ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری

sarrafi_2
آذربایجان شیفاهی خلق ادبیاتیندا اوشاق فولکولورو
علیرضا صرافی

اوشاق فولكولورو مضمون باخيميندان اوشاقلارين ياش خوصوصيتلريني و پسيكولوژيسيني نظره آلماقلا يارانير.
اوشاق فولكولورونون يارانماسيندا هم اوشاقلار هم ده بؤيوكلرين رولو واردير. بؤيوكلر هميشه اوشاقلارين تربيه ائتمكله مشغول اوْلموشلار. اوشاق فولكولورو اونلارا ديل، سايي اؤيرتمكدن باشلاميش اخلاقي اويون و تربيه‌وي مسأله‌لره قدر موضوعلاريني احتيوا ائدير. عئيني حالدا، اوشاق فولكولورونون بير چوخ حيصه‌لري اويون و ايلنجه اوٍچوندور.
آشاغيدا اوشاق ادبياتي‌نين چئشيتلي نؤعلريني تانيتديرماق اوٍچون اوْنلاردان اؤرنكلر وئريله‌جكدير:

1-     كيچيك اوشاقلارا اوْخونان شعيرلر
بو شعيرلر چوخ كيچيك اوشاقلار اوچون اوخوناركن عئيني حالدا اوْنلارين ياشلاري ايله موناسيب بير نوع ساده اويونلارلا بيرليكده، هم ده اوشاقلارين پئسيكولوژيك ايستكلرينه اويغون اونلاري نوازيش ائتمه ايله‌ توامدير. مثلا:

  • لولو لولو حوْوضه
    اوشاغين اليني اللرينه آليب، آووجوندا بارماق ايله بير داييره چكيب،اوْخورلار:
    -لوٍلو،لوٍلو حوْوضه
    -دؤرت بير ياني سبزه
    (سونرا جيري بارماغي بوٍكرك) :
    -بير قوش گلدي سو ايچمگه،
    (ايكينجي بارماغي بوٍكرك ):
    -بو توتدو،
    (آرا بارماغي بوٍكرك):
    -بو پيشيردي،
    (دؤردونجو بارماغي بوٍكرك):
    -بو يئدي،
    (سونرا باش بارماغين باشينا چالاراق) دئيرلر:
    -بونا دئديلر: كوٍله قالاسان، بؤيومويه‌سن، كوٍله قالاسان، بؤيومويه‌سن.
  • بربرينجي
    بير اوشاغين بارماقلارين ساياراق بئله اوخويارلار.
    ايگنه – ايگنه،
    اوجو دويمه
    بربرينجي،
    شام آغاجي
    شاطير كئچي،
    قوز آغاجي
    قوتور كئچي
    هاپپان،
    هوپپان
    ياريل،
    ييرتيل
    سو ايچ،
    قورتول
  • سينيق قول
    بير اوشاغين اليندن توتوب  اهمالجا قاوزاييب، ائنيديرر و بو شعرلري اوْخويارلار:
    سينيق قول ها سينيق قول
    سويا گئدر سينيق قول
    سودان گلير سينيق قول
    بير تيكه چؤرك گؤرنده
    (قولونو داهادا قاوزاياراق):
    دوٍم – دوز دورار سينيق قول
    دوٍم – دوز دورار سينيق قول
  • ككليگيمين باشي ساري
    نئچه اوشاق دوْوره اوْتوروب، بير خيرداجا اوشاغي دا آرالاريندا اوْتوردوب، باشلارينا  بير چادرا يادا ملافه چكرلر. سونرا  اللريني خيرداجا اوشاغين باشينا چكرك‌،بو شعيرلري اوْخورلار:
    ككليگيمين
    باشي ساري،
    (ساچلاريني تومارلاياراق):
    ساچي ساري،
    (ياناقلاريني اوْخشاياراق):
    ديمديگي ساري،
  • (قوللاريني)،
  • قاناتي ساري،
    (و نهايت آياقلارينا ال چكرك):
  • آياغي ساري،
    سوْنرا دا بيردن اللرينين آرخاسيله  ملافه‌‌ني يئللنديريب، اوْخورلار:
  • ككليگيم ققوو،ققوو،ققوو
  • ككليگيم ققوو،ققوو،ققوو
  • مرزي هابالا مرزي
    بير اوشاغين باشيني ديزلرينين اوستونه قويوب، كوٍرگينه ووراراق دئيرلر:
    مرزي هابالا مرزي
    گئتديم گؤردوم :
    دره‌ده بير آت اؤلوبدور
    آشي گيريب قاشينا،
    قارقالار ييغيليب، باشينا
    قارقاسان،سرچه؟
    (اوشاق قارقا دئسه اوْنو سانكي قارقالار ديمديكله‌ييرميش كيمي قار-قار دئيه‌رك قيرتارلار،)
    (اوشاق سرچه دئسه اونو  جوك-جوك دئيه‌رك آزجا يوموشاق  چيمديكلرلر.)
  • يا موندادي ياموندا
    كيچيك بير شئيي آوجوندا گيزلدرلر تاپماسي اوچون يومولموش اللرين اوستونه بير-بير چاليب، اوخويارلار:
    ياموندادي،
    ياموندا.
    حالواچي
    توكانيندا.
    دده‌م
    دئدي :
    آچ
    بون
    دا.

2-     اوشاق ديلي
اوشاقلارا ديل اؤيرتمك اوٍچون ايلك اؤنجه اونلارا چوخ بسيط و ساده سؤزلر اؤيردرلر. بو سؤزلرين بير پاراسي عئينا طبيعتدن تقليد اولموشدور مثلا:ايته  هاف هاف،:اينگه ما تويوق- خوروزا قو قو
باشقا سؤزلرده عوموما آچيق بير هيجانين  ايكي دؤنه تكراريندان يارانان سؤزلردير.
جي جي  :  پالتار
په په  :  چؤرك
پوفي  :  ايستي يئمك
قاقا   : شوكولات، شيرني
جيززا  : چيراق
قوجي   :  قوجاق
جيز    : ايستي و يانديريجي وسيله
جو جو  : بؤجك
چپان چپان :ال چال،ال چالماق،چپيك چالماق
تاتان تاتان: آتديم آت

پا پا   : باشماق
اوپباداننا: آتيل،
اوپبالا:  يوخاري،گؤي
به به:    اوشاق
پيشي:   پيشيك
جينقيلي:  كيچيك،بالاجا
دادار:    آياق اوسته
دردر:    گزمك،ائودن ائشيگه گئتمك
دينقيلي:   كيچيك بالاجا
قاقا:    شيرني
لالا:     ياتاق،ياتماق
ما:      اينك،اؤكوز،گاميش
تتي پاپي  : آتديم، آتديم آت
گور –گور بابا: ايلديريم
همّ  ائله :  يه
چيم چيم : يويونماق، يويون
قو قو :تويوق،خوروز
دودومه :قويون، قوزو
به‌به‌يي : قويون،قوزو
دده، ننه، ممه‌ بابا و… اوشاقلارلا بؤيوكلرين آراسيندا اورتاق سؤزلرديرلر .

3-     سانامالار
بو شعرلر اوشاقلارا سايلاري اؤيرتمك اوٍچون يارانميشدير . آشاغيدا توركجه و فارسجا سايلاردان باشقا مكتب صينيفلري و ايماملارين آدينين ترتيبينه مخصوص ساناما نومونه‌لري وئريلير:

  • توركجه سايلار
    بير، ايكي
    بيزيمكي
    اوچ، دؤرد
    قاپيني اؤرت
    بئش، آلتي
    ساموار آلتي
    يئتدي، سكگيز
    فيرنگيز
    دوققوز، اون
    قيرميزي دون
    اون بير، اون ايكي
    ائرمني بؤركو .
  • فارسجا سايلار
    يك
    يئككه دانيشما
    دو
    دونبالاق آشما
    سه
    سفئه دانيشما
    چهار
    چادراوي آچما
    پنج
    پنجره‌دن قاچما
    شيش
    شيشمه سن آللاه
    هفت
    هفته بيجارسان
    هشت
    هشته بيجارسان
    نه
    نوغول ساتانسان
    ده
    دخيل ساتانسان
  • مكتب صينيف‌لرينين سيراسي
    اوّللر، تنبللر
    سوت وئرمه‌سن اؤلرلر
    دوّملاري دؤيرلر
    سوّملاري سئورلر
    چاهارملاري چالارلار
    پنجم‌لري پنجرلر
  • ششم‌لاري شيشرلر
    خانيم ساواشسا
    ايشـ …
  • ايماملارين آدي سيراسي
    بيلديگينيز كيمي ايران توٍركلرينين اكثريتي اوْن‌ايكي ايماملي شيعه موٍسلمانلاردير . اونا گؤره ده اوشاقلارا  كيچيك ياشلاريندان ايماملارين آدلاريني اؤيردرلر. آشاغيدا توفارقاندا  ثبت ائديلميش (آل خبر دئييم) آدلي قوشما دا همين مقصده اويغون يارانميش و خلق ايچينده ياييلميشدير:
    سحر سحر قوچ ايگيدلر عرب آتي مئيداندي
    محرابدا باشيندان تؤكولن قاندي
    اوّلينجي ايمامين آدي شاهي مرداندي.
    ايكينجي‌سين آل خبر دئييم.

 جنت قاپيسينا قدم باساندي،
بهشت باغلاريندا قنديل آساندي.
ايكينجي ايمامين آدي ايمام حسندي
اوٍچونجوسون آل خبر دئييم.

اوْخودوم قورآني آچيلدي ديليم.
كربلا چؤلونده تشنه حوسئينيم.
اوٍچونجو ايماميم آدي ايمام حوسئنيم.
دؤردونجوسون آل خبر دئييم.

باهار اوْلو داغلار گئير تزه دون،
دين ايچينده بسله‌ميشم تزه دين.
دؤردونجو ايماميم آدي زين العابدين.
بئشينجي‌سين آل خبر دئييم

بير يئره گئديرسن اوتور،دور آغير!
موشگولده قالاندا مولاني چاغير!
بئشينجي ايمام آدي محمد باغير
آلتينجي‌سين آل خبر دئييم.

دونيا مالين ييغديق، ييغديق بوداديق،
نولايدي اوستموزه گله‌يدي هاديق.
آلتينجي ايماميم آدي جعفر صاديق.
يئدينجي‌سين آل خبر دئييم.

آلاق دستامازي، قيلاق نامازين،
بير جان وئرين وئرك بونون نيازين.
يئدينجي ايماميم آدي موسايي كاظيم.
سگيزينجي‌سين آل خبر دئييم.

اونون آدي بنزر آيا، اوْلدوزا.
اونا هر نه وئرسن ريضادي ريضا
سگيزينجي ايماميم آدي ايمام ريضا
دوقّوزونجوسون آل خبر دئييم.

آغام علي كوثر اوسته ساغيدي،
او گزن يئر جنتين بير باغيدي.
دوقّوزونجو ايمامين آدي محمد تاغيدي.
اونونجوسون آل خبر دئييم.

آغام علي كوثر اوسته ساغيدي،
او گزن يئر جنتين بير باغيدي.
اونونجو ايمامين آدي علي النقي.
اون بيرينجي‌سين آل خبر دئييم.

باغيندا وار شيرين اوزوم عسگري،
باغ ديبيندن حزين-حزين سس گلي.
اون بيرينجي ايمامين آدي حسن عسگري.
اون‌ايكينجي‌سين آل خبر دئييم.
سحر اوْلوب داغلار باشي دوماندي
قيامتده،دينسيز گونو ياماندي.
اون‌ايكينجي ايمامين آدي ايمام زماندي.
مهدي صل الله عليه وآله

4-     ساتاشمالار
اوشاقلار آراسيندا ايلنجه‌لردن بيري ساتاشمالاردير.
ميثال:
– دئ آبي
– آبي
-گئت يالا قابي

– دي پاخيل
-پاخيل
-دووارا ياخيل

– دئ اذان
– اذان
-باشينا كئچسين قازان

-ديً پيالا
-پيالا
گئت حووضدان سو يالا.

