «من ائشیتدیک‌لریمی دئییرم، فقط بو!»
ائلمیرانین ائشیتدیک‌لری قورتاران دئییلدی. دانیشا- دانیشا, یورولمادان قیچی‌نین اوستونه قویدوغو درگینی واراقلاییردی. دئدیم: ـ «نه اولاردی اونون اؤلوم خبرینی بو درگیدن اوخویاسان؟»
ائلمیرا بیر منه باخدی، بیر ده درگی‌ ایچینده‌کی شکیل‌لره.
درگی‌یه ائله بئله‌سینه اؤلن آدام‌لارین خبرینی وورمازلار. بو جور نشریه‌لرده خبر بیر آز هیجانلی اولمالی. مثلن اونون یئرله گؤی آراسیندا ال آیاق چالماغی‌نین شکیلینی اوز قابیغینا یئرلَشدیره‌رلر.
ائلمیرا دئدی: ـ «اونا داوا آتیب یوخودا اؤلمک آرتیقراق یاراشار… سن اوندان چوخ پیس عوض چیخیرسان!»
دئدیم: ـ «نه‌یین عوضینی؟!»
ـ «صوبحدن آخشاما اوردا اَیله‌شیب بیزه باخماغی‌نین عوضینی. هر نَدی، او، ایندی من‌نن بو آپارتمانین بوتون آروادلاری‌نین جیکینی ده بیلیر، بؤکونو ده.»
سونرا یوخودا یئرییَن آدام‌لار کیمی پنجره قاباغینا گئدیب روزنامه دَلیییندن قارشی آپارتمانا باخدی. من کیشینی یامانلایا- یامانلایا, روزنامه‌لرین هامیسینی جیریب شیشه‌دن قوپارتدیم. گئجه‌نین زیل قارانلیغیندا هئچ زاد گؤرسَنمیردی.
ائلمیرا صوبحه کیمی درگیده‌کی ناغیل‌لاری اوخودو. من کاناپه‌نین اوستونده یاتدیم. تلویزیونداکی آدام‌لار سس‌سیز سمیرسیز گئجه‌نی باشا ووردولار. گون چیخاندا، ایکیمیز ده چییین چییینه پنجره قاباغینا آددیم آتدیق. آسفالت اوستونده، دوز اونون ائیوانی‌‌نین آلتیندا محو بیر کروکی گؤردوک. ائیوانا کئچیب دیققت‌له یئره باخدیق. دئدیم: ـ «اوشاق نقاشی‌لرینه اوخشامیر؟»
دئدی: ـ «دومبه‌‌له‌دوز اوشاقلیغیمدا چَکدیک‌لریمه بَنزه‌ییر.»
او گونون گئجه‌سی، یئددی‌یوز اللی دوققوز کانال دَییشدیم. ائلمیرا کاناپه اوستونده اوزانمیش، باش آغریسینا گؤره دالبادال استامینیفون قورصو آتدی. منه دئدی: ـ «تلویزیونون سسینی آل!»
کانال‌لاری دَییشه- دَییشه، اونا فیکیرلَشدیم. اوشاق اولسایدیم، هامیدان گیزلی آشاغی‌یا، او دوشدویو یئره گئدیب کروکی‌سینه، یوخ، ائلمیرا اوشاقلیغیندا چکدییی نقاشی‌یه قاش‌گؤز چَکردیم. اونا بیغ دا قویاردیم. قارا بیر پاپاق. دوداغی‌نین آراسینا سیقار. سون کانالدا نَم‌کیم آغ پاپاق باشیندایکن یئنه موغامات اوخویوردو. سسینی ائشیتمیردیم، آنجاق او سه‌گاه اوخویوردو. کنترولو میزین اوستونه قویوب دوردوم. ائلمیرا کاناپه اوستونده یاتمیشدی. بیر آز اونا باخدیم. نَم‌‌نییه, اؤز- اؤزومه ائلمیرا کیشی‌نین یوخوسونو گؤرور دئیه دوشوندوم. آیاق بارماغی اوسته ائیوانا گئتدیم. قارشی آپارتمانین بئشینجی طبقه‌سینده، بیر قارالتی قیمیلداندی. او گئجه ائلمیرادان گیزلین جیبیمه قویدوغوم بوتون سیقارلاریمی چکیب قورتاردیم.

اشتراک گذاری در print
چاپ

یک پاسخ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *