جوما آخشامی، ۲۹ مرداد تاریخینده اوستاد «حبیب فرشباف»ین «قرهداغ کندلرینده» آدلی کیتابینین تقدیمات مراسیمی «دوکتور اسماعیل ملاعباسزاده»نین آپاریجیلیغی ایله تهران شهرینده کئچیریلدی.
اوستاد «حبیب فرشباف»ین قیرخینجی ایللرین اوللرینده قلمه آلدیغی شعرلری احاطه ائدهن «قرهداغ کندلرینده» کیتابی ایلک دفعه ۱۳۵۸-جی ایلده «میرعلی سیدسلامت»ین امهیی سایهسینده تبریزده نشر اولونموشدو. کیتاب بو دفعه «دوکتور محمدعلی آرامی»نین حمایهسی، «دوکتور مرتضی مجدفر»ین رئداکتورلوغو، «علی تقیزاده لاریجان»ین نشره حاضیرلاماسی و بعضی شعرلرین ترجومهسی ایله، «دوکتور ابراهیم اصلانی»نین رهبرلیک ائتدیگی «پیشگامان پژوهشمدار» انتشاراتیندا چاپدان چیخیبدیر.
اوستاد فرشبافین یوزدن آرتیق سئونلرینین، ائلهجه ده ادبی و مدنیت خادیملرین اشتراکی ایله کئچیریلن بو مراسیم ایکی ساعت داوام ائدیب، کیتابین حاضیرلانماسی و نشرینده اشتراک ائدن شخصلرین چیخیشلاری ایله دوام ائتمیشدیر.
مراسیمین ایلک دانیشانی کیتابین رئداکتورو «دوکتور مرتضی مجدفر» اولوب. او، چیخیشیندا اوستاد فرشبافین آذربایجانین قاراداغ کندلرینده معلملیک ائتدیی دؤوره، تورک دیللی شاگیردلره تطبیق ائتدیگی تدریس اصوللارینا، کند جمعیتی و بو بؤلگهنین اینسانلاری ایله موناسیبتلرینه اشاره ائتمکله، اونون یئرلی اهالی اوچون نفوذلو و چوخ حؤرمتلی بیر شخصیته چئوریلدیینی وورغولامیشدیر.
دوکتور مجدفر کیتابین رئداکتهسی زامانی، خصوصیله شعرلرین دوزگون اورفوقرافیاسینا دقت یئتیردیینی وورغولاییب. او، آذربایجان تورکجهسینین فونئتیک خصوصیتلری نظره آلینماقلا، تورکجه متنلرین واحید املا قایداسی ایله یازیلماسینین، او جوملهدن صائت و صامت اشارهلریندن دوزگون استفاده ائدیلمهسینین واجیبلیگینی قئید ائدیب و «قرهداغ کندلرینده» کیتابیندا بو مسئلهیه خصوصی حساسلیقلا یاناشماغا چالیشدیغینی دئییبدیر.
دوکتور مجدفر چیخیشینین سونوندا اوستاد «حبیب فرشباف»ین ضیالی و دهیرلی شخصیتینه حؤرمتینی ایفاده ائدهرک، اؤزونو اونون سئونلریندن و معنوی داوامچیلاریندان بیری کیمی تقدیم ائدیب. او دئییب:
«اوستاد «حبیب فرشباف»ین چوخسایلی سئونلری وار. اونون آدینی موناسیب بیر مجلیسده چکمک کیفایتدیر کی، نه قدهر بؤیوک رغبت قازاندیغینی درحال آنلایاسان. من ده اوستادین بعضی اثرلرینین رئداکتهسی و ترجومهسینی حیاتا کئچیرمک شرفینه نایل اولموش بیری کیمی، اونون سئونلری و معنوی داوامچیلاری سیراسیندایام.»
مراسیمین ایکینجی چیخیش ائدهنی کیتابین نشرینین حیاتا کئچیریلمهسینده دستک و سعیلری اؤنملی رول اوینایان «دوکتور محمدعلی آرامی» اولوب.
دوکتور آرامی چیخیشیندا کیتابین یئنیدن نشر اوچون سئچیلمهسینین سببلرینی و اونون یوکسک کئیفیتله چاپ ائدیلمهسینی ایضاح ائدیب. او، اوستاد فرشبافین شعرلرینی قیرخینجی ایللرده آذربایجان کندلرینین سوسیال حیاتینی بوتون چالارلاری ایله عکس ائتدیرهن بیر گوزگو آدلاندیریب. دوکتور آرامی بیلدیریب کی، بو کیتابداکی هر بیر شعر آلتمیش ایل اول آذربایجان کندلرینده مؤوجود اولان سوسیال قورولوشو، مدنی نومونهلری، خالقین اینانج و اعتقادلارینی درک ائتمک اوچون سندلی منبعدیر. او علاوه ائدیب کی، شاعرین خیدمت ائتدیی کندلرین سوسیال- مدنی سیماسینی فوتوشکیللرله قئیده آلماسی بو دهیری داها دا تاماملاییب.
دوکتور آرامی چیخیشینین داوامیندا اوستاد فرشبافین «قرهداغ کندلرینده» پوئماسینی اوخویاراق تحلیل ائدیب و بو اثری سوسیال و مدنی ایضاحین سندی کیمی سجییهلندیریب. او، پوئماداکی، یاخین زاماندا وفات ائتمیش شخصیتلردن بیرینه (سلیمان) توخوناراق، همین شخصیتی اینسانلیغین پارلاق نومونهسی و تجسسومو آدلاندیریبدیر. دوکتور آرامی چیخیشینین سونوندا دئییب: «من اوستاد «حبیب فرشباف»ین «قرهداغ کندلرینده» کیتابینین نشرینی، بوتون آذربایجانین کند و شهرلرینده یاشایان صاف و صمیمی اینسانلارا تقدیم ائدیرم.»