– دي آينا
– آينا
-ميمون اوْل اوينا

– گئتديم باغا
– من ده من ده
– چيخديم بوداغا
– من ده من ده
– شافتالي ييغديم
– من ده من ده
– باغبان گلدي
– من ده من ده
– ايتي كوشكورتدو
– من ده من ده
– ايت منه هوردو
– من ده من ده

خديجه، بيتلي جوجه.
هاوا خالا،تنديري قالا،كسووو گؤتور،مني قووالا.
كاظيم، قولاغيوين ديبين قازيم.
مؤحسون،ننه‌ن اؤلسون
هاشيم  ساققاليوا ديرماشيم.
عاباس آدام ننه‌سين قاپباس قاپسا بير تيكه
چؤرك تاپباس.
غافار ايت كيمين قاپار
هومايون هاني به سنين تومانون؟
عئين اله،ائششگي ترسه چوللا.

رمضان، قبير قازان
ارسلان، اوشاقلارا يئر سالان
ناغي،ناغي، جوولاغي، گؤيده وورار
مايالاغي.
مشدي، دامدان ايشـ….
بير اوشاغين قولاغيندان توتوب ‎سوروشارلار:
-بو ندي؟
– قولاق.
– بونو بير بوراق .
دييه قولاغين بورارلار.
بير اوشاغين بورنوندان ياپيشيب سوروشارلار:
-بو ندي؟
– بورون.
– بونو بير بورون.
دييه بورنونو بورارلار.
بعضا ده بير نفرين جيدّي سؤزلرينين آراسيندا اوز وئرن قيسا مكثلرده آتماجا سؤز آتارلار:
از قضا رباني،
پيشيك يئدي مورباني
– البته،
-يئريوي ساليم دربتده.
-كيمدي؟
-كيليمچي.

-نئلييك؟
– ساققيز آلاق چئينييك ( …)ـه وئرمه‌يك.

 -نه منه؟
-ايينه‌ينن تپنه.
-نه‌منه؟
-ارين يوخدو گه‌منه

5-     ترسه ترجومه‌لر
پهلوي دوروندن باشلاياراق بوگونه قدر  ايراندا مكتبلرده بوتون درسلر فارسجا كئچير،عئيني حالدا ابتدايي درسليك كيتابلاري فارس اوشاقلاري اوٍچون تنظيم اوْلموشدور و تورك اوشاقلاري  هله بيلمه‌ديكلري بير ديلي اؤيرنمه‌دن يازيب،اوْخوماق و دانيشماق مجبوريتينده قالميشديلار.. بيله بير حالدا، اوْمونيم كلمه‌لر فارسجايا چئويريلنده  يانليش آنلاييشيندا ايشله‌نمه‌سي طبيعي حاديثه‌دير . آشاغيداكي ميثاللار همين زوراكي  تعليمات سيستمينه طعنه‌لي بير اعتيراض كيمي  يارانان ترسه ترجومه‌لر‌دير.

به من يك كوهِ رود بده!
( منه بير داغ چاي وئر!)

 توديوانه را پيشكش، انگورِ مرا چهل!
( صندليني قاباغا چك ،منيم اوٍزومو قيرخ!)

تا  كَسي اگر زمين داري، ايست  بهزارم! زمستانهايم درد ميكند.
(تاكسي يئرين وارسا، دور مينيم! قيشلاريم آغريير.)

رفتيم خانه عسل- نمكمان،كمي بگير-نگير خورديم!
( گئتديك بالدوزوم  گيله،بير آز توت ايله آلما يئديك)

6-     عربجه‌يه سؤز ياراشديرما
آذربايجاندا چوخ قديم زامانلاردان اوشاقلارا ان كيچيك ياشلاريندان قوران كريمين قرائتيني اؤيردرميشلر. مكتب خانا آخوندلاري بو ايش راحات اوْلسون دييه، بير پارا عربجه كلمه‌لرين قارشيسيندا تانيش تورك سؤزلريني ده قرينه اوْلاراق دئير و اوشاق بئله‌ليكله عربجه كلمه‌لري و عيباره‌لري داها تئزراق، داها راحاتراق اؤيرنرميش. هم ده درس موحيطيني صميميلشديريب،درسلرين قورو وآنلاشيلماز اوْلدوغوندان يورولوب،،قاچان اوشاقلاري مكتبه جلب ائدرميشلر. همين مئتود بير پارا عربجه دوعالار و ديني تكليفلرده ده ايشلنميشدير.  اونلاردان نومونه اوْلاراق:
ليُخرِجَ
يولوخ جوجه
في عَمَد ممَدَّده
هارا گئتسين بو شخته‌‌ده
لَيُنبَذَنَ
گلين بزه لـله
ولظالّين
منم ظاليم
سمع لله لِمن حمده
سني الله بونو وئر حميده
آللاهم اسئلك
ياغلي كوكه، يئ بير تيكه
آلّهم صلي‌سي،
كئچي‌نين سققلي‌سي

7-     قوش ديلي
اوشاقلار اؤز آرالاريندا بعضاً رمزي ديل ايله دانيشارلار. بودا اونون اوٍچوندور كي مثلاً بؤيوكلر اونلارين سؤزون باشا دوشمه‌سين، يادا بعضاً آرالاريندا اوْلان بير كيچيك اوشاق صؤحبتلردن باش آچماسينلار. اؤرنك اوْلاراق ” هارا گئديرسن ” سؤزو قارقا ديلي ايله اوْلور:
هاقا رقا گئگي‌ ديگير سَگن
و سيغيرچين ديلي ايله اوْلور:
هازا رازا  گئزي ديزير سزن
گؤروندوگو كيمي هر هيجادا سونرا Q و G يا Z ايله باشلايان آچيق بير هيجا علاوه اوْلور.
بعضا ده بير ثابيت هيجا بيرينجي هيجادان سوْنرا علاوه اولور،مثلا من گليرم  عوضينه دئييلير: منفير گلفيريرم.
گؤروندوگوكيمي بورادا (فير FIR )سؤزلرين بيرينجي هيجاسي ايله ايكينجي هيجاسي آراسينا كئچميشدير.
باشقا رمزي ديلده كلمه‌لرين ايلك هيجاسينين ايلك صامتيني، ايكينجي هيجانين ايلك صاميتي ايله دَييشمكله يارانير. اؤرنك اوٍچون:
كيتاب    تيكاب    تيكاب
دسمال  مسدال  مسدال
بعضاً جومله‌‌ده  كلمه‌‌‌لرين  صاميتلري بير-بيريله يئرلرين  دَييشيرلر. اؤرنك اوٍچون:
قاب – قاشيق               قاش – قابيق
توخو چيتداديم              چوخوم تيتداديم
كلمه لرين بو نوع دييشديريلمه‌سيندن بعضاً چوخ گولونج سؤزلر يارانير.اونلارا چاش باش  سؤزلر دئييلر .
چاش باش سؤزلرده بعضا ده كلمه‌لرين يئري دييشيك دوشور، مثلا فاعيل مفعولون يئرينه،مضاف،مضاف‌اليه.و …. يئرينه ايشله‌نير

8-     يانيلماجلار
يانيلماجلار اوشاقلارين ديللري داها دا آچيلسين دييه، اوشاقلار آراسيندا ياريش كيمي ايجرا اوْلونار. بعضاً بير قيسا عيبارتي اوچ يا بئش دفعه تيكرارلاماق تكليف اوْلور.
آتي مين – ايتي قوو
ايتي مين – آتي قوو

ال اوٍزوموزو يوواق اوٍزوموموزو ييه ك،
يا اوٍزوموموزو ييه ك ال اوٍزوموزو يوواق.

 قيرخ كوٍپ، قيرخ قيرپي قيريق كوٍپ.

 قلمه منه قلمه لنمه
من اؤزوم قلمه لننلردنم

گئتديم گؤردوم كورپو آلتيندا ايكي كوركو ييرتيق كيرپي وار
ائركك كوركو ييرتيق كيرپي ديشي كوركو ييرتيق
كيرپي‌نين كوركونو يامير
ديشي كوركو ييرتيق كيرپي ده ائركك كوركو ييرتيق
كيرپي‌نين كوركونو يامير

بو كاسا بيزيم اؤزوموزونموش.

آشباز عباس آش آسميش،
ياخشي آسميش، خوش آسميش

سريه سورونو سورويه-سورويه سالدي سرين سردابايا.