مراسیمین اوچونجو دانیشانی کیتابین نشره حاضیرلانماسی و بعضی شعرلرین ترجومهچیسی اولان جناب «علی تقیزاده لاریجان» ایدی. او، کیتابین ییغیلماسی، حاضیرلانماسی، شعرلرده آدی چکیلن شخصیتلر و مکان آدلاری ایله باغلی حاشیهلر یازیلماسی، ائلهجه ده بعضی شعرلرین فارس دیلینه ترجومهسی پروسئسیندن بحث ائدرکن، شعرین باشقا بیر دیله ترجومهسینین چتینلیکلریندن سؤز آچدی. او علاوه ائتدی کی، ترجومه اولونان بوتون شعرلر اؤلچولو و عروض وزنینده یئرینه یئتیریلیب؛ متنی، مضمونو و شعرلرین ادبی دهیرلرینی قوروماقلا یاناشی، منبع دیلیندن هدف دیلی اولان فارسجایا ترجومهنین مومکون قدهر امانتدارلیقلا و ان آز قصورلارلا کؤچورولمهسینه چالیشیبدیر. بوندان علاوه، تقیزاده اوستاد فرشبافین بیر داستانی اساسیندا سناریو یازیب و مساعد بیر شرایطده بو سئناریو اساسیندا «یک زمستان، یک روستا، یک انار» آدلی بیر فیلمین چکیلمهسیندن خبر وئردی.
تقیزاده چیخیشینین داوامیندا دئدی: «کاش من ده اوستاد فرشبافین شاگیردی اولماق شرفینه نایل اولایدیم. من ابتدایی صینیف شاگیردی اولدوغوم ایللرده اوستاد فرشباف بیزیم کندین قونشو کندلرینده درس دئییردی، اوشاقلیقدا اوستاد فرشبافین شاگیردی اولماق شرفینه نایل اولماسام دا، قوجا یاشیمدا اونون شعرلرینی ترجومه ائتمکله و اونونلا دوستلوق ائتمکله غرور دویورام. اوستاد فرشبافین بیز قاراداغ اهالیسینه اولان محبتی قارشیلیقلیدیر. قاراداغلیلار دا اونو بؤیوک بیر معلم، ضیالی بیر اینسان و اونودولماز دوست کیمی تانیییرلار.»
مراسیمین گئدیشینده فارسدیللی صنعتکار جناب «افشار» حافظین بیر غزلینی ایفا ائدیب؛ آردینجا ایسه آذربایجانین مشهور صنعتکاری «عاشیق محبوب خلیلی» بیر عاشیق ماهنیسی اوخویوب و تدبیر اشتراکچیلاری طرفیندن رغبتله قارشیلانیبدیر.
مراسیمین سونونجو چیخیش ائدهنی «پیشگامان پژوهشمدار» انتشاراتینین مدیری «دوکتور ابراهیم اصلانی» اولوب. او، کیتابین چاپ و نشر پروسئسیندن بحث ائدهرک، اوستاد فرشبافین اجتماعی و پئداقوژی فعالیتی حاقیندا فیکیرلرینی سؤیلهییبدیر. دوکتور اصلانی اوستادین اینسانی کئیفیتلرینه توخوناراق، فرشبافی حؤرمته لاییق، ضیالی و اینسانی ایدهآللارا صادق بیر شخصیت کیمی دهیرلندیریب.
دوکتور اصلانی وورغولاییب کی، اوستاد فرشباف سادهجه فداکار بیر معلم دئییل، او عؤمرونو اینسانلیغا حصر ائتمیش بیر شخصدیر. او، اجتماعی و مدنی حیاتی فوتوشکیللرله سندلشدیرمکله، چوخسایلی شعرلر و حئکایهلر یازماقلا بو اینسانی سیماسینی لاییقینجه یئرینه یئتیریب. دوکتور اصلانی چیخیشینین سونوندا «مولوی»نین «اینسان آرزولاییرام» ایفادهسینه استناد ائدهرک قئید ائدیب کی، اوستاد فرشباف محض «مولوی»نین آختاردیغی او اینسان نومونهسیدیر.
مراسیم اوستاد «حبیب فرشباف»ین چیخیشی ایله باشا چاتدی. او، چیخیشیندا کیتابین نشری و یاییمیندا امهیی اولان هر کسه تشککورونو بیلدیردی؛ حیات یولداشی و ائولادی ایله بیرلیکده قوناقلارا میننتدارلیق ائتدی. اوستاد فرشباف داها سونرا قاراداغدا معلملیک ائتدیی ایللر، کند جمعیتی و بو دیارین ساکینلری ایله قوردوغو علاقهلرین ماهیتی حاققیندا حاضیرلادیغی متنی اوخودو. او، همچنین معلمی «فریدون قاراچورلو»نون اونون اجتماعی و پئداقوژی شخصیتینین فورمالاشماسیندا، ائلهجه ده تدریس مئتودلارینین اینکیشافینداکی رولونو بؤیوک احتراملا خاطیرلادی.
مراسیم آخشام ساعت ۱۹:۰۰-دا یئکونلاشدی. داها سونرا گالینگور جیلدلی و یومشاق اوزلوکله نشر اولونان «قرهداغ کندلرینده» کیتابی ساتیشا چیخاریلدی و اوستاد فرشباف اوخوجولارین آلدیغی نوسخهلری خاطیره اولاراق ایمضالادی. (گزارشین سونو- ایشیق)