 گيرديم دَييرمانا،سيلديم سوٍپوردوم،سيلكينديم، چيخديم.

 بوگون چارشنبه آخشاميدي
چارشنبه آخشاملاشيرسان گل چارشنبه
آخشاملاشاق،
چارشنبه آخشاملاشميرسانسا، چارشنبه
آخشاملاشماياق.

“بازاردا نه اوجوز ؟
ميس اوجوز، دوز اوجوز، كوٍنجود اوجوز.

بو ميس نه پيس ميس ايميش،بو ميس كاشانميسي ايميش.

آشپاز آباس بوز باش آسار  اوباشدا،بو باشدا

 بوْز آتين بوْز تورباسيني بوْش آس باشيندان،
آپار  ايسلات گتير ياش آس باشيندان.

يورغانا يوغرول يورغون.

آغ بال قاباق بوْز بال قاباق،
بوز بال قاباق،آغ بال قاباق

جومه گونو  جومه مچيتده جووه‌لي جابارين جوبه‌سيني جوبوتدولر.
آي آخساق آشپاز حسن شاه آشپازلار آس پيشيريرلر سن ده گل آش پيشير آي خساق آشپاز حسن شاه.”

گئتديم گؤردوم شاه عاباسين باش آشبازي آشباز عاباس آش آساندا بوزباش آسمير، بوزباش آساندا آش .
دئديم:
اي شاه عاباسين باش آشبازي  آشباز عاباس نيه آش آساندا بوزباش آسميرسان،بوزباش آساندا آش؟
دئدي:
من شاه‌ عاباسين باش آشبازي آشباز عاباس آش آساندا بوزباش آسميرام، بوزباش،بوزباشنان آش يولا گئتمز.

9-     قوشماجالار
اوشاقلارين سؤز خزينه‌سي چوخالسين و ديللري داها دا آچيلسين دييه،كئچميش زامانلاردان بوگونه كيمي  چوخلو قوشماجالار يارانميشدير.
چوخ قديم چاغلاردان آغيزدان آغيزا، نسيلدن نسيله دولاناراق اليميزه چا تميش قوشماجالارين فورم باخيميندان اؤزونه مخصوص اؤزلليكلري وار:
قوشماجالار يئددي هيجالي شعرلردير كي اوندا قافيه‌لرين عومومي دوزولوشو بئله‌دير: (aa bb cc dd …)
اوندان علاوه ميصراعلار بير بير اوشاغين يادينا دوشسون دئيه هر بئيتين اولينده گلن كلمه‌لر اوندان قاباقكي ميصراعدا دا گلميشدير كي بو دا  شعرلرين يادا دوشمه‌سي و تداعي-معاني اولماسيندا اوشاغا يارديمچي اولور.مثلا آشاغيدا وئريلن مشهور «اوٍشودوم ها اوٍشودوم »قوشماجاسيندا آلتينا چيزگي چكيلن كلمه‌لر دئديگيميز كيمي تكرارلانميشدير:

اوشودوم ها اوشودوم
داغدان آلما داشيديم

آلماجيغيمي آلديلار
منه ظولوم قيلديلار

من ظولومدن بئزارام
درين قويو قازارام

درين قويو بئش گئچي
هاني بونون ائركجي

ائركج قازاندا قاينار
قنبر يانيندا اوينار

قنبر گئتدي اودونا
قارقي باتدي بودونا

قارقي دئييل قميشدي
بئش بارماغي گوموشدو

گوموشو وئرديم تاتا
تات منه داري وئردي
داريني سپديم قوشا
قوش منه قاناد وئردي
قانادلانديم اوچماغا
حق قاپيسين آچماغا

حق قاپيسي كليدلي
كليد دوه بوينوندا
دوه گيدان يولوندا..
باشقااؤرنكلر:

آ تشتي، تشتي، تئشتي
آ تشتي، تشتي، تئشتي
ووردو گيلاني كئچدي
ايكي خوروز ساواشدي
بيري قانا بولاشدي
قان آخدي چايا دوشدو
چايدان بيلديرچين اوچدو
بيلديرچين بيللي – بيللي
گل اوْخو بيزيم ديلي
بيزيم ديل اورمو ديلي
اورمو بوردان اوزاقدي
دريا اوندان قاباقدي

اورمودان آتلي گلر
آتليلار چاتلي گلر
آتلار يئير آرپاني
يئمزسه چيخار جاني
جان دئدي جانان گلدي
ياديما شامان گلدي
شامان آتالار سؤزو

هبسنه ها هبسنه
هبسنه ها هبسنه
هبسنه بير قوش ايدي
آغاجا قونموش ايدي
بَي اوغلو گوًرموش ايدي
اوخ ايله وورموش ايدي
من اوْخومدان بئزارام
كتان كوًينك يازارام
كتان كوًينك ميل-ميلي
گل اوْخو بيزيم ديلي
بيزيم ديل اورمو ديلي
اورمودان گلن آتلار
آغزيندا يوين تاتلار
تات منه داري وئردي
داريني سپديم قوشا
قوش منه قانات وئردي
قاناتلانديم اوچماغا
حق قاپيسين آچماغا
حق قاپيسي كيليدلي
كيليد بابام بئلينده
بابام شيروان يولوندا
شيروان يولو بوز توتوب
دوره‌سي يارپيز توتوب
او يارپيزي دررديم
ساچلاريمي بزرديم
خان داييمين تويوندا
اوينايارديم،سوزرديم.

ياغدي ياغيشلار،
بانلادي قوشلار،
حيوان گاميشلار.
آراندا قيشلار.

قوزولاريم گئدين
اوبا گئتدي قالمايين
هويه ويه هود گلدي
كؤرپه قاچين قورد گلدي.

ال – اله ها ال – اله
سو گلدي لوله-لوله.
سويون باشي بيزيمدي
چشمه داشي سيزيندي.
باجيم  گئديب، كهريزه
سودان گتيرسين بيزه.
سون زامانلاردا يارانان قوشماجالاردان دا اؤرنك اوْلاراق آشاغيداكيلاري گؤسترمك اوْلار:
مينديم فايتونا
آتلار ييخيلدي
مينديم داشقايا
تكري سيندي
مينديم ائششگه
ساغ قيچي سيندي
مينديم قاطيرا
سول قيچي سيندي
مينديم ماشينا
بنزين قورتولدو
گئتديم ناهارا
ناهار قورتولدو
گئتديم ائوميزه
دووار ييخيلدي
قالديم آلتيندا
ياخام قورتولدو

 تورشولو آش ايچمرم
دروازادان گئچمرم
دروازا منيم اوْلسون
قيرميزي دونوم اوْلسون.
گئييم،گئديم تهرانا
تهراندا تويوم اوْلسون
قيزلار گلسين تويوما
قوربان اوْلسون بويوما.

كئچل،كئچل باميه
گئتدي مريضخانه‌يه.
مريضخانا باغليدي
كئچلين باشي ياغليدي.
كئچل دئير واي باشيم
قازاندا قاينار آشيم.
آشيمي ايچن اوْلايدي
باشيما س….. اوْلايدي.

بالاجا چيراق دود ائيله‌دي
صدامي نابود ائيله‌دي

10- اوشاق اويونلاري ادبياتي
اوشاق اويونلارينين دا بير بعضا موعيّن  ادبيات (نظم) ايله ايجرا اوْلور مثلا:
آنا مني قوردا وئرمه
چادرامي سويا وئرمه

-گويده نه وار ؟
-گؤي مينجيغي.
-يئرده نه وار؟
-يئر مينجيغي .
بنؤوشه بنده دوشه
بيزدن سيزه كيم دوشه
…….دوشه

ال-اله، دويمه دله
من گئديرم بابام گيله.
بابام منه باشماق آليب،
بير تاي سنه، بير تاي منه.

اوستا دئدي
اوستا نه دئدي؟
اوستا بلخدن دئدي.
نرگيزه باخ نرگيزه
تختيوي گؤتور گل بيزه. !

آي هوستانا هوستانا
بيري دوشدو بوستانا
ووردولار قيچي سيندي
آپارديلار حكيمه
حكيم توتدو قيچيني

 آي هولا هولا هولا
بورجون اوجو قيرميزي
گؤتور بؤركووو  وور بيزي !

گيزلن پاچ
گلديم قاچ !

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *